Chapter 11
Chapter 10 / Book of Jubilees / Dillmann's Edition / Chapter 11 Chapter 12

1 ወበ፴ወ፭ ፡ ኢዮቤልዩ ፡ በሱባዔ ፡ ሣልስ ፡ በ፩ ፡ ዓመቱ ፡ ነሥአ ፡ ሎቱ ፡ ራግው ፡ ብእሲተ ፡ ወስማ ፡ ኦራ ፡ ወለተ ፡ ኦር ፡ ወለተ ፡ ወልደ ፡ ኬሴድ ፡ ወወለደት ፡ ሎቱ ፡ ውሉደ ፡ ወጸውዐ ፡ ስሞ ፡ ሴሩግ ፡ በሳብዕ ፡ ዓመቱ ፡ ለዝ ፡ ሱባዔሁ ፡ ለዝ ፡ ኢዮቤልው ።

2 ወወጠኑ ፡ ውሉደ ፡ ኖኅ ፡ ይትቃተሉ ፡ ለፄውዎ ፡ ወለቀቲል ፡ ፩፩ ፡ እኅዋሁ ፡ ወለክዒወ ፡ ደመ ፡ ሰብእ ፡ ዲበ ፡ ምድር ፡ ወለበሊዐ ፡ ደም ፡ ወለሐኒጸ ፡ አህጉር ፡ ጽኑዓት ፡ ወጥቅም ፡ ወማኅፈድ ፡ ወለተልዕሎ ፡ ብእሲ ፡ ላዕለ ፡ ሕዝብ ፡ ወለሠይመ ፡ መቅድመ ፡ ወለፀዊረ ፡ ፀብእ ፡ ሕዝብ ፡ ቅድመ ፡ ሕዝብ ፡ ወአሕዛብ ፡ ቅድመ ፡ አሕዛብ ፡ ወሀገር ፡ ቅድመ ፡ ሀገር ፡ ወኵሎ ፡ ለአእክዮ ፡ ወለአጥርዮ ፡ ንዋየ ፡ ሐቅል ፡ ወለምህሮ ፡ ውሉዶሙ ፡ ፀብአ ፡ ወአኀዙ ፡ ይፄውዉ ፡ ሀገረ ፡ ወለሠይጠ ፡ ገብር ፡ ወአመት ።

3 ወሐነጸ ፡ ኡር ፡ ወልደ ፡ ኬሴድ ፡ ሀገረ ፡ እራሃ ፡ እንተ ፡ ኬልዴዎን ፡ ወሰመየ ፡ ስማ ፡ በስመ ፡ ዚአሁ ፡ ወበስመ ፡ አቡሁ ።

4 ወገብረ ፡ ሎቱ ፡ ስብክዋተ ፡ ወይሰግዱ ፡ ፩፩ ፡ ለጣዖት ፡ ዘገብሩ ፡ ለርእሶሙ ፡ ስብኮ ፡ ወወጠኑ ፡ ይግበሩ ፡ ግልፎ ፡ ወምስለ ፡ ርኩሰ ፡ ወመናፍስት ፡ ጸዋጋን ፡ ይረድኡ ፡ ወያስሕቱ ፡ ከመ ፡ ይግበሩ ፡ አበሳ ፡ ወርኵሰ ።

5 ወመኰንን ፡ መስቴማ ፡ ይኄይል ፡ ለገቢረ ፡ ዝንቱ ፡ ኵሉ ፡ ወይፌኑ ፡ በእደ ፡ መናፍስት ፡ ለእለ ፡ ተውህቡ ፡ ታሕተ ፡ እደዊሁ ፡ ለገቢረ ፡ ኵሉ ፡ ጌጋይ ፡ ወኃጢአት ፡ ወኵሉ ፡ አበሳ ፡ ለአማስኖ ፡ ወለአኅጕሎ ፡ ወለክዒወ ፡ ደም ፡ ዲበ ፡ ምድር ።

6 በእንተዝ ፡ ተጸውዐ ፡ ስሙ ፡ ለሴሩኅ ፡ ሴሩግ ፡ እስመ ፡ ተመይጡ ፡ ኵሉ ፡ ለገቢረ ፡ ኵሉ ፡ ኃጢአት ።

7 ወልህቀ ፡ ወኀደረ ፡ ውስተ ፡ ኡር ፡ ዘከለዳውያን ፡ ቅሩበ ፡ አበ ፡ እመ ፡ ብእሲቱ ፡ ወኮነ ፡ ያመልክ ፡ ጣዖተ ። ወነሥአ ፡ ሎቱ ፡ ብእሲተ ፡ አመ ፡ ፴ወ፮ ፡ አዮቤልው ፡ በሱባዔ ፡ ኃምስ ፡ በዓመት ፡ ቀዳሚሁ ፡ ሎቱ ፡ ወስማ ፡ ሜልካ ፡ ወለተ ፡ ኬብር ፡ ወለተ ፡ እኅወ ፡ አቡሁ ።

8 ወወለደት ፡ ሎቱ ፡ ናኮርሃ ፡ በዓመት ፡ ቀዳሚሁ ፡ ለዝ ፡ ሱባዔ ፡ ወልህቀ ፡ ወኀደረ ፡ ውስተ ፡ ኡር ፡ ዘከለዳዊያን ፡ ወመሀሮ ፡ አቡሁ ፡ ሑሣሤሆሙ ፡ ለከለዳዊያን ፡ ለተማርዮ ፡ ወለተሰግሎ ፡ በተኣምረ ፡ ስማይ ።

9 ወበ፴ወ፯ ፡ ኢዮቤልው ፡ በሱባዔ ፡ ሳድስ ፡ በ፩ ፡ ዓመቱ ፡ ነሥአ ፡ ሎቱ ፡ ብእሲተ ፡ ወስማ ፡ ኢያስክ ፡ ወለተ ፡ ኔስቴግ ፡ ዘከለዳዊያን ።

10 ወወለደት ፡ ሎቱ ፡ ታራሃ ፡ በዓመተ ፡ ሳብዕ ፡ ሱባዔ ፡ ለዝ ።

11 ወፈነወ ፡ መኰንን ፡ መስቴማ ፡ ቋዓተ ፡ ወአዕዋፈ ፡ ከመ ፡ ይብልዑ ፡ ዘርአ ፡ ዘይዘራእ ፡ ውስተ ፡ ምድር ፡ ወለአማስኖ ፡ ምድር ፡ ከመ ፡ ይሂድዎሙ ፡ ለእጓለ ፡ ሰብእ ፡ ትግብርቶሙ ፡ ዘእንበለ ፡ ይሕርሱ ፡ ዘርአ ፡ ይእርዩ ፡ ቋዓት ፡ እምገጸ ፡ ምድር ።

12 በእንተዝ ፡ ጸውዐ ፡ ስሞ ፡ አቡሁ ፡ ታራ ፡ እስመ ፡ ያስተጼንስዎሙ ፡ ቋዓት ፡ ወአዕዋፍ ፡ ወይበልዑ ፡ ዘርኦሙ ፡ ሎሙ ።

13 ወዓመታት ፡ አኀዙ ፡ ይዕበሩ ፡ እምቅድመ ፡ ገጾሙ ፡ ለአዕዋፍ ፡ ወኵሎ ፡ ፍሬ ፡ ዕፅ ፡ ይበልዑ ፡ እምአዕዋም ፡ በኃይል ፡ ዐቢይ ፡ እመ ፡ ክህሉ ፡ አድኅኖ ፡ ኅዳጠ ፡ እምኵሉ ፡ ፍሬ ፡ ምድር ፡ በመዋዕሊሆሙ ።

14 ወበዘ፴ወ፱ ፡ ኢዮቤልው ፡ በሱባዔ ፡ ካልእ ፡ በቀዳሚ ፡ ዓመት ፡ ነሥአ ፡ ሎቱ ፡ ታራ ፡ ብእሲተ ፡ ወስማ ፡ ኤድና ፡ ወለተ ፡ አብራም ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ።

15 ወበሳብዕ ፡ ዓመቱ ፡ ለዝሱባዔ ፡ ወለደት ፡ ሎቱ ፡ ወልደ ፡ ወጸውዐ ፡ ስሞ ፡ አብራም ፡ በስመ ፡ አቡሃ ፡ ለእሙ ፡ እስመ ፡ ሞተ ፡ ዘእንበለ ፡ ትፅንስ ፡ ወልደ ፡ ወለቱ ፡

16 ወአኀዘ ፡ ሕፃን ፡ ያእምር ፡ ስሕተተ ፡ ምድር ፡ ከመ ፡ ኵሉ ፡ ይስሕት ፡ በድኅሬሆሙ ፡ ለግልፎ ፡ ወድኅረ ፡ ርኵስ ፡ ወመሀሮ ፡ አቡሁ ፡ መጽሐፈ ፡ ወልደ ፡ ፪ ፡ ሱባዔ ፡ ዓመት ፡ ወተፈልጠ ፡ እምአቡሁ ፡ ከመ ፡ ኢይስግድ ፡ ምስሌሁ ፡ ለጣዖት ።

17 ወአኀዘ ፡ ይጸሊ ፡ ኀበ ፡ ፈጣሬ ፡ ኵሉ ፡ ከመ ፡ ያድኅኖ ፡ እምስሕተተ ፡ ውሉደ ፡ ሰብእ ፡ ወከመ ፡ ኢይረድ ፡ መክፈልቱ ፡ ውስተ ፡ ስሒት ፡ ድኅረ ፡ ርኵስ ፡ ወምናኔ ።

18 ወበጽሐ ፡ ጊዜ ፡ ዘርእ ፡ ለዘሪእ ፡ ውስተ ፡ ምድር ፡ ወወፅኡ ፡ ኵሎሙ ፡ ኅቡረ ፡ ከመ ፡ ይዕቀቡ ፡ ዘርኦሙ ፡ እምገጸ ፡ ቋዓት ፡ ወወፅአ ፡ አብራም ፡ ምስለ ፡ እለ ፡ ወፅኡ ፡ ወሕፃን ፡ ውእቱ ፡ ወልደ ፡ ፲ወ፬ ፡ ዓም ።

19 ወደመና ፡ ቋዓት ፡ መጸኡ ፡ ከመ ፡ ይብልዑ ፡ ዘርአ ፡ ወአብራም ፡ ይረውጽ ፡ አንጻሪሆሙ ፡ ዘእንበለ ፡ ይንበሩ ፡ ውስተ ፡ ምድር ፡ ወይኬልሕ ፡ ላዕሌሆሙ ፡ ዘእንበለ ፡ ይንበሩ ፡ ዲበ ፡ ምድር ፡ ለበሊዐ ፡ ዘርእ ፡ ወይብል ፡ ኢትረዱ ፡ ግብኡ ፡ ውስተ ፡ መካን ፡ ኀበ ፡ ወፃእክሙ ፡ ወተመይጡ ።

20 ወገብኡ ፡ በይእቲ ፡ ዕለት ፡ ደመናተ ፡ ቋዓት ፡ ወ፸ፍናው ፡ ወኢይነበሩ ፡ እምኵሉ ፡ ቋዓት ፡ ውስተ ፡ ኵሉ ፡ ገራውህ ፡ ኀበ ፡ ሀሎ ፡ አብራም ፡ ወኢተርፈ ፡ ህየ ፡ ወኢ፩ ።

21 ወይሬእይዎ ፡ ኵሎሙ ፡ እለ ፡ ምስሌሁ ፡ ውስተ ፡ ኵሉ ፡ ገራውህ ፡ ይኬልሕ ፡ ወኵሉ ፡ ቋዓት ፡ ተመይጡ ፡ ወዐብየ ፡ ስሙ ፡ በኵሉ ፡ ምድረ ፡ ከለዳዊያን ።

22 ወመጽኡ ፡ ኀቤሁ ፡ በዓመት ፡ ዝንቱ ፡ ኵሉ ፡ እለ ፡ ይዘርኡ ፡ ወሀሎ ፡ የሐውር ፡ ምስሌሆሙ ፡ እስከ ፡ አመ ፡ የሐልቅ ፡ ጊዜ ፡ ዘርአ ፡ ምድር ፡ ወዘርኡ ፡ ምድሮሙ ፡ ወአብኡ ፡ በውእቱ ፡ ዓመት ፡ እክለ ፡ ወበልዑ ፡ ወጸግቡ ።

23 ወበዓመት ፡ ፩ ፡ ዘሱባዔ ፡ ኃምስ ፡ መሀረ ፡ አብራም ፡ ለእለ ፡ ይገብሩ ፡ ንዋየ ፡ አልህምት ፡ ለኪነተ ፡ ዕፅ ፡ ወገብሩ ፡ ንዋየ ፡ በመልዕልተ ፡ ምድር ፡ በአንጻረ ፡ ድጕር ፡ ዕርፍ ፡ ከመ ፡ ያንብረ ፡ ላዕሌሁ ፡ ዘርአ ፡ ወይወርድ ፡ እምውስቴቱ ፡ ዘርእ ፡ ውስተ ፡ ከተማ ፡ ዘርእ ፡ ወይትኀባእ ፡ ውስተ ፡ ምድር ፡ ወኢይፈርሁ ፡ እንከ ፡ እምገጸ ፡ ቋዓት ።

24 ወገብሩ ፡ ከመዝ ፡ ላዕለ ፡ ኵሉ ፡ ድጕረ ፡ ዕርፍ ፡ ወድጕረ ፡ ዕርፍ ፡ መልዕልተ ፡ ምድር ፡ ወዘርኡ ፡ ወገብሩ ፡ ኵሉ ፡ ምድር ፡ ኵሎ ፡ ዘከመ ፡ አዘዞሙ ፡ አብራም ፡ ወኢይፈርሁ ፡ እንከ ፡ እምገጸ ፡ አዕዋፍ ።