Chapter 7
Chapter 6 / Old Testament / Daniel / Chapter 7 Chapter 8

1 ራእይ ፡ በቀዳማዊ ፡ ዓመተ ፡ መንግሥቱ ፡ ለበልጣሰር ፡ ንጉሠ ፡ ከለዴዎን ፡ ሐለመ ፡ ዳንኤል ፡ ሕልመ ፡ ወርእየ ፡ ርእሶ ፡ በውስተ ፡ ምስካቡ ፡ ወጸሐፈ ፡ ሕልሞ ።

2 አነ ፡ ዳንኤል ፡ ሐለምኩ ፡ ወርኢኩ ፡ አርባዕተ ፡ ነፋሳቱ ፡ ነፍኁ ፡ ውስተ ፡ ባሕር ፡ ዐቢይ ።

3 ወዐርጉ ፡ አራዊት ፡ አርባዕቱ ፡ ዐበይት ፡ እምባሕር ፡ ኅቡረ ።

4 ወቀዳማዊ ፡ ከመ ፡ አንበሳዊት ፡ ወባቲ ፡ ክንፈ ፡ ወክነፊሃኒ ፡ ከመዘ ፡ ንስር ፡ ወርኢክዋ ፡ እስከ ፡ ተመልኀ ፡ ክነፊሃ ፡ ወተንሥአት ፡ ወቆመት ፡ በእግረ ፡ ሰብእ ፡ ዲበ ፡ ምድር ፡ ወልበ ፡ ሰብእ ፡ ተውህበ ፡ ላቲ ።

5 ወመጽአ ፡ ካልእ ፡ አርዌ ፡ ወይመስል ፡ ድበ ፡ ወቆመ ፡ አሐዱ ፡ ገጹ ፡ ወሠለስቱ ፡ ገበዋቲሃ ፡ ውስተ ፡ አፉሃ ፡ <ማእከለ ፡ አስናኒሃ ፡ >ወከመዝ ፡ እቤላ ፤ ተንሥኢ ፡ ብልዒ ፡ ሥጋ ፡ ብዙኀ ።

6 ወእምድኅረ ፡ ዝንቱ ፡ ርኢኩ ፡ ካልአ ፡ አርዌ ፡ ከመ ፡ ነምር ፡ ወላዕሌሃ ፡ ኀምስቱ ፡ ክንፈ ፡ ዖፍ ፡ ወአርባዕቱ ፡ አርእስቲሃ ፡ ለአርዌሁ ፡ ወተውህበ ፡ ሎቱ ፡ መባሕት ።

7 ወድኅሬሁ ፡ ሎቱ ፡ ርኢኩ ፡ ራብዕ ፡ ግሩም ፡ ወመደንግፅ ፡ ወኀያል ፡ ጥቀ ፡ ወስነኒሁ ፡ ዘኀጺን ፡ ይበልዕ ፡ ወየሐርጽ ፡ ወዘተርፈ ፡ ይከይድ ፡ በእግሩ ፡ ወውአቱ ፡ የዐቢ ፡ እምኵሉ ፡ አራዊት ፡ ዘቅድሜሁ ፤ ዐሠርቱ ፡ አቅርንቲሁ ።

8 ወነጸርኩ ፡ አቅርንቲሁ ፡ ወናሁ ፡ ካልእ ፡ ቀርን ፡ ንኡስ ፡ በቈለ ፡ በማእከሎሙ ፡ ወሠለስቱ ፡ አቅርንቲሁ ፡ እለ ፡ ቅድሜሁ ፡ ተመልኁ ፡ እምቅድመ ፡ ገጹ ፡ ወውስቴቱ ፡ አዕይንት ፡ ከመ ፡ አዕይንተ ፡ ሰብእ ፡ ውስተ ፡ ውእቱ ፡ ቀርን ፡ ወአፉሁ ፡ ይነብብ ፡ ዐቢያተ ።

9 ወርኢኡ ፡ እስከ ፡ አንበሩ ፡ መናብርተ ፡ ወነበረ ፡ ብሉየ ፡ መዋዕል ፡ ወልብሱ ፡ ጻዕዳ ፡ ከመ ፡ በረድ ፡ ወሥዕርተ ፡ ርእሱ ፡ ከመ ፡ ፀምር ፡ ወመንበሩሂ ፡ እሳት ፡ ዘይነድድ ፡ ወሰረገላቲሁኒ ፡ አፍሓም ፡ ዘያንበለብል ።

10 ወፈለገ ፡ እሳት ፡ ይውሕዝ ፡ ቅድሜሁ ፤ አእላፈ ፡ አእላፍ ፡ ይትለአክዎ ፡ ወምእልፊት ፡ አእላፍ ፡ ይቀውሙ ፡ ቅድሜሁ ፤ ወነበረ ፡ ዐውደ ፡ ወከሠቱ ፡ መጻሕፍተ ።

11 ወርኢኩ ፡ ሶቤሃ ፡ እምቃለ ፡ ነገሩ ፡ ዐቢይ ፡ ዘይነብብ ፡ <ዝኩ ፡ ቀርን ፡ እስከ ፡ ተአተተ ፡ >ዝኩ ፡ አርዌ ፡ ወጠፍአ ፡ ወወሀቡ ፡ ሥጋሁ ፡ ያውዕዩ ፡ በእሳት ።

12 ወቆመ ፡ ርእሶሙ ፡ ለእልክቱ ፡ አራዊት ፡ ወተውህበ ፡ ሎሙ ፡ ነዋኅ ፡ ሕይወት ፡ እስከ ፡ ዕድሜሆሙ ።

13 ወርኢኩ ፡ በራእየ ፡ ሌሊት ፡ ወናሁ ፡ መጽአ ፡ በደመና ፡ ሰማይ ፡ ከመ ፡ ወልደ ፡ እጓለ ፡ እመ ፡ ሕያው ፡ ወበጽሐ ፡ ኀበ ፡ ብሉየ ፡ መዋዕል ።

14 ወተውህበ ፡ ሎቱ ፡ ምኵናን ፡ ወክብር ፡ ወመንግሥት ፡ ወኵሎሙ ፡ አሕዛብ ፡ ወበሓውርት ፡ ወነገድ ፡ ተቀንዩ ፡ ሎቱ ፡ ወምኵናኑሂ ፡ ምኵናን ፡ ዘለዓለመ ፡ ዓለም ፡ ዘኢየኀልቅ ፡ ወመንግሥቱሂ ፡ ዘኢይማስን ።

15 ወርዕደኒ ፡ መንፈስየ ፡ አነ ፡ ዳንኤል ፡ ወደንገፀኒ ፡ ልብየ ፡ እምራእየ ፡ ርእስየ ።

16 ወሖርኩ ፡ ወተጠየቅዎ ፡ ለአሐዱ ፡ እምእለ ፡ ይቀውሙ ፡ ወነገረኒ ፡ ወአይድዐኒ ፡ ፍካሬሁ ፡ ጥዩቀ ፡ ኵሎ ፡ ነገሮ ።

17 እሉ ፡ አርባዕቱ ፡ አራዊት ፡ ዐበይት ፡ አርባዕቱ ፡ ነገሥት ፡ እሙንቱ ፡ ይትነሥኡ ፡ ዲበ ፡ ምድር ፡ ወየአትቱ ፡

18 ወይገብእ ፡ መንግሥት ፡ ለቅዱሳነ ፡ ልዑል ፡ ወይነብርዋ ፡ ለዓለመ ፡ ዓለም ።

19 ወተጠየቁ ፡ በእንተ ፡ ራብዕ ፡ አርዌ ፡ እስመ ፡ ነኪር ፡ ውእቱ ፡ እምኵሉ ፡ አራዊት ፡ ወግሩም ፡ ውእቱ ፡ ጥቀ ፡ ወስነኒሁ ፡ ዘኀጺን ፡ ወጽፈሪሁኒ ፡ ዘኀጺን ፡ ወይበልዕሂ ፡ ወየሐርጽሂ ፡ ወዘተርፈ ፡ ይከይድ ፡ በእግሩ ።

20 ወበእንተ ፡ ዐሠርቱ ፡ አቅርንቲሁ ፡ ዘውስተ ፡ ርእሱ ፡ ወዝኩሂ ፡ ካልእ ፡ ዘበቈለ ፡ ወመልኆሙ ፡ ለዐሠርቱ ፡ እለ ፡ እምቅድሜሁ ፡ አቅርንት ፡ ዝኩ ፡ ዘአዕይንት ፡ ወአፉሁ ፡ ይነብብ ፡ ዐቢያተ ፡ ወርእሱሂ ፡ ዐቢይ ፡ እምቢጹ ።

21 ርኢክዎ ፡ ለውእቱ ፡ ቀርን ፡ ይትቃተሎሙ ፡ ለቅዱሳን ፡ ወሞኦሙ ።

22 እስከ ፡ መጽአ ፡ ብሉየ ፡ መዋዕል ፡ ወፈትሐ ፡ ሎሙ ፡ ለቅዱሳነ ፡ ልዑል ፡ ወበጽሐ ፡ ዕድሜሁ ፡ ወአጽንዑ ፡ መንግሥቶሙ ፡ ቅዱሳን ።

23 ወይቤ ፤ አርዌ ፡ ራብዕ ፡ ራብዕት ፡ መንግሥት ፡ ይእቲ ፡ ውስተ ፡ ምድር ፡ እንተ ፡ ተዐቢ ፡ እምኵሉ ፡ መንግሥታት ፡ ወትበልዕ ፡ ኵሎ ፡ መንግሥታተ ፡ ምድር ፡ ወይከይዳ ፡ ወይመትራ ።

24 ወዐሠርቱሂ ፡ አቅርንት ፡ ዐሠርቱ ፡ መንግሥታት ፡ ዘይትነሣእ ፡ ዲበ ፡ ምድር ፡ ወእምድኅሬሁ ፡ ይትነሣእ ፡ ካልእ ፡ ንጉሥ ፡ ለእኩያን ፡ እለ ፡ ቅድሜሁ ፡ ወያኀስሮሙ ፡ ለዐሠርቱ ፡ ነገሥት ።

25 ወይነብብ ፡ በነገረ ፡ ልዑል ፡ ወያስሕቶሙ ፡ ለቅዱሳነ ፡ ልዑል ፡ ወይኄሊ ፡ ይወልጥ ፡ መዋዕለ ፡ ወሕገ ፡ ወይትወሀብ ፡ ሎቱ ፡ እስከ ፡ ዕድሜሁ ፡ ውስተ ፡ እዴሁ ፡ ወዓመት ፡ ወመንፈቀ ፡ ዓመት ።

26 ወነበረ ፡ ዐውደ ፡ ወይስዕሮ ፡ ለመልአክ ፡ ከመ ፡ ያማስን ፡ ለግሙራ ።

27 ወመንግሥተ ፡ ወምኵናነ ፡ ወዕበየ ፡ መንግሥት ፡ ዘመትሕተ ፡ ሰማይ ፡ ተውህበ ፡ ለቅዱሳነ ፡ ልዑል ፡ ወመንግሥቱሂ ፡ መንግሥት ፡ ዘለዓለመ ፡ ዓለም ፡ ወኵሉ ፡ መኳንንት ፡ ይትቀነዩ ፡ ሎቱ ፡ ወይትኤዘዙ ፡ ሎቱ ፡ እስከ ፡ ዝየ ፡ ወአሜሁ ፡ ማኅለቅተ ፡ ሕዝብ ።

28 ወአነ ፡ ዳንኤል ፡ ኅሊናየ ፡ ይትሀወከኒ ፡ ጥቀ ፡ በሕቁ ፡ ወተወለጠኒ ፡ ራእይ ፡ ወዐቀብኩ ፡ ነገሮ ፡ ውስተ ፡ ልብየ ።