Chapter 5
Chapter 4 / Old Testament / Daniel / Chapter 5 Chapter 6

1 በልጠሶር ፡ ንጉሥ ፡ ገብረ ፡ ምሳሐ ፡ ለመገብቱ ፡ ወዐሠርተ ፡ ምእተ ፡ ብእሴ ፡ አስተየ ፡ ወይነ ።

2 ወእንዘ ፡ ይሰቲ ፡ ወይነ ፡ በልጣሶር ፡ ሰኪሮ ፡ ይቤ ፡ ያምጽኡ ፡ ንዋየ ፡ ወርቅ ፡ ወብሩር ፡ ዘአምጽአ ፡ ናቡከደነጾር ፡ አቡየ ፡ እምቤተ ፡ መቅደስ ፡ ዘኢየሩሳሌም ፡ ወይስተዩ ፡ ቦቱ ፡ <ንጉሥ ፡ ወመገብቱ ፡ ወአንስቲያሁ ፡ ወዕቁባቲሁ ።

3 ወአምጽኡ ፡ ንዋየ ፡ ወርቅ ፡ ወብሩር ፡ ዘአምጽኡ ፡ እምነ ፡ መቅደሰ ፡ ኢየሩሳሌም ፡ ወሰትዩ ፡ ቦቱ ፡ >ንጉሥ ፡ ወመገብቱ ፡ ወአንሰቲያሁ ፡ ወዕቁባቲሁ ።

4 ሰትዩ ፡ ቦቱ ፡ ወይነ ፡ ወአእኰቱ ፡ አማልክቲሆሙ ፡ ዘወርቅ ፡ ወዘብሩር ፡ ወዘብርት ፡ ወዘኀጺን ፡ ወዘዕፅ ፡ ወዘልሕኵት ።

5 ወበይእቲ ፡ ሳዐት ፡ ወፅአት ፡ አጽባዕተ ፡ እደ ፡ ሰብእ ፡ ወጸሐፈት ፡ ቅድመ ፡ ማኅቶት ፡ ውሰተ ፡ ምርገ ፡ አረፍተ ፡ ቤተ ፡ ንጉሥ ፡ ወርእየ ፡ ንጉሥ ፡ አጽባዕተ ፡ እድ ፡ ትጽሕፍ ።

6 ወሶቤሃ ፡ ጸልሞ ፡ ገጹ ፡ ወደንገፆ ፡ ልቡ ፡ ወተፈትሐ ፡ መሌሊተ ፡ ሐቌሁ ፡ ወተጓድአ ፡ ብረኪሁ ።

7 ወአውየወ ፡ ንጉሥ ፡ በኀይሉ ፡ ከመ ፡ ያምጽኡ ፡ ሎቱ ፡ ማርያነ ፡ ወሰብአ ፡ ሰገል ፡ ወይቤሎሙ ፡ ለጠቢባነ ፡ ባቢሎን ፤ ዘአነበቦ ፡ ለዝ ፡ መጽሐፍ ፡ ወነገረኒ ፡ ፍካሬሁ ፡ ኣለብሶ ፡ ሜላተ ፡ ወኣዐንቆ ፡ በዝግና ፡ ወርቅ ፡ ውስተ ፡ ክሳዱ ፡ ወእሠይሞ ፡ መኰንነ ፡ ውስተ ፡ ሣልስት ፡ እደ ፡ መንግሥትየ ።

8 ወቦኡ ፡ ኵሎሙ ፡ ጠቢባነ ፡ ባቢሎን ፡ ወስእኑ ፡ አንብቦ ፡ መጽሐፉ ፡ ወፍካሬሁኒ ፡ ኢነገርዎ ፡ ለንጉሥ ።

9 ወደንገፀ ፡ በልጣሶር ፡ ንጉሥ ፡ ወጸልሞ ፡ ገጹ ፡ ወደንገፁ ፡ መገብቱ ።

10 ወቦአት ፡ ንግሥት ፡ ቤተ ፡ ምሳሕ ፡ ወትቤ ፤ ንጉሥ ፡ ለዓለም ፡ ሕያው ፡ ኢይደንግፅከ ፡ ልብከ ፡ ወኢይጽሉምከ ፡ ገጽከ ።

11 ሀሎ ፡ ብእሲ ፡ ውስተ ፡ መንግሥትከ ፡ ዘቦ ፡ ላዕሌሁ ፡ መንፈሰ ፡ እግዚአ ፡ ብሔር ፡ ቅዱሰ ፡ ወበመዋዕለ ፡ አቡከኒ ፡ ተረክበ ፡ ላዕሌሁ ፡ ጥበብ ፡ ወፈከረ ፡ ወሤሞ ፡ ንጉሥ ፡ አቡከ ፡ መልአከ ፡ ጠቢባን ፡ ወማአምራን ፡ ወሰብአ ፡ ሰገል ፡ ወሰብአ ፡ ሥራይ ።

12 እስመ ፡ ፈድፈደ ፡ መንፈስ ፡ ዘላዕሌሁ ፡ ወጥበብ ፡ ወውስተ ፡ ፍካሬ ፡ ሕልም ፡ ወይነግር ፡ ዘኅቡእ ፡ ወይፈትሕ ፡ ዘእሱር ፡ ዳንኤል ፡ ወንጉሥ ፡ ሰመዮ ፡ ስሞ ፡ በልጣሳር ፤ ወይእዜኒ ፡ ይጸውዕዎ ፡ ወይንግርከ ፡ ፍካሬሁ ።

13 ሶቤሃ ፡ ቦአ ፡ ዳንኤል ፡ ቅድመ ፡ ንጉሥ ፡ ወይቤሎ ፡ ንጉሥ ፡ ለዳንኤል ፤ አንተኑ ፡ ዳንኤል ፡ ዘእምደቂቀ ፡ ፄዋ ፡ ይሁዳ ፡ ዘአምጽአ ፡ ንጉሥ ፡ አቡየ ።

14 ብማዕኩ ፡ በእንቲአከ ፡ ከመ ፡ መንፈሰ ፡ እግዚአ ፡ ብሔር ፡ ላዕሌከ ፡ ወጥበብ ፡ ወምክር ፡ ወፍካሬ ፡ ወፈድፋደ ፡ ተረክበ ፡ ላዕሌከ ።

15 ወይእዜኒ ፡ ቦኡ ፡ ቅድሜየ ፡ ጠቢባን ፡ ወሰብአ ፡ ሰገል ፡ ወማእምራን ፡ ያንብቡ ፡ ዘመጽሐፈ ፡ ወያይድዑኒ ፡ ፍካሬሁ ፡ ወስእኑ ፡ አንብቦቶ ።

16 ወሰማዕኩ ፡ አነ ፡ በእንቲአከ ፡ ከመ ፡ ትክል ፡ ፈክሮ ፤ ወይእዜኒ ፡ ለእመ ፡ ክህልከ ፡ አንብቦቶ ፡ ለዝ ፡ መጽሐፍ ፡ ወአይዳዕከኒ ፡ ፍካሬሁ ፡ ሜላተ ፡ ኣለብሰከ ፡ ወኣዐንቀከ ፡ ቃማ ፡ ወርቅ ፡ ውስተ ፡ ክሳድከ ፡ ወትኴንን ፡ ሣልስተ ፡ መንግሥትየ ።

17 ወይቤ ፡ ዳንኤል ፡ ቅድመ ፡ ንጉሥ ፤ ሀብትከሂ ፡ ለከ ፡ ለይኩንከ ፡ ወፍተ ፡ መንግሥትከሂ ፡ ሀብ ፡ ለባዕድ ፡ ወአነ ፡ ኣነብቦ ፡ ለመጽሐፍ ፡ ወእነግረከ ፡ ፍካሬሁኒ ።

18 ንጉሥ ፡ እግዚአ ፡ ብሔር ፡ ልዑል ፡ ወሀቦ ፡ መንግሥተ ፡ ወክብረ ፡ ወዕበየ ፡ ወግርማ ፡ ለናቡከደነጾር ፡ አቡከ ።

19 ወእምዕበዩ ፡ ዘወሀቦ ፡ ኵሉ ፡ አሕዛብ ፡ ወበሓውርት ፡ ወሕዝብ ፡ ይርዕዱ ፡ እምኔሁ ፡ ወይፈርሁ ፡ እምገጹ ፤ ዘፈቀደ ፡ ይቀትል ፡ ወዘፈቀደ ፡ ይቀሥፍ ፡ ወዘፈቀደ ፡ ያከብር ።

20 ወአመ ፡ አዕበየ ፡ ልቦ ፡ ወአጽንዐ ፡ ነፍሶ ፡ ከመ ፡ ይትዐበይ ፡ ወድቀ ፡ እምዕበየ ፡ መንግሥቱ ፡ ወኀስረ ፡ እምክብሩ ።

21 ወሰደዶ ፡ እምሰብእ ፡ ወልበ ፡ አርዌ ፡ ተውህቦ ፡ ወነበረ ፡ ምስለ ፡ ሐለስትዮታት ፡ ወተርዕየ ፡ ሣዕረ ፡ ከመ ፡ ላህም ፡ ወተሠርየ ፡ ነፍስቱ ፡ እምጠለ ፡ ሰማይ ፡ እስከ ፡ አእመረ ፡ ከመ ፡ ልዑል ፡ ይኴንን ፡ መንግሥተ ፡ እጓለ ፡ እመ ፡ ሕያው ፡ ወለዘ ፡ ፈቀደ ፡ ይሁብ ።

22 ወአንተሂ ፡ ወልዱ ፡ በልጣሶር ፡ ኢያተሐትከ ፡ ልበከ ፡ ቅድመ ፡ ንጉሥ ፡ ወዘንተ ፡ ኵሎ ፡ ኢያእመርከ ።

23 ወተዐበይከ ፡ ላዕለ ፡ እግዚአ ፡ ብሔር ፡ አምላከ ፡ ሰማይ ፡ ወንዋየ ፡ ቤቱ ፡ አምጻእከ ፡ ቅድሜከ ፡ ወአንተ ፡ ወመገብትከ ፡ ወአንስቲያከ ፡ ወዕቁባቲከ ፡ ሰተይክሙ ፡ ቦቱ ፡ ወይነ ፡ ወአማልክተ ፡ ወርቅ ፡ ወብሩር ፡ ወኀጺን ፡ ወዕፀው ፡ እለ ፡ ኢይሰምዑ ፡ ወኢይሬእዩ ፡ ወኢያአምሩ ፡ አእኰትከ ፡ ወለእግዚአ ፡ ብሔርሰ ፡ ዘውስተ ፡ እዴሁ ፡ መንፈስከ ፡ ወኵሉ ፡ ፍናዊከ ፡ ኢያእኰትከ ።

24 ወበእንተዝ ፡ እምኀቤሁ ፡ ፈነወ ፡ አጽባዕተ ፡ እድ ።

25 ወዝ ፡ መጽሐፍ ፡ ዘተአዘዘ ፤ ማኔ ፡ ቴቄል ፡ ፋሬስ ።

26 ወከመዝ ፡ ፍካሬሁ ፤ ማኔ ፤ ሰፈራ ፡ እግዚአ ፡ ብሔር ፡ ለመንግሥትክ ፡ ወሰለጣ ።

27 ቴቄል ፤ ደለዋ ፡ በመዳልው ፡ ወተረክበት ፡ ሕጽጽተ ።

28 ፋሬስ ፤ ተስዕረት ፡ መንግሥትከ ፡ ወተውህበት ፡ ለሜድስ ፡ ወለፋርስ ።

29 ወአዘዘ ፡ በልጣሶር ፡ ወአልበስዎ ፡ ሜላተ ፡ ለዳንኤል ፡ ወአዕነቅዎ ፡ ቃማ ፡ ወርቅ ፡ ዲበ ፡ ክሳዱ ፡ ወሰበኩ ፡ ሎቱ ፡ ከመ ፡ ይኰንን ፡ ሣልስተ ፡ እደ ፡ መንግሥቱ ።

30 ወበይእቲ ፡ ሌሊት ፡ ሞተ ፡ በልጣሶር ፡ ንጉሠ ፡ ከለዴዎን ።

31 ወዳርዮስ ፡ ሜድያዊ ፡ ነግሠ ፡ ህየንቴሁ ፡ እንዘ ፡ ስሳ ፡ ወክልኤ ፡ ክረምቱ ።