Chapter 12
Chapter 11 / Book of Jubilees / Dillmann's Edition / Chapter 12 Chapter 13

1 ወኮነ ፡ በሱባዔ ፡ ሳድስ ፡ በሳብዕ ፡ ዓመቱ ፡ ሎቱ ፡ ይቤ ፡ አብራም ፡ ለታራ ፡ አቡሁ ፡ እንዘ ፡ ይብል ፡ አባ ፡ ወይቤ ፡ ነየ ፡ አነ ፡ ወልድየ ።

2 ወይቤ ፡ ምንተ ፡ ረድኤተ ፡ ወተድላ ፡ ለነ ፡ እምእሉ ፡ ጣዖት ፡ ዘአንተ ፡ ታመልክ ፡ ወትሰግድ ፡ ቅድሜሆሙ ፡

3 እስመ ፡ አልቦ ፡ ላዕሌሆሙ ፡ ምንትኒ ፡ መንፈስ ፡ እስመ ፡ ስግመት ፡ እሙንቱ ፡ ወስሕተተ ፡ ልብ ፡ እሙንቱ ፤ ኢታምልክዎሙ ።

4 አምልኩ ፡ አምላከ ፡ ሰማይ ፡ ዘያወርድ ፡ ጠለ ፡ ወዝናመ ፡ ላዕለ ፡ ምድር ፡ ወይገብር ፡ ኵሎ ፡ ላዕለ ፡ ምድር ፡ ወኵሎ ፡ ዘፈጠረ ፡ በቃሉ ፡ ወኵሉ ፡ ሕይወት ፡ እምቅድመ ፡ ገጹ ።

5 በምንት ፡ አንትሙ ፡ ታመልኩ ፡ እለ ፡ አልቦሙ ፡ ልብ ፡ መንፈስ ፡ ላዕሌሆሙ ፡ እስመ ፡ ግብረ ፡ እደው ፡ እሙንቱ ፡ ወዲበ ፡ መታክፍቲክሙ ፡ አንትሙ ፡ ትጸውርዎሙ ፡ ወአልቦ ፡ እምኔሆሙ ፡ ለክሙ ፡ ረጽኤተ ፡ ዘእንበለ ፡ ኀሳር ፡ ዐቢይ ፡ ለእለ ፡ ይገብርዎሙ ፡ ወስሕተተ ፡ ልብ ፡ ለእለ ፡ ያመልክዎሙ ፤ ኢታምልክዎሙ ።

6 ወይቤ ፡ ታራ ፡ አነሂ ፡ ኣአምር ፡ ወልድየ ፡ ወምንተ ፡ እሬሲ ፡ ለዝ ፡ ሕዝብ ፡ እለ ፡ አዘዙኒ ፡ እትለአክ ፡ ቅድሜሆሙ ፤

7 እመ ፡ ነገርክዎሙ ፡ ጽድቀ ፡ ይቀትሉኒ ፡ እስመ ፡ ተለወት ፡ ነፍሶሙ ፡ ኀቤሆሙ ፡ ከመ ፡ ያምልክዎሙ ፡ ወይሰብሕዎሙ ፤ አርምም ፡ ወልድየ ፡ ኢይቅትሉከ ።

8 ወነገረ ፡ ዘንተ ፡ ነገረ ፡ ለክልኤ ፡ አኃዊሁ ፡ ወተምዑ ፡ ላዕሌሁ ፡ ወአርመመ ።

9 ወበ፵ ፡ ኢዮቤልዉ ፡ በሱባዔ ፡ ካልእ ፡ በሳብዕ ፡ ዓመቱ ፡ ሎቱ ፡ ነሥአ ፡ ሎቱ ፡ አብራም ፡ ብእሲተ ፡ ወስማ ፡ ሶራ ፡ ወለተ ፡ አቡሁ ፡ ወኮነቶ ፡ ሎቱ ፡ ብእሲተ ።

10 ወአራን ፡ እኁሁ ፡ ነሥአ ፡ ሎቱ ፡ በዓመት ፡ ዘሱባዔ ፡ ሣልስ ፡ ወወለደት ፡ ሎቱ ፡ ወልደ ፡ ብእሲቱ ፡ በዓመት ፡ ሳብዕ ፡ ዘሱባዔ ፡ ዝንቱ ፡ ወጸውዐ ፡ ስሞ ፡ ሎጥ ።

11 ወናኮርኒ ፡ እኁሁ ፡ ነሥአ ፡ ሎቱ ፡ ብእሲተ ።

12 ወበዓመት ፡ ... ፡ ዘሕይወተ ፡ አብራም ፡ ውእቱ ፡ ሱባዔ ፡ ራብዕ ፡ በዓመት ፡ ራብዑ ፡ ተንሥአ ፡ አብራም ፡ በሌሊት ፡ ወአውዐየ ፡ ቤተ ፡ ጣዖታት ፡ ወአውዐየ ፡ ኵሎ ፡ በውስተ ፡ ቤት ፡ ወሰብእ ፡ አልቦ ፡ ዘአእመረ ።

13 ወተንሥኡ ፡ በሌሊት ፡ ወፈቀዱ ፡ ያድኅኑ ፡ አማልክቲሆሙ ፡ እማእከለ ፡ እሳት ።

14 ወሰረረ ፡ አራን ፡ ከመ ፡ ያድኅኖሙ ፡ ወነደ ፡ እሳት ፡ ላዕሌሁ ፡ ወውዕየ ፡ በማእከለ ፡ እሳት ፡ ወሞተ ፡ በኡር ፡ ዘከለዳውያን ፡ በቅድመ ፡ ታራ ፡ አቡሁ ፡ ወቀበርዎ ፡ በኡር ።

15 ወወፅአ ፡ ታራ ፡ እምነ ፡ ኡር ፡ ዘከለዳውያን ፡ ውእቱ ፡ ወወሉዱ ፡ ከመ ፡ ይምጽኡ ፡ ውስተ ፡ ምድረ ፡ ሊባኖስ ፡ ወውስተ ፡ ምድረ ፡ ከናአን ፡ ወኀደረ ፡ ውስተ ፡ ካራን ፡ ወኀደረ ፡ አብራም ፡ ምስለ ፡ አቡሁ ፡ ውስተ ፡ ካራን ፡ ክልኤ ፡ ሱባዔ ፡ ዓመታት ።

16 ወበሳድስ ፡ ሱባዔ ፡ በዓመት ፡ ኃምስ ፡ ሎቱ ፡ ተንሥአ ፡ አብራም ፡ ወነበረ ፡ በሌሊት ፡ በሠርቀ ፡ ወርኅ ፡ ሳብዕ ፡ ከመ ፡ ያበይን ፡ ከዋክብተ ፡ እምሰርክ ፡ እስከ ፡ ነግህ ፡ ከመ ፡ ይርአይ ፡ ምንተ ፡ ይከውን ፡ ግብረ ፡ ዓመት ፡ በዝናማት ፡ ወሀሎ ፡ ውእቱ ፡ ባሕቲቱ ፡ ይነብር ፡ ወያቤይን ።

17 ወመጽአ ፡ ውስተ ፡ ልቡ ፡ ቃል ፡ ወይቤ ፡ ኵሉ ፡ ተኣምረ ፡ ከዋክብት ፡ ወተኣምሪሃ ፡ ለፀሓይ ፡ ወለወርኅ ፡ ኵሉ ፡ በእደ ፡ እግዚአብሔር ፡ ለምንት ፡ አነ ፡ እትኃሠሥ ፡

18 ለእመ ፡ ፈቀደ ፡ ያዘንም ፡ ሰርከ ፡ ወነግሀ ፡ ወእመ ፡ ፈቀደ ፡ ያወርድ ፡ ወኵሉ ፡ ውስተ ፡ እዴሁ ።

19 ወጸለየ ፡ በይእቲ ፡ ሌሊት ፡ ወይቤ ፡ አምላኪየ ፡ አምላክ ፡ ልዑል ፡ አንተ ፡ ባሕቲትከ ፡ ሊተ ፡ አምላክ ፡ ወአንተ ፡ ኵሎ ፡ ፈጠርከ ፡ ወግብረ ፡ እደዊከ ፡ ኵሉ ፡ ኮነ ፡ ወሀለወ ፡ ወኪያከ ፡ ወመለኮተከ ፡ ኀረይኩ ፤

20 አድኅነኒ ፡ እምእደ ፡ መናፍስት ፡ እኩያን ፡ እለ ፡ ይሰለጡ ፡ ውስተ ፡ ሕሊና ፡ ልበ ፡ ሰብእ ፡ ወኢያስሕቱኒ ፡ እምድኅሬከ ፡ አምላኪየ ፡ ወረስየኒ ፡ ኪያየ ፡ ወዘርእየ ፡ ለዓለም ፡ ወኢንስሕት ፡ እምይእዜ ፡ ወእስከ ፡ ለዓለም ።

21 ወይቤ ፡ እመ ፡ እግባእ ፡ ውስተ ፡ ኡር ፡ ዘከለዳዊያን ፡ እለ ፡ የኀሥሡ ፡ ገጽየ ፡ ከመ ፡ እግባእ ፡ ኀቤሆሙ ፡ ወሚመ ፡ እንበር ፡ ዝየ ፡ በዝ ፡ መካን ፡ ፍኖተ ፡ ርቱዐ ፡ በቅድሜከ ፡ ኪያሃ ፡ ሠርሕ ፡ በእደ ፡ ገብርከ ፡ ይግበር ፡ ወኢይሖር ፡ በስሕተተ ፡ ልብየ ፡ አምላኪየ ።

22 ውእቱ ፡ ፈጸመ ፡ ተናግሮ ፡ ወጸልዮ ፡ ወናሁ ፡ ተፈነወ ፡ ቃለ ፡ እግዚአብሔር ፡ ኀቤሁ ፡ በእዴየ ፡ እንዘ ፡ ይብል ፡ ነዓ ፡ አንተ ፡ እምድርከ ፡ ወእምነ ፡ ትዝምድከ ፡ ወእምነ ፡ ቤተ ፡ አቡከ ፡ ውስተ ፡ ምድር ፡ እንተ ፡ አነ ፡ ኣርእየከ ፡ ወእሬስየከ ፡ ውስተ ፡ ምድር ፡ እንተ ፡ ተዐቢ ፡ ውስተ ፡ ሕዝብ ፡ ዐቢየ ፡ ወብዙኅ ።

23 ወእባርከከ ፡ ወኣዐቢ ፡ ስመከ ፡ ወትከውን ፡ ቡሩከ ፡ ውስተ ፡ ምድር ፡ ወይትባረኩ ፡ ብከ ፡ ኵሎሙ ፡ አሕዛበ ፡ ምድር ፤ ለእለ ፡ ይባርኩከ ፡ እባርኮሙ ፡ ወለእለ ፡ ይረግሙከ ፡ እረግሞሙ ።

24 ወእከውነከ ፡ ለከ ፡ አምላከ ፡ ለወልድከ ፡ ወለውሉደ ፡ ውሉድከ ፡ ወለኵሉ ፡ ዘርእከ ፡ ወእምድኅሬከሂ ፡ አነ ፡ አምላክከ ፤ ኢትፍራህ ፡ እምይእዜ ፡ ወእስከ ፡ ኵሉ ፡ ትዝምደ ፡ ምድር ፡ አነ ፡ አምላክከ ።

25 ወይቤለኒ ፡ እግዚአብሔር ፡ አምላክ ፡ ፍታሕ ፡ አፉሁ ፡ ወእዘኒሁ ፡ ይስማዕ ፡ ወይንብብ ፡ በልሳን ፡ እንተ ፡ ታስተርኢ ፡ እስመ ፡ አዕረፈ ፡ እምነ ፡ አፈ ፡ ኵሉ ፡ ውሉደ ፡ ሰብእ ፡ (ወእምዕለተ ፡ ድቂቅ ፡ ) ።

26 ወፈታሕኩ ፡ አፉሁ ፡ ወከናፍሪሁ ፡ ወፈታሕኩ ፡ እዘኒሁ ፡ ወአኀዝኩ ፡ እትናገር ፡ ምስሌሁ ፡ በዕብራይስጥ ፡ በልሳነ ፡ ፍጥረት ።

27 ወነሥአ ፡ መጻሕፍተ ፡ አበዊሁ ፡ ወጽሑፋት ፡ እማንቱ ፡ ዕብራይስጥ ፡ ወደገሞን ፡ ወአኀዘ ፡ ይትመሀሮን ፡ እምአሜሃ ፡ ወአነ ፡ ኣየድዖ ፡ ኵሎ ፡ ዘይስእኖ ፡ ወተምህሮን ፡ ስድስተ ፡ ወርኀ ፡ ዝናም ።

28 ወኮነ ፡ ዓመት ፡ ሳብዕ ፡ ዘሱባዔ ፡ ሳድስ ፡ ወተናገረ ፡ ምስለ ፡ አቡሁ ፡ ወአይድዖ ፡ ከመ ፡ የሖር ፡ ውእቱ ፡ እምካራን ፡ ለሐዊረ ፡ ምድረ ፡ ከነዓን ፡ ይርአያ ፡ ወይግባእ ፡ ኀቤሁ ።

29 ወይቤሎ ፡ ታራ ፡ አቡሁ ፡ ሖር ፡ በሰላም ፤ አምላከ ፡ ዓለማት ፡ ያርትዕ ፡ ፍኖተከ ፡ ወእግዚአብሔር ፡ ምስሌከ ፡ ወይትማኅፀንከ ፡ እምኵሉ ፡ እኩይ ፡ ወየሀብ ፡ ላዕሌከ ፡ ሣህለ ፡ ወምሕረተ ፡ ወሞገሰ ፡ በቅድመ ፡ እለ ፡ ይሬእዩከ ፡ ወኢይኰንኑከ ፡ ኵሉ ፡ ውሉደ ፡ ሰብእ ፡ ለአእክዮ ፡ ዲቤከ ፤ ሑር ፡ በሰላም ።

30 ወእመ ፡ ርኢከ ፡ ምድረ ፡ አዳም ፡ ለአዕይንቲከ ፡ ለኀዲር ፡ ውስቴታ ፡ ነዓ ፡ ወንሥአኒ ፡ ምስሌከ ፡ ኀቤከ ። ወንሥኦ ፡ ለሎጥ ፡ ምስሌከ ፡ ወልደ ፡ አራን ፡ እኁከ ፡ ለከ ፡ ለወልደ ፡ ወእግዚአብሔር ፡ ምስሌከ ፡

31 ወናኮርሃ ፡ እኁከ ፡ ኅድግ ፡ ኀቤየ ፡ እስከ ፡ ትገብእ ፡ በሰላም ፡ ወነሐውር ፡ ምስሌከ ፡ ኵልነ ፡ ኅቡረ ።