Chapter 14
Chapter 13 / Book of Jubilees / Dillmann's Edition / Chapter 14 Chapter 15

1 ወእምድኅረዝ ፡ ነገር ፡ በራብዕ ፡ ዓመት ፡ ዘዝሱበዔ ፡ በሠርቀ ፡ ሣልስ ፡ ወርኅ ፡ ኮነ ፡ ቃለ ፡ እግዚአብሔር ፡ ኀበ ፡ አብራም ፡ በሕልም ፡ እንዘ ፡ ይብል ፡ ኢትፍራህ ፡ አብራም ፡ እስመ ፡ አነ ፡ ቃውምከ ፡ ወዐስብከ ፡ ጥቀ ፡ ፈደፋድ ።

2 ወይቤ ፡ እግዚኦ ፡ እግዚኦ ፡ ምንተ ፡ ትሁበኒ ፡ ወአንሰ ፡ አሐውር ፡ ዘእንበለ ፡ ወልድ ፤ ወልደ ፡ ማሴቅ ፡ ወልደ ፡ አመትየ ፡ ውእቱ ፡ ደማስቆስ ፡ ኤሊኤዜር ፡ ውእቱ ፡ ይወርሰኒ ፡ ወሊተኒ ፡ ኢወሀብከኒ ፡ ዘርአ ።

3 ወይቤሎ ፡ ኢይወርሰከዝ ፡ ዘእንበለ ፡ ዘይወፅእ ፡ እምከርሥከ ፡ ውእቱ ፡ ይወርሰከ ።

4 ወአውፅኦ ፡ አፍአ ፡ ወይቤሎ ፡ ነጽር ፡ ውስተ ፡ ሰማይ ፡ ወርኢ ፡ ከዋክብተ ፡ ሰማይ ፡ እመ ፡ ትክል ፡ ኈልቆቶሙ ።

5 ወነጸረ ፡ ሰማየ ፡ ወርእየ ፡ ከዋክብተ ፡ ወይቤሎ ፡ ከመዝ ፡ ይኩን ፡ ዘርእከ ፡

6 ወአምኖ ፡ ለእግዚአብሔር ፡ ወተኈለቆ ፡ ጽድቀ ።

7 ወይቤሎ ፡ አነ ፡ እግዚአብሔር ፡ አምላክከ ፡ ዘአውፃእኩከ ፡ እምነ ፡ ኡር ፡ ዘከለዳዊያን ፡ ከመ ፡ አሀብከ ፡ ምድረ ፡ ከነዓን ፡ ለእኂዝ ፡ ለዓለም ፡ ወእከውነከ ፡ ለከ ፡ አምላከ ፡ ወለዘርእከ ፡ እምድኅሬከ ።

8 ወይቤ ፡ እግዚኦ ፡ እግዚኦ ፡ በምንት ፡ ኣአምር ፡ ከመ ፡ እወርስ ።

9 ወይቤሎ ፡ ንሣእ ፡ ለከ ፡ ጣዕዋ ፡ ዘ፫ዓመት ፡ ወጠሌ ፡ ዘ፫ዓመት ፡ ወበግዐ ፡ ዘ፫ዓመት ፡ ወመንጤጠ ፡ ወርግበ ።

10 ወነሥአ ፡ ዘንተ ፡ ኵሎ ፡ በመንፈቀ ፡ ወርኅ ፡ ወውእቱ ፡ ይነብር ፡ ኀበ ፡ ድራይ ፡ ዘማምራይ ፡ እንተ ፡ ይእቲ ፡ ቅሩበ ፡ ኬብሮን ፡

11 ወሐነጸ ፡ ህየ ፡ ምሥዋዐ ። ወዘብሐ ፡ ዘንተ ፡ ኵሎ ፡ ወከዐወ ፡ ደሞሙ ፡ ውስተ ፡ ምሥዋዕ ፡ ወነፈቆን ፡ እማእከል ፡ ወአንበሮሙ ፡ አንጻራቲሆሙ ፡ በበገጾሙ ፡ ወአዕዋፈሰ ፡ ኢነተፈ ።

12 ወይወርዱ ፡ አዕዋፍ ፡ ዲበ ፡ ስፍሕ ፡ ወይከልኦሙ ፡ አብራም ፡ ወኢየኀድግ ፡ አዕዋፍ ፡ ይልክፍዎን ።

13 ወኮነ ፡ ሶበ ፡ ዕርበተ ፡ ፀሓይ ፡ ድንጋፄ ፡ ወድቀ ፡ ላዕለ ፡ አብራም ፡ ወናሁ ፡ ዐቢይ ፡ ግርማ ፡ ጽልመት ፡ ወድቀ ፡ ላዕሌሁ ፡ ወተብህለ ፡ ለአብራም ፡ አእምሮ ፡ አእምር ፡ ከመ ፡ ፈላሴ ፡ ይከውን ፡ ዘርእከ ፡ ውስተ ፡ ምድረ ፡ ነኪር ፡ ወይቀንይዎሙ ፡ ወያሐምምዎሙ ፡ ፬፻ዓመተ ።

14 ወለሕዝብኒ ፡ እለ ፡ ይትቀነዩ ፡ አነ ፡ እፈትሖሙ ፡ ሎሙ ፡ ወእምድኅረዝ ፡ ይወፅኡ ፡ እምህየ ፡ ምስለ ፡ ጥሪት ፡ ብዙኅ ፡

15 ወአንተ ፡ ተሐውር ፡ ኀበ ፡ አበዊከ ፡ በሰላም ፡ ወትትቀበር ፡ በርስእ ፡ ሠናይ ።

16 ወበትውልድ ፡ ራብዕ ፡ ይትመየጡ ፡ ዝየ ፡ እስመ ፡ ኢተፈጸመ ፡ ኃጢአቶሙ ፡ ለአሞሬዎን ፡ እስከ ፡ ይእዜ ።

17 ወነቅሐ ፡ እምንዋም ፡ ወተንሥአ ፡ ወፀሓይ ፡ ዐረበ ፡ ወነድ ፡ ኮነ ፡ ወናሁ ፡ እቶን ፡ ይጠይስ ፡ ወነበልባለ ፡ እሳት ፡ ኀለፈ ፡ ማእከለ ፡ ስፍሕ ።

18 ወበይእቲ ፡ ዕለት ፡ ተካየደ ፡ ኪዳነ ፡ እግዚአብሔር ፡ ምስለ ፡ አብራም ፡ እንዘ ፡ ይብል ፡ ለዘርእከ ፡ እሁብ ፡ ዛተ ፡ ምድረ ፡ እምፈለገ ፡ ግብጽ ፡ እስከ ፡ ፈለግ ፡ ዐቢይ ፡ ኤፍራጥስ ፡ ለቄኔውስ ፤ ወለቄኑዜውስ ፤ ወለቄድምኔውስ ፤ ወለፌሬዜውስ ፤ ወለራፍኢያን ፤ ወለፈኬሬውስ ፤ ወለኤዌውስ ፤ ወለአሞሬውስ ፤ ወለከናኔውስ ፤ ወለጌርጌሴውስ ።

19 ወኀለፈ ፡ ወአዕረገ ፡ አብራም ፡ ስፍሓተ ፡ ወአዕዋፈ ፡ ወመሥዋዕቶሙ ፡ ወሞጻሕቶሙ ፡ ወበልዐቶሙ ፡ እሳት ።

20 ወበይእቲ ፡ ዕለት ፡ ተካየድነ ፡ ኪዳነ ፡ ምስለ ፡ አብራም ፡ በከመ ፡ ኪዳን ፡ ዘተካየድነ ፡ በዛቲ ፡ ወርኅ ፡ ምስለ ፡ ኖኅ ፡ ወአብራም ፡ ሐደሳ ፡ ለበዓል ፡ ወለሥርዐት ፡ ሎቱ ፡ እስከ ፡ ለዓለም ።

21 ወአብራም ፡ ተፈሥሐ ፡ ወአይድዐ ፡ ዘንተ ፡ ነገረ ፡ ኵሎ ፡ ለሶራ ፡ ብእሲቱ ፡ ወአምነ ፡ ከመ ፡ ይከውኖ ፡ ዘርእ ፡ ወይእቲሰ ፡ ኢትወልድ ።

22 ወአምከረቶ ፡ ሶራ ፡ ለአብራም ፡ ምታ ፡ ወትቤሎ ፡ ባእ ፡ ኀበ ፡ አጋር ፡ ለአኪትየ ፡ ግብጻዊት ፡ እመቦ ፡ ከመ ፡ ይሕንጽ ፡ ለከ ፡ እምኔሃ ፡ ዘርአ ።

23 ወሰምዐ ፡ አብራም ፡ ቃለ ፡ ሶራ ፡ ብእሲቱ ፡ ወይቤላ ፡ ግበሪ ፡ ወነሥአት ፡ ሶራ ፡ አጋርሃ ፡ ለአኪታ ፡ ግብጻዊት ፡ ወወሀበታ ፡ ለአብራም ፡ ምታ ፡ ትኩኖ ፡ ብእሲተ ።

24 ወቦአ ፡ ኀቤሃ ፡ ወፀንሰት ፡ ወወለደት ፡ ወልደ ፡ ወጸውዐ ፡ ስሞ ፡ ይስማኤል ፡ በዓመት ፡ ኃምስ ፡ ዘዝሱባዔ ፡ ወውእቱ ፡ ዓመት ፡ ፹ወ፮ዓመት ፡ ሕይወቱ ፡ ለአብራም ።