Bel
Susanna / Deuterocanonical / Bel Tobit

1 እምድኅረ ፡ ሞተ ፡ ንጉሥ ፡ አስጢያጌስ ፡ ወተቀብረ ፡ ኀበ ፡ አበዊሁ ፡ ነግሠ ፡ ቂሮስ ፡ ፋርሳዊ ፡ መንግሥቶ ።

2 ወሀሎ ፡ ዳንኤል ፡ ደቀ ፡ ጽርሑ ፡ ለንጉሥ ፡ ወይክብር ፡ እምኵሉ ፡ አዕርክቲሁ ።

3 ወሀሎ ፡ ምስል ፡ ዘያመልኩ ፡ ሰብአ ፡ ባቢሎን ፡ ወያስተዋፅኡ ፡ ሎቱ ፡ ኵሎ ፡ አሚረ ፡ ሲሳዮ ፡ ስንዳሌ ፡ ዕሥር ፡ ወካዕበ ፡ በመስፈርተ ፡ አርጣባስ ፡ ወአባግዐ ፡ አርብዓ ፡ ወወይን ፡ ስድስቱ ፡ መስፈር ።

4 ወያመልኮ ፡ ንጉሥ ፡ ወየሐውር ፡ ንጉሥ ፡ ኵሎ ፡ አሚረ ፡ ወይሰግድ ፡ ሎቱ ፡ ወዳንኤልሰ ፡ ይሰግድ ፡ ለአምላኩ ፡ ወይቤሎ ፡ ንጉሥ ፤ ለምንት ፡ ኢትሰግድ ፡ ለቤል ።

5 ወይቤ ፤ ኢያመልክ ፡ ጣዖተ ፡ ግብረ ፡ እደ ፡ ሰብእ ፡ ዘእንበለ ፡ ዳእሙ ፡ አምላክ ፡ ሕያው ፡ ዘፈጠረ ፡ ሰማየ ፡ ወምድረ ፡ ወመኰንን ፡ ውእቱ ፡ ለኵሉ ፡ ዘነፍስ ።

6 ወይቤሎ ፡ ንጉሥ ፤ ይመስለከኑ ፡ ኢኮነ ፡ ሕያወ ፡ አምላከ ፡ ቤል ፡ ኢትሬኢኑ ፡ መጠነ ፡ ይበልዕ ፡ ወይሰቲ ፡ እንተ ፡ ጸብሐት ።

7 ወሠሐቀ ፡ ዳንኤል ፡ ወይቤ ፤ ኢያስሕቱከ ፡ ንጉሥ ፡ ዝሰ ፡ ውስጡ ፡ ጽቡር ፡ ወአፍኣሁ ፡ ብርት ፡ ወኢይበልዕ ፡ ወኢይሰቲ ፡ ግሙራ ።

8 ወተምዐ ፡ ንጉሥ ፡ ወጸውዖሙ ፡ ለገነውቱ ፡ ወይቤሎሙ ፤ እመ ፡ ኢነገርክሙኒ ፡ መኑ ፡ ይበልዕ ፡ ዘንተ ፡ ሲሳዮ ፡ ትመውቱ ።

9 ወእመሰ ፡ በጻሕክሙ ፡ ሊተ ፡ ከመ ፡ ቤል ፡ ይበልዕ ፡ ይመውት ፡ ዳንኤል ፡ ዘፀረፈ ፡ ላዕለ ፡ ቤል ፤ ወይቤሎ ፡ ዳንኤል ፡ ለንጉሥ ፤ ለይኩን ፡ በከመ ፡ ትቤ ።

10 ወየአክሉ ፡ ገነውቱ ፡ ለቤል ፡ ሰብዓ ፡ ዘእንበለ ፡ አንስት ፡ ወደቅ ፡ ወሖሩ ፡ ንጉሥ ፡ ወዳንኤል ፡ ቤት ፡ ቤል ።

11 ወይቤሉ ፡ ገነውተ ፡ ቤል ፤ ናሁ ፡ ንሕነ ፡ ነሐውር ፡ አፍኣ ፡ ወአንተ ፡ ንጉሥ ፡ ሥራዕ ፡ ማእዳቲሁ ፡ ወቅዳሕ ፡ ወይኖሂ ፡ ወአስተናብር ፡ ወዝጋሕ ፡ ኆኅቶሂ ፡ ወኅትም ፡ በማኅተምከ ።

12 ወጊስ ፡ በጽባሕ ፡ ወእመ ፡ ኢረከብከ ፡ በዘ ፡ በልዐ ፡ ኵሎ ፡ ቤል ፡ ንመውት ፡ ወእመ ፡ አኮ ፡ ዳንኤል ፡ ዘሐሰወ ፡ ላዕሌነ ።

13 ወእሙንቱሰ ፡ ያአምሩ ፡ ዘይገብሩ ፡ በታሕተ ፡ ማእድ ፡ ቦሙ ፡ ፍኖተ ፡ ኅቡኡ ፡ ወእንተ ፡ ህየ ፡ ይበውኡ ፡ ዘልፈ ፡ ወይበልዑ ።

14 ወወፂኦሙ ፡ ሠርዐ ፡ ንጉሥ ፡ ለቤል ፡ ዘይበልዕ ፡ ወአዘዘ ፡ ዳንኤል ፡ ለቍልዔሁ ፡ ያምጽኡ ፡ ሐመደ ፡ ወረበበ ፡ ውስተ ፡ ቤቱ ፡ በቅድመ ፡ ንጉሥ ፡ ባሕቲቱ ፡ ወወፂኦሙ ፡ ዐጸዉ ፡ ኆኅተ ፡ ወኀተሙ ፡ በማኅተመ ፡ ንጉሥ ፤ ወኀሊፎሙ ።

15 ቦኡ ፡ ገነውተ ፡ ቤል ፡ በሌሊት ፡ በከመ ፡ ያለምዱ ፡ ወአንስቶሙ ፡ ወደቂቆሙ ፡ ወበልዑ ፡ ወሰትዩ ፡ ኵሎ ።

16 ወጌሱ ፡ በጽባሕ ፡ ንጉሥ ፡ ወዳንኤል ።

17 ወይቤ ፡ ንጉሥ ፤ ዳኅን ፡ ማኅተም ፡ ዳንኤል ፤ ወይቤ ፤ እወ ፡ ዳኅን ፡ ንጉሥ ።

18 ወእምዝ ፡ ሶበ ፡ አርኀወ ፡ ኆኅተ ፡ ነጸረ ፡ ንጉሥ ፡ ማእደ ፡ ወውዐ ፡ በዐቢይ ፡ ቃል ፡ ወይቤ ፤ ዐቢይ ፡ አንተ ፡ ቤል ፡ ወአልብከ ፡ ትምይንተ ።

19 ወሠሐቆ ፡ ዳንኤል ፡ ወአኀዞ ፡ ለንጉሥ ፡ ኢይባእ ፡ ውስጠ ፡ ወይቤሎ ፤ ነጽር ፡ ምድረ ፡ ወርኢ ፡ አሠረ ፡ ምንትዝ ።

20 ወይቤ ፡ ንጉሥ ፤ እሬኢ ፡ አሠረ ፡ ዕደው ፡ ወአንስት ፡ ወደቅ ።

21 ወተምዐ ፡ ንጉሥ ፡ ወአኀዞሙ ፡ ሶቤሃ ፡ ለገነውት ፡ ወአንስቶሙ ፡ ወደቆሙ ፡ ወአርአይዎ ፡ ኆኅተ ፡ ኅቡአ ፡ እንተ ፡ ኀበ ፡ ይበውኡ ፡ ወይበልዑ ፡ ዘውስተ ፡ ማእድ ።

22 ወቀተሎሙ ፡ ንጉሥ ፡ ወወሀበ ፡ ቤልሃ ፡ ወመጠዎ ፡ ለዳንኤል ፡ ወቀጥቀጦ ፡ ወነሠተ ፡ ቤቶ ።

23 ወሀሎ ፡ ከይሲ ፡ ዐቢይ ፡ ወያመልክዎ ፡ ሰብአ ፡ ባቢሎን ።

24 ወይቤሎ ፡ ንጉሥ ፡ ለዳንኤል ፤ ዝኒ ፡ ብርትኑ ፡ ትብል ፡ ወናሁ ፡ ሕያው ፡ ወይበልዕ ፡ ወይሰቲ ፡ ወኢትክል ፡ ብሂሎቶ ፡ ኢኮነ ፡ ሕያወ ፡ አምላከ ፡ ስግድ ፡ ሎቱ ።

25 ወይቤሎ ፡ ዳንኤል ፤ ለእግዚአብሔር ፡ አምላኪየ ፡ እሰግድ ፡ እስመ ፡ ውእቱ ፡ አምላክ ፡ ሕያው ።

26 ወአንተ ፡ ንጉሥ ፡ አብሐኒ ፡ ወእቅትሎ ፡ ለዝ ፡ ከይሲ ፡ ዘእንበለ ፡ መጥባሕት ፡ ወበትር ፤ ወይቤሎ ፡ ንጉሥ ፤ አባሕኩከ ።

27 ወነሥአ ፡ ዳንኤል ፡ ፔሳ ፡ ወሥዕርተ ፡ ወሥብሐ ፡ ወአብሰሎ ፡ ኅቡረ ፡ ወገብሮ ፡ ለኃልኀ ፡ ወአፍአሞ ፡ ለከይሲ ፡ ውስተ ፡ አፉሁ ፡ ወውኂጦ ፡ ነቅዐ ፡ ውእቱ ፡ ከይሲ ፡ ወይቤሎሙ ፤ ርኢ ፡ አምላክክሙ ።

28 ወእምዝ ፡ ሰሚዖሙ ፡ ሰብአ ፡ ባቢሎን ፡ ተምዑ ፡ ጥቀ ፡ ወተመይጡ ፡ ላዕለ ፡ ንጉሥ ፡ ወይቤሉ ፤ ተይህደ ፡ ንጉሥ ፡ ቤልሃኒ ፡ ቀተለ ፡ ወቀጥቀጦ ፡ ወከይሴኒ ፡ ቀተለ ፡ ወገነወተኒ ፡ ቀተለ ።

29 ወይቤሉ ፤ ንሖር ፡ ኀበ ፡ ንጉሥ ፡ ወየሀበነ ፡ ዳንኤልሃ ፡ ወእመ ፡ አኮ ፡ ንቀትለከ ፡ ወቤተከሂ ።

30 ወርእዮ ፡ ንጉሥ ፡ ከመ ፡ ጥቀ ፡ ያጠውቅዎ ፡ ሶበ ፡ በግብር ፡ ኮኖ ፡ ለንጉሥ ፡ መጠዎሙ ፡ ዳንኤልሃ ።

31 ወወሰድዎ ፡ ውስተ ፡ ግበ ፡ አናብስት ፡ ወነበረ ፡ ህየ ፡ ሰዱሰ ፡ ዕለተ ።

32 ወሀለዉ ፡ ውስተ ፡ ግብ ፡ ሰብዐቱ ፡ አናብስት ፡ ወኵሎ ፡ አሚረ ፡ ይሴስይዎሙ ፡ ክልኤ ፡ ሰብአ ፡ ወክልኤ ፡ አባግዐ ፡ ወአሜሁሰ ፡ ኢወሀብዎሙ ፡ ከመ ፡ ይብልዕዎ ፡ ለዳንኤል ።

33 ወሀሎ ፡ እንባቆም ፡ በይሁዳ ፡ ነቢይ ፡ ወአብሰለ ፡ ተብሲለ ፡ ወኅብሰተኒ ፡ ወወደየ ፡ ውሰተ ፡ አሰፈሪድ ፡ ወወረደ ፡ ሐቅለ ፡ ይሰድ ፡ ለእለ ፡ የዐፅዱ ።

34 ወይቤሎ ፡ መልአከ ፡ እግዚአብሔር ፡ ለእንባቆም ፤ ሰድ ፡ ዘንተ ፡ ምሳሐ ፡ ለዳንኤል ፡ ባቢሎን ፡ ውስተ ፡ ግበ ፡ አናብስት ።

35 ወይቤሎ ፡ እንባቆም ፤ እግዚኦ ፡ ኢያአምር ፡ ባቢሎን ፡ ወኢርኢኩ ፡ ግበ ፡ አናብስት ፡ አይቴ ፡ ውእቱ ።

36 ወአኀዞ ፡ መልአከ ፡ እግዚአብሔር ፡ በድማሑ ፡ ወጾሮ ፡ በሥዕርተ ፡ ርእሱ ፡ ወአብጽሖ ፡ ኀበ ፡ ግበ ፡ አናብስት ፡ ዘባቢሎን ፡ በኀይለ ፡ መንፈሱ ።

37 ወከልሐ ፡ እንባቆም ፡ ወይቤ ፤ ዳንኤል ፡ ዳንኤል ፡ ንሣእ ፡ ምሳሔ ፡ ዘፈነወ ፡ ለከ ፡ እግዚአብሔር ።

38 ወይቤ ፡ ዳንኤል ፤ ተዘከረኒሁ ፡ እግዚአብሔር ፡ ወኢኀደጎሙ ፡ ለእለ ፡ ያፈቅርዎ ።

39 ወተንሥአ ፡ ዳንኤል ፡ ወበልዐ ፡ ወአግብኦ ፡ መልአከ ፡ እግዚአብሔር ፡ ለእንባቆም ፡ ብሔሮ ፡ ሶቤሃ ።

40 ወመጽአ ፡ ንጉሥ ፡ በሳብዕት ፡ ዕለት ፡ ወላሐዎ ፡ ለዳንኤል ፡ ወቀርበ ፡ ኀበ ፡ ግበ ፡ አናብስት ፡ ወነጸረ ፡ ወርእዮ ፡ ለዳንኤል ፡ ይነብር ።

41 ወከልሐ ፡ ንጉሥ ፡ በዐቢይ ፡ ቃል ፡ ወይቤ ፤ ዐቢይ ፡ አንተ ፡ እግዚአብሔር ፡ አምላከ ፡ ዳንኤል ፡ ወአልቦ ፡ ባዕደ ፡ ዘእንበሌከ ።

42 ወአውፅኦ ፡ ወለእልክቱሰ ፡ እለ ፡ ፈቀዱ ፡ ይቅትልዎ ፡ አውረድዎሙ ፡ ውስተ ፡ ግብ ፡ ወበልዕዎሙ ፡ ሶቤሃ ፡ በቅድሜሁ ።

 

ተፈጻመ ፡ ዘዳንኤል ።