Chapter 6
Chapter 5 / Book of Jubilees / Dillmann's Edition / Chapter 6 Chapter 7

1 አመ ፡ ሠርቁ ፡ ለወርኅ ፡ ሣልስ ፡ ወፅአ ፡ እምነ ፡ ታቦት ፡ ወሐነጸ ፡ ምሥዋዐ ፡ ውስተ ፡ ውእቱ ፡ ደብር ።

2 ወአስተርአየ ፡ ዲበ ፡ ምድር ፡ ወነሥአ ፡ መሐስዐ ፡ ጠሊ ፡ ወአስተስረየ ፡ በደሙ ፡ በእንተ ፡ ኵሉ ፡ አበሳ ፡ ምድር ፡ እስመ ፡ ተደምሰሰ ፡ ኵሉ ፡ ዘሀሎ ፡ ውስቴታ ፡ ዘእንበለ ፡ እለ ፡ ሀለዉ ፡ ውስተ ፡ ታቦት ፡ ምስለ ፡ ኖኅ ።

3 ወአዕረገ ፡ ሥብሐ ፡ ዲበ ፡ ምሥዋዕ ፡ ወነሥአ ፡ ላህመ ፡ ወበሐኰ ፡ ወበግዐ ፡ ወአጣሌ ፡ ወጼወ ፡ ወመንጤጠ ፡ ወእጕለ ፡ ርግብ ፡ ወአዕረገ ፡ ጽንሓሐ ፡ ውስተ ፡ ምሥዋዕ ፡ ወሦጠ ፡ ላዕሌሆን ፡ ምሥዋዕተ ፡ ልዉሰ ፡ በቅብዕ ፡ ወነዝኀ ፡ ወይነ ፡ ወወደየ ፡ ላዕሌሁ ፡ ስኂነ ፡ ወአዕረገ ፡ መዐዛ ፡ ሠናይ ፡ ዘይሠምር ፡ ቅድመ ፡ እግዚአብሔር ።

4 ወአጼነወ ፡ እግዚአብሔር ፡ መዐዛ ፡ ሠናይ ፡ ወተካየደ ፡ ምስሌሁ ፡ ኪዳነ ፡ ከመ ፡ ኢይኩን ፡ ማየ ፡ አይኅ ፡ ዘያማስን ፡ ምድረ ፤ ኵሎ ፡ መዋዕለ ፡ ምድር ፡ ዘርእ ፡ ወማእረር ፡ ኢይንትግ ፡ ደደክ ፡ ወመርቄ ፡ ወሐጋይ ፡ ወክረምት ፡ ወመዓልት ፡ ወሌሊት ፡ ኢይወልጡ ፡ ሥርዐቶሙ ፡ ወኢይንትጉ ፡ ለዓለም ።

5 ወአንትሙኒ ፡ ለሀቁ ፡ ወተባዝኁ ፡ ውስተ ፡ ምድር ፡ ወብዝኁ ፡ ላዕሌሃ ፡ ወኩኑ ፡ ለበረከት ፡ ማእከለ ፤ ፍርሀትክሙ ፡ ወረዓድክሙ ፡ እሁብ ፡ ዲበ ፡ ኵሉ ፡ ዘውስተ ፡ ምድር ፡ ወዘውስተ ፡ ባሕር ።

6 ወናሁ ፡ ወሀብኩክሙ ፡ ኵሎ ፡ አራዊተ ፡ ወኵሎ ፡ እንስሳ ፡ ወኵሎ ፡ ዘይሰርር ፡ ወኵሎ ፡ ዘይትሐወስ ፡ ዲበ ፡ ምድር ፡ ወውስተ ፡ ማያት ፡ ዓሣት ፡ ወኵሎ ፡ ለሲሲት ፡ ከመ ፡ ሐምለ ፡ ሣዕር ፡ ወሀብኩክሙ ፡ ኵሎ ፡ ትብልዑ ።

7 ወባሕቱ ፡ ሥጋ ፡ ዘምስለ ፡ መንፈሱ ፡ ምስለ ፡ ደም ፡ ኢትብልዑ ፡ እስመ ፡ ደም ፡ ነፍሰ ፡ ኵሉ ፡ ዘሥጋ ፡ ውእቱ ፡ ከመ ፡ ኢይትኃሠሥ ፡ ደምክሙ ፡ ውስተ ፡ ነፍሳቲክሙ ። እምውስተ ፡ እደ ፡ ኵሉ ፡ አኀሥሦ ፡ ለደመ ፡ ሰብእ ፤

8 ኵሉ ፡ ዘይክዑ ፡ ደመ ፡ ሰብእ ፡ በእደ ፡ ሰብእ ፡ ደሙ ፡ ይትከዐው ፡ እስመ ፡ በመልክዐ ፡ እግዚአብሔር ፡ ገብሮ ፡ ለአዳም ።

9 ወአንትሙሂ ፡ ለሀቁ ፡ ወብዝኁ ፡ ዲበ ፡ ምድር ።

10 ወመሐለ ፡ ኖኅ ፡ ወደቂቁ ፡ ከመ ፡ ኢይብልዑ ፡ ኵሎ ፡ ደመ ፡ ዘበኵሉ ፡ ሥጋ ፡ ወተካየደ ፡ ኪዳነ ፡ ቅድመ ፡ እግዚአብሔር ፡ አምላክ ፡ ለዓለም ፡ በኵሉ ፡ ትውልደ ፡ ምድር ፡ በዝንቱ ፡ ወርኅ ።

11 በእንተ ፡ ዝንቱ ፡ ተናገረከ ፡ ትትካየድ ፡ ኪዳነ ፡ አንተኒ ፡ ምስለ ፡ ደቂቀ ፡ እስራኤል ፡ በዝ ፡ ወርኅ ፡ በዲበ ፡ ደብር ፡ ምስለ ፡ መሐላ ፡ ወትነዝኅ ፡ ላዕሌሆሙ ፡ ደመ ፡ በእንተ ፡ ኵሉ ፡ ነገረ ፡ ኪዳን ፡ ዘተካየደ ፡ እግዚአብሔር ፡ ምስሌሆሙ ፡ ለኵሉ ፡ መዋዕል ።             

12 ወጽሕፍት ፡ ዛቲ ፡ ስምዕ ፡ ላዕሌክሙ ፡ ከመ ፡ ትዕቀብዋ ፡ በኵሉ ፡ መዋዕል ፡ ከመ ፡ ኢትብልዑ ፡ በኵሉ ፡ መዋዕል ፡ ኵሎ ፡ ደመ ፡ አራዊት ፡ ወአዕዋፍ ፡ ወእንሰሳ ፡ በኵሉ ፡ መዋዕለ ፡ ምድር ፤ ወሰብእ ፡ ዘበልዐ ፡ ደመ ፡ አርዌ ፡ ወዘእንስሳ ፡ ወዘአዕዋፍ ፡ በኵሉ ፡ መዋዕለ ፡ ምድር ፡ ይሴሮ ፡ ውእቱ ፡ ወዘርኡ ፡ እምድር ።

13 ወአንተ ፡ አዝዞሙ ፡ ለደቂቀ ፡ እስራኤል ፡ ኢይብልዑ ፡ ኵሎ ፡ ደመ ፡ ከመ ፡ የሀሉ ፡ ስሞሙ ፡ ወዘርኦሙ ፡ ቅድመ ፡ እግዚአብሔር ፡ አምላክነ ፡ ኵሎ ፡ መዋዕለ ።

14 ወአልቦ ፡ ለዝ ፡ ሕግ ፡ ዐቅመ ፡ መዋዕል ፡ እስመ ፡ ለዓለም ፡ ውእቱ ፡ ወይዕቀብዎ ፡ ለትውልደ ፡ ትውልድ ፡ ከመ ፡ ይኩኑ ፡ እንዘ ፡ ይትመሐለሉ ፡ በእንቲአሆሙ ፡ በደም ፡ በቅድመ ፡ እግዚአብሔር ፡ በኀበ ፡ ምሥዋዕ ፡ በኵሉ ፡ ዕለት ፡ ወዕለተ ፡ ነግህ ፡ ወሰርክ ፡ ያስተሰርዩ ፡ በእንቲአሆሙ ፡ ወትረ ፡ ቅድመ ፡ እግዚአብሔር ፡ ከመ ፡ ይዕቀብዎ ፡ ወኢይሠረዉ ።

15 ወወሀቦ ፡ ለኖኅ ፡ ወለደቂቁ ፡ ትእምርተ ፡ ከመ ፡ ኢይኩን ፡ ዳግመ ፡ አይኅ ፡ ዲበ ፡ ምድር ፤

16 ቀስቶ ፡ ወሀበ ፡ ውስተ ፡ ደመና ፡ ለትእምርት ፡ ኪዳን ፡ ዘለዓለም ፡ ከመ ፡ ኢይኩን ፡ እንከ ፡ ማየ ፡ አይኅ ፡ ዲበ ፡ ምድር ፡ ለአማስኖታ ፡ ኵሎ ፡ መዋዕለ ፡ ምድር ።

17 በእንተዝ ፡ ተሠርዐ ፡ ወተጽሕፈ ፡ ውስተ ፡ ጽላተ ፡ ሰማይ ፡ ከመ ፡ ይኩኑ ፡ ገበርተ ፡ በዓል ፡ ዘሱባዔያት ፡ በዝ ፡ ወርኅ ፡ ምዕረ ፡ ለዓመት ፡ ለሐዲስ ፡ ኪዳን ፡ በኵሉ ፡ ዓም ፡ ወዓመት ።

18 ወኮነት ፡ ኵላ ፡ ዛቲ ፡ በዓል ፡ እንዘ ፡ ትትገበር ፡ በሰማይ ፡ እምዕለተ ፡ ፍጥረት ፡ እስከ ፡ መዋዕሊሁ ፡ ለኖኅ ፡ ፳ወ፮ ፡ ኢዮቤልዉ ፡ ወሱባዔ ፡ ዓመት ፡ ፭ ፡ ወዐቀብዋ ፡ ኖኅ ፡ ወደቂቁ ፡ ፯ ፡ ኢዮቤልዉ ፡ ወሱባዔ ፡ ዓመታት ፡ አሐተ ፡ እስከ ፡ አመ ፡ ሞተ ፡ ኖኅ ። ወአማሰኑ ፡ ውሉዱ ፡ እስከ ፡ አመ ፡ መዋዕሊሁ ፡ ለአብርሃም ፡ ወይበልዑ ፡ ደመ ።

19 ወአብርሃምሰ ፡ ባሕቱ ፡ ዐቀባ ፡ ወይስሐቅ ፡ ወያዕቆብ ፡ ዐቀብዋ ፡ እስመ ፡ ውሉደ ፡ እሙንቱ ፡ እስከ ፡ መዋዕሊከ ፡ ወበመዋዕሊከ ፡ ረስዑ ፡ ውሉደ ፡ እስራኤል ፡ እስከ ፡ አመ ፡ ሐደስክዎሙ ፡ በኀበዝ ፡ ደብር ።

20 ወአንተሂ ፡ አዝዞሙ ፡ ለደቂቀ ፡ እስራኤል ፡ ይዕቀብዋ ፡ ለዛቲ ፡ በዓል ፡ በኵሉ ፡ ትዝምዶሙ ፡ ለትእዛዝ ፡ ሎሙ ፡ ዕለተ ፡ አሐተ ፡ በዓመት ፡ በዝ ፡ ወርኅ ፡ ይግበሩ ፡ በዓለ ፡ ባቲ ።

21 እስመ ፡ በዓለ ፡ ሱባዔያት ፡ ይእቲ ፡ ወበዓለ ። ፍሬ ፡ ቀዳሜ ፡ ይእቲ ፡ ክልኤ ፡ ዕጽፍት ፡ ወክልኤ ፡ ዘመድ ፡ ዛቲ ፡ በዓል ፡ በከመ ፡ ጽሑፍ ፡ ወቍሩጽ ፡ በእንቲአሃ ፡ ግብራ ።

22 እስመ ፡ ጸሐፍኩ ፡ ውስተ ፡ መጽሐፈ ፡ ሕግ ፡ ዘቀዳሚ ፡ ውስተ ፡ ዘጸሐፍኩ ፡ ለከ ፡ ትግበራ ፡ በበጊዜሃ ፡ ዕለተ ፡ አሐተ ፡  በዓመት ፡ ወቍርባኖሂ ፡ ነገርኩከ ፡ ከመ ፡ ይኩኑ ፡ ዝኩራነ ፡ ወይግበርዋ ፡ ውሉደ ፡ እስራኤል ፡ ውስተ ፡ ትዝምዶሙ ፡ በዝ ፡ ወርኅ ፡ ዕለተ ፡ አሐተ ፡ ለለ ፡ ፩ ፡ ዓመት ።

23 ወበሠርቀ ፡ ወርኅ ፡ ቀዳሚ ፡ ወበሠርቀ ፡ ወርኅ ፡ ራብዕ ፡ ወበሠርቀ ፡ ወርኅ ፡ ሳብዕ ፡ ወበሠርቀ ፡ ወርኅ ፡ ዓሥር ፡ ዕለታተ ፡ ተዝካር ፡ እማንቱ ፡ ወዕለታተ ፡ ጊዜ ፡ እማንቱ ፡ ውስተ ፡ ፬ ፡ መክፈልተ ፡ ዓመት ፤ ጽሑፋት ፡ እማንቱ ፡ ለስምዕ ፡ ለዓለም ።

24 ወኖኅ ፡ ሠርዖን ፡ ሎቱ ፡ ለበዓላት ፡ ለትውልድ ፡ ዘለዓለም ፡ እስመ ፡ ኮነ ፡ ሎቱ ፡ ቦቶን ፡ ተዝካረ ።

25 በሠርቀ ፡ ወርኅ ፡ ቀዳሚ ፡ ተብህለ ፡ ሎቱ ፡ ይግበር ፡ ታቦተ ፡ ወባቲ ፡ የብሰት ፡ ምድር ፡ ወአርኀወ ፡ ወርእየ ፡ ምድረ ።

26 ወበሠርቀ ፡ ወርኅ ፡ ራብዕ ፡ ተፈጸመ ፡ አፈ ፡ መዓምቅቲሃ ፡ ለቀላይ ፡ ታሕቲት ። ወበሠርቀ ፡ ወርኅ ፡ ሳብዕ ፡ ተርኅወ ፡ ኵሉ ፡ አፈ ፡ መዓምቅተ ፡ ምድር ፡ ወአኀዘ ፡ ማያት ፡ ይረድ ፡ ውስተ ፡ ቀላይ ፡ ታሕቲት ።

27 ወበሠርቀ ፡ ወርኅ ፡ ዓሥር ፡ አስተርአየ ፡ አርእስተ ፡ አድባር ፡ ወኖኅ ፡ ተፈሥሐ ።

28 በእንተዝ ፡ ሠርዖን ፡ ኪያሆን ፡ ሎቱ ፡ ለበዓላት ፡ ለተዝካር ፡ እስከ ፡ ለዓለም ፡ ወከመዝ ፡ እማንቱ ፡ ሥሩዓት ፡

29 ወያዐርግዎን ፡ ውስተ ፡ ጽላተ ፡ ሰማይ ፤ ዐሥሩ ፡ ወሠላስ ፡ ሰንበታት ፡ አሐቲ ፡ እምኔሆን ፡ እምዛቲ ፡ ውስተ ፡ ዛቲ ፡ ተዝካሮን ፤ እምቀዳሚት ፡ እስከ ፡ ካልእት ፤ ወእምካልእት ፡ እስከ ፡ ሣልስት ፤ ወእምሣልስት ፡ እስከ ፡ ራብዕት ።

30 ወይከውና ፡ ኵሎን ፡ መዋዕል ፡ ዘትእዛዝ ፡ ኀምሳ ፡ ወክልኤ ፡ ሰንበታተ ፡ መዋዕል ፡ ወኵሎሙ ፡ ዓመት ፡ ፍጹመ ፤

31 ከመዝ ፡ ተሐረጸ ፡ ወተሠርዐ ፡ ውስተ ፡ ጽላተ ፡ ሰማይ ፡ ወአልቦ ፡ ተዐድዎ ፡ ፫ወ፬ ፡ ዓመተ ፡ ወዓም ።

32 ወአንተኒ ፡ አዝዞሙ ፡ ለደቂቀ ፡ እስራኤል ፡ ወይዕቀቡ ፡ ዓመታተ ፡ በዝ ፡ ኍልቍ ፡ ፫፻ወ፷ ፡ ወረቡዐ ፡ መዋዕለ ፡ ወይከውን ፡ ፍጹመ ፡ ዓመተ ፡ ወኢያማስን ፡ ጊዜሁ ፡ እመዋዕሊሁ ፡ ወእምበዓላቲሁ ፡ እስመ ፡ ኵሉ ፡ ይበጽሕ ፡ ቦሙ ፡ በከመ ፡ ስምዖሙ ፡ ወኢየኀልፉ ፡ ዕለተ ፡ ወኢያማስኑ ፡ በዓለ ።

33 ወለእመ ፡ ተዐደዉ ፡ ወኢገብርዎን ፡ በከመ ፡ ትእዛዙ ፡ ሎቱ ፡ አሜሃ ፡ ኵሎሙ ፡ ያማስኑ ፡ ጊዜያቲሆሙ ፡ ወዓመታትሂ ፡ ይትሐወሱ ፡ እምውስተዝ ፡ ወጊዜያትሂ ፡ ወዓመታትሂ ፡ ወይትዐደዉ ፡ ሥርዐቶሙ ።

34 ወኵሎሙ ፡ ውሉደ ፡ እስራኤል ፡ ይረስዑ ፡ ወኢይረክቡ ፡ ፍኖተ ፡ ዓመታት ፡ ወይረስዑ ፡ ሠርቀ ፡ ወሰንበተ ፡ ወበዓለ ፡ ወኵሎ ፡ ሥርዐተ ፡ ዘዓመታት ፡ ይጌግዩ ።

35 እስመ ፡ ኣአምር ፡ አነ ፡ ወእምይእዜ ፡ አነ ፡ ኣየድዐከ ፡ ወአኮ ፡ እምልብየ ፡ እስመ ፡ ከመዝ ፡ መጽሐፍ ፡ ጽሑፍ ፡ ቅድሜየ ፡ ወተሠርዐ ፡ ውስተ ፡ ጽላተ ፡ ሰማይ ፡ ኵፋሌሁ ፡ ለመዋዕል ፡ ከመ ፡ ይርስዑ ፡ በዓላተ ፡ ኪዳንየ ፡ ወየሐውሩ ፡ በበዓላተ ፡ አሕዛብ ፡ ድኅረ ፡ ስሕተቶሙ ፡ ወድኅረ ፡ ኢያእምሮቶሙ ።

36 ወይከውኑ ፡ እለ ፡ ያስተሐይጹ ፡ በሑያጼ ፡ ወርኅ ፡ እስመ ፡ ታማስን ፡ ይእቲ ፡ ጊዜያተ ፡ ወትቀድም ፡ እምዓመታት ፡ ለዓመት ፡ ዐሡረ ፡ ዕለተ ።

37 በእንተዝ ፡ ይመጽእ ፡ ዓመታት ፡ ሎሙ ፡ እንዘ ፡ ያማስኑ ፡ ወይገብሩ ፡ ዕለተ ፡ ስምዕ ፡ ምንንተ ፡ ወርኵስተ ፡ ዕለተ ፡ በዓለ ፡ ወኵሎ ፡ ይዴምሩ ፡ መዋዕለ ፡ ቅዱሳተ ፡ ርኩሳተ ፡ ወዕለተ ፡ ርኵስተ ፡ ዕለተ ፡ ቅዱሳን ፡ እስመ ፡ ይስሕቱ ፡ አውራኀ ፡ ወሰንበታተ ፡ ወበዓላተ ፡ ወኢዮቤለዩ ።

38 በእንተዝ ፡ አነ ፡ እኤዝዘከ ፡ ወኣሰምዕ ፡ ለከ ፡ ከመ ፡ ታስምዕ ፡ ሎሙ ፡ እስመ ፡ እምድኅረ ፡ ሞትከ ፡ ያማስኑ ፡ ውሉድከ ፡ ከመ ፡ ይግበሩ ፡ ዓመተ ፡ ፫፻ወ፷ወ፬ ፡ መዋዕለ ፡ ባሕቲቶን ፡ ወበእንተዝ ፡ ይስሕቱ ፡ ሠርቀ ፡ ወሰንበተ ፡ ወጊዜ ፡ ወበዓላተ ፡ ወይበልዑ ፡ ኵሎ ፡ ደመ ፡ ምስለ ፡ ኵሉ ፡ ዘሥጋ ።