Chapter 5
Chapter 4 / Book of Jubilees / Dillmann's Edition / Chapter 5 Chapter 6

1 ወኮነ ፡ አመ ፡ ወጠኑ ፡ ደቂቀ ፡ እጓለ ፡ እመሕያው ፡ ይብዝኁ ፡ ዲበ ፡ ገጻ ፡ ለኵላ ፡ ምድር ፡ ወአዋልድ ፡ ተወልዳ ፡ ሎሙ ፡ ወርእይዎን ፡ መላእክተ ፡ እግዚአብሔር ፡ በአሐቲ ፡ ዓመት ፡ ዘኢዮቤልዩ ፡ ዝንቱ ፡ እስመ ፡ ሠናያት ፡ ለርኢይ ፡ እማንቱ ፡ ወነሥእዎን ፡ ሎሙ ፡ አንስትያ ፡ እምኵሎን ፡ እለ ፡ ኀረዩ ፡ ወወለዳ ፡ ሎመ ፡ ውሉደ ፡ ወእሙንቱ ፡ ረዓይት ።

2 ወልህቀት ፡ ዐመፃ ፡ ዲበ ፡ ምድር ፡ ወኵሉ ፡ ዘሥጋ ፡ አማሰነ ፡ ፍኖቶ ፡ እምሰብእ ፡ እስከ ፡ እንስሳ ፡ ወእስከ ፡ አራዊት ፡ ወእስከ ፡ አዕዋፍ ፡ ወእስከ ፡ ኵሉ ፡ ዘያንሶሱ ፡ ውስተ ፡ ምድር ፤ ኵሎሙ ፡ አማሰኑ ፡ ፍኖቶሙ ፡ ወሥርዐቶሙ ። ወአኀዙ ፡ ይትባልዑ ፡ በበይናቲሆሙ ፡ ወዐመፃ ፡ ልህቀት ፡ ዲበ ፡ ምድር ፡ ወኵሉ ፡ ሕሊና ፡ አእምሮ ፡ ለኵሎሙ ፡ እጓለ ፡ እመሕያው ፡ ከመዝ ፡ እኩይ ፡ ኵሎ ፡ መዋዕለ ።

3 ወርእያ ፡ እግዚአብሔር ፡ ለምድር ፡ ወናሁ ፡ ማሰነት ፡ ወአማሰነ ፡ ኵሉ ፡ ዘሥጋ ፡ ሥርዐቶ ፡ ወአእከዩ ፡ ኵሎሙ ፡ ቅድመ ፡ አዕይንቲሁ ፡ ኵሎ ፡ ዘሀሎ ፡ ውስተ ፡ ምድር ።

4 ወይቤ ፡ እደመስሶ ፡ ለሰብእ ፡ ወኵሎ ፡ ዘሥጋ ፡ ዘመልዕልተ ፡ ገጸ ፡ ምድር ፡ ዘፈጥረ ።

5 ወኖኅ ፡ ባሕቲቱ ፡ ረከበ ፡ ሞገሰ ፡ በቅድመ ፡ አዕይንቲሁ ፡ ለእግዚአብሔር ።

6 ወዲበ ፡ መላእክቲሁ ፡ እለ ፡ ፈነወ ፡ ውስተ ፡ ምድር ፡ ተምዐ ፡ ፈድፋደ ፡ ይሠርዎሙ ፡ እምኵሉ ፡ ሥልጣኖሙ ፡ ወይቤለነ ፡ ከመ ፡ ንእስሮሙ ፡ ውስተ ፡ መዕምቅቲሃ ፡ ለምድር ፡ ወናሁ ፡ እሙንቱ ፡ እሱራን ፡ ማእከሎሙ ፡ ወባሕትታወያን ።

7 ወዲበ ፡ ውሉዶሙ ፡ ወፅአ ፡ ቃል ፡ እምቅድመ ፡ ገጹ ፡ ከመ ፡ ይምሐጾሙ ፡ በሰይፍ ፡ ወያሰስሎሙ ፡ እምታሕተ ፡ ሰማይ ።

8 ወይቤ ፡ ኢይነብር ፡ መንፈስየ ፡ ዲበ ፡ ሰብእ ፡ ለዓለም ፡ እስመ ፡ ሥጋ ፡ እሙንቱ ፡ ወይኩን ፡ መዋዕሊሆሙ ፡ ፻ወ፳ ፡ ዓመት ።

9 ወፈነወ ፡ ማእከሎሙ ፡ ሰይፎ ፡ ከመ ፡ ይቅትል ፡ ፩፩ ፡ ቢጾ ፡ ወወጠኑ ፡ ይቅትሉ ፡ ዝንቱ ፡ ዘንተ ፡ እስከ ፡ ወድቁ ፡ ኵሎሙ ፡ ውስተ ፡ ሰይፍ ፡ ወተደምሰሱ ፡ እምነ ፡ ምድር ፡

10 ወአበዊሆሙሰ ፡ ይኔጽሩ ፡ ወእምድኅረዝ ፡ ተአስሩ ፡ ውስተ ፡ መዕምቅቲሃ ፡ ለምድር ፡ እስከ ፡ ዕለተ ፡ ደይን ፡ ዐቢይ ፡ ለከዊነ ፡ ኵነኔ ፡ እስከ ፡  ፤ ለዓለም ፡ ዲበ ፡ ኵሎሙ ፡ እለ ፡ አማሰኑ ፡ ፍኖቶሙ ፡ ወምክሮሙ ፡ ቅድመ ፡ እግዚአብሔር ።

11 ወደምሰሶሙ ፡ ለኵሎሙ ፡ እመካኖሙ ፡ ወኢተርፈ ፡ ፩ ፡ እምኔሆሙ ፡ ዘኢኰነነ ፡ በኵሉ ፡ እከዮሙ ።

12 ወገብረ ፡ ለኵሉ ፡ ግብሩ ፡ ፍጥረተ ፡ ሐዳሰ ፡ ወጻድቅተ ፡ ከመ ፡ ኢየአብሱ ፡ በኵሉ ፡ ፍጥረቶሙ ፡ እስከ ፡ ለዓለም ፡ ወይጽደቁ ፡ ኵሉ ፡ በበ ፡ ትዝምዱ ፡ ኵሎ ፡ መዋዕለ ፤

13 ወኵነኔ ፡ ኵሎሙ ፡ ተሠርዐ ፡ ወተጽሕፈ ፡ ውስተ ፡ ጽላተ ፡ ሰማይ ፡ ወአልቦ ፡ ዐመፃ ፡ ወኵሎሙ ፡ እለ ፡ ተዐደዉ ፡ እምፍኖቱ ፡ ለእንተ ፡ ተሠርዐት ፡ ሎሙ ፡ ከመ ፡ ይሑሩ ፡ ባቲ ፡ ወለእመ ፡ ኢሖሩ ፡ ባቲ ፡ ተጽሕፈ ፡ ኵነኔ ፡ ለኵሉ ፡ ፍጥረት ፡ ወለኵሉ ፡ ትዝምድ ።

14 ወአልቦ ፡ ምንትኒ ፡ ዘበሰማይ ፡ ወዘበምድር ፡ ወዘውስተ ፡ ብርሃን ፡ ወዘውስተ ፡ ጽልመት ፡ ወበሲኦል ፡ ወውስተ ፡ ቀላይ ፡ ወውስተ ፡ መጽልም ፡ ወኵሉ ፡ ኵነኔሆሙ ፡ ሥሩዕ ፡ ወጽሑፍ ፡ ወቅሩጽ ፡

15 በእንተ ፡ ኵሉ ፤ ለንኡስ ፡ ወለዐቢይ ፤ በከመ ፡ ዕበዩ ፡ ወለንኡስሂ ፡ በከመ ፡ ንእሱ ፡ ወለለ ፡ ፩ ፡ በከመ ፡ ፍኖቱ ፡ ይኴንኖ ።

16 ወኢኮነ ፡ ውእቱ ፡ ዘይነሥእ ፡ ገጸ ፡ ወኢኮነ ፡ ውእቱ ፡ ዘይነሥእ ፡ ሕልያነ ፡ እመ ፡ ይቤ ፡ ይግበር ፡ ኵነኔ ፡ ለለ፩፩ ፡ እመ ፡ ወሀበ ፡ ኵሎ ፡ ዘውስተ ፡ ምድር ፡ ኢይነሥእ ፡ ገጾ ፡ ወኢይትሜጠው ፡ እምእዴሁ ፡ እስመ ፡ መኰንን ፡ ውእቱ ።

17 ወዲበ ፡ ደቂቀ ፡ እስራኤል ፡ ተጽሕፈ ፡ ወተሠርዐ ፡ እመ ፡ ተመይጡ ፡ ኀቤሁ ፡ በጽድቅ ፡ የኀድግ ፡ ኵሎ ፡ አበሳሆሙ ፡ ወይሰሪ ፡ ኵሎ ፡ ኀጢአቶሙ ፡

18 ተሠርዐ ፡ ወተጽሕፈ ፡ ይትመሐር ፡ ለኵሉ ፡ እለ ፡ ይትመየጡ ፡ እምኵሉ ፡ ጌጋዮሙ ፡ ምዕረ ፡ ለለ ፡ ዓመት ።

19 ወዲበ ፡ ኵሎሙ ፡ እለ ፡ አማሰኑ ፡ ፍናዊሆሙ ፡ ወምክሮሙ ፡ እምቅድመ ፡ አይኅ ፡ ኢተንሥአ ፡ ገጾሙ ፡ ዘእንበለ ፡ ለኖኅ ፡ ባሕቲቱ ፡ እስመ ፡ ተንሥአ ፡ ሎቱ ፡ ገጹ ፡ በእንተ ፡ ውሉድ ፡ እለ ፡ አድኀኖሙ ፡ እማየ ፡ አይኅ ፡ በእንቲአሁ ፡ እስመ ፡ ጻድቅት ፡ ይእቲ ፡ ልቡ ፡ በኵሉ ፡ ፍናዊሁ ፡ በከመ ፡ እዙዝ ፡ በእንቲአሁ ፡ ወኢተዐደወ ፡ እምኵሉ ፡ ዘሥሩዕ ፡ ሎቱ ።

20 ወይቤ ፡ እግዚአብሔር ፡ ይደመስስ ፡ ኵሎ ፡ ዘዲበ ፡ የብስ ፡ ወኵሎ ፡ ዘተፈጥረ ፡ እምሰብእ ፡ እስከ ፡ አራዊት ፡ ወእስከ ፡ እንስሳ ፡ ወእስከ ፡ አዕዋፍ ፡ ወእስከ ፡ ዘይትሐወስ ፡ ዲበ ፡ ምድር ።

21 ወአዘዘ ፡ ለኖኅ ፡ ይግበር ፡ ሎቱ ፡ ታቦተ ፡ ከመ ፡ ያድኅኖ ፡ እምነ ፡ ማየ ፡ አይኅ ።

22 ወገብረ ፡ ኖኅ ፡ ታቦተ ፡ በኵሉ ፡ በከመ ፡ አዘዞ ፡ በ... ፡ ኢዮቤልወ ፡ ዓመታት ፡ በኃምስ ፡ ሱባዔ ፡ በ፭ ፡ ዓመት ።

23 ወቦአ ፡ በሳድስ ፡ ሎቱ ፡ በካልእ ፡ ወርኅ ፡ በሠርቁ ፡ ለካልእ ፡ ወርኅ ፤ እስከ ፡ አመ ፡ ዐሡሩ ፡ ወሰዱሱ ፡ ቦአ ፡ ውእቱ ፡ ወኵሉ ፡ ዘአባእነ ፡ ሎቱ ፡ ወስተ ፡ ታቦት ፡ ወዐጸዎ ፡ እግዚአብሔር ፡ እንተ ፡ አፍኣሁ ፡ በዐሡሩ ፡ ወሰቡዑ ፡ ምሴት ።

24 ወአርኀወ ፡ እግዚአብሔር ፡ ፯ ፡ መንበሕባሕተ ፡ ሰማይ ፡ ወአፈወ ፡ አንቅዕተ ፡ ቀላይ ፡ ዐቢይ ፡ በሰብዑ ፡ አፈው ፡ በኍልቍ ።

25 ወአኀዙ ፡ መንባሕባሓት ፡ ያውርዱ ፡ ማየ ፡ እምሰማይ ፡ ፵ ፡ መዋዕለ ፡ ወ፵ ፡ ለያልየ ፡ ወአንቅዕተ ፡ ቀላይሂ ፡ ያዐርጉ ፡ ማያተ ፡ እስከ ፡ መልአ ፡ ኵሉ ፡ ዓለም ፡ ማየ ።

26 ወልህቀ ፡ ማይ ፡ ዲበ ፡ ምድር ፤ ፲ወ፭ ፡ በእመት ፡ ተለዐለ ፡ ዲበ ፡ ኵሉ ፡ አደባር ፡ ነዋኃት ፡ ማያት ፡ ወተለዐለት ፡ ታቦት ፡ ዲበ ፡ ምድር ፡ ወታንሶሱ ፡ ዲበ ፡ ገጸ ፡ ማያት ።

27 ወሀሎ ፡ ማይ ፡ ይቀውም ፡ ዲበ ፡ ገጸ ፡ ምድር ፡ ፭ ፡ አውራኀ ፡ ፻ወ፭ ፡ ዕለተ ።

28 ወሖረት ፡ ታቦት ፡ ወአዕረፈት ፡ ዲበ ፡ ርእሰ ፡ ሉባር ፡ ፩ ፡ እምአድባረ ፡ አራራት ።

29 ወበወርኅ ፡ ራብዕ ፡ ተፈጸመ ፡ አንቅዕተ ፡ ቀላይ ፡ ዐቢይ ፡ ወመንበሕባሓተ ፡ ሰማይ ፡ ተእኅዛ ፡ ወበሠርቀ ፡ ወርኅ ፡ ሳብዕ ፡ ተርኅወ ፡ ኵሉ ፡ አፈወ ፡ መዕምቅተ ፡ ምድር ፡ ወአኀዘ ፡ ማይ ፡ ይረድ ፡ ውስተ ፡ ቀላይ ፡ ታሕቲት ።

30 ወበሠርቀ ፡ ወርኅ ፡ ዓሥር ፡ አስተርአየ ፡ አርእስተ ፡ አድባር ። ወበሠርቁ ፡ ለወርኅ ፡ ቀዳሚ ፡ አስተርአየት ፡ ምድር ።

31 ወነጽፈ ፡ ማያት ፡ እመልዕልተ ፡ ምድር ፡ በሱባዔ ፡ ኃምስ ፡ በሳብዕ ፡ ዓመቱ ፡ ሎቱ ፡ ወአመ ፡ ዐሡሩ ፡ ወሰቡዑ ፡ ዕለት ፡ ለካልእ ፡ ወርኅ ፡ የብሰት ፡ ምድር ።

32 ወአመ ፡ ፳ ፡ ወሰቡዑ ፡ ሎቱ ፡ አርኀዋ ፡ ለታቦት ፡ ወፈነወ ፡ እምውስቴታ ፡ አራዊተ ፡ ወእንስሳ ፡ ወአዕዋፈ ፡ ወዘይትሐወስ ።