Chapter 3
Chapter 2 / Old Testament / Daniel / Chapter 3 Chapter 4

1 አመ ፡ ዐሠርቱ ፡ ወሰማንቱ ፡ ዓመተ ፡ መንግሥቱ ፡ ለናቡከደነጾር ፡ ገብረ ፡ ምስለ ፡ ዘወርቅ ፡ ኑኁ ፡ ስሳ ፡ በእመት ፡ ወግድሙ ፡ ስድስ ፡ በእመት ፡ ወአቀሞ ፡ ውስተ ፡ ሐቅለ ፡ ብሔረ ፡ ባቢሎን ።

2 ወለአከ ፡ ያስተጋብኡ ፡ መኳንንተ ፡ ወመላእክተ ፡ ወመሳፍንተ ፡ ወዐበይተ ፡ ወነገሥተ ፡ ወኵሎ ፡ መላእክተ ፡ በሓውርት ፡ ይሞጽኡ ፡ ለመድቅሐ ፡ ውእቱ ፡ ምስል ፡ ዘአቀመ ፡ ናቡከደነጾር ፡ ንጉሥ ።

3 ወተጋብኡ ፡ መኳንንት ፡ ወመሳፍንት ፡ ወመገብት ፡ ወዐበይት ፡ ወሐበይት ፡ ወነገሥት ፡ ወመላእክተ ፡ በሓውርት ፡ ለመድቅሐ ፡ ምስል ፡ ዘአቀመ ፡ ናቡከደነጾር ፡ ንጉሥ ፡ ወቆመ ፡ ቅድመ ፡ ምስል ።

4 ወከልሐ ፡ ዐዋዲ ፡ በሕቁ ፡ በኀይል ፤ ለክሙ ፡ ይብለክሙ ፡ አሕዛብ ፡ ወሕዝብ ፡ ወበሓውርት ።

5 እምከመ ፡ ሰማዕክሙ ፡ ቃለ ፡ ቀርን ፡ ወዕንዚራ ፡ ወመሰንቆ ፡ ወብዒዛ ፡ ወማሕሌት ፡ ግነዩ ፡ ወስግዱ ፡ ለምስል ፡ ዘወርቅ ፡ ዘአቀመ ፡ ናቡከደነጾር ፡ ንጉሥ ።

6 ወዘኢገነየ ፡ ወኢሰገደ ፡ በጊዜሃ ፡ ይወድይዎ ፡ ውስተ ፡ እቶነ ፡ እሳት ፡ ዘይነድድ ።

7 ወእምዝ ፡ ሶበ ፡ ሰምዑ ፡ አሕዛብ ፡ ቃለ ፡ ቀርን ፡ ወዕንዚራ ፡ ወመሰንቆ ፡ ወብዒዛ ፡ ወማሕሌት ፡ ገነዩ ፡ ኵሉ ፡ አሕዛብ ፡ ወሰገዱ ፡ ለምስል ፡ ዘወርቅ ፡ ዘአቀመ ፡ ናቡከደነጾር ፡ ንጉሥ ።

8 ወእምዝ ፡ መጽኡ ፡ ሰብአ ፡ ፋርስ ፡ ወአስተዋደይዎሙ ፡ ለአይሁድ ።

9 ኀበ ፡ ናቡከደነጾር ፡ ንጉሥ ፡ ወይቤልዎ ፤ ንጉሥ ፡ ለዓለም ፡ ሕያው ።

10 አንተ ፡ ንጉሥ ፡ አዘዝከ ፡ ትእዛዘ ፡ ለኵሉ ፡ አሕዛብ ፡ ከመ ፡ እምከመ ፡ ሰምዑ ፡ ቃለ ፡ ቀርን ፡ ወዕንዚራ ፡ ወመሰንቆ ፡ ወማሕሌት ፡ ወከበሮ ፡ ወኵሎ ፡ ተውኔተ ።

11 ዘኢገነየ ፡ ወኢሰገደ ፡ ለምስል ፡ ዘወርቅ ፡ ይደይዎ ፡ ውስተ ፡ እቶነ ፡ እሳት ፡ ዘይነድድ ።

12 ሀለዉ ፡ ዕደው ፡ እለ ፡ ሤምከ ፡ ለግብረ ፡ በሓውርተ ፡ ባቢሎን ፡ ሲድራቅ ፡ ወሚሳቅ ፡ ወአብደናጎ ፡ እለ ፡ አበዩ ፡ ትእዛዘከ ፡ ንጉሥ ፡ ወኢያምለኩ ፡ እምላከከ ፡ ወኢሰገዱ ፡ ለምስል ፡ ዘወርቅ ፡ ዘገበርከ ።

13 ወሶቤሃ ፡ ተምዕዐ ፡ ናቡከደነጾር ፡ ንጉሥ ፡ ወአዘዘ ፡ በመዐት ፡ ያምጽእዎሙ ፡ ለሲድራቅ ፡ ወሚሳቅ ፡ ወአብደናጎ ፡ ወመጽኡ ፡ ቅድመ ፡ ንጉሥ ።

14 ወተሰጥዎሙ ፡ ናቡከደነጾር ፡ ወይቤሎሙ ፤ አማንክሙኑ ፡ ሲድራቅ ፡ ወሚሳቅ ፡ ወአብደናጎ ፡ ኢታመልኩ ፡ አምላኪየ ፡ ወኢትሰግዱ ፡ ለምስል ፡ ዘወርቅ ፡ ዘገበርኩ ።

15 ይእዜኒኬ ፡ እመ ፡ ጥቡዓን ፡ አንትሙ ፡ እምከመ ፡ ሰማዕክሙ ፡ ቃለ ፡ ቀርን ፡ ወዕንዚራ ፡ ወመሰንቆ ፡ ወማሕሌት ፡ ወከበሮ ፡ ወብዒዛ ፡ ወኵሎ ፡ ተውኔተ ፤ ወእስኩ ፡ ለእመ ፡ ኢትሰግዱ ፡ ለምስል ፡ ዘወርቅ ፡ ዘገበርኩ ፡ ወእምከመ ፡ ኢትሰግዱ ፡ በጊዜሃ ፡ ይወድዩክሙ ፡ ውስተ ፡ እቶነ ፡ እሳት ፡ ዘይነድድ ፤ ወመኑ ፡ ውእቱ ፡ እግዚአ ፡ ብሔር ፡ ዘያድኅነክሙ ፡ እምእዴየ ።

16 ወአውሥእዎ ፡ ሲድራቅ ፡ ወሚሳቅ ፡ ወአብደናጎ ፡ ለናቡከደነጾር ፡ ንጉሥ ፡ ወይቤልዎ ፤ ናቡከደነጾር ፡ ኢንፈቅድ ፡ ንሕነሰ ፡ ንሰጠውከ ፡ በዝ ፡ ነገር ።

17 ሀሎ ፡ አምላክነ ፡ ውስተ ፡ ሰማይ ፡ ዘናመልክ ፡ ንሕነ ፡ ወይክል ፡ አድኅኖተነ ፡ እምእዴከ ፡ ወእምእቶነ ፡ እሳት ፡ ዘይነድድ ፤ ወያነግፈነ ፡ እምእዴከ ፡ ንጉሥ ።

18 ከመ ፡ ታእምር ፡ አምላከከሂ ፡ ኢናመልክ ፡ ወለምስልሂ ፡ ዘወርቅ ፡ ዘአቀምከ ፡ ኢንሰግድ ።

19 ወሶቤሃ ፡ ተምዕዐ ፡ ናቡከደነጾር ፡ በሕቁ ፡ ወተመይጠ ፡ ርእየተ ፡ ገጹ ፡ በእንተ ፡ ሲድራቅ ፡ ወሚሳቅ ፡ ወአብደናጎ ፡ ወአዘዘ ፡ ያንድዱ ፡ እቶነ ፡ ምስብዒተ ፡ እስከ ፡ በሕቁ ፡ ይውዒ ።

20 ወአዘዘ ፡ ዕደወ ፡ ጽኑዓነ ፡ ወኀያላነ ፡ ያጽድፍዎሙ ፡ ለሲድራቅ ፡ ወሚሳቅ ፡ ወአብደናጎ ፡ ወያውርድዎሙ ፡ ውስተ ፡ እቶነ ፡ እሳት ፡ ዘይነድድ ።

21 ወአሰርዎሙ ፡ እደዊሆሙ ፡ ወእገሪሆሙ ፡ ወወረውዎሙ ፡ ማእከለ ፡ እቶነ ፡ እሳት ፡ ዘይነድድ ።

22 እስመ ፡ ኀያል ፡ ቃለ ፡ ንጉሥ ፡ አንደዱ ፡ እቶነ ፡ በሕቁ ፡ ምስብዒተ ።

23 ወወረዱ ፡ እሉ ፡ ሠለስቱ ፡ ሲድራቅ ፡ ወሚሳቅ ፡ ወአብደናጎ ፡ ማእከለ ፡ እቶነ ፡ እሳት ፡ ዘይነድድ ፡ እንዘ ፡ እሱራን ።

24 ወአንሶሰዉ ፡ ማእከለ ፡ እሳት ፡ ወአእኰቱ ፡ እግዚአ ፡ ብሔር ፡ ወይባርክዎ ፡ ለእግዚአ ፡ ብሔር ።

25 ወቆመ ፡ አዛርያ ፡ ወጸለየ ፡ ከመዝ ፡ ወከሠተ ፡ አፋሁ ፡ በማእከለ ፡ እሳት ፡ ወይቤ ።

26 ይትባረክ ፡ እግዚአ ፡ ብሔር ፡ አምላከ ፡ አበዊነ ፡ ወእኩት ፡ ወስቡሕ ፡ ስምከ ፡ ለዓለም ።

27 እስመ ፡ ጻድቅ ፡ አንተ ፡ በኵሉ ፡ ዘአምጻእከ ፡ ላዕሌነ ፡ ወእሙን ፡ ኵሉ ፡ ግብርከ ፡ ወርቱዕ ፡ ኵሉ ፡ ፍኖትከ ፡ ወጽድቅ ፡ ኵሉ ፡ ኵነኔከ ።

28 ወገበርከ ፡ ፍትሐ ፡ ወርትዐ ፡ በኵሉ ፡ ዘገበርከ ፡ ለነ ፡ ወዲበ ፡ ሀገረ ፡ አበዊነ ፡ ኢየሩሳሌም ፡ ቅድስት ፡ እስመ ፡ ኵነኔ ፡ ርትዕ ፡ [ወ] አምጻእከ ፡ ዘንተ ፡ በኀጢአትነ ፡ ኵሎ ።

29 እስመ ፡ አበስነ ፡ ወጌገይነ ፡ ዘኀደግናከ ፡ ወዐመፅነ ፡ በኵሉ ።

30 ወኢሰማዕነ ፡ ትእዛዘከ ፡ ወኢዐቀብነ ፡ ወኢገበርነ ፡ በከመ ፡ አዘዝከነ ፡ ከመ ፡ ይኩን ፡ ሠናይ ፡ ላዕሌነ ።

31 ወኵሎ ፡ ዘአምጻእከ ፡ ላዕሌነ ፡ ወኵሎ ፡ ዘገበርከ ፡ ዲቤነ ፡ በኵነኔ ፡ ጽድቅከ ፡ ረሰይከ ።

32 ወመጠውከነ ፡ ውስተ ፡ እደ ፡ ፀርነ ፡ ኃጥኣን ፡ ወዐላዊያን ፡ ወንጉሥ ፡ ዐማፂ ፡ ወእኩይ ፡ እምኵሉ ፡ ምድር ።

33 ወይእዜኒ ፡ አኮ ፡ መጠንነ ፡ <ንክሥት ፡ አፉነ ፡ >ኀፍረተ ፡ ወኀሳረ ፡ ለኣግብርቲከ ፡ ዘኮነነ ፡ ወለእለ ፡ ይፈርሁከ ።

34 ወኢትመጥወነ ፡ ለግሙራ ፡ በእንተ ፡ ስምከ ፡ ወኢትሚጥ ፡ ኪዳነነ ።

35 ወኢታርሕቅ ፡ ምሕረተከ ፡ እምኔነ ፤ በእንተ ፡ አብረሀም ፡ ፍቁርከ ፡ ወበእንተ ፡ ይስሐቅ ፡ ቍልዔከ ፡ ወእስራኤል ፡ ቅዱስከ ።

36 እለ ፡ ተናገርኮሙ ፡ ወትቤሎሙ ፡ ከመ ፡ ታብዝኅ ፡ ዘርኦሙ ፡ ከመ ፡ ኮከበ ፡ ሰማይ ፡ ወከመ ፡ ኆጻ ፡ ዘውሰተ ፡ ጽንፈ ፡ ባሕር ።

37 እስመ ፡ ውኁዳን ፡ እምኵሉ ፡ አሕዛብ ፡ ወኮነ ፡ ኅሱራነ ፡ በኵሉ ፡ ምድር ፡ ዮም ፡ በእንተ ፡ ኀጢአትነ ።

38 ወአልቦ ፡ በዝ ፡ መዋዕል ፡ መልአከ ፡ ወነቢየ ፡ ወንጉሠ ፡ ወኢቍርባነ ፡ ወኢመሥዋዕተ ፡ ወኢኀበ ፡ ያጸንሕሑ ፡ [ወኢ] ዕጣነ ፡ ወኢብሔረ ፡ ኀበ ፡ ይፈርዩ ፡ በቅድሜከ ፡ ወይርከቡ ፡ ሣህለከ ።

39 ዳእሙ ፡ በነፍስ ፡ የዋህ ፡ ወበመንፈስ ፡ ትሑት ፡ ተወከፈነ ።

40 ከመ ፡ መሥዋዕተ ፡ ሐራጊት ፡ ወአልህምት ፡ ወአእላፍ ፡ አባግዕ ፡ ሥቡሕ ፡ ከማሁ ፡ ይኩን ፡ መሥዋዕትነ ፡ በቅድሜከ ፡ ዮም ፡ ወይትፈጸም ፡ በድኅሬከ ፤ እስመ ፡ ኢትኀፈሩ ፡ እለ ፡ ተወከሉ ፡ ብከ ።

41 ወይእዜኒ ፡ ንተልወከ ፡ ወንፈርሀከ ፡ ወነኀሥሥ ፡ ገጸከ ።

42 ወኢታስተኀፍረነ ፡ ዳእሙ ፡ ግበር ፡ ምስሌነ ፡ በከመ ፡ ተመይጦትከ ፡ ወበከመ ፡ ብዙኀ ፡ ምሕረትከ ።

43 አድኅነነ ፡ በስብሐቲከ ፡ ወሀብ ፡ አኰቴተ ፡ ለስምከ ፡ ኣግዚኦ ።

44 ወይትኀፈሩ ፡ ኵሎሙ ፡ እለ ፡ ያሐሥሙ ፡ ለአግብርቲከ ፡ ወይኅሰሩ ፡ በኵሉ ፡ ትዕግልቶሙ ፡ ወይትቀጥቀጥ ፡ ኀይሎሙ ።

45 ወያእምሩ ፡ ከመ ፡ አንተ ፡ እግዚአ ፡ ብሔር ፡ አምላክ ፡ ባሕቲትከ ፡ ወስቡሕ ፡ በኵሉ ፡ ዓለም ።

46 ወኢኀደጉ ፡ አስተዋድዮቶሙ ፡ ወዓሊ ፡ ኀበ ፡ ንጉሥ ፡ ወውሰተ ፡ እሳቱ ፡ ትይ ፡ ወፔሳ ፡ ወስጢጲዮን ፡ ወቅሌሜጢዳ ።

47 ወተለዐለ ፡ ነበልባል ፡ እምእቶን ፡ አርብዓ ፡ ወትስዕ ፡ በእመት ።

48 ወያንሶስው ፡ ወያውዒ ፡ ዘረከቦ ፡ ኀበ ፡ እቶኖሙ ፡ ለፋርስ ።

49 ወወረደ ፡ መልአከ ፡ እግዚአ ፡ ብሔር ፡ ምስለ ፡ እለ ፡ አዛርያ ፡ ውስተ ፡ እቶን ፡ ወዘበጦ ፡ ለነበልባለ ፡ እሳት ፡ እምእቶን ።

50 ወረሰዮ ፡ ለማእከለ ፡ እቶን ፡ ከመ ፡ ነፋስ ፡ ቈሪር ፡ ወኢለከፎሙ ፡ ወኢበምንትኒ ፡ ወኢሰሐጦሙ ፡ ወኢያጽሀቆሙ ።

51 ወሶቤሃ ፡ እሙንቱ ፡ ሠለስቲሆሙ ፡ ኅቡረ ፡ በአሐዱ ፡ አፍ ፡ ሰብሑ ፡ ወአእኰቱ ፡ ወባረኩ ፡ ለእግዚአ ፡ ብሔር ፡ በውስተ ፡ እቶን ፡ ወይቤሉ ።

52 ይትባረክ ፡ እግዚአ ፡ ብሔር ፡ አምላከ ፡ አበዊነ ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ። ወይትባረክ ፡ ስመ ፡ ስብሐቲሁ ፡ ቅዱስ ፤ ወስቡሕኒ ፡ ውእቱ ፡ ወልዑልኒ ፡ ውእቱ ፡ በኵሉ ፡ ዓለም ።

53 ኩሩክ ፡ አንተ ፡ በድርሐ ፡ ቅድሳተ ፡ ስብሐቲከ ፤ ወስቡሕኒ ፡ አንተ ፡ ወእኩትኒ ፡ አንተ ፡ ለዓለም ።

54 ወቡሩክ ፡ አንተ ፡ ዘትሬኢ ፡ ቀለያተ ፡ ነቢረከ ፡ ላዕለ ፡ ኪሩቤል ፤ ወስቡሕኒ ፡ አንተ ፡ ወልዑልኒ ፡ አንተ ፡ ለዓለም ።

55 ቡሩክ ፡ አንተ ፡ በዲበ ፡ መንበረ ፡ መንግሥትከ ፤ ወስቡሕኒ ፡ አንተ ፡ ወቡሩክኒ ፡ አንተ ፡ ለዓለም ።

56 ቡሩክ ፡ አንተ ፡ በመልዕልተ ፡ ሰማየት ፤ ወስቡሕኒ ፡ አንተ ፡ ወክቡርኒ ፡ አንተ ፡ ለዓለም ።

57 ይባርክዎ ፡ ኵሉ ፡ ግብረ ፡ እግዚእ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

58 ይባርክዎ ፡ ሰማያት ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

59 ይባርክዎ ፡ መላእክተ ፡ እግዚእ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

60 ይባርክዎ ፡ ኵሉ ፡ ማያት ፡ ዘመልዕልተ ፡ ሰማያት ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

61 ይባርክዎ ፡ ኵሉ ፡ ኀይለ ፡ እግዚእ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

62 ይባርክዎ ፡ ፀሐይ ፡ ወወርኅ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

63 ይባርክዎ ፡ ከዋክብተ ፡ ሰማይ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

64 ይባርክዎ ፡ ኵሉ ፡ ጠል ፡ ወዝናም ፡ ለእግዚአ ፡ ብሔር ፡ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

65 ይባርክዎ ፡ ኵሉ ፡ መንፈስ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

66 ይባርክዎ ፡ እሳት ፡ ወላህብ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

67 ይባርክዎ ፡ መዐልት ፡ ወሌሊት ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

68 ይባርክዎ ፡ ጠል ፡ ወአውል ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

69 ይባርክዎ ፡ ቍር ፡ ወአስሐቲያ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

70 ይባርክዎ ፡ በርህ ፡ ወጽልመት ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

71 ይባርክዎ ፡ ደደክ ፡ ወመርቄ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

72 ይባርክዎ ፡ በረድ ፡ ወጊሜ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

73 ይባርክዎ ፡ መብረቅ ፡ ወደመና ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

74 ትባርኮ ፡ ምድር ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

75 ይባርክዎ ፡ አድባር ፡ ወአውግር ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

76 ይባርክዎ ፡ ኵሉ ፡ ዘይበቍል ፡ ውስተ ፡ ምድር ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

77 ይባርክዎ ፡ ቀለያት ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

78 ይባርክዎ ፡ ባሕር ፡ ወኣፍላግ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

79 ይባርክዎ ፡ ዐንበሪ ፡ ወኵሉ ፡ ዘይትሐወስ ፡ ውስተ ፡ ማይ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

80 ይባርክዎ ፡ አዕዋፈ ፡ ሰማይ ፡ ለእግዚአ ፡ ብሔር ፡ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

81 ይባርክዎ ፡ ኵሉ ፡ አራዊት ፡ ወእንስሳ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

82 ይባርክዎ ፡ ደቂቀ ፡ እጓለ ፡ እመ ፡ ሕያው ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

83 ይባርክዎ ፡ እስራኤል ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

84 ይባርክዎ ፡ ካህናተ ፡ እግዚእ ፡ ለእግዚአ ፡ ብሔር ፡ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

85 ይባርክዎ ፡ አግብርተ ፡ እግዚእ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

86 ይባርክዎ ፡ መንፈስ ፡ ወነፍሰ ፡ ጻድቃን ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

87 ይባርክዎ ፡ ጻድቃን ፡ ወትሑታነ ፡ ልብ ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ።

88 ይባርክዎ ፡ አናንያ ፡ ወአዛርያ ፡ ወሚሳኤል ፡ ለእግዚአ ፡ ብሔር ፤ ስቡሕኒ ፡ ውእቱ ፡ ወልዑልኒ ፡ ውእቱ ፡ ለዓለም ። እስመ ፡ አድኀነነ ፡ እምእደ ፡ ሲኦል ፡ ወእሞት ፡ ባልሐነ ፡ ወእምእቶነ ፡ እሳት ፡ ዘይነድድ ፡ አንገፈነ ፡ ወአውፅአነ ፡ እማእከለ ፡ ነበልባል ።

89 ግነዩ ፡ ለእግዚአ ፡ ብሔር ፡ እስመ ፡ ኄር ፡ እስመ ፡ ለዓለም ፡ ምሕረቱ ።

90 ባርክዎ ፡ ለእግዚአ ፡ ብሔር ፡ ኵልክሙ ፡ እለ ፡ ትፈርህዎ ፡ ለአምላከ ፡ አማልክት ፤ ሰብሕዎ ፡ ወግነዩ ፡ ሎቱ ፡ እስመ ፡ ለኵሉ ፡ ዓለም ፡ ምሕረቱ ።

91 ወሰምዖሙ ፡ ናቡከደነጾር ፡ እንዘ ፡ ያነብቡ ፡ ወአንከረ ፡ ወተንሥአ ፡ ፍጡነ ፡ ወይቤሎሙ ፡ ለመገብቱ ፤ አኮኑ ፡ ሠለስተ ፡ ዕደወ ፡ ወደይነ ፡ ማእከለ ፡ እቶን ፡ እሱራነ ፤ ወይቤልዎ ፤ እወ ፡ ንጉሥ ።

92 ወይቤ ፡ ንጉሥ ፤ አንሰ ፡ እሬኢ ፡ ዝየ ፡ አርባዕተ ፡ ዕደወ ፡ ፍቱሓነ ፡ ወያንሶስዉ ፡ ማእከለ ፡ እሳት ፡ ወአልቦ ፡ ዘለከፎሙ ፡ ወገጹ ፡ ለራብዕ ፡ ወልደ ፡ እግዚአ ፡ ብሔር ፡ ይመስል ።

93 ወእምዝ ፡ ሖረ ፡ ናቡከደነጾር ፡ ኀበ ፡ ኆኅተ ፡ እቶነ ፡ እሳት ፡ ዘይነድድ ፡ ወይቤ ፤ ሲድራቅ ፡ ወሚሳቅ ፡ <ወ>አብደናጎ ፡ አግብርተ ፡ እግዚአ ፡ ብሔር ፡ ልዑል ፡ ፃኡ ፡ ወንዑ ፤ ወወፅኡ ፡ ሲድራቅ ፡ ወሚሳቅ ፡ ወአብደናጎ ፡ እማእከለ ፡ እሳት ።

94 ወተጋብኡ ፡ መገብት ፡ ወመላእክት ፡ ወመኳንንት ፡ ወኀያላን ፡ ዘንጉሥ ፡ ወርእይዎሙ ፡ ለእሙንቱ ፡ ዕደው ፡ ከመ ፡ ኢቀርቦሙ ፡ እሳት ፡ ሥጋሆሙ ፡ ወኢለከፎሙ ፡ ሥዕርተ ፡ ርእሶሙ ፡ ወኢተወለጠ ፡ ርእየቶሙ ፡ ወኣልቦ ፡ ላዕሌሆሙ ፡ ጼና ፡ እሳት ፤ ወሰገደ ፡ ንጉሥ ፡ ለእግዚአ ፡ ብሔር ፡ በቅድሜሆሙ ።

95 ወአውሥአ ፡ ናቡከደነጾር ፡ ወይቤ ፤ ይትባረክ ፡ አምላከ ፡ ሲድራቅ ፡ ወሚሳቅ ፡ ወአብደናጎ ፡ ዘፈነወ ፡ መልአኮ ፡ ወአድኀነ ፡ አግብርቴሁ ፡ እለ ፡ ተወከሉ ፡ ቦቱ ፡ ወሜጡ ፡ ቃለ ፡ ንጉሥ ፡ ወወሀቡ ፡ ነፍሶሙ ፡ ለእሳት ፡ ከመ ፡ ኢያምልኩ ፡ ወኢይስግዱ ፡ ለኵሉ ፡ አማልክት ፡ ዘእንበለ ፡ ለአምላኮሙ ።

96 ወአነሂ ፡ አዘዝኩ ፡ ለኵሉ ፡ አሕዛብ ፡ ወነገድ ፡ ወበሓውርት ፤ እመቦ ፡ ዘነበበ ፡ ላዕለ ፡ አምላከ ፡ ሲድራቅ ፡ ወሚሳቅ ፡ ወአብደናጎ ፡ ይትኰነን ፡ ነፍሶ ፡ ወይትበርበር ፡ ቤቶ ፡ እስመ ፡ አልቦ ፡ ካልአ ፡ አምላከ ፡ ዘያድኅን ፡ ከመዝ ።

97 ወሤሞሙ ፡ ንጉሥ ፡ ለሲድራቅ ፡ ወሚሳቅ ፡ ወአብደናጎ ፡ ለበሓውርተ ፡ ባቢሎን ፡ ወአዕበዮሙ ፡ ወአኰነኖሙ ፡ ለኵሉ ፡ አይሁድ ፡ እለ ፡ ውስተ ፡ መንግሥቱ ፡ ሀለዉ ።

98 ናቡከደነጾር ፡ ንጉሥ ፡ ለኵሉ ፡ አሕዛብ ፡ ወነገድ ፡ ወበሓውርት ፡ ዘኵሉ ፡ ምድር ፤ ሰላም ፡ ይብዛኅክሙ ።

99 ትእምርተ ፡ ወመንክረ ፡ ዘገብረ ፡ ሊተ ፡ እግዚአ ፡ ብሔር ፡ ልዑል ፡ አደመኒ ፡ በቅድሜየ ፡ እንግርክሙ ።

100 እስመ ፡ ዐቢይ ፡ ወጽኑዕ ፤ መንግሥቱ ፡ መንግሥት ፡ ዘለዓለም ፡ ወምኵናኑ ፡ ለትውልደ ፡ ትውልድ ።