Chapter 6
Chapter 5 / Old Testament / Daniel / Chapter 6 Chapter 7

1 ወአደሞ ፡ በቅድሜሁ ፡ ለዳርዮስ ፡ ወሤመ ፡ በውስተ ፡ መንግሥቱ ፡ ምእተ ፡ ወዕሥራ ፡ መሳፍንተ ፡ ከመ ፡ የሀልዉ ፡ ውስተ ፡ ኵሉ ፡ መንግሥቱ ።

2 ወእለ ፡ ይትሌዐሉ ፡ እምኔሆሙ ፡ ሠለስቱ ፡ ነገሥት ፡ ወአሐዱ ፡ እምኔሆሙ ፡ ዳንኤል ፡ ከመ ፡ ኀቤሆሙ ፡ ያግብኡ ፡ ነሥታ ፡ ወኢያጽሕብዎ ፡ ለንጉሥ ።

3 ወዳንኤል ፡ የዐቢ ፡ እምኔሆሙ ፡ እስመ ፡ ፈድፋደ ፡ መንፈስ ፡ ዘላዕሌሁ ፡ ወሤሞ ፡ ንጉሥ ፡ ላዕለ ፡ ኵሉ ፡ መንግሥቱ ።

4 ወኀሠሡ ፡ ሎቱ ፡ ምክንያተ ፡ ለዳንኤል ፡ መገብት ፡ ወመኳንንት ፡ ወኢረከቡ ፡ ምክንያት ፡ ወኢምንተሂ ፡ ወኢጌጋየኒ ፡ እስመ ፡ ምእመን ፡ ውእቱ ።

5 ወይቤሉ ፡ መገብት ፤ ኢንረክብ ፡ ሎቱ ፡ ምክንያተ ፡ ለዳንኤል ፡ ዘእንበለ ፡ በሕገ ፡ አምላኩ ።

6 ወእምዝ ፡ ተጋብኡ ፡ መገብት ፡ ወመኳንንት ፡ ኀበ ፡ ንጉሥ ፡ ወይቤልዎ ፤ ሕያው ፡ ንጉሥ ፡ ዳርዮስ ፡ ለዓለም ።

7 ወተማከሩ ፡ መላእክት ፡ ወመሳፍንት ፡ ወመገብት ፡ ኵሎመ ፡ እለ ፡ ውስተ ፡ መንግሥትከ ፡ ወዐደሙ ፡ ዕድሜ ፡ ከመ ፡ አልቦ ፡ ዘይስኦል ፡ ኀበ ፡ ኵሉ ፡ አማልክት ፡ ወሰብእ ፡ እስከ ፡ ሠላሳ ፡ ዕለት ፡ ዘእንበለ ፡ ኀቤከ ፡ ንጉሥ ፡ ላዕለ ፡ ኵሉ ፡ መንግሥት ፡ ወእማእኮ ፡ ይደይዎ ፡ ውስተ ፡ ዐዘቅተ ፡ አናብስት ።

8 ይእዜኒ ፡ ንጉሥ ፡ አዝዝ ፡ ዕድሜኪ ፡ ወጸሐፍ ፡ ከመ ፡ ኢይእበዩ ፡ ሥርዐተ ፡ ፋርስ ፡ ወሜዶን ።

9 ሶቤሃ ፡ አዘዘ ፡ ዳርዮስ ፡ ይጽሐፉ ፡ ዘንተ ፡ ሥርዐተ ።

10 ወአእሚሮ ፡ ዳንኤል ፡ ከመ ፡ ተአዘዘ ፡ ዝሥርዐት ፡ ቦአ ፡ ቤቶ ፡ ወአርኀወ ፡ መሳክወ ፡ ዘጽርሑ ፡ አንጻረ ፡ ኢየሩሳሌም ፡ ወጊዜ ፡ ሠለስቱ ፡ ሳዐት ፡ ዘዕለት ፡ ሰገደ ፡ ወጸለየ ፡ ወተጋነየ ፡ ቅድመ ፡ አምላኩ ፡ በአይ ፡ ግብር ፡ ዘልፈ ።

11 ወያስተሓይጽዎ ፡ እሙንቱ ፡ ዕደው ፡ ወረከብዎ ፡ ለዳንኤል ፡ ያስተበቍዖ ፡ ለአምላኩ ፡ ወይጼሊ ።

12 ወሖሩ ፡ ወይቤልዎ ፡ ለንጉሥ ፡ ኦንጉሥ ፡ አኮኑ ፡ ዐደምከ ፡ ከመ ፡ ኢይስአል ፡ ኵሉ ፡ ሰብአ ፡ እስከ ፡ ሠላሳ ፡ ዕለት ፡ ዘእንበለ ፡ ኀቤከ ፡ ንጉሥ ፡ ይደይዎኬ ፡ ውስተ ፡ ዐዘቅተ ፡ አናብስት ፤ ወይቤ ፡ ንጉሥ ፤ እሙን ፡ ዝነገር ፡ ወኢይትነሠት ፡ ቃሎሙ ፡ ለፋርስ ፡ ወለሜዶን ።

13 ወአውሥኡ ፡ ወይቤሉ ፡ ቅድመ ፡ ንጉሥ ፤ ዳንኤል ፡ ዘእምደቂቀ ፡ ፄዋ ፡ ይሁዳ ፡ አበየ ፡ ትእዛዘከ ፡ ወጊዜ ፡ ሠለስቱ ፡ ሳዐተ ፡ ዕለት ፡ ሰአለ ፡ ኀበ ፡ አምላኩ ፡ ስእለቶ ።

14 ወሰሚዖ ፡ ንጉሥ ፡ ዘንተ ፡ ተከዘ ፡ ጥቀ ፡ ወተባአሱ ፡ ያድኅኖ ፡ ለዳንኤል ፡ ወእስከ ፡ ሰርክ ፡ ፈቀደ ፡ ያድኅኖ ።

15 ወይቤሉ ፡ እሙንቱ ፡ ዕደው ፡ ሶቤሃ ፡ ለንጉሥ ፤ አእምር ፡ ንጉሥ ፡ ከመ ፡ ዕድሜ ፡ ዘዐደሙ ፡ ፋርስ ፡ ወሜዶን ፡ ወሠርዑ ፡ አበየ ፡ ወኢሐሰበከ ፡ ንጉሥ ።

16 ወእምዝ ፡ አዘዘ ፡ ንጉሥ ፡ ያምጽእዎ ፡ ለዳንኤል ፡ ወወደይዎ ፡ ውስተ ፡ ግበ ፡ አናብስት ፤ ወይቤሎ ፡ ንጉሥ ፡ ለዳንኤል ፤ አምላክከ ፡ ዘኪያሁ ፡ ተወከልከ ፡ ዘልፈ ፡ ለያድኅንከ ።

17 ወአምጽኡ ፡ እብነ ፡ ወከደኑ ፡ ዲበ ፡ አፈ ፡ ግብ ፡ ወኀተመ ፡ ንጉሥ ፡ በሕልቀቱ ፡ ወበሕልቀተ ፡ መገብቱ ፡ ከመ ፡ አልቦ ፡ ዘይትመንገን ፡ ላዕለ ፡ ዳንኤል ።

18 ወአተወ ፡ ንጉሥ ፡ ቤቶ ፡ ወኖመ ፡ ዘእንበለ ፡ ይደረር ፡ ወኢያብኡ ፡ ሎቱ ፡ ዘይበልዕ ፡ ወአበዮ ፡ ንዋም ፡ ወዐጸወ ፡ እግዚአ ፡ ብሔር ፡ አፋሆሙ ፡ ለአናብስት ፡ ወኢሰሐጥዎ ፡ ለዳንኤል ።

19 ወእምዝ ፡ ጌሰ ፡ ንጉሥ ፡ በጽባሕ ፡ ቅድመ ፡ ጎሕ ፡ ወሮጸ ፡ ኀበ ፡ ግበ ፡ አናብስት ።

20 ወበጺሖ ፡ ኀበ ፡ ግብ ፡ ከልሐ ፡ በዐቢይ ፡ ቃል ፡ ወይቤ ፤ ዳንኤል ፡ ገብረ ፡ እግዚአ ፡ ብሔር ፡ ሕያው ፡ አምላክከ ፡ ዘኪያሁ ፡ ታመልክ ፡ ዘልፈ ፡ ክህለኑ ፡ አድኅኖተከ ፡ እምአፈ ፡ አናብስት ።

21 ወይቤሎ ፡ ዳንኤል ፡ ለንጉሥ ፤ ንጉሥ ፡ ለዓለም ፡ ሕያው ።

22 አምላኪየ ፡ ፈነወ ፡ መልአኮ ፡ ወፈፀመ ፡ አፈ ፡ አናብስት ፡ ወኢሰሐጡኒ ፡ እስመ ፡ ተረክበ ፡ ሊተ ፡ ጽድቅ ፡ በቅድሜሁ ፡ ወበቅድሜከኒ ፡ ንጉሥ ፡ ኢገበርኩ ፡ እኩየ ።

23 ሶቤሃ ፡ ተፈሥሐ ፡ ጥቀ ፡ በእንቲአሁ ፡ ወአዘዘ ፡ ያውፅእዎ ፡ ለዳንኤል ፡ እምግብ ፡ ወኢተነክየ ፡ ወኢምንተኒ ፡ ወኢተረክበ ፡ ሕሡም ፡ ላዕሌሁ ፡ እስመ ፡ ተአምነ ፡ በአምላኩ ።

24 ወይቤ ፡ ንጉሥ ፤ አምጽእዎሙ ፡ ለዕደው ፡ እለ ፡ አስተዋደይዎ ፡ ለዳንኤል ፤ ወወደይዎሙ ፡ ውስተ ፡ ዐዘቅተ ፡ አናብስት ፡ እሙንቱ ፡ ወደቂቆሙ ፡ ወአንስቲያሆሙ ፡ ወዘእንበለ ፡ ይብጽሑ ፡ ምድረ ፡ ግብ ፡ አኀዝዎሙ ፡ አናብስት ፡ ወቀጥቀጥዎሙ ፡ ኵሎ ፡ አዕፅምቲሆሙ ።

25 ወእምዝ ፡ ጸሐፈ ፡ ዳርዮስ ፡ ንጉሥ ፡ ለኵሉ ፡ አሕዛብ ፡ ወሕዝብ ፡ ወበሓውርት ፡ ወለኵሉ ፡ እለ ፡ ይነብሩ ፡ ውስተ ፡ ምድር ፡ ኵሉ ፤ ሰላምአ ፡ ይብዛኅክሙ ፡ እምቅድመ ፡ ገጽየ ።

26 አዘዝኩ ፡ ሥርዐተ ፡ ለኵሉ ፡ መኳንንት ፡ ዘውስተ ፡ መንግሥትየ ፡ ከመ ፡ ይፍርሁ ፡ ወይርዐዱ ፡ እምቅድመ ፡ ገጹ ፡ ለአምላከ ፡ ዳንኤል ፡ እስመ ፡ ውእቱ ፡ አምላክ ፡ ሕያው ፡ ዘይሄሉ ፡ ለዓለም ፡ ዘኢይማስን ፡ መንግሥቱ ፡ ወምኵናኑ ፡ ለዘላፉ ።

27 ወያድኅንሂ ፡ ወይረድእ ፡ ወይገብር ፡ ትእምርተ ፡ ወመንክረ ፡ በሰማይ ፤ ዘአድኀኖ ፡ ለዳንኤል ፡ እምአፈ ፡ አናብስት ።

28 ወዐብየ ፡ ዳንኤል ፡ በመንግሥተ ፡ ዳርዮስ ፡ ወበመንግሥተ ፡ ቂሮስ ፡ ፋርሳዊ ።