Chapter 8
Chapter 7 / Old Testament / Daniel / Chapter 8 Chapter 9

1 አመ ፡ ዐሠርቱ ፡ ዓመተ ፡ መንግሥቱ ፡ ለበልጣሳር ፡ ንጉሥ ፡ አስተርአየኒ ፡ ራእይ ፡ አነ ፡ ዳንኤል ፡ እምድኅረ ፡ አስተርአየኒ ፡ ዘቀዳሚ ።

2 ወሀለውኩ ፡ ውስተ ፡ ሱሶስ ፡ ዘባሪ ፡ እንተ ፡ ብሔረ ፡ ኤሌም ፡ ወሀለውኩ ፡ ውስተ ፡ ኡባል ።

3 ወአንሣእኩ ፡ ዐይንየ ፡ ወርኢኩ ፡ መጽአ ፡ አሐዱ ፡ ብሕኵ ፡ ወቆመ ፡ ቅድመ ፡ ኡባል ፡ ወነዋኅት ፡ አቅርንቲሁ ፡ ወአሐዱ ፡ ይነውኅ ፡ እምካልኡ ፡ ወዘይነውኅ ፡ ድኅረ ፡ በቈለ ።

4 ወርኢክዎ ፡ ለውእቱ ፡ ብሕኵ ፡ ይወግእ ፡ በአቅርንቲሁ ፡ ለመንገለ ፡ ባሕር ፡ ወሰሜን ፡ ወደቡብ ፡ ወኢይቀውም ፡ ኵሉ ፡ አራዊት ፡ ቅድሜሁ ፡ ወአልቦ ፡ ዘያመሥጥ ፡ እምእዴሁ ፡ ወገብረ ፡ ዘከመ ፡ ይፈቅድ ፡ ዐቢየ ።

5 ወአነ ፡ ዳንኤል ፡ ሀለውኩ ፡ ውስተ ፡ ሱሶስ ፡ ወእኄሊ ፡ ወመጽአ ፡ አሐዱ ፡ ደቤላ ፡ ዘጠሊ ፡ እምደቡብ ፡ ላዕለ ፡ ኵሉ ፡ ገጸ ፡ ምድር ፡ ወአልቦ ፡ ዘለከፋ ፡ ለምድር ፡ ወቦ ፡ ቀርነ ፡ ማእከለ ፡ አቅርንቲሁ ፡ ውእቱ ፡ ደቤላ ።

6 ወሖረ ፡ ኀበ ፡ ዝኵ ፡ ብሕኵ ፡ ዘቦ ፡ አቅርንተ ፡ ዘርኢኩ ፡ ይቀውም ፡ ኀበ ፡ ኡባል ፡ ወሮጸ ፡

ኀቤሁ ፡ በኀይል ።

7 ወርኢክዎ ፡ በጽሐ ፡ ኀበ ፡ ዝኵ ፡ ወአብደ ፡ ላዕሌሁ ፡ ወአውደቆ ፡ ለብሕኵ ፡ ወቀጥቀጦ ፡ ክልኤሆሙ ፡ አቅርንቲሁ ፡ ወአልቦ ፡ ኀይለ ፡ ዝኵ ፡ ብሕኵ ፡ ከመ ፡ ይቁም ፡ ቅድሜሁ ፤ ወነፅኆ ፡ ውስተ ፡ ምድር ፡ ወኬዶ ፡ ወአልቦ ፡ ዘያድኅኖ ፡ እምእዴሁ ፡ ለውእቱ ፡ ብሕኵ ።

8 ወዝኵ ፡ ደቤላ ፡ ዘጠሊ ፡ አብደ ፡ ጥቀ ፡ ወሶበ ፡ ግደሎ ፡ ሰበሮ ፡ ዝኵ ፡ ቀርኖ ፡ [ወ]ዐቢየ ፡ ወበቈለ ፡ አርባዕቱ ፡ መትሕቶ ፡ ለአርባዕቱ ፡ ነፋሳት ፡ ዘሰማይ ።

9 ወእምውስተ ፡ አሐዱ ፡ እምኔሆሙ ፡ በቈለ ፡ አሐዱ ፡ ቀርን ፡ ጽኑዕ ፡ ወዐቢይ ፡ ጥቀ ፡ ለመንገለ ፡ ሰሜን ፡ ወጽባሕ ፡ ለኀበ ፡ ኀይል ።

10 ወዐቢይ ፡ እስከ ፡ ኀይለ ፡ ሰማይ ፡ ወወድቀ ፡ ውስተ ፡ ምድር ፡ እምኀይለ ፡ ሰማይ ፡ ወእምከዋክብተ ፡ ሰማይ ፡ ወኬዶን ።

11 እስክ ፡ ማእከለ ፡ ሰርዌ ፡ ከመ ፡ ያድኅን ፡ ፄዋሁ ፡ ወባሕቱ ፡ ይትሀወኩ ፡ መሣውዕት ፡ ወኮነ ፡ ወተሰልጠ ፡ ወማሰነ ፡ መቅደስ ።

12 ወተውህበ ፡ ላዕለ ፡ መሥዋዕተ ፡ ኀጢአት ፡ ወተገድፈት ፡ ውስተ ፡ ምድር ፡ ወገብረ ፡ ወተሰልጠ ።

13 ወሰማዕኩ ፡ አሐዱ ፡ መልአክ ፡ ይነግር ፡ ወይቤ ፡ አሐዱ ፡ ቅዱስ ፡ ይነብብ ፡ ለፌልሙንጢ ፤ እስከ ፡ ማእዜኑ ፡ ይቁም ፡ ራአይ ፡ መሥዋዕት ፡ እንተ ፡ ተነሥተት ፡ ወኀጢአት ፡ እንተ ፡ አማሰነት ፡ ትውህበት ፡ ወመቅደስ ፡ ወኀይል ፡ ተከይደ ።

14 ወይቤሎ ፤ እስከ ፡ ሰርክ ፡ ወነግህ ፡ ወዕሥራ ፡ ወሠለስቱ ፡ ምእት ፡ መዋዕል ፡ ወይነድሕ ፡ መቅደስ ።

15 ወእምዝ ፡ ሶበ ፡ ርኢኩ ፡ አነ ፡ ዳንኤል ፡ ዘራእየ ፡ ኀሠሥኩ ፡ ራእየ ፡ ወመጽአ ፡ ወቆመ ፡ ቅድሜየ ፡ ከመ ፡ ራእየ ፡ ብእሲ ።

16 ወሰማዕኩ ፡ ቃለ ፡ ብእሲ ፡ በማእከለ ፡ ኡባል ፡ ወጸውዐ ፡ ወይቤ ፤ ገብርኤል ፡ አለብዎ ፡ ዝኩ ፡ ራእየ ።

17 ወመጽአ ፡ ወቆመ ፡ ጠቃ ፡ ኀበ ፡ እቀውም ፡ አነ ፡ ወመጺኦ ፡ ደንገፅኩ ፡ ወወደቁ ፡ በገጽየ ፡ ወይቤለኒ ፤ ለበውከኑ ፡ ወልደ ፡ እጓለ ፡ እመ ፡ ሕያው ፡ ዓዲ ፡ ኢኀልቀ ፡ ዕድሜሁ ፡ ለራእይ ።

18 ወሶበ ፡ ነበበኒ ፡ ደንገፅኩ ፡ ወወደቁ ፡ በገጽየ ፡ ውስተ ፡ ምድር ፡ ወአኀዘኒ ፡ ወአቀመኒ ፡ በእግርየ ።

19 ወይቤለኒ ፤ ናሁ ፡ አነ ፡ እነግረከ ፡ ዘይክውን ፡ በደኃሪ ፡ መቅሠፍት ፡ እስመ ፡ ዓዲ ፡ ማኅለቅተ ፡ ዕድሜሁ ።

20 ብሕኵ ፡ ዘርኢከ ፡ ዘቦ ፡ አቅርንተ ፡ ንጉሠ ፡ ፋርስ ፡ ወሜዶን ፡ ውእቱ ።

21 ወደቤላ ፡ ዘጠሊ ፡ ንጉሠ ፡ ኤሊኖን ፡ ውእቱ ፡ ወቀርኑ ፡ የዐቢ ፡ ዘማእከለ ፡ አቅርንቲሁ ፡ ውእቱ ፡ ንጉሥ ፡ ቀዳማዊ ።

22 ወዘተቀጥቀጠ ፡ ኀበ ፡ ቆሙ ፡ አርባዕቱ ፡ አቅርንት ፡ ታሕቴሆሙ ፡ አርባዕቱ ፡ ነገሥት ፡ ይትነሥኡ ፡ ወአኮ ፡ በኀይሎሙ ።

23 ወበደኃሪታ ፡ ለመንግሥቶሙ ፡ ትትፈጸም ፡ ኀጢአቶሙ ፡ ወይትነሣእ ፡ ንጉሥ ፡ ዘኢ<የ>ኀፍር ፡ ገጸ ፡ ወኢያአምር ፡ ምሳሌ ።

24 ወጽኑዕ ፡ ኀይሉ ፡ ወያማስን ፡ ዕጹባተ ፡ ወያረትዕ ፡ ወገብረ ፡ ወያጠፍኦሙ ፡ ለጽኑዓን ፡ ወለቅዱሳን ፡ ሕዝብ ።

25 ወያረትዕ ፡ አርዑት ፡ ክሳድ ፡ ወትምይንት ፤ ውስተ ፡ እዴሁ ፡ ወይትዔበይ ፡ በልቡ ፡ ወበጕሕሉት ፡ ያኀልቆሙ ፡ ለብዙኃን ፡ <ወዲበ ፡ መልአከ ፡ መላእክት ፡ ይቀውም ፡ ወዘእንበለ ፡ እድ ፡ ይትቀጠቀጥ ፡ እደ ።

26 ወራእየ ፡ ሰርክ ፡ ወነግህ ፡ ዘተብህለ ፡ እሙን ፡ ውእቱ ፡ >ወአንተ ፡ ኅትሞ ፡ ለዝ ፡ ራእይ ፡ ለብዙኅ ፡ መዋዕል ።

27 ወአነ ፡ ዳንኤል ፡ ደዌኩ ፡ ወሰከብኩ ፡ መዋዕለ ፡ ወተንሣእኩ ፡ ወገበርኩ ፡ ግብረ ፡ ንጉሥ ፡ ወአንከርኩ ፡ ዘራእየ ፡ ወአልቦ ፡ ዘያአምሮ ።