6
5 / New Testament / Ephesians / 6

1 ውሉድኒ ፡ ተአዘዙ ፡ ለአዝማዲክሙ ፡ በእግዚእነ ፡ እስመ ፡ ጽድቅ ፡ ውእቱ ፡ ዝንቱ ።

2 ወቀዳሚ ፡ ትእዛዝ ፡ በውስተ ፡ ሥርዓት ።

3 አክብር ፡ አባከ ፡ ወእመከ ። ከመ ፡ ሠናየ ፡ ይኩንከ ፡ ወይኑኅ ፡ መዋዕሊከ ፡ በዲበ ፡ ምድር ።

4 አበውኒ ፡ ኢታስተቍጥዑ ፡ ውሉደክሙ ፡ አላ ፡ ሐፅኑ ፡ ወገሥጹ ፡ በትምህርተ ፡ እግዚአበሔር ።

5 ነባሪኒ ፡ ተአዘዙ ፡ ለአጋእዝቲክሙ ፡ እለ ፡ ይኴንኑክሙ ፡ ሥጋክሙ ፡ በፍርሀት ፡ ወበረዓድ ፡ ወበልብ ፡ ስፉሕ ፡ ከመ ፡ ዘለክርስቶስ ።

6 ወአኮ ፡ ከመ ፡ ዘያደሉ ፡ ለዐይነ ፡ ሰብእ ፡ አላ ፡ ከመ ፡ አግብርተ ፡ ክርስቶስ ፡ እንዘ ፡ ትገብሩ ፡ ፈቃደ ፡ ለእግዚአብሔር ።

7 ወበኵሉ ፡ ነፍስክሙ ፡ ተቀነዩ ፡ ሎሙ ፡ በአፍቅሮ ፡ ከመ ፡ ዘለእግዚአብሔር ፡ ወአኮ ፡ ከመ ፡ ዘለሰብእ ።

8 እንዘ ፡ ታአምሩ ፡ ከመ ፡ ኵሉ ፡ ዘገብረ ፡ ሠናየ ፡ ይትዐሰይ ፡ በኀበ ፡ እግዚአብሔር ፡ እመኒ ፡ ነባሪ ፡ ወእመኒ ፡ አግዓዚ ።

9 ወአጋእዝትኒ ፡ ዕሩየ ፡ ግበሩ ፡ ሎሙ ፡ እንዘ ፡ ታቈርሩ ፡ መዓተክሙ ፡ ወተኀድጉ ፡ ሎሙ ፡ አበሳሆሙ ፡ ታአምሩ ፡ ከመ ፡ ብክሙ ፡ እግዚአ ፡ በሰማያት ፡ ዘኢያደሉ ፡ ለገጽ ።

10 እንከሰ ፡ ጽንዑ ፡ በእግዚአብሔር ፡ ወበጽንዐ ፡ ኀይሉ ።

11 ወልበሱ ፡ ወልታ ፡ እግዚአብሔር ፡ በዘትክሉ ፡ ተቃውሞቶ ፡ ለመናግንተ ፡ ሰይጣን ።

12 እስመ ፡ ቀትልክሙ ፡ ኢኮነ ፡ ምስለ ፡ ዘሥጋ ፡ ወደም ፡ ዘእንበለ ፡ ምስለ ፡ መኳንንተ ፡ ጽልመት ፡ ወአጋንንት ፡ እኩያን ፡ እለ ፡ መትሕተ ፡ ሰማይ ።

13 ወበእንተዝ ፡ ንሥኡ ፡ ወልታ ፡ እግዚአብሔር ፡ ከመ ፡ ትክሀሉ ፡ ተቃውሞታ ፡ ለዕለት ፡ እኪት ፡ ወከኁ ፡ ድልዋነ ፡ በኵሉ ፡ ከመ ፡ ትጽንዑ ።

14 ቁሙ ፡ እንከ ፡ ቀኒተክሙ ፡ ሐቌክሙ ፡ በጽድቅ ፡ ወልበሱ ፡ ልብሰ ፡ ኀጺን ፡ ዘጽድቅ ።

15 ተሥኢነክሙ ፡ ኀይለ ፡ ወንጌል ፡ ዘበሰላም ።

16 ወምስለዝ ፡ ኵሉ ፡ ንሥኡ ፡ ንዋየ ፡ ሐቅል ፡ ዘሃይማኖት ፡ በዘትክሉ ፡ አጥፍኦተ ፡ ኵሉ ፡ አሕጻሁ ፡ ለእኩይ ፡ ርሱን ።

17 ወንሥኡ ፡ ጌራ ፡ መድኀኒት ፡ ወሰይፈ ፡ ዘመንፈስ ፡ ቅዱስ ፡ ዘውእቱ ፡ ቃለ ፡ እግዚአብሔር ።

18 በኵሉ ፡ ጸሎት ፡ ወስእለት ፡ እንዘ ፡ ትጼልዩ ፡ በኵሉ ፡ ጊዜ ፡ በመንፈስ ፡ ወምስሌሁ ፡ ትግሁ ፡ ወተፀመዱ ፡ በኵሉ ፡ ጸሎት ፡ በእንተ ፡ ኵሎሙ ፡ ቅዱሳን ።

19 ወበእንቲአየ ፡ ከመ ፡ የሀበኒ ፡ ቃለ ፡ ወይክሥት ፡ አፉየ ፡ ከመ ፡ እንግር ፡ ገሃደ ፡ ሕርመተ ፡ ትምህርት ።

20 ዘበእንቲአሁ ፡ እተነብል ፡ ሙቁሕየ ፡ ከመ ፡ እንግር ፡ ገሃደ ፡ በእንቲአሁ ፡ በከመ ፡ ይደሉ ፡ እንግር ።

21 ወከመ ፡ ታእምሩ ፡ አንትሙሂ ፡ ዜናየ ፡ ዘከመ ፡ እገብር ፡ ኵሎ ፡ ያጤይቀክሙ ፡ ቲኪቆስ ፡ እኁነ ፡ ዘናፈቅር ፡ ላእኪ ፡ እግዚአብሔር ፡ ምእመን ።

22 ዘፈኖኩ ፡ ኀቤክሙ ፡ በእንተዝ ፡ ከመ ፡ ታእምሩ ፡ ዜናየ ፡ ወይተፈሣሕክሙ ፡ ልብክሙ ።

23 ሰላም ፡ ለአኀዊነ ፡ ወተፋቅሮ ፡ ምስለ ፡ ሃይማኖት ፡ እምኀበ ፡ እግዚአብሔር ፡ አቡነ ፡ ወእግዚእነ ፡ ኢየሱስ ፡ ክርስቶስ ።

24 ወጸጋሁ ፡ ምሰለ ፡ ኵሎሙ ፡ እለ ፡ ያፈቅርዎ ፡ ለእግዚእነ ፡ ኢየሱስ ፡ ክርስቶስ ፡ በኢጥፍአት ። አሜን ።