Chapter 1
/ Old Testament / Daniel / Chapter 1 Chapter 2

ዘዳንኤል ፡ ነቢይ ።

 

1 አመ ፡ ሣልስ ፡ ዓመተ ፡ መንግሥቱ ፡ ለኢይዋቄም ፡ ንጉሠ ፡ ይሁዳ ፡ መጽአ ፡ ናቡከደነጾር ፡ ንጉሠ ፡ ባቢሎን ፡ ኢየሩሳሌም ፡ ወቀተላ ።

2 ወአግብአ ፡ እግዚአ ፡ ብሔር ፡ ውስተ ፡ እዴሁ ፡ ለኢዮአቂም ፡ ንጉሠ ፡ ይሁጻ ፡ ወንዋየ ፡ ቤተ ፡ እግዚአ ፡ ብሔር ፡ ወወሰደ ፡ ብሔረ ፡ ሰናኦር ፡ ቤተ ፡ አምላኩ ፡ ወንዋየ ፡ አቡሁ ፡ ወቤተ ፡ መዝገበ ፡ አምላኩ ።

3 ወይቤሎ ፡ ንጉሥ ፡ ለአዝፉኔዝ ፡ ሊቀ ፡ ኅድዋኒሁ ፡ ያምድእ ፡ እምደቂቀ ፡ እስራኤል ፡ እምእለ ፡ ተፄወዉ ፡ ያምድእ ፡ እምዘመደ ፡ መንግሥት ።

4 ቢጸ ፡ ወራዙት ፡ እለ ፡ አልቦሙ ፡ ነውረ ፡ ዘለሓይ ፡ ገጾሙ ፡ ወያአምሩ ፡ ኵሎ ፡ ጥበበ ፡ ወይሌብዉ ፡ ምክረ ፡ ወይኄልዩ ፡ ጥዩቀ ፡ እለ ፡ ቦሙ ፡ ኀይለ ፡ ይቁሙ ፡ ውስተ ፡ ጽርሐ ፡ ንጉሥ ፡ ቅድሜሁ ፡ ወይምህርዎሙ ፡ መጽሐፈ ፡ ዘነገረ ፡ ፋርስ ።

5 ወአዘዘ ፡ ሎሙ ፡ ንጉሥ ፡ ሲሳዮሙ ፡ ኵሎ ፡ አሚረ ፡ የሀብዎሙ ፡ እማእደ ፡ ንጉሥ ፡ ዘዘ ፡ ዕለቶሙ ፡ ወእምነ ፡ ወይን ፡ ዘይሰቲ ፡ ውእቱ ፡ ወየኀርሥዎሙ ፡ ሠለስተ ፡ ዓመተ ፡ ወእምዝ ፡ ይቁሙ ፡ ቅድመ ፡ ንጉሥ ።

6 ወሀለዉ ፡ ምስሌሆሙ ፡ እምደቂቀ ፡ ይሁዳ ፡ ዳንኤል ፡ ወአናንያ ፡ ወአዛርያ ፡ ወሚሳኤል ።

7 ወወለጦሙ ፡ አስማቲሆሙ ፡ ሊቀ ፡ ኅጽዋን ፡ ለዳንኤል ፡ በልጣሳር ፡ ወለአናንያ ፡ ሲድራቅ ፡ ወለሚሳኤኡ ፡ ሚሳቅ ፡ ወለአዛርያ ፡ አብደናጎ ።

8 ወአጥብዐ ፡ ዳንኤል ፡ በልቡ ፡ ከመ ፡ ኢይብላዕ ፡ እማእደ ፡ ንጉሥ ፡ ወከመ ፡ ኢይስተይ ፡ እምወይኑ ፤ ወአስተብቍዖ ፡ ለሊቀ ፡ ኅጽዋን ፡ ከመ ፡ ኢያብልዖ ።

9 ወወሀቦ ፡ እግዚአ ፡ ብሔር ፡ ለዳንኤል ፡ ሣህለ ፡ ወምሕረተ ፡ በቅድመ ፡ ሊቀ ፡ ኅጽዋን ።

10 ወይቤሎ ፡ ሊቀ ፡ ኅጽዋን ፡ ለዳንኤል ፤ እፈርሆ ፡ አነ ፡ ለእግዚእየ ፡ ለንጉሥ ፡ እስመ ፡ አዘዘ ፡ ሲሳየክሙ ፡ ወዘትሰትዩ ፡ እመ ፡ ርእየክሙ ፡ ድግዱጋኒክሙ ፡ እምደቅ ፡ እለ ፡ ቢጽክሙ ፡ ኢይኰንነኒ ፡ ንጉሥ ፡ ርእስየ ።

11 ወይቤሎ ፡ ዳንኤል ፡ ለአሜስድ ፡ ዘሤመ ፡ ሊቀ ፡ ኅጽዋን ፡ ዲበ ፡ ዳንኤል ፡ ወአናንያ ፡ ወአዛርያ ፡ ወሚሳኤል ።

12 አመክሮሙ ፡ ለአግብርቲከ ፡ ዐሡረ ፡ ዕለተ ፡ ወሀበነ ፡ እምፍሬ ፡ ምድር ፡ ወንብላዕ ፡ ወማየ ፡ ንስተይ ።

13 ወትርአይ ፡ ነፍስትነ ፡ ወነፍስቶሙ ፡ ለደቅ ፡ እለ ፡ ይሴሰዩ ፡ እማእደ ፡ ንጉሥ ፤ ወዘከመ ፡ ርኢኮ ፡ ግበር ፡ ምስለ ፡ አግብርቲከ ።

14 ወሰምዖሙ ፡ ወአመከሮሙ ፡ ዐሡረ ፡ ዕለተ ።

15 ወኀሊፎ ፡ ዐሡር ፡ ዕለት ፡ ኀየሰ ፡ ነፍስቶሙ ፡ ወሠነየ ፡ ራእዮሙ ፡ እምእልክቱ ፡ ደቅ ፡ እለ ፡ ይሴሰዩ ፡ እማእደ ፡ ንጉሥ ።

16 ወእምዝ ፡ ይነሥእ ፡ አሜስድ ፡ ሲሳዮሙ ፡ ወወይነ ፡ ዘይሰትዩ ፡ ወይሁቦሙ ፡ ዘርአ ፡ ምድር ።

17 ለአርባዕቱ ፡ ደቅ ፤ ወወሀቦሙ ፡ እግዚአ ፡ ብሔር ፡ ጥበበ ፡ ወአእምሮ ፡ ወልቡና ፡ በኵሉ ፡ መጽሐፍ ፡ ወዳንኤል ፡ ጠቢብ ፡ በኵሉ ፡ ራእይ ፡ ወፍካሬ ፡ ሕልም ።

18 ወእምዝ ፡ ተፈጺሞ ፡ መዋዕል ፡ ዘአዘዘ ፡ ንጉሥ ፡ አምጽእዎሙ ፡ ኀቤሁ ፡ ወአብኦመ ፡ ሊቀ ፡ ኅጽዋን ፡ ቅድመ ፡ ንጉሥ ፡ ናቡከደነጾር ።

19 ወተናገሮሙ ፡ ንጉሥ ፡ ወኢተረክበ ፡ በውስተ ፡ ኵሉ ፡ ከመ ፡ ዳንኤል ፡ ወአናንያ ፡ ወአዛርያ ፡ ወሚሳኤል ፤ ወቆሙ ፡ ቅድመ ፡ ንጉሥ ።

20 ወበኵሉ ፡ ነገረ ፡ ጥበብ ፡ ወምክር ፡ ዘኀሠሠ ፡ ንጉሥ ፡ በኀቤሆሙ ፡ ረከበ ፡ ተዕሥርተ ፡ እምኵሉ ፡ ሰብአ ፡ ሥራይ ፡ ወሰብአ ፡ ሰገል ፡ እለ ፡ ውስተ ፡ መንግሥቱ ።

21 ወነበረ ፡ ዳንኤል ፡ እስከ ፡ አሐቲ ፡ ዓመተ ፡ መንግሥቱ ፡ ለቂሮስ ፡ ንጉሥ ።