Chapter 8
Chapter 7 / Book of Jubilees / Dillmann's Edition / Chapter 8 Chapter 9

1 ወበ፳ወ፱ ፡ ኢዮቤልዉ ፡ በሱባዔ ፡ ቀዳሚ ፡ በቀዳሚሁ ፡ ነሥአ ፡ ሎቱ ፡ አርፋክስድ ፡ ብእሲተ ፡ ወስማ ፡ ራሱእያ ፡ ወለተ ፡ ሱሰን ፡ ወለተ ፡ ኤላም ፡ ሎቱ ፡ ብእሲተ ፡ ወወለደት ፡ ሎቱ ፡ ወልደ ፡ በዓመት ፡ ሣልስ ፡ ዘሱባዔ ፡ ዝንቱ ፡ ወጸውዐ ፡ ስሞ ፡ ቃይናም ።

2 ወልህቀ ፡ ወልድ ፡ ወመሀሮ ፡ አቡሁ ፡ መጽሐፈ ፡ ወሖረ ፡ ይኅሥሥ ፡ ሎቱ ፡ መካነ ፡ ኀበ ፡ ይእኅዝ ፡ ሎቱ ፡ ሀገረ ።

3 ወረከበ ፡ መጽሐፈ ፡ ዘቈረጹ ፡ ቀደምት ፡ ውስተ ፡ ኰኵሕ ፡ ወአንበበ ፡ ዘውስቴታ ፡ ወአዕለዋ ፡ ወረስዐ ፡ እምውስቴታ ፡ ከመ ፡ ሀሎ ፡ ውስቴታ ፡ ትምህርተ ፡ ትጉሃን ፡ በዘ ፡ ይሬእዩ ፡ ሰገለ ፡ ፀሓይ ፡ ወወርኅ ፡ ወከዋክብት ፡ ወውስተ ፡ ኵሉ ፡ ተኣምረ ፡ ሰማይ ፡

4 ወጸሐፈ ፡ ወኢነገረ ፡ በእንቲአሃ ፡ እስመ ፡ ይፈርሆ ፡ ለኖኅ ፡ ነጊረ ፡ በእንቲአሃ ፡ ከመ ፡ ኢይትመዓዕ ፡ ላዕሌሁ ፡ በእንቲአሃ ።

5 ወአመ ፡ ፴ ፡ ኢዮቤልዉ ፡ በሱባዔ ፡ ካልእ ፡ በቀዳሚ ፡ ዓመቱ ፡ ነሥአ ፡ ሎቱ ፡ ብእሲተ ፡ ወስማ ፡ ሜልካ ፡ ወለተ ፡ አባዳይ ፡ ወልደ ፡ ያፌት ፡ ወበዓመት ፡ ራብዑ ፡ ሎቱ ፡ ወለደት ፡ ወልደ ፡ ወጸውዐ ፡ ስሞ ፡ ሳላ ፡ እስመ ፡ ይቤ ፡ ተፈንዎ ፡ ተፈነውኩ ።

6 ወበዓመት ፡ ራብዕ ፡ ተወልደ ፡ ወልህቀ ፡ ሳላ ፡ ወነሥአ ፡ ሎቱ ፡ ብእሲተ ፡ ወስማ ፡ ሙአክ ፡ ወለተ ፡ ኬሴድ ፡ እኅወ ፡ አቡሁ ፡ ሎቱ ፡ ብእሲተ ፡ በዓመት ፡ ወበ፴ ፡ ኢዮቤልዩ ፡ በሱባዔ ፡ ኃምስ ፡ በቀዳሚ ፡ ዓመቱ ።

7 ወወለደት ፡ ሎቱ ፡ ወልደ ፡ በኃምስ ፡ ዓመቱ ፡ ወጸውዐ ፡ ስሞ ፡ ኤቦር ፡ ወነሥአ ፡ ሎቱ ፡ ብእሲተ ፡ ወስማ ፡ አዙራድ ፡ ወለተ ፡ ኔብሮድ ፡ በ፴ወ፪ ፡ ኢዮቤልው ፡ በሱባዔ ፡ ሳብዕ ፡ በሣልስ ፡ ዓመቱ ።

8 ወበሳድስ ፡ ዓመቱ ፡ ወለደት ፡ ሎቱ ፡ ወልደ ፡ ወጸውዐ ፡ ስሞ ፡ ፋሌክ ፡ እስመ ፡ በመዋዕል ፡ ዘተወልደ ፡ አኀዙ ፡ ደቂቀ ፡ ኖኅ ፡ ይትካፈሉ ፡ ሎሙ ፡ ምድረ ፡ ወበእንተዝ ፡ ጸውዐ ፡ ስሞ ፡ ፋሌክ ።

9 ወተካፈሉ ፡ ሎሙ ፡ ምድረ ፡ በእኩይ ፡ በበይናቲሆሙ ፡ ወነገርዎ ፡ ለኖኅ ።

10 ወኮነ ፡ በቀዳሚሁ ፡ ለ፴ወ፫ ፡ ኢዮቤልው ፡ ወከፈልዋ ፡ ለምድር ፡ ፫ ፡ መክፈልተ ፡ ለሴም ፡ ወለካም ፡ ወለያፌት ፡ በበ ፡ ርስቱ ፡ በቀዳሚ ፡ ዓመት ፡ ዘ፩ ፡ ሱባዔ ፡ መልእክ ፡ እንዘ ፡ ይነብር ፡ ፩ ፡ እምኔነ ፡ እለ ፡ ተፈነውነ ፡ ኀቤሆሙ ።

11 ወጸውዐ ፡ ደቂቆ ፡ ወቀርቡ ፡ ኀቤሁ ፡ እሙንቱ ፡ ወውሉዶሙ ፡ ወከፈለ ፡ ምድረ ፡ በዑፃዌ ፡ ዘይእኅዙ ፡ ሠለስቲሆሙ ፡ ውሉዱ ፡ ወሰፍሑ ፡ እደዊሆሙ ፡ ወነሥኡ ፡ ሎሙ ፡ መጽሐፈ ፡ እምኅፅነ ፡ ኖኅ ፡ አቡሆሙ ።

12 ወወጽአ ፡ በመጽሐፍ ፡ ዕፃሁ ፡ ለሴም ፡ ማእከለ ፡ ምድር ፡ ዘይእኅዝ ፡ ለርስቱ ፡ ወለውሉዱ ፡ ለትውልድ ፡ ዘለዓለም ፡ እማእከለ ፡ ደብረ ፡ ራፋ ፡ እሙፃአ ፡ ማይ ፡ እምፈለገ ፡ ጢና ፡ ወየሐውር ፡ መክፈልቱ ፡ መንገለ ፡ ዐረብ ፡ እንተ ፡ ማእከለዝ ፡ ፈለግ ፡ ወየሐውሩ ፡ እስከ ፡ ይቀርቡ ፡ ኀበ ፡ ቀላየ ፡ ማያት ፡ እምኀበ ፡ ይወፅእ ፡ ዝንቱ ፡ ፈለግ ፡ እምኔሃ ፡ ወይወፅእ ፡ ዝንቱ ፡ ፈለግ ፡ ወይክዑ ፡ ማያቲሁ ፡ ውስተ ፡ ባሕረ ፡ ሚኦት ፡ ወየሐውር ፡ ዝፈለግ ፡ ውስተ ፡ ባሐር ፡ ዐቢይ ፤ ኵሉ ፡ ዘመንገለ ፡ ደቡብ ፡ ለያፌት ፡ ወኵሉ ፡ ዘመንገለ ፡ ገጸ ፡ ሰሜን ፡ ለሴም ።

13 ወየሐውር ፡ እስከ ፡ ሶበ ፡ ይቀርብ ፡ ካራሶ ፡ ዝውእቱ ፡ ውስተ ፡ ሕፅነ ፡ ልሳን ፡ እንተ ፡ ትኔጽር ፡ መንገለ ፡ ሰሜን ።

14 ወየሐውር ፡ መክፈልቱ ፡ እንተ ፡ መንገለ ፡ ባሕር ፡ ዐቢይ ፡ ወየሐውር ፡ ርቱዐ ፡ እስከ ፡ ይቀርብ ፡ መንገለ ፡ ዐረቢሃ ፡ ለልሳን ፡ እንተ ፡ ትኔጽር ፡ መንገለ ፡ ሰሜን ፡ እስመ ፡ ዛቲ ፡ ባሕር ፡ ስማ ፡ ልሳነ ፡ ባሕረ ፡ ግብጽ ።

15 ወትገምፅ ፡ እምህየ ፡ መንገለ ፡ ሰሜን ፡ መንገለ ፡ አፉሃ ፡ ለባሕር ፡ ዐባይ ፡ ውስተ ፡ ከናፍረ ፡ ማያት ፡ ወተሐውር ፡ መንገለ ፡ ዐረብ ፡ ዓፈራ ፡ ወተሐውር ፡ እስከ ፡ ትቀርብ ፡ ኀበ ፡ ማየ ፡ ግዮን ፡ ፈለግ ፡ ወመንገለ ፡ ሰሜኑ ፡ ለማየ ፡ ግዮን ፡ መንገለ ፡ ድንጋጉ ፡ ለዝ ፡ ፈለግ ።

16 ወተሐውር ፡ መንገለ ፡ ጽባሕ ፡ እስከ ፡ ሶበ ፡ ትቀርብ ፡ ኀበ ፡ ገነተ ፡ ኤዶም ፡ መንገለ ፡ ሰሜኑ ፡ ለሰሜን ፡ ወእምጽባሒሃ ፡ ለኵላ ፡ ምድረ ፡ ኤዶም ፡ ወለኵሉ ፡ ጽባሕ ፡ ወይትመየጥ ፡ ውስተ ፡ ጽባሕ ፡ ይመጽእ ፡ እስከ ፡ ሶበ ፡ ይቀርብ ፡ መንገለ ፡ ጽባሒሁ ፡ ለደብር ፡ ዘስሙ ፡ ራፋ ፡ ወይወርድ ፡ መንገለ ፡ ጽንፉ ፡ ለሙፃአ ፡ ማየ ፡ ጢና ፡ ፈለግ ።

17 ዛቲ ፡ መክፈልት ፡ ወፅአት ፡ በዕፁ ፡ ለሴም ፡ ወለውሉዱ ፡ ለእኂዞታ ፡ ለዓለም ፡ ለትውልዱ ፡ እስከ ፡ ለዓለም ።

18 ወተፈሥሐ ፡ ኖኅ ፡ እስመ ፡ ወፅአ ፡ ዝንቱ ፡ መክፈልት ፡ ለሴም ፡ ወለውሉዱ ፡ ወተዘከረ ፡ ቃሎ ፡ ዘነበበ ፡ በአፉሁ ፡ በትንቢት ፡ እስመ ፡ ይቤ ፡ ይትባረክ ፡ እግዚአብሔር ፡ አምላኩ ፡ ለሴም ፡ ወይኅድር ፡ እግዚአብሔር ፡ ውስተ ፡ ማኅደሪሁ ፡ ለሴም ።

19 ወአእመረ ፡ ከመ ፡ ገነተ ፡ ኤዶም ፡ ቅድስተ ፡ ቅዱሳን ፡ ወማኅደሩ ፡ ለእግዚአብሔር ፡ ውእቱ ፡ ወደብረ ፡ ሲና ፡ ማእከለ ፡ ገዳም ፡ ወደብረ ፡ ጽዮን ፡ ማእከለ ፡ ሕንብርታ ፡ ለምድር ፡ ሠለስቲሆሙ ፡ ዝንቱ ፡ መንጸረ ፡ ዝንቱ ፡ ለቅድስት ፡ ተፈጥሩ ።

20 ወባረኮ ፡ ለአምላከ ፡ አማልክት ፡ ዘወደየ ፡ ውስተ ፡ አፉሁ ፡ ንባበ ፡ እግዚአብሔር ፡

21 ወአእመረ ፡ ከመ ፡ መክፈልተ ፡ በረከት ፡ ወቡራኬ ፡ በጽሐት ፡ ለሴም ፡ ወለውሉዱ ፡ ለትውልድ ፡ ዘለዓለም ። ኵላ ፡ ምድረ ፡ ኤዶም ፡ ወኵላ ፡ ምድረ ፡ ባሕረ ፡ ኤርትራ ፡ ወኵላ ፡ ምድረ ፡ ጽባሕ ፡ ወህንደኬ ፡ ወበኤርትራ ፡ ወአድባሪሁ ፡ ወኵላ ፡ ምድረ ፡ ባሳር ፡ ወኵላ ፡ ምድረ ፡ ሊባኖስ ፡ ወደሰያተ ፡ ከፍቱር ፡ ወኵሉ ፡ ደብረ ፡ ሰኔር ፡ ወአማና ፡ ወደብረ ፡ አሱር ፡ ዘደቡብ ፡ ወኵላ ፡ ምድረ ፡ ኤላም ፡ ወአሱር ፡ ወባቤል ፡ ወሱሳን ፡ ወማዕዳይ ፡ ወኵላ ፡ አድባረ ፡ አራራት ፡ ወኵሉ ፡ ማዕዶተ ፡ ባሕር ፡ ዘማዕዶተ ፡ ደብረ ፡ አሱር ፡ ዘመንገለ ፡ ደቡብ ፡ ምድር ፡ ቡርክት ፡ ወስፍሕት ፡ ወኵሉ ፡ ዘውስቴታ ፡ ጥቀ ፡ ሠናይ ።

22 ወለካም ፡ ወፅአ ፡ መክፈልቱ ፡ ዘዳግም ፡ መንገለ ፡ ማዕዶተ ፡ ጊዮን ፡ መንገለ ፡ ሰሜን ፡ በየማነ ፡ ገነት ፡ ወየሐውር ፡ መንገለ ፡ ሰሜን ፡ ወየሐውር ፡ ኵሎ ፡ አድባረ ፡ እሳት ፤ ወየሐውር ፡ መንገለ ፡ ዐረብ ፡ መንገለ ፡ ባሕረ ፡ አጢል ፡ ወየሐውር ፡ ዐረብ ፡ እስከ ፡ ይቀርብ ፡ ኀበ ፡ ባሕረ ፡ ማኡክ ፡ እንተ ፡ ይእቲ ፡ ዘኵሉ ፡ ይወርድ ፡ ውስቴታ ፡ ዘይትሐጐል ።

23 ወይመጽእ ፡ ውስተ ፡ ደቡብ ፡ ውስተ ፡ ጽንፈ ፡ ጋዲት ፡ ወይመጽእ ፡ ውስተ ፡ ከናፍረ ፡ ማየ ፡ ባሕር ፡ ውስተ ፡ ማያተ ፡ ማዕዶተ ፡ ባሕር ፡ ዐቢይ ፡ እስከ ፡ ሶበ ፡ ይቀርብ ፡ ፈለገ ፡ ግዮን ፡ ወየሐውር ፡ ግዮን ፡ ፈለግ ፡ እስከ ፡ ሶበ ፡ ይቀርብ ፡ በየማነ ፡ ገነተ ፡ ኤዶም ።

24 ወዛቲ ፡ ምድር ፡ እንተ ፡ ወፅአት ፡ ለካም ፡ በመክፈልት ፡ ዘይእኅዝ ፡ ለዓለም ፡ ሎቱ ፡ ወለውሉዱ ፡ ለትዝምዶሙ ፡ እስከ ፡ ለዓለም ።

25 ወለያፌት ፡ ወፅአ ፡ መክፈልት ፡ ሣልስ ፡ ማዕዶተ ፡ ጢና ፡ ፈለግ ፡ መንገለ ፡ ደቡቡሂ ፡ ለሙፃአ ፡ ማያቲሆሙ ፡ ወየሐውር ፡ መንገለ ፡ ጽባሕ ፡ ደቡብ ፡ ኵሎ ፡ ደወለ ፡ ላግ ፡ ወኵሎ ፡ ጽባሐቲሁ ።

26 ወየሐውር ፡ መንገለ ፡ ደቡብ ፡ ለደቡብ ፡ ወየሐውር ፡ አድባረ ፡ ቂልጥ ፡ መንገለ ፡ ደቡብ ፡ ወመንገለ ፡ ባሕረ ፡ ማዑቅ ፡ ወይመጽእ ፡ መንገለ ፡ ጽባሑ ፡ ለጋዲር ፡ እስከ ፡ መንገለ ፡ እደ ፡ ማየ ፡ ባሕር ።

27 ወየሐውር ፡ እስከ ፡ ሶበ ፡ ይቀርብ ፡ መንገለ ፡ ዐረበ ፡ ፋራ ፡ ወይገብእ ፡ መንገለ ፡ አፌራግ ፡ ወየሐውር ፡ መንገለ ፡ ጽባሕ ፡ መንገለ ፡ ማየ ፡ ባሕረ ፡ ሜአት ።

28 ወየሐውር ፡ መንገለ ፡ እደ ፡ ጢና ፡ ፈለግ ፡ መንገለ ፡ ጽባሐ ፡ ደቡብ ፡ እስከ ፡ ሶበ ፡ ይቀርብ ፡ እስከ ፡ ጽንፈ ፡ ማያቲሁ ፡ መንገለ ፡ ደብረ ፡ ራፋ ፡ ወየዐውድ ፡ ለደቡብ ።

29 ዛቲ ፡ ምድር ፡ እንተ ፡ ወፅአት ፡ ለያፌት ፡ ወለውሉዱ ፡ በመክፈልቱ ፡ ለርስቱ ፡ ዘይእኅዝ ፡ ለዓለመ ፡ ሎቱ ፡ ወለውሉዱ ፡ ለትዝምዶሙ ፡ እስከ ፡ ለዓለም ፤ ደሰያት ፡ ዐበይት ፡ ፭ ፡ ወምድር ፡ ዐባይ ፡ በደቡብ ፡

30 ወባሕቱ ፡ ቈሪር ፡ ይእቲ ፡ ወምድረ ፡ ካምሰ ፡ መርቄ ፡ ይእቲ ፡ ወምድረ ፡ ሴምሰ ፡ ኢመርቄ ፡ ወኢደደክ ፡ እስመ ፡ ቱስሕት ፡ ይእቲ ፡ በቍር ፡ ወምውቅ ።