Chapter 10
Chapter 9 / Book of Jubilees / Dillmann's Edition / Chapter 10 Chapter 11

1 ወበሱባዔ ፡ ሣልስ ፡ ዘኢዮቤልዩ ፡ ዝንቱ ፡ አኀዙ ፡ አጋንንት ፡ ርኩሳን ፡ ያስሕትዎሙ ፡ ለደቂቀ ፡ ኖኅ ፡ ወያአብድዎሙ ፡ ወያሐጕልዎሙ ።

2 ወመጽኡ ፡ ውሉዱ ፡ ኀበ ፡ ኖኅ ፡ አቡሆሙ ፡ ወነገርዎ ፡ በእንተ ፡ አጋንንት ፡ እለ ፡ ያስሕትዎሙ ፡ ወይጼልሉ ፡ ወይቀትሉ ፡ ውሉደ ፡ ውሉዱ ።

3 ወጸለየ ፡ ቅድመ ፡ እግዚአብሔር ፡ አምላኩ ፡ ወይቤ ፡ አምላከ ፡ መናፍስት ፡ ዘውስተ ፡ ኵሉ ፡ ዘሥጋ ፡ ዘገበርከ ፡ ምስሌየ ፡ ምሕረተ ፡ ወአድኀንከኒ ፡ ወውሉድየሂ ፡ እምነ ፡ ማየ ፡ አይኅ ፡ ወኢገበርከኒ ፡ ከመ ፡ እኅልቅ ፡ ከመ ፡ ገበርከ ፡ ለውሉደ ፡ ሐጕል ፡ እስመ ፡ ዐቢይ ፡ ሣህልከ ፡ ላዕሌየ ፡ ወዐብየት ፡ ምሕረትከ ፡ ላዕለ ፡ ነፍስየ ፡ ይትለዐል ፡ ሣህልከ ፡ ላዕለ ፡ ውሉደ ፡ ውሉድከ ። ወኢይመብሉ ፡ መንፈስ ፡ እኩያን ፡ ላዕሌሆሙ ፡ ከመ ፡ ኢያማስንዎሙ ፡ እምነ ፡ ምድር ።

4 ወአንተ ፡ ባርከኒ ፡ ኪያየ ፡ ወውሉድየ ፡ ንልሀቅ ፡ ወንብዛኅ ፡ ወንምልኣ ፡ ለምድር ።

5 ወአንተ ፡ ታአምር ፡ ዘከመ ፡ ገብሩ ፡ ትጉሃኒከ ፡ አበዊሆሙ ፡ ለእሉ ፡ መንፈስ ፡ በመዋዕልየ ፡ ወዝኒ ፡ መናፍስት ፡ እለ ፡ ሀለዉ ፡ በሕይወት ፡ ዕፅዎሙ ፡ ወአኀዞሙ ፡ ውስተ ፡ መካነ ፡ ደይን ፡ ወኢያማስኑ ፡ ውስተ ፡ ውሉደ ፡ ገብርከ ፡ አምላኪየ ፡ እስመ ፡ ጸዋጋን ፡ እሙንቱ ፡ ወለአማስኖ ፡ ተፈጥሩ ፡

6 ወኢይመብሉ ፡ በመንፈሰ ፡ ሕያዋን ፡ እስመ ፡ አንተ ፡ ባሕቲትከ ፡ ታአምር ፡ ኵነኔሆሙ ፡ ወኢይትበውሑ ፡ ላዕለ ፡ ውሉደ ፡ ጻድቃን ፡ እምይእዜ ፡ ወእስከ ፡ ለዓለም ።

7 ወይቤለነ ፡ አምላክነ ፡ ከመ ፡ ንእስር ፡ ኵሎ ፡

8 ወመጽአ ፡ መልአከ ፡ መናፍስት ፡ መስቴማ ፡ ወይቤ ፡ እግዚእ ፡ ፈጣሪ ፡ አትርፍ ፡ እምኔሆሙ ፡ ቅድሜየ ፡ ወይስምዑ ፡ ቃልየ ፡ ወይግበሩ ፡ ኵሎ ፡ ዘእቤሎሙ ፡ እስመ ፡ ለእመ ፡ ኢተርፉ ፡ ሊተ ፡ እምውስቴቶሙ ፡ ኢይክል ፡ ገቢረ ፡ ሥልጣነ ፡ ፈቃድየ ፡ ውስተ ፡ ውሉደ ፡ ሰብእ ። እስመ ፡ እሙንቱ ፡ ውእቶሙ ፡ ለአማስኖ ፡ ወለአሕጕሎ ፡ ወለአስሕቶ ፡ ቅድመ ፡ ኵነኔ ፡ እስመ ፡ ዐቢይ ፡ እከዮሙ ፡ ለውሉደ ፡ ሰብእ ።

9 ወይቤ ፡ ይተረፍ ፡ ቅድሜሁ ፡ ዐሥራቶሙ ፡ ወ፱ ፡ መክፈልት ፡ ይውርዱ ፡ ውስተ ፡ መካነ ፡ ደይን ።

10 ወለ፩ ፡ እምኔነ ፡ ይቤ ፡ ከመ ፡ ንምሀሮ ፡ ለኖኅ ፡ ኵሎ ፡ ፈውሶሙ ፡ እስመ ፡ ያአምር ፡ ከመ ፡ አኮ ፡ በርትዕ ፡ ዘየሐውሩ ፡ ወአኮ ፡ በጽድቅ ፡ ዘይትበአሱ ።

11 ወገበርነ ፡ በከመ ፡ ቃሉ ፤ ኵሎ ፡ እኩያነ ፡ እለ ፡ ይጸወጉ ፡ አሰርነ ፡ ውስተ ፡ መካነ ፡ ደይን ፡ ወዐሥራቶሙሰ ፡ አትረፍነ ፡ ከመ ፡ ይትኰነኑ ፡ ቅድመ ፡ ሰይጣን ፡ ዲበ ፡ ምድር ።

12 ወፈውሰ ፡ ደዌሆሙ ፡ ኵሎ ፡ ነገርናሁ ፡ ለኖኅ ፡ ምስለ ፡ አስሕቶቶሙ ፡ ከመ ፡ ይፈውስ ፡ በዕፀወ ፡ ምድር ።

13 ወጸሐፈ ፡ ኖኅ ፡ ኵሎ ፡ ዘከመ ፡ ምህርናሁ ፡ በመጽሐፍ ፡ በኵሉ ፡ ትዝምደ ፡ ፈውሳት ፡ ወተዐጽዉ ፡ መናፍስት ፡ እኩያን ፡ እምድኅሬሆሙ ፡ ለውሉደ ፡ ኖኅ ።

14 ወወሀበ ፡ ኵሎ ፡ መጻሕፍተ ፡ ዘጸሐፈ ፡ ለሴም ፡ ወልዱ ፡ ዘይልህቅ ፡ እስመ ፡ ኪያሁ ፡ ያፈቅሮ ፡ ፈድፋደ ፡ እምነ ፡ ኵሉ ፡ ውሉዱ ።

15 ወኖመ ፡ ኖኅ ፡ ምስለ ፡ አበዊሁ ፡ ወተቀብረ ፡ ውስተ ፡ ሉባር ፡ ደብር ፡ በምድረ ፡ አራራት ።

16 ፱፻ ፡ ወ፶ ፡ ዓመተ ፡ ፈጸመ ፡ በሕይወቱ ፡ ፲ወ፱ ፡ ኢዮቤልወ ፡ ወክልኤ ፡ ሱባዔ ። ወ፭ ፡ ዓመተ ፡

17 ዘአፈድፈደ ፡ ሐይወ ፡ ዲበ ፡ ምድር ፡ እምውሉደ ፡ ሰብእ ፡ በእንተ ፡ ጽድቁ ፡ ዘባቲ ፡ ፍጹም ፡ በጽድቁ ፡ ዘእንበለ ፡ ኤኖክ ። እስመ ፡ ግብሩ ፡ ለኤኖክ ፡ ፍጥረት ፡ ውእቱ ፡ ለስምዕ ፡ ለትዝምደ ፡ ዓለም ፡ ከመ ፡ ይንግር ፡ ኵሎ ፡ ግብረ ፡ ትውልድ ፡ በዕለተ ፡ ደይን ።

18 ወበ፴ወ፫ ፡ ኢዮቤልው ፡ በዓመት ፡ ፩ ፡ በዘካልእ ፡ ሱባዔ ፡ ነሥአ ፡ ሎቱ ፡ ፋሌክ ፡ ብእሲተ ፡ እንተ ፡ ስማ ፡ ሎምና ፡ ወለተ ፡ ሲናአር ፡ ወወለደት ፡ ሎቱ ፡ ወልደ ፡ በዓመት ፡ ራብዕ ፡ ዘሱባዔ ፡ ዝንቱ ። ወጸውዖ ፡ ስሞ ፡ ራግው ፡ እስመ ፡ ይቤ ፡ ናሁ ፡ ውሉደ ፡ ሰብእ ፡ ኮኑ ፡ እኩያነ ፡ ለምክረ ፡ ፁግ ፡ ከመ ፡ ይሕንፁ ፡ ሎሙ ፡ ሀገረ ፡ ወማኅፈደ ፡ ውስተ ፡ ምድረ ፡ ሰናኦር ።

19 እስመ ፡ ፈለሱ ፡ እምድረ ፡ አራራት ፡ መንገለ ፡ ጽባሕ ፡ ውስተ ፡ ሰናአር ፡ እስመ ፡ በመዋዕሊሁ ፡ ሐነጽዎ ፡ ለሀገር ፡ ወለማኅፈድ ፡ እንዘ ፡ ይብሉ ፡ ንዕርግ ፡ ቦቱ ፡ ውስተ ፡ ሰማይ ።

20 ወአኀዙ ፡ ይሕንጹ ፡ ወበሱባዔ ፡ ራብዕ ፡ ...በእሳት ፡ ወኮኖሙ ፡ ግንፋል ፡ ከመ ፡ እብን ፡ ወፅቡር ፡ በዘይመርጉ ፡ ቦቱ ፡ አስፋሊጦስ ፡ ዘይወፅእ ፡ እምነ ፡ ባሕር ፡ ወእምአንቅዕተ ፡ ማያት ፡ በምድረ ፡ ሰናኦር ።

21 ወሐነጽዎ ፡ ፵ ፡ ዓመተ ፡ ወ፫ ፡ ዓመተ ፡ ሀለዉ ፡ የሐንጽዎ ፡ ግንፋለ ፡ ፍጹመ ፡ ፫ወ፲ ፡ ውስቴቱ ፡ ወ፫ ፡ አሐቲ ፡ ለኑኁ ፡ አሐቲ ፡ ፶፻ወ፬፻ወ፴ወ፫ ፡ በእመት ፡ ዐርገ ፡ ኑኁ ፡ ወክልኤ ፡ ስዝር ፡ ወ፲ወ፭ ፡ ምዕራፍ ።

22 ወይቤለነ ፡ እግዚአብሔር ፡ አምላክነ ፡ ለነ ፡ ናሁ ፡ ሕዝብ ፡ ፩ ፡ ወጠነ ፡ ይግበር ፡ ወይእዜኒ ፡ ኢየኃልቅ ፡ እምኔሆሙ ። ንዑ ፡ ንረድ ፡ ወንክዐው ፡ ልሳናቲሆሙ ፡ ወኢይስማዕ ፡ ፩፩ቃለ ፡ ካልኡ ፡ ወይዘረዉ ፡ ውስተ ፡ አህጉር ፡ ወውስተ ፡ አሕዛብ ፡ ወኢትንበር ፡ እንከ ፡ አሐቲ ፡ ምክር ፡ ላዕሌሆሙ ፡ እስከ ፡ ዕለተ ፡ ደይን ።

23 ወወረደ ፡ እግዚአብሔር ፡ ወወረድነ ፡ ምስሌሁ ፡ ንርአይ ፡ ሀገረ ፡ ወማኅፈደ ፡ ዘሐነጹ ፡ ውሉደ ፡ ሰብእ ።

24 ወሶጠ ፡ ኵሎ ፡ ቃለ ፡ ልሳናቲሆሙ ፡ ወኢሰምዐ ፡ እንከ ፡ አሐዱ ፡ ቃለ ፡ ካልኡ ፡ ወአንተጉ ፡ እንከ ፡ ሐኒጸ ፡ ሀገር ፡ ወማኅፈድ ።

25 በእንተዝ ፡ ተሰምየት ፡ ኵላ ፡ ምድረ ፡ ሰናኦር ፡ ባቤል ፡ እስመ ፡ በህየ ፡ ሰጠጠ ፡ አምላክ ፡ ኵሎ ፡ ልሳናቲሆሙ ፡ ለውሉደ ፡ ሰብእ ፡ ወእምህየ ፡ ተዘርዉ ፡ ውስተ ፡ አህጉሪሆሙ ፡ በበ ፡ ልሳናቲሆሙ ፡ ወበበ ፡ ሕዘቢሆሙ ።

26 ወፈነወ ፡ እግዚአብሔር ፡ ነፋሰ ፡ ዐቢየ ፡ ውስተ ፡ ማኅፈድ ፡ ወገፍትኦ ፡ ውስተ ፡ ምድር ፡ ወናሁ ፡ ውእቱ ፡ ማኅፈድ ፡ ማእከለ ፡ ምድረ ፡ አሱር ፡ ወባቢሎን ፡ ውስተ ፡ ምድረ ፡ ሰናኦር ፡ ወጸውዐ ፡ ስሞ ፡ ድቀት ።

27 በሱባዔ ፡ ራብዕ ፡ በ፩ ፡ ዓመት ፡ በቅድመ ፡ ዚአሁ ፡ ዘ፴ወ፬ ፡ ኢዮቤልው ፡ ተዘርዉ ፡ እምድረ ፡ ሲናኦር ።

28 ወሖሩ ፡ ካም ፡ ወውሉዱ ፡ ውስተ ፡ ምድር ፡ እንተ ፡ እኅዝት ፡ ሎቱ ፡ ዘረከቦ ፡ በመክፈልቱ ፡ ውስተ ፡ ምድረ ፡ ...

29 ወርእየ ፡ ከናአን ፡ ምድረ ፡ ሊባኖስ ፡ እስከ ፡ ሙሐዘ ፡ ግብጽ ፡ ከመ ፡ ሠናይት ፡ ይእቲ ፡ ጥቀ ፡ ወኢሖረ ፡ ውስተ ፡ ምድረ ፡ ርስቱ ፡ መንገለ ፡ ዐረብ ፡ ባሕር ፡ ወኀደረ ፡ ውስተ ፡ ምድረ ፡ ሊባኖስ ፡ እምጽባሕ ፡ ወእምዐረብ ፡ ምድረ ፡ ዮርደኖስ ፡ ወበእደ ፡ ባሕር ።

30 ወይቤሎ ፡ ካም ፡ አቡሁ ፡ ወኵስ ፡ ወሜጽሬም ፡ ወአኃዊሁ ፡ እስመ ፡ ኀደርከ ፡ ውስተ ፡ ምድር ፡ እንተ ፡ ኢኮነት ፡ እንቲአከ ፡ ወኢወፅአ ፡ ለነ ፡ በዕፃዌ ፡ ኢትግበር ፡ ከመዝ ፡ እስመ ፡ ለእመ ፡ ከመዝ ፡ ገበርከ ፡ አንተሂ ፡ ወደቂቅከሂ ፡ ትወድቁ ፡ በኲናት ፡ ውስተ ፡ ምድር ፡ ወርጉማን ፡ በሀከክ ፡ እስመ ፡ በሀከክ ፡ ኀደርክሙ ፡ ወበሀከክ ፡ ይወድቁ ፡ ደቂቅከ ፡ ወትሴፎ ፡ ለዓለም ።

31 ኢትኅድር ፡ ውስተ ፡ ማኅደረ ፡ ሴም ፡ እስመ ፡ ለሴም ፡ ወለውሉዱ ፡ ወፅአ ፡ በዕፆሙ ፤

32 ርጉም ፡ አንተ ፡ ወርጉመ ፡ ትከውን ፡ እምኵሎሙ ፡ ውሉደ ፡ ኖኅ ፡ በመርገም ፡ እንተ ፡ ተሠራዕነ ፡ በመሐላ ፡ በቅድሜሁ ፡ ለመኰንን ፡ ቅዱስ ፡ ወበቅድመ ፡ ኖኅ ፡ አቡነ ።

33 ወኢሰምዖሙ ፡ ወኀደረ ፡ ምድረ ፡ ሊባኖስ ፡ እምኤማት ፡ እስከ ፡ ሙባአ ፡ ግብጽ ፡ ውእቱ ፡ ወውሉዱ ፡ እስከ ፡ ዛዕለት ።

34 ወበእንተዝ ፡ ተሰምየት ፡ ይእቲ ፡ ምድር ፡ ከናአን ።

35 ወያፌትሰ ፡ ወውሉዱ ፡ ሖሩ ፡ መንገለ ፡ ባሕር ፡ ወኀደሩ ፡ ውስተ ፡ መክፈልቶሙ ፡ ወርእየ ፡ ማዳይ ፡ ምድረ ፡ ባሕር ፡ ወአደመቶ ፡ በቅድሜሁ ፡ ወአስተብቍዓ ፡ እምኀበ ፡ ኤላም ፡ ወአሶር ፡ ወአርፋክስድ ፡ እምኀበ ፡ እኅወ ፡ ብእሲቱ ፡ ወኀደረ ፡ ውስተ ፡ ምድረ ፡ ሜድቂን ፡ ቅሩበ ፡ ኀበ ፡ እኅወ ፡ ብእሲቱ ፡ እስከ ፡ ዛቲ ፡ ዕለት ፡

36 ወሰመየ ፡ ምንባሪሁ ፡ ወምንባረ ፡ ውሉዱ ፡ መደቂን ፡ በስመ ፡ ማዳይ ፡ አቡሆሙ ።