Chapter 7
Chapter 6 / Book of Jubilees / Dillmann's Edition / Chapter 7 Chapter 8

1 ወበሱባዔ ፡ ሳብዕ ፡ በቀዳሚ ፡ ዓመቱ ፡ በዝ ፡ ኢዮቤልዉ ፡ ተከለ ፡ ኖኅ ፡ ወይነ ፡ ኀበ ፡ ደብር ፡ እንተ ፡ ዲቤሁ ፡ አዕረፈት ፡ ታቦት ፡ ዘስሙ ፡ ሉባር ፡ እምአድባረ ፡ አራራት ፡ ወገብረ ፡ ፍሬ ፡ በራብዕ ፡ ዓመት ፡ ወዐቀበ ፡ ፍሬሁ ፡ ወቀሰመ ፡ በውእቱ ፡ ዓመት ፡ በወርኅ ፡ ሳብዕ ።

2 ወገብረ ፡ እምውስቴቱ ፡ ወይነ ፡ ወወደዮ ፡ ውስተ ፡ ንዋይ ፡ ወዐቀበ ፡ እስከ ፡ ዓመት ፡ ኃምስ ፡ እስከ ፡ ዕለተ ፡ ቀዳሚት ፡ በሠርቀ ፡ ወርኅ ፡ ቀዳሚት ።

3 ወገብረ ፡ ዕለተ ፡ ዛተ ፡ በፍሥሓ ፡ በዓለ ፡ ወገብረ ፡ ጽንሓሐ ፡ ለእግዚአብሔር ፡ ጣዕዋ ፡ እምአልህምት ፡ አሐደ ፡ ወበሐኰ ፡ ፩ ፡ ወአባግዐ ፡ ዘዘ ፡ ዓመት ፡ ፯ ፡ ወመሐስዐ ፡ ጠሊ ፡ ፩ ፡ ከመ ፡ ያስተስሪ ፡ ቦቱ ፡ ለርእሱ ፡ ወበእንተ ፡ ውሉዱ ።

4 ወገብረ ፡ መሐስዐ ፡ ቅድመ ፡ ወአንበረ ፡ እምነ ፡ ደሙ ፡ ዲበ ፡ ሥጋ ፡ ዘምሥዋዕ ፡ ዘገብረ ፡ ወኵሎ ፡ ስብሐ ፡ አዕረገ ፡ ውስተ ፡ ምሥዋዕ ፡ ዘኀበ ፡ ገብረ ፡ ጽንሓሐ ፡ ለእግዚአብሔር ፡ ወላህመ ፡ ወበሐኰ ፡ ወአባግዐ ፡ ወአዕረገ ፡ ኵሎ ፡ ሥጋሆሙ ፡ ዲበ ፡ ምሥዋዕ ።

5 ወአንበረ ፡ ኵሎ ፡ መሥዋዕቶሙ ፡ ልውሰ ፡ በቅብዕ ፡ ላዕሌሆሙ ፡ ወእምዝ ፡ ነዝኀ ፡ ወይነ ፡ ውስተ ፡ እሳት ፡ ዘዲበ ፡ ምሥዋዕ ፡ አቅደመ ፡ ወአንበረ ፡ ስኂነ ፡ ዲበ ፡ ምሥዋዕ ፡ ወአዕረገ ፡ መዐዛ ፡ ሠናይ ፡ ዘይሠምር ፡ ቅድመ ፡ እግዚአብሔር ፡ አምላኩ ።

6 ወተፈሥሐ ፡ ወሰትየ ፡ እምዝ ፡ ወይን ፡ ውእቱ ፡ ወውሉዱ ፡ በፍሥሓ ።

7 ወኮነ ፡ ምሴተ ፡ ወቦአ ፡ ውስተ ፡ ሰቀላሁ ፡ ወሰከበ ፡ ሰኪሮ ፡ ወኖመ ፡ ወተከሥተ ፡ በውስተ ፡ ሰቀላሁ ፡ እንዘ ፡ ይነውም ፡ ውእቱ ።

8 ወርእዮ ፡ ካም ፡ ለኖኅ ፡ አቡሁ ፡ ዕራቆ ፡ ወወፂኦ ፡ ነገረ ፡ ለ፪ ፡ አኃዊሁ ፡ አፍአ ።

9 ወነሥአ ፡ ሴም ፡ ልብሶ ፡ ወተንሥአ ፡ ውእቱ ፡ ወያፌት ፡ ወአንበሩ ፡ ልብሰ ፡ ዲበ ፡ መታክፍቲሆሙ ፡ ወገጾሙ ፡ ድኅሪተ ፡ ወከደኑ ፡ ኃፍረተ ፡ አቡሆሙ ።

10 ወነቅሐ ፡ እምንዋሙ ፡ ኖኅ ፡ ወአእመረ ፡ ኵሎ ፡ ዘገብረ ፡ ላዕሌሁ ፡ ወልዱ ፡ ዘይንእስ ፡ ወረገሞ ፡ ለወልዱ ፡ ወይቤ ፡ ርጉም ፡ ከነዓን ፡ ቅኑየ ፡ ገብረ ፡ ይኩን ፡ ለአኃዊሁ ።

11 ወባረኮ ፡ ለሴም ፡ ይትባረክ ፡ እግዚአብሔር ፡ አምላኩ ፡ ለሴም ፡ ወይኩን ፡ ከናአን ፡ ገብሮ ፡

12 ወያስፍሕ ፡ እግዚአብሔር ፡ ለያፌት ፡ ወይኅድር ፡ እግዚአብሔር ፡ ውስተ ፡ ማኅደረ ፡ ሴም ፡ ወይኩን ፡ ከናአን ፡ ገብሮ ።

13 ወአእመረ ፡ ካም ፡ ከመ ፡ ረገሞ ፡ አቡሁ ፡ ለወልዱ ፡ ዘይንእስ ፡ ወሕሱም ፡ ኮነ ፡ ሎቱ ፡ እስመ ፡ ረገሞ ፡ ለወልዱ ፡ ወተፈልጠ ፡ እምአቡሁ ፡ ውእቱ ፡ ወውሉዱ ፡ ምስሌሁ ፡ ኵስ ፡ ወምስጥሬም ፡ ወፉድ ፡ ወከናአን ፡

14 ወሐነጸ ፡ ሎቱ ፡ ሀገረ ፡ ወጸውዐ ፡ ስማ ፡ በስመ ፡ ብእሲቱ ፡ ኔኤላተ ፡ ሜክ ።

15 ወርእየ ፡ ያፌት ፡ ወቀንአ ፡ ለእኁሁ ፡ ወሐነጸ ፡ ውእቱሂ ፡ ሀገረ ፡ ወሰመየ ፡ ስማ ፡ በስመ ፡ ብእሲቱ ፡ አደቴንሴስ ።

16 ወሴምሰ ፡ ነበረ ፡ ምስለ ፡ አቡሁ ፡ ኖኅ ፡ ወሐነጸ ፡ ሀገረ ፡ በእደ ፡ አቡሁ ፡ ኀበ ፡ ደብር ፡ ወጸውዐ ፡ ስማ ፡ ውእቱሂ ፡ በስመ ፡ ብእሲቱ ፡ ሴዴቃቴልባብ ።

17 ወናሁ ፡ አህጉር ፡ እላንቱ ፡ ሠላስ ፡ ቅሩበ ፡ ሉባር ፡ ደብር ፤ ሴዱቃቴልባብ ፡ ቅድመ ፡ ገጸ ፡ ደብር ፡ በጽባሒሁ ፡ ወናኡልትማኡክ ፡ ገጸ ፡ ሰሜን ፡ ወአዳታኔሴስ ፡ መንገለ ፡ ባሕር ።

18 ወእሉ ፡ ውሉደ ፡ ሴም ፡ ኤላም ፡ ወአሱር ፡ ወአርፋክስድ ፡ ዝንቱ ፡ ትውልድ ፡ እምድኅረ ፡ ክልኤ ፡ ዓም ፡ ዘአይኅ ፤

19 . . . ጎሜርሃ ፤ ወማጎግሃ ፤ ወማዳይሃ ፤ ወኢዩአያ ፤ ቶቤልሃ ፤ ምስክሃ ፤ ወቲራስሃ ፡ እሉ ፡ ውሉደ ፡ ኖኅ ።

20 ወበ፳ወ፰ ፡ ኢዩቤልው ፡ አኀዘ ፡ ኖኅ ፡ የአዝዝ ፡ ለውሉደ ፡ ውሉዱ ፡ ሥርዐተ ፡ ወትእዛዘ ፡ ኵሎ ፡ ዘከመ ፡ ያአምር ፡ ወፍትሐ ፡ ወአስምዐ ፡ ላውሉዱ ፡ ከመ ፡ ይግበሩ ፡ ጽድቀ ፡ ወከመ ፡ ይክድኑ ፡ ኀፍረተ ፡ ሥጋሆሙ ፡ ወከመ ፡ ይባርክዎ ፡ ለዘፈጠሮሙ ፡ ወያክብሩ ፡ አበ ፡ ወእመ ፡ ወያፍቅሩ ፡ ፩፩ ፡ ቢጾ ፡ ወይዕቀቡ ፡ ነፍሶሙ ፡ እምኵሉ ፡ ዝሙት ፡ ወእምኵሉ ፡ ርኵስ ፡ ወዐመፃ ።

21 እስመ ፡ በእንተ ፡ ዝንቱ ፡ ፫ ፡ ኮነ ፡ አይኅ ፡ ላዕለ ፡ ምድር ፡ እስመ ፡ በእንተ ፡ ዝሙት ፡ ዘዘመዉ ፡ ትጉሃን ፡ እምትእዛዘ ፡ ኵነኔሆሙ ፡ በድኅረ ፡ አዋልደ ፡ ሰብእ ፡ ወነሥኡ ፡ ሎሙ ፡ አንስትያ ፡ እምኵሉ ፡ እለ ፡ ኀረዩ ፡ ገብሩ ፡ መቅድመ ፡ ርኵስ ።

22 ወወለዱ ፡ ውሉደ ፡ ናፊዴም ፡ ወኵሎሙ ፡ ኢይትማሰሉ ፡ ወይበልዕ ፡ ፩፩ ፡ ካልኦ ፡ ወቀተሎ ፡ ያርባሕ ፡ ለናፊል ፡ ወናፊል ፡ ቀተሎ ፡ ለኤልዮ ፡ ወኤልዮ ፡ ለእጓለ ፡ እመሕያው ፡ ወሰብእሂ ፡ ቢጾ ፡

23 ወኵሉ ፡ ተሠይጠ ፡ ይግበር ፡ ዐመፃ ፡ ወከመ ፡ ይክዐው ፡ ደመ ፡ ብዙኀ ፡ ወመልአት ፡ ምድር ፡ ዐመፃ ፤

24 ወእምድኅረ ፡ እሉ ፡ ኵሎሙ ፡ አራዊት ፡ ወእንስሳ ፡ ወአዕዋፍ ፡ ወዘያንሶሱ ፡ ወዘይትሐወስ ፡ ዲበ ፡ ምድር ፤ ወተክዕወ ፡ ደም ፡ ብዙኅ ፡ ዲበ ፡ ምድር ፡ ወኵሉ ፡ ሕሊናሁ ፡ ወፈቃዱ ፡ ለሰብእ ፡ ይሔሊ ፡ ከንቶ ፡ ወእኩየ ፡ በኵሉ ፡ መዋዕል ።

25 ወደምሰሰ ፡ እግዚአብሔር ፡ ኵሎ ፡ እምገጸ ፡ ምድር ፡ በእንተ ፡ ምግባሮሙ ፡ ወበእንተ ፡ ደም ፡ ዘተክዕዉ ፡ ማእከለ ፡ ምድር ።

26 ወተረፍነ ፡ አነ ፡ ወአንትሙ ፡ ደቂቅየ ፡ ወኵሉ ፡ ዘቦአ ፡ ምስሌነ ፡ ውስተ ፡ ታቦት ፡ ወናሁ ፡ አነ ፡ እሬኢ ፡ ቀዳሚ ፡ ምግባሪክሙ ፡ ከመ ፡ ዘኢኮንክሙ ፡ አንትሙ ፡ ዘተሐውሩ ፡ በጽድቅ ፡ እስመ ፡ በፍኖተ ፡ ሙስና ፡ ወጠንክሙ ፡ ትሑሩ ፡ ወትትፋለጡ ፡ ፩ ፡ እምነ ፡ ቢጹ ፡ ወትትቃንኡ ፡ ዝንቱ ፡ ምስለ ፡ ዝንቱ ፡ ወከመ ፡ ኢተሀልዉ ፡ ፩፩ኅቡረ ፡ ምስለ ፡ ቢጹ ፡ ወእኁሁ ።

27 ወአንትሙ ፡ ውሉድየ ፡ እስመ ፡ እሬኢ ፡ አነ ፡ ወናሁ ፡ አጋንንት ፡ አስሕቶ ፡ ወጠኑ ፡ ላዕሌክሙ ፡ ወላዕለ ፡ ውሉድክሙ ፡ ወይእዜኒ ፡ አነ ፡ እፈርህ ፡ በእንቲአክሙ ፡ ከመ ፡ እምድኅረ ፡ ሞትኩ ፡ ትክዐዉ ፡ ደመ ፡ ሰብእ ፡ ውስተ ፡ ገጸ ፡ ምድር ፡ ወትደመሰሱ ፡ አንትሙሂ ፡ እምገጻ ።

28 እስመ ፡ ኵሉ ፡ ዘይክዑ ፡ ደመ ፡ ኵሉ ፡ ሰብእ ፡ ወኵሉ ፡ ዘይበልዕ ፡ ደመ ፡ ኵሉ ፡ ዘሥጋ ፡ ይደመሰስ ፡ ኵሎሙ ፡ እምድር ።

29 ወኢይተርፍ ፡ ኵሉ ፡ ሰብእ ፡ ዘይበልዕ ፡ ደመ ፡ ወይክዑ ፡ ደመ ፡ ዲበ ፡ ምድር ፡ ወኢይተርፍ ፡ ዘርእ ፡ ሎቱ ፡ ወደኃሪት ፡ በታሕተ ፡ ሰማይ ፡ ሕያው ፡ እስመ ፡ ውስተ ፡ ሲኦል ፡ የሐውሩ ፡ ወውስተ ፡ መካን ፡ ደይን ፡ ይወርዱ ፡ ውስተ ፡ ጽልመት ፡ ማዕምቅ ፡ የአትቱ ፡ ኵሎሙ ፡ በሞት ፡ ጸዋግ ።

30 ኵሉ ፡ ደም ፡ ላዕሌክሙ ፡ ዘውእቱ ፡ በኵሉ ፡ መዋዕል ፡ ዘጠባሕክሙ ፡ ኵሎ ፡ አርዌ ፡ ወእንስሳ ፡ ወዘይሰርር ፡ ዲበ ፡ ምድር ፡ ወግበሩ ፡ ምጽዋተ ፡ ላዕለ ፡ ነፍስክሙ ፡ በደፊኖቱ ፡ ዘይትከዐው ፡ ዲበ ፡ ገጸ ፡ ምድር ።

31 ወኢትኩኑ ፡ ከመ ፡ ዘይበልዕ ፡ ምስለ ፡ ደም ፡ ወአጽንዑ ፡ ከመ ፡ ኢይብልዑ ፡ ደመ ፡ በቅድሜክሙ ፤ ድፍኑ ፡ ደመ ፡ በዲበ ፡ ምድር ፡ እስመ ፡ ከመዝ ፡ ተአዘዝኩ ፡ ኣስምዕ ፡ ለክሙ ፡ ወለውሉድክሙሂ ፡ ምስለ ፡ ኵሉ ፡ ዘሥጋ ።

32 ወኢትብልዕዋ ፡ ለነፍስ ፡ ምስለ ፡ ሥጋ ፡ ከመ ፡ ኢይኩኑ ፡ ዘይትኀሠሡ ፡ ደምክሙ ፡ ዘነፍስክሙ ፡ እምእደ ፡ ኵሉ ፡ ዘሥጋ ፡ ዘይክዕው ፡ ዲበ ፡ ምድር ።

33 እስመ ፡ ምድር ፡ ኢትነጽሕ ፡ እምነ ፡ ደም ፡ እምዘ ፡ ተክዕወ ፡ ላዕሌሃ ፡ እስመ ፡ በደሙ ፡ ዘከዐዎ ፡ ትነጽሕ ፡ ምድር ፡ በኵሉ ፡ ትዝምደ ፡

34 ወይእዜሰ ፡ ውሉድየ ፡ ስምዑ ፡ ወግበሩ ፡ ርትዐ ፡ ወጽድቀ ፡ ከመ ፡ ትተከሉ ፡ በጽድቅ ፡ ውስተ ፡ ኵሉ ፡ ገጸ ፡ ምድር ፡ ወይትሌዐል ፡ ክብርክሙ ፡ በቅድመ ፡ አምላኪየ ፡ ዘአድኀነኒ ፡ እምነ ፡ ማየ ፡ አይኅ ።

35 ወናሁ ፡ አንትሙ ፡ ተሐውሩ ፡ ወተሐንጹ ፡ ለከሙ ፡ አህጉረ ፡ ወትተክሉ ፡ ውስቴቶሙ ፡ ኵሎ ፡ ተክለ ፡ ዘዲበ ፡ ምድር ፡ ወኵሎ ፡ ዕፀ ፡ ዘይፈሪ ፤

36 ፫ ፡ ዓመተ ፡ ይከውን ፡ ፍሬሁ ፡ ዘኢይትቀሰም ፡ እምኵሉ ፡ ለበሊዖቱ ፡ ወበራብዕ ፡ ዓመት ፡ ይትቄደስ ፡ ፍሬሁ ፡ ወየዐርግ ፡ ቀዳሚ ፡ ፍሬ ፡ ዘይሠጠው ፡ ቅድመ ፡ እግዚአብሔር ፡ አምላክነ ፡ ልዑል ፡ ዘፈጠሪ ፡ ሰማይ ፡ ወምድር ፡ ወኵሎ ፡ ከመ ፡ ያዕርጉ ፡ በጥሉል ፡ ቀዳሜ ፡ ወይን ፡ ወቅብዕ ፡ ቀዳሚ ፡ ፍሬ ፡ ውስተ ፡ ምሥዋዐ ፡ እግዚአብሔር ፡ ዘይትወከፍ ፡ ወዘተረፈ ፡ ይብልዑ ፡ ላእካነ ፡ ቤተ ፡ እግዚአብሔር ፡ በቅድመ ፡ ምሥዋዕ ፡ ዘይትወከፍ ።

37 ወበዓመት ፡ ኃምስት ፡ ግበሩ ፡ ኅድገተ ፡ ከመ ፡ ትኅድግዎ ፡ አንትሙ ፡ በጽድቅ ፡ ወበርትዕ ፡ ወትጸድቁ ፡ ወይረትዕ ፡ ኵሉ ፡ ተክልክሙ ፡

38 እስመ ፡ ከመዝ ፡ አዘዘ ፡ ሄኖክ ፡ አቡሁ ፡ ለአቡከሙ ፡ ለማቱሳላ ፡ ወልዱ ፡ ወማቱሳላ ፡ ለወልዱ ፡ ላሜኅ ፡ ወላሜኅ ፡ አዘዘኒ ፡ ኵሎ ፡ ዘአዘዝዎ ፡ አበዊሁ ፡

39 ወአነሂ ፡ እኤዝዘክሙ ፡ ውሉድየ ፡ በከመ ፡ አዘዘ ፡ ሄኖክ ፡ ለወልዱ ፡ በቀዳሜ ፡ ኢዮቤልውሳት ፡ እንዘ ፡ ሕያው ፡ ውእቱ ፡ ውስተ ፡ ትዝምዱ ፡ ሳብዕ ፡ አዘዘ ፡ ወአስምዐ ፡ ለወልዱ ፡ ወለውሉደ ፡ ውሉዱ ፡ እስከ ፡ አመ ፡ ዕለተ ፡ ሞቱ ።