Chapter 13
Chapter 12 / Book of Jubilees / Dillmann's Edition / Chapter 13 Chapter 14

1 ወሖረ ፡ አብራም ፡ እምካራን ፡ ወነሥኣ ፡ ለሶራ ፡ ብእሲቶ ፡ ወሎጥ ፡ ወልደ ፡ አራን ፡ እኁሁ ፡ ውስተ ፡ ምድረ ፡ ከናአን ፡ ወመጽአ ፡ ውስተ ፡ ምድረ ፡ አሱር ፡ ወአንሶሰወ ፡ እስከ ፡ ሰቂሞን ፡ ወኀደረ ፡ ኀበ ፡ ድርስ ፡ ነዋኅ ።

2 ወርእየ ፡ ምድረ ፡ ወናሁ ፡ አዳም ፡ ጥቀ ፡ እምብዋአ ፡ ኤሜት ፡ እስከ ፡ ኀበ ፡ ደብር ፡ ነዋኅ ።

3 ወይቤሎ ፡ እግዚአብሔር ፡ ለከ ፡ ወለዘርእከ ፡ እሁብ ፡ ዛተ ፡ ምድረ ።

4 ወሐነጸ ፡ ምሥዋዐ ፡ በህየ ፡ ወአዕረገ ፡ ዲቤሁ ፡ ጽንሓሐ ፡ ለእግዚአብሔር ፡ ዘአስተርአዮ ።

5 ወአንሥአ ፡ እምህየ ፡ ውስተ ፡ ደብረ ፡ ቤቴል ፡ ዘመንገለ ፡ ባሕር ፡ ወአጌ ፡ መንገለ ፡ ጽባሕ ፡ ወተከለ ፡ ደብተራሁ ፡ ህየ ።

6 ወርእየ ፡ ወናሁ ፡ ምድር ፡ አዳም ፡ ወስፍሕት ፡ ወኄርት ፡ ጥቀ ፡ ኵሉ ፡ ይሠርፅ ፡ ላዕሌሃ ፡ አውያን ፤ ወበለስ ፤ ወሮማን ፡ ዕፀ ፡ ባላን ፡ ወድርስ ፤ ወጠርቤንቶስ ፤ ወዕፀ ፡ ዘይት ፡ ወቄድሮስ ፤ ወሊባኖስ ፤ ወቄጵርስስ ፡ ወኵሉ ፡ ዕፀወ ፡ ገዳም ፤ ወማይ ፡ ዲበ ፡ አድባር ።

7 ወባረከ ፡ ለእግዚአብሔር ፡ ዘአውፅኦ ፡ እምነ ፡ ኡር ፡ ዘከለዳዊያን ፡ ወአምጽኦ ፡ ውስተዝ ፡ ደብር ።

8 ወኮነ ፡ በ፩ዓመት ፡ በሱባዔ ፡ ሳብዕ ፡ በሠርቀ ፡ ወርኅ ፡ በዘ ፡ ቀዳሚ ፡ ሐነጸ ፡ ምሥዋዐ ፡ በዝ ፡ ደብር ፡ ወጸውዖ ፡ በስመ ፡ እግዚአብሔር ፡ አንተ ፡ አምላኪየ ፡ አምላክ ፡ ዘለዓለም ።

9 ወአዕረገ ፡ ዲበ ፡ ምሥዋዕ ፡ ጽንሓሐ ፡ ለእግዚአብሔር ፡ ከመ ፡ የሀሉ ፡ ምስሌሁ ፡ ወኢይኅድጎ ፡ ኵሎ ፡ መዋዕለ ፡ ሕይወቱ ።

10 ወተንሥአ ፡ እምህየ ፡ ወሖረ ፡ መንገለ ፡ ደቡብ ፡ ወበጽሐ ፡ እስከ ፡ ኬብሮን ፡ ወኬብሮን ፡ አሜሃ ፡ ተሐንጸት ፡ ወነበረ ፡ ህየ ፡ ዓመተ ፡ ፪ ፡ ውስተ ፡ ምድረ ፡ ደቡብ ፡ እስከ ፡ ቦአ ፡ ሎጥ ፡ ወኮነ ፡ ዐባር ፡ ዲበ ፡ ምድር ።

11 ወሖረ ፡ አብራም ፡ ውስተ ፡ ግብጽ ፡ በሣልስ ፡ ዓመት ፡ ዘሱባዔ ፡ ወኀደረ ፡ ውስተ ፡ ግብጽ ፡ ፭ ፡ ዓመተ ፡ ዘእንበለ ፡ ትትሀየድ ፡ ብእሲቱ ፡ እምኔሁ ፡

12 ወጠናይሰ ፡ ዘግብጽ ፡ አሜሃ ፡ ተሐንጸት ፡ በሰብዓቱ ፡ ክረምት ፡ እምድኅረ ፡ ኬብሮን ።

13 ወኮነ ፡ አመ ፡ ሄዶ ፡ ፈርዖን ፡ ሶራሃ ፡ ብእሲቶ ፡ ለአብራም ፡ ወቀሠፎ ፡ እግዚአብሔር ፡ ለፈርዖን ፡ ወኵሎ ፡ ቤቶ ፡ በመቅሠፍት ፡ ዐቢይ ፡ በእንተ ፡ ሶራ ፡ ብእሲቱ ፡ ለአብራም ፡

14 ወአብራም ፡ ክቡር ፡ በጥሪት ፡ ጥቀ ፡ በአባግዕ ፡ ወበአልህምት ፤ ወበአዕዱግ ፤ ወበአፍራስ ፡ ወበአግማል ፤ ወበአግብርት ፡ ወበአእማት ፤ ወበብሩር ፤ ወበወርቅ ፡ ፈድፋደ ። ወለሎጥኒ ፡ ወልደ ፡ እኁሁ ፡ ቦጥሪት ።

15 ወአግብአ ፡ ፈርዖን ፡ ሶራሃ ፡ ብእሲቶ ፡ አብራም ፡ ወአፍለሶ ፡ እምድረ ፡ ግብጽ ፡ ወሖረ ፡ ውስተ ፡ መካን ፡ ኀበ ፡ ተተክለ ፡ ደብተራሁ ፡ እንተ ፡ ቀዲሙ ፡ ውስተ ፡ መካነ ፡ ምሥዋዐ ፡ አጌ ፡ እምጽባሐ ፡ ቤቴል ፡ ወሖረ ፡ ወባረከ ፡ እግዚአብሔርሃ ፡ አምላኮ ፡ ዘሜጦ ፡ በሰላም ።

16 ወኮነ ፡ በዘ፵ወ፩ ፡ ኢዮቤልዉ ፡ በሣልስ ፡ ዓም ፡ ዘሱባዔ ፡ ቀዳሚ ፡ ገብአ ፡ ውስተዝ ፡ መካን ፡ ወአዕረገ ፡ ዲቤሁ ፡ ጽንሓሐ ፡ ወጸውዐ ፡ በስመ ፡ እግዚአብሔር ፡ ወይቤ ፡ አንተ ፡ እግዚአብሔር ፡ አምላክ ፡ ልዑል ፡ አምላኪየ ፡ ለዓለመ ፡ ዓለም ።

17 ወበራብዕ ፡ ዓም ፡ ዘሱባዔ ፡ ተፈልጠ ፡ ሎጥ ፡ እምኔሁ ፡ ወኀደረ ፡ ሎጥ ፡ ውስተ ፡ ሰዶም ፡ ወሰብአ ፡ ሰዶምሰ ፡ ኃጥኣን ፡ ጥቀ ፡

18 ወኀዘነ ፡ በልቡ ፡ እስመ ፡ ተፈልጠ ፡ ወልደ ፡ እኁሁ ፡ እምኔሁ ፡ እስመ ፡ አልቦ ፡ ውሉድ ።

19 በውእቱ ፡ ዓመት ፡ አመ ፡ ተፄወወ ፡ ሎጥ ፡ ወይቤሎ ፡ እግዚአብሔር ፡ ለአብራም ፡ እምድኅረ ፡ ተፈልጠ ፡ እምኔሁ ፡ ሎጥ ፡ በራብዕ ፡ ዓመት ፡ ዘሱባዔዝ ፡ ወይቤሎ ፡ አንሥእ ፡ አዕይንቲከ ፡ እመካን ፡ ኀበ ፡ ሀለውከ ፡ ትነብር ፡ ህየ ፡ መንገለ ፡ ሰሜን ፡ ወሊባ ፡ ወባሕር ፡ ወጽባሕ ።

20 እስመ ፡ ኵላ ፡ ምድር ፡ እንተ ፡ ትሬኢ ፡ ለከ ፡ ወለዘርእከ ፡ እሁብ ፡ እስከ ፡ ለዓለም ፡ ወእሬሲ ፡ ዘርአከ ፡ ከመ ፡ ኆፃ ፡ ባሕር ፤ እመ ፡ ይክል ፡ ሰብእ ፡ ኈልቆ ፡ ኆፃ ፡ ባሕር ፡ ወዘርእከኒ ፡ ይትኈለቍ ።

21 ተንሥእ ፡ አንሶሱ ፡ ኑኃ ፡ ወርኅባ ፡ ወርኢ ፡ ኵሎ ፡ እስመ ፡ ለዘርእከ ፡ እሁብ ፡ ወሖረ ፡ አብራም ፡ ኬብሮን ፡ ወኀደረ ፡ ህየ ።

22 ወበዝ ፡ ዓመት ፡ መጽአ ፡ ኮሎዶጎሞር ፡ ንጉሠ ፡ ኤላም ፡ ወኤማልፋል ፡ ንጉሠ ፡ ሲናአር ፡ ወአሪኦክ ፡ ንጉሠ ፡ ሴላሰር ፡ ወቲርጋል ፡ ንጉሠ ፡ አሕዛብ ፡ ወቀተልዎ ፡ ለንጉሠ ፡ ገሞራ ፡ ወጐየ ፡ ንጉሠ ፡ ሰዶም ፡ ወብዙኃን ፡ ወድቁ ፡ በቍስል ፡ በሴዴማው ፡ በብሔረ ፡ ፄው ።

23 ወፄወዉ ፡ ሰዶምሃ ፡ ወአዳምሃ ፡ ወሴቦዔም ፡ ወፄወውዎ ፡ ለሎጥሂ ፡ ወልደ ፡ እኁሁ ፡ ለአብራም ፡ ወኵሎ ፡ ጥሪቶ ፡ ወሖረ ፡ እስከ ፡ ዳን ።

24 ወመጽአ ፡ ዘድኅነ ፡ ወነገሮ ፡ ለአብራም ፡ ከመ ፡ ተፄወወ ፡ ወልደ ፡ እኁሁ ፡ ለአብራም ።

25 ወአስተረሰየ ፡ ልደ ፡ ቤቱ ፡ ዲበ ፡ አብራም ፡ ወዲበ ፡ አብራም ፡ ወዲበ ፡ ዘርኡ ፡ ዐሥራተ ፡ ቀዳሚ ፡ ለእግዚአብሔር ፡ ወእግዚአብሔር ፡ ሠርዖ ፡ ሥርዓተ ፡ ዘለዓለም ፡ የሀብዎ ፡ ለካህናት ፡ ለእለ ፡ ይትቀነዩ ፡ በቅድሜሁ ፡ ከመ ፡ የአኀዝዋ ፡ ለዓለም ።

26 ወአልቦ ፡ ለዝ ፡ ሕግ ፡ ወሰነ ፡ መዋዕል ፡ እስመ ፡ ለትውልድ ፡ ዘለዓለም ፡ ሥሩዕ ፡ ከመ ፡ የሀቡ ፡ ዓሥራተ ፡ ለእግዚአብሔር ፡ እምዘርእ ፤ ወእምወይን ፤ ወእምቅብእ ፤ ወእምአልህምት ፤ ወእምአባግዕ ።

27 ወውእቱ ፡ ወሀበ ፡ ለካህናቲሁ ፡ ለበሊዕ ፡ ወለሰትይ ፡ በፍሥሓ ፡ በቅድሜሁ ።

28 ወበጽሐ ፡ ኀቤሁ ፡ ንጉሠ ፡ ሰዶም ፡ ወሰገደ ፡ ቅድሜሁ ፡ ወይቤ ፡ እግዚእነ ፡ አብራም ፡ ጸግወነ ፡ ነፍሰ ፡ እለ ፡ ባላህከ ፡ ወምህርካሁሰ ፡ ይኩንከ ፡ ለከ ።

29 ወይቤሎ ፡ አብራም ፡ ሎቱ ፡ ኣነሥእ ፡ እደውየ ፡ ኀበ ፡ አምላክ ፡ ልዑል ፡ እምፈትል ፡ እስከ ፡ ቶታነ ፡ አሣእን ፡ እመ ፡ እነሥእ ፡ እምኵሉ ፡ ዘዚአከ ፡ ከመ ፡ ኢትኩን ፡ በሃሌ ፡ አነ ፡ አብዐልክዎ ፡ ለአብራም ፤ ዘእንበለ ፡ ዘበልዑ ፡ ዳእሙ ፡ ወራዙት ፡ ወመክፈልቶሙ ፡ ለዕደው ፡ እለ ፡ ሖሩ ፡ ምስሌየ ፡ አውናን ፡ ወኤስኮል ፡ ወመምሬ ፡ እሙንቱ ፡ ይነሥኡ ፡ መክፈልቶሙ ።