Chapter 9
Chapter 8 / Book of Jubilees / Dillmann's Edition / Chapter 9 Chapter 10

1 ወከፈለ ፡ ካም ፡ ማእከለ ፡ ውሉዱ ፡ ወወፅአ ፡ ቀዳሚ ፡ መክፈልት ፡ ለኵስ ፡ መንገለ ፡ ጽባሕ ፡ ወዐረቢሁ ፡ ሎቱ ፡ ለፉድ ፡ ወዐረቢሁ ፡ ሎቱ ፡ ለከናአን ፡ መንገለ ፡ ዐረበ ፡ ባሕር ።

2 ወሴምኒ ፡ ከፈለ ፡ ውእቱሂ ፡ ማእከለ ፡ ውሉዱ ፡ ወወፅአ ፡ መክፈልት ፡ ቀዳሚ ፡ ለኤላም ፡ ወለውሉዱ ፡ መንገለ ፡ ጽባሑ ፡ ለጤግርስ ፡ ፈለግ ፡ እስከ ፡ ሶበ ፡ ይቀርብ ፡ መንገለ ፡ ጽባሕ ፡ ኵላ ፡ ምድረ ፡ ህንደኬ ፡ ወበኤርትራ ፡ በእዴሁ ፡ ወማያተ ፡ ዴዳን ፡ ወኵሉ ፡ አድባር ፡ ዘምብሪ ፡ ወኤላ ፡ ወኵሉ ፡ ምድረ ፡ ሱሳን ፡ ወኵሉ ፡ ዘበእደ ፡ ፈርናክ ፡ እስከ ፡ ባሕረ ፡ ኤርትራ ፡ ወእስከ ፡ ጢና ፡ ፈለግ ።

3 ወለአሱርኒ ፡ ወፅአ ፡ መክፈልት ፡ ካልእ ፡ ኵላ ፡ ምድረ ፡ አሱር ፡ ወነነዌ ፡ ወሲናኦር ፡ ወእስከ ፡ ቅሩበ ፡ ህንደኬ ፡ ወየዐርግ ፡ ውስተ ፡ ፈለግ ።

4 ወለአርፋክስድ ፡ ወፅአ ፡ መክፈልት ፡ ሣልስ ፡ ኵላ ፡ ምድረ ፡ ዘደወለ ፡ ከላዴዎን ፡ መንገለ ፡ ጽባሑ ፡ ለኤውፍራጢስ ፡ ዘቅሩብ ፡ ለባሕረ ፡ ኤርትራ ፡ ወኵሉ ፡ ማያተ ፡ ገዳም ፡ እስከ ፡ ቅሩብ ፡ ውስተ ፡ ልሳነ ፡ ባሕር ፡ እንተ ፡ ትኔጽር ፡ መንገለ ፡ ግብጽ ፡ ኵላ ፡ ምድረ ፡ ሊባኖስ ፡ ወሳኔር ፡ ወአማና ፡ እስከ ፡ ቅሩበ ፡ አውፍራጢስ ።

5 ወለአራም ፡ ወፅአ ፡ መክፈልት ፡ ራብዕ ፡ ኵላ ፡ ምድረ ፡ ሜስጰጦምያ ፡ ማእከለ ፡ ጥግሪስ ፡ ወኤፍራጥስ ፡ መንገለ ፡ ደቡብ ፡ ለከለዳውያን ፡ እስከ ፡ ቅሩበ ፡ ደብረ ፡ አሱር ። ወምድረ ፡ አረራ ፡

6 ለውሉድ ፡ ወፅአ ፡ መክፈልቱ ፡ ኃምስ ፡ ደብረ ፡ አሱር ፡ ወኵሉ ፡ ዚአሁ ፡ እስከ ፡ ይቀርብ ፡ መንገለ ፡ ጽባሐ ፡ አሱር ፡ እኁሁ ።

7 ወያፌት ፡ ውእቱሂ ፡ ከፈለ ፡ ምድረ ፡ ርስቱ ፡ ማእከለ ፡ ውሉዱ ፡

8 ወወፅአ ፡ መክፈልት ፡ ቀዳሚ ፡ ለጎሜር ፡ መንገለ ፡ ጽባሕ ፡ እምገጸ ፡ ደቡብ ፡ እስከ ፡ ጢና ፡ ፈለግ ። ወበደቡብ ፡ ለማጎግ ፡ ወፅአ ፡ ኵሉ ፡ ውሣጥያቲሁ ፡ ለደቡብ ፡ እስከ ፡ ይቀርብ ፡ መንገለ ፡ ባሕረ ፡ ሜአት ።

9 ወለማዳይ ፡ ወፅአ ፡ መክፈልቱ ፡ ከመ ፡ የአኀዝ ፡ እምዐረብ ፡ ለክልኤሆሙ ፡ አኃዊሁ ፡ እስከ ፡ ደሰያት ፡ ወእስከ ፡ ጽነፊሆን ፡ ለደሰያት ፡

10 ወለኢዮእዋን ፡ ወፅአ ፡ መክፈልት ፡ ራብዕ ፡ ኵሉ ፡ ደሰያት ፡ ወደሰያት ፡ ዘመንገለ ፡ እደሉድ ።

11 ወለቶቤልሂ ፡ ወፅአ ፡ መክፈልት ፡ ኃምስ ፡ ማእከለ ፡ ልሳን ፡ እንተ ፡ ትቀርብ ፡ መንገለ ፡ እደ ፡ መክፈልተ ፡ ሉድ ፡ እስከ ፡ ልሳን ፡ ካልእት ፡ ውስተ ፡ ማዕዶተ ፡ ልሳን ፡ ካልእት ፡ ውስተ ፡ ልሳን ፡ ሣልስት ።

12 ወለምስክ ፡ ወፅአ ፡ መክፈልት ፡ ሳድስ ፡ ወኵሉ ፡ ማዕዶተ ፡ ልሳን ፡ ዘሣልስት ፡ እስከ ፡ ይቀርብ ፡ ጽባሒሁ ፡ ለጋዲር ።

13 ወለቲራስ ፡ ወፅአ ፡ መክፈልት ፡ ሳብዕ ፡ ፬ ፡ ደሰያት ፡ ዐበይት ፡ በማእከለ ፡ ባሕር ፡ እለ ፡ ይቀርቡ ፡ ለመክፈልተ ፡ ካም ፡ ወደሰያት ፡ ዘከማቱሪ ፡ ለውሉደ ፡ አርፋክስድ ፡ ወፅአ ፡ በዑፃዌ ፡ ሎቱ ፡ ርስተ ።

14 ወከመዝ ፡ ከፈሉ ፡ ውሉደ ፡ ኖኅ ፡ ለደቂቆሙ ፡ በቅድመ ፡ ኖኅ ፡ አቡሆሙ ፡ ወአምሐለ ፡ በመርገም ፡ ረጊሞሙ ፡ ለኵሉ ፡ በበ ፡ ፩፩ ፡ ዘፈቀደ ፡ የአኀዝ ፡ መክፈልተ ፡ ዘኢወፅአ ፡ በዕፃሁ ።

15 ወይቤሉ ፡ ኵሎሙ ፡ ለይኩን ፡ ወለይኩን ፡ ሎሙ ፡ ወለውሉዶሙ ፡ እስከ ፡ ለዓለም ፡ በትዝምዶሙ ፡ እስከ ፡ አመ ፡ ዕለተ ፡ ደይን ፡ በዘ ፡ ይኴንኖሙ ፡ እግዚአብሔር ፡ አምላክ ፡ በሰይፍ ፡ ወበእሳት ፡ በእንተ ፡ ኵሉ ፡ እከይ ፡ ዘርኩስ ፡ ዘጌጋዮሙ ፡ ዘመልእዋ ፡ ለምድር ፡ አበሳ ፡ ወርኩሰ ፡ ወዝሙተ ፡ ወኀጢአተ ።