Chapter 15
Chapter 14 / Book of Jubilees / Dillmann's Edition / Chapter 15 Chapter 16

1 ወበዓመት ፡ ኃምስ ፡ ዘሱባዔ ፡ ዘራብዑ ፡ ለኢዮቤልዉ ፡ ዝንቱ ፡ በወርኅ ፡ ሣልስ ፡ በመንፈቀ ፡ ወርኅ ፡ ገብረ ፡ አብራም ፡ በዓለ ፡ ቀዳሜ ፡ ማእረር ፡ ዘዘርአ ፡ ስርናይ ።

2 ወአዕረገ ፡ መሥዋዕተ ፡ ሐዲሰ ፡ ዲበ ፡ መሥዋዕተ ፡ ቀዳሜ ፡ እክል ፡ ለእግዚአብሔር ። ላህመ ፡ ወበሐኰ ፡ ወበግዐ ፡ ዲበ ፡ ምሥዋዕ ፡ ጽንሓሐ ፡ ለእግዚአብሔር ፡ ወመሥዋዕቶሙ ፡ ወሞጻሕቶሙ ፡ አዕረገ ፡ ዲበ ፡ ምሥዋዕ ፡ ምስለ ፡ ስኂን ።

3 ወአስተርአዮ ፡ እግዚአብሔር ፡ ለአብራም ፡ ወይቤሎ ፡ አነ ፡ አምላከ ፡ ሰዳይ ፡ ወአሥምር ፡ ቅድሜየ ፡ ወኩን ፡ ፍጹመ ፡

4 ወእሁብ ፡ ኪዳንየ ፡ ማእከሌየ ፡ ወማእከሌከ ፡ ወአልህቀከ ፡ ጥቀ ።

5 ወወድቀ ፡ አብራም ፡ በገጹ ፡ ወተናገሮ ፡ እግዚአብሔር ፡ ወይቤ ፡

6 ናሁ ፡ ሥርዐትየ ፡ ምስሌከ ፡ ወእሬስየከ ፡ አበ ፡ ለብዙኃን ፡ አሕዛብ ።

7 ወኢይጸዋዕ ፡ እንከ ፡ ስምከ ፡ አብራም ፡ ወይኩን ፡ እንከ ፡ ስምከ ፡ እምይእዜ ፡ ወእስከ ፡ ለዓለም ፡ አብርሃም ፤ እስመ ፡ አበ ፡ ብዙኃን ፡ አሕዛብ ፡ ሤምኩከ ፡

8 ወኣዐብየከ ፡ ኪያከ ፡ ጥቀ ፡ ወእሁበከ ፡ አሕዛብ ፡ ወነገሥት ፡ ይወፅኡ ፡ እምኔከ ።

9 ወእሁብ ፡ ኪዳንየ ፡ ማእከሌየ ፡ ወማእከሌከ ፡ ወማእከለ ፡ ዘርእከ ፡ እምድኅሬከ ፡ በትዝምዶሙ ፡ ወለሥርዐት ፡ ዘለዓለም ፡ ከመ ፡ እኩንከ ፡ አምላከ ፡ ወለዘርእከ ፡ እምድኅሬከ ፡

10 በትዝምዶሙ ፡ ምድረ ፡ ኀበ ፡ ፈለስከ ፡ ምድረ ፡ ከነዓን ፡ ዘትኬንን ፡ ለዓለም ፡ ወእከውኖሙ ፡ አምላከ ።

11 ወይቤሎ ፡ እግዚአብሔር ፡ ለአብርሃም ፡ ወአንተኒ ፡ ኪዳንየ ፡ ዕቀብ ፡ አንተ ፡ ወዘርእከ ፡ እምድኅሬከ ፡ ወትገዝሩ ፡ ኩሎ ፡ ቍልፈተክሙ ፡ ወይከውን ፡ ትእምርተ ፡ ሥርዐትየ ፡ ዘለዓለም ፡ ማእከሌየ ፡ ወማእከሌክሙ ፡

12 ወለትውልድ ። አመ ፡ ሳምንት ፡ ዕለት ፡ ትገዝርዎ ፡ ኵሎ ፡ ሮሰ ፡ በትዝምድክሙ ፡ ወልደ ፡ ቤት ፡ ወዘበወርቅ ፡ ተሣየጥክሙ ፡ እምኵሉ ፡ ውሉደ ፡ ነኪር ፡ ዘአጥረይክሙ ፡ ዘኢኮነ ፡ እምዘርእከ ፡

13 ግዝረተ ፡ ይትግዘሩ ፡ ወልደ ፡ ቤትከ ፡ ወዘበወርቅ ፡ ተሣየጥከ ፡ ይትገዘሩ ። ወይኩን ፡ ኪዳንየ ፡ ውስተ ፡ ሥጋክሙ ፡ ለሥርዐት ፡ ዘለዓለም ፡

14 ወዘኢኮነ ፡ ግዙረ ፡ ሮስክሙ ፡ ዘኢተገዝረ ፡ ሥጋ ፡ ቍልፈቱ ፡ በዕለተ ፡ ሳምንት ፡ ትሰሮ ፡ ይእቲ ፡ ነፍስ ፡ እምዘመዳ ፡ እስመ ፡ ኪዳንየ ፡ ነሠተ ።

15 ወይቤሎ ፡ እግዚአብሔር ፡ ለአብርሃም ፡ ሶራ ፡ ብእሲትከ ፡ ኢትጸዋዕ ፡ እንከ ፡ ስማ ፡ ሶራ ፡ እስመ ፡ ሳራ ፡ ስማ ፡

16 ወእባርክ ፡ ወእሁበከ ፡ እምኔሃ ፡ ወልደ ፡ ወእባርኮ ፡ ወይከውን ፡ ሕዝበ ፡ ወነገሥተ ፡ አሕዛብ ፡ እምኔሁ ፡ ይከውኑ ።

17 ወወድቀ ፡ አብርሃም ፡ በገጹ ፡ ወተፈሥሐ ፡ ወይቤ ፡ በልቡ ፡ እመ ፡ ለዘምእትኑ ፡ ዓመት ፡ ይወልድ ፡ ወልደ ፡ ወሳራሂ ፡ እንተ ፡ ፺ዓመት ፡ ትወልድኑ ።

18 ወይቤሎ ፡ አብርሃም ፡ ለእግዚአብሔር ፡ መፍትው ፡ ይሕየው ፡ ይስማኤል ፡ ቅድሜከ ፡

19 ወይቤ ፡ እግዚአብሔር ፡ ኦሆ ፡ ወሳራሂ ፡ ትወልድ ፡ ለከ ፡ ወልደ ፡ ወትጼውዕ ፡ ስሞ ፡ ይስሐቅ ፡ ወኣቀውም ፡ ኪዳንየ ፡ ምስሌሁ ፡ ዘለዓለም ፡ ወለዘርኡ ፡ እምድኅሬሁ ።

20 ወበእንተ ፡ ይስማኤልሂ ፡ ሰማዕኩከ ፡ ወናሁ ፡ እባርኮ ፡ ወኣልህቆ ፡ ወኣበዝኆ ፡ ጥቀ ፡ ወ፲ወ፪ ፡ መላእክተ ፡ ይወልድ ፡ ወእሠይሞ ፡ ውስተ ፡ ሕዝብ ፡ ዐቢይ ።

21 ወኪዳንየ ፡ ኣቀውም ፡ ምስለ ፡ ይስሐቅ ፡ ዘትወልድ ፡ ለከ ፡ ሳራ ፡ በዝ ፡ መዋዕል ፡ በዓመት ፡ ካልእ ።

22 ወፈጺሞ ፡ እንዘ ፡ ይትናገር ፡ ምስሌሁ ፡ ወዐርገ ፡ እግዚአብሔር ፡ እመልዕልተ ፡ አብርሃም ።

23 ወገብረ ፡ አብርሃም ፡ በከመ ፡ ይቤሎ ፡ እግዚአብሔር ፡ ወነሥአ ፡ ይስማኤልሃ ፡ ወልዶ ፡ ወኵሎ ፡ ልደ ፡ ቤቱ ፡ ወዘሂ ፡ በወርቅ ፡ ተሣየጠ ፡ ኵሎ ፡ ሮሰ ፡ ዘውስተ ፡ ቤቱ ፡ ወገዘረ ፡ ሥጋ ፡ ምስከቦሙ ።

24 ወበጊዜ ፡ ዛቲ ፡ ዕለት ፡ ተገዝረ ፡ አብርሃም ፡ ወኵሉ ፡ ሰብአ ፡ ቤቱ ፡ ወኵሎሙ ፡ እለ ፡ በወርቅ ፡ ተሣየጦሙ ፡ ወእምውሉደ ፡ ነኪራንኒ ፡ ተገዝሩ ፡ ምስሌሁ ።

25 ወዝ ፡ ሕግ ፡ ለኵሉ ፡ ትውልድ ፡ ዘለዓለም ፡ ወአልቦ ፡ ክስበተ ፡ መዋዕል ፡ ወአልቦ ፡ ተዐድዎ ፡ አሐተ ፡ ዕለተ ፡ እምሰሙን ፡ መዋዕል ፡ እስመ ፡ ሥርዐት ፡ ዘለዓለም ፡ ውእቱ ፡ ሥሩዕ ፡ ወጽሑፍ ፡ ውስተ ፡ ጽላተ ፡ ሰማይ ።

26 ወኵሉ ፡ ዘተወልደ ፡ ዘኢተገዝረ ፡ ሥጋ ፡ ነፍስቱ ፡ እስከ ፡ ሰሙን ፡ ዕለት ፡ ኢኮነ ፡ እምውሉደ ፡ ሥርዐት ፡ ዘተካየደ ፡ እግዚአብሔር ፡ ለአብርሃም ፡ አላ ፡ እምነ ፡ ውሉደ ፡ ሙስና ፡ ወአልቦ ፡ እንከ ፡ ትእምርት ፡ ላዕሌሁ ፡ ከመ ፡ ይኩን ፡ ለእግዚአብሔር ፡ እስመ ፡ ለአማስኖ ፡ ወለተሐጕሎ ፡ እምነ ፡ ምድር ፡ ወለተሠርዎ ፡ እምነ ፡ ምድር ፡ እስመ ፡ ኪዳኖ ፡ ለእግዚአብሔር ፡ አምላክነ ፡ ነሠተ ።

27 እስመ ፡ ኵሎሙ ፡ መላእክተ ፡ ገጽ ፡ ወኵሎሙ ፡ መላእክተ ፡ ቅዳሴ ፡ ከመዝ ፡ ፍጥረቶሙ ፡ እምዕለተ ፡ ፍጥረቶሙ ፡ ወነጸሮሙ ፡ ለመላእክተ ፡ ቅዳሴ ፡ ለቅዳሴ ፡ ወቀደሶ ፡ ለእስራኤል ፡ ከመ ፡ ይኩኑ ፡ ምስሌሁ ፡ ወምስለ ፡ መላእክቲሁ ፡ ቅዱሳን ።

28 ወአንተኒ ፡ አዝዝ ፡ ለውሉደ ፡ እስራኤል ፡ ወይዕቀቡ ፡ ትእምርተዝ ፡ ኪዳን ፡ ወለትውልዶሙ ፡ ለሥርዐት ፡ ዘለዓለም ፡ ወኢይሠረው ፡ እምነ ፡ ምድር ።

29 እስመ ፡ ትእዛዝ ፡ ተሠርዐ ፡ ለኪዳን ፡ ከመ ፡ ይዕቀብዎ ፡ ለዓለም ፡ ዲበ ፡ ኵሎሙ ፡ ደቂቀ ፡ እስራኤል ።

30 እስመ ፡ ይስማኤልሃ ፡ ወውሉዱ ፡ ወአኃዊሁ ፡ ወኤሳውሃ ፡ ኢያቅረበ ፡ ኀቤሁ ፡ እግዚአብሔር ፡ ወኢኀረየ ፡ ቦሙ ፡ እስመ ፡ ውሉደ ፡ አብርሃም ፡ እሙንቱ ፡ እስመ ፡ አእመሮሙ ፡ ወእስራኤልሃ ፡ ኀረየ ፡ ይኩንዎ ፡ ሕዝበ ።

31 ወቀደሶ ፡ ወአስተጋብኦ ፡ እምኵሉ ፡ ውሉደ ፡ ሰብእ ፡ እስመ ፡ ብዙኅ ፡ አሕዛብ ፡ ወብዙኅ ፡ ሕዝብ ፡ ወኵሎሙ ፡ ሎቱ ፡ ወዲበ ፡ ኵሉ ፡ አስለጠ ፡ መናፍስተ ፡ ከመ ፡ ያስሕቶሙ ፡ እምድኅሬሁ ፡

32 ወዲበ ፡ እስራኤል ፡ ኢያስለጠ ፡ ወኢመነሂ ፡ መልአከ ፡ ወመንፈሰ ። እስመ ፡ ውእቱ ፡ ባሕቲቱ ፡ መኰንኖሙ ፡ ወውእቱ ፡ የዐቅቦሙ ፡ ወይትኀሠሦሙ ፡ እምእደ ፡ መላእክቲሁ ፡ ወእምነ ፡ መናፍስቲሁ ፡ ወእምእደ ፡ ኵሎሙ ፡ ወኵሉ ፡ ትእዛዛቲሁ ፡ ከመ ፡ ይዕቀቦሙ ፡ ወይባርኮሙ ፡ ወይኩንዎ ፡ ሎቱ ፡ ወውእቱ ፡ ይኩኖሙ ፡ ሎሙ ፡ እምይእዜ ፡ ወእስከ ፡ ለዓለም ።

33 ወእምይእዜ ፡ አነ ፡ እዜንወከ ፡ ከመ ፡ በዛቲ ፡ ሥርዐት ፡ ይሔስዉ ፡ ውሉደ ፡ እስራኤል ፡ ወኢይትገዘሩ ፡ ውሉዶሙ ፡ በከመ ፡ ኵሉዝ ፡ ሕግ ፡ እስመ ፡ እምሥጋ ፡ ግዝረቶሙ ፡ ይከውኑ ፡ መትርፋነ ፡ ውእተ ፡ ግዝረተ ፡ ውሉዶሙ ፡ ወኵሎሙ ፡ ውሉደ ፡ ቤልሖር ፡ የኀድጉ ፡ ውሉዶሙ ፡ ዘእንበለ ፡ ግዝረት ፡ በከመ ፡ ተወልዱ ።

34 ወትከውን ፡ መዐት ፡ ዲበ ፡ ውሉደ ፡ እስራኤል ፡ ዐቢይ ፡ እምኀበ ፡ እግዚአብሔር ፡ እስመ ፡ ኀደጉ ፡ ኪዳኖ ፡ ወእምቃሉ ፡ ተግኅሡ ፡ ወወሀኩ ፡ ወጸረፉ ፡ በከመ ፡ ሥርዐቶሙ ፡ ኢይገብሩ ፡ ለዝ ፡ ትእምርት ፡ እስመ ፡ ገብሩ ፡ ነፍሳቲሆሙ ፡ ከመ ፡ አሕዛብ ፡ ለሰስሎ ፡ ወለተሠርዎ ፡ እምድር ። ወአልቦ ፡ እንከ ፡ ሎሙ ፡ ኅድገት ፡ ወስርየት ፡ ከመ ፡ ይስረይ ፡ ወይኀድግ ፡ እምኵሉ ፡ ኀጢአት ፡ ለስሕተት ፡ ዛቲ ፡ ዘለዓለም ።