3
2 / New Testament / Ephesians / 3 4

1 ወእንበይነዝ ፡ አነ ፡ ጳውሎስ ፡ ሙቁሑ ፡ ለክርስቶስ ፡ እንበይነ ፡ ዚአክሙ ፡ አሕዛብ ።

2 ሶበሰ ፡ ሰማዕክሙ ፡ ሀብተ ፡ ጸጋሁ ፡ ለእግዚአብሔር ፡ ዘወሀበኒ ፡ በእንቲአክሙ ።

3 እስመ ፡ ከሠተ ፡ ሊተ ፡ ምክሮ ፡ ወአርአየኒ ፡ በከመ ፡ ጸሐፍኩ ፡ ለክሙ ፡ ኅዳጠ ።

4 ዘትክሉ ፡ አእምሮ ፡ ሶበ ፡ ታነብቡ ፡ ወታአምሩ ፡ ሕሊናየ ፡ በምክሩ ፡ ለክርስቶስ ።

5 ዘኢያአምሮ ፡ ካልእ ፡ ትውልድ ፡ ለደቂቀ ፡ እጓለ ፡ እመሕያው ፡ ከመ ፡ ይእዜ ፡ ተከሥተ ፡ ለቅዱሳን ፡ ሐዋርያት ፡ ወነቢያቲሁ ፡ በመንፈስ ፡ ቅዱስ ።

6 ከመ ፡ ይረስዮሙ ፡ ለአሕዛብ ፡ መዋርስቲሁ ፡ ወሥጋሁ ። ወይኅበሩ ፡ ተስፋ ፡ በኢየሱስ ፡ ክርስቶስ ፡ በትምህርተ ፡ ወንጌል ።

7 ዘሎቱ ፡ ተሠየምኩ ፡ አነ ፡ ላእከ ፡ በከመ ፡ ሀብተ ፡ ጸጋሁ ፡ ዘወሀበኒ ፡ ሊተ ፡ በረድኤተ ፡ ኀይሉ ።

8 ሊተ ፡ ዘአነ ፡ እቴሐት ፡ እምኵሎሙ ፡ ቅዱሳን ፡ ወሀበኒ ፡ ዘንተ ፡ ጸጋሁ ፡ ከመ ፡ እምሀሮሙ ፡ ለአሕዛብ ፡ ብዕለ ፡ ክርስቶስ ፡ ዘአልቦ ፡ አሰር ።

9 ወአብርሀ ፡ ለኵሉ ፡ ምንት ፡ ውእቱ ፡ ሥርዐቱ ፡ ለዝንቱ ፡ ምክር ፡ ዘኅቡእ ፡ እምዓለም ፡ በኀበ ፡ እግዚአብሔር ፡ ዘኵበሎ ፡ ፈጠረ ።

10 ከመ ፡ ይእዜ ፡ ይትዐወቅ ፡ ለቀደምት ፡ ወለመኳንንት ፡ እለ ፡ በሰማያት ፡ በእንተ ፡ ቤተ ፡ ክርስቲያኑ ፡ ጥበቢሁ ፡ ለእግዚአብሔር ፡ እንተ ፡ ብዙኅ ፡ ሕበሪሃ ።

11 ዘሠርዐ ፡ እምቅድመ ፡ ዓለም ፡ ወፈጸመ ፡ በኢየሱስ ፡ ክርስቶስ ፡ እግዚእነ ።

12 ዘቦቱ ፡ ረከብነ ፡ ሞገሰ ፡ ወመርሐነ ፡ ውስተ ፡ ተስፋ ፡ በሃይማኖት ።

13 ወበእንተ ፡ ዝንቱ ፡ አስተበቍዐክሙ ፡ ከመ ፡ ኢትትቈጥዕዋ ፡ ለሕማምየ ፡ እንተ ፡ ትረክበኒ ፡ በእንቲአክሙ ፡ ለክብርክሙ ።

14 ወእንበይነ ፡ ዘንቱ ፡ እሰግድ ፡ ለአብ ፡ በበረከትየ ።

15 ዘኪያሁ ፡ ይጼውዑ ፡ ኵሉ ፡ በሐውርት ፡ ዘበሰማያት ፡ ወዘበምድር ።

16 ከመ ፡ የሀብክሙ ፡ በከመ ፡ ብዕለ ፡ ስብሐቲሁ ፡ ወያጽንዕክሙ ፡ በኀይለ ፡ መንፈስ ፡ ቅዱስ ።

17 እስመ ፡ እንተ ፡ ውስጡ ፡ ለሰብእ ፡ የኀድር ፡ ክርስቶስ ፡ በሃይማኖት ፡ ውስት ፡ ልብክሙ ፡ በተፋቅሮ ።

18 እንዘ ፡ ይከውን ፡ ጽኑዐ ፡ ሥርውክሙሂ ፡ ወመሠረትክሙሂ ።

19 ከመ ፡ ትክሀሉ ፡ ረኪበ ፡ ምስለ ፡ ኵሉ ፡ ቅዱሳን ፡ ምንትኑ ፡ ራሕቡ ፡ ወኑኁ ፡ ወላዕሉ ፡ ወዕመቁ ፡ ለጠይቆ ፡ ብዝኀ ፡ አእምሮ ፡ ፍቅሩ ፡ ለክርስቶስ ፡ ከመ ፡ ትስልጡ ፡ በኵሉ ፡ በፍጻሜ ፡ እግዚአብሔር ።

20 ዘይክል ፡ አጽንዖተክሙ ፡ ትግበሩ ፡ ኵሎ ፡ ወታፈድፍዱ ፡ ዘንስእል ፡ ወዘንሔሊ ፡ በከመ ፡ ይረደአነ ፡ ኀይሉ ።

21 ዘሎቱ ፡ ስብሐት ፡ በቤተ ፡ ክርስቲያን ፡ በኢየሱስ ፡ ክርስቶስ ፡ በኵሉ ፡ ትውልድ ፡ ወለዓለመ ፡ ዓለም ፡ አሜን ።