Susanna
Judith / Deuterocanonical / Susanna Bel

1 ወሀሎ ፡ አሐዱ ፡ ብእሲ ፡ ዘይነብር ፡ ባቢሎን ፡ ወስሙ ፡ ኢዮአቄም ።

2 ወአውሰበ ፡ ብእሲተ ፡ እንተ ፡ ስማ ፡ ሶሰና ፡ ወለተ ፡ ኪልቂዩ ፡ ወሠናይት ፡ ጥቀ ፡ ወትፈርህ ፡ አግዚአ ፡ ብሔር ።

3 ወአዝማዲሃኒ ፡ ጻድቃን ፡ ወመሀርዋ ፡ ለወለቶሙ ፡ ኦሪተ ፡ ሙሴ ።

4 ወኢይዋቄም ፡ ባዕል ፡ ጥቀ ፡ ወቦ ፡ ዐጸደ ፡ አሕማል ፡ ጎረ ፡ ቤቱ ፤ ወይመጽኡ ፡ ኀቤሁ ፡ አይሁድ ፡ እስመ ፡ ውእቱ ፡ ይከብር ፡ እምኵሎሙ ።

5 ወአስተርአዩ ፡ ክልኤቱ ፡ ረባናት ፡ መድልዋን ፡ በውእቱ ፡ ዓመት ፡ እለ ፡ በእንቲአሆሙ ፡ ነገረ ፡ እግዚአ ፡ ብሔር ፡ ከመ ፡ እምባቢሎን ፡ ወፅአት ፡ ኀጢአት ፡ እምረባናት ፡ መድልዋን ፡ እለ ፡ ይብሉ ፡ ነዐቅቦሙ ፡ ለሕዝብ ።

6 ወእሙንቱ ፡ ይፀመዱ ፡ ቤተ ፡ ኢዮአቄም ፡ ወይመጽኡ ፡ ኀቤሁ ፡ ኵሎሙ ፡ እለ ፡ ይትኴነኑ ።

7 ወእምዝ ፡ አቲዎ ፡ ሕዝብ ፡ ጊዜ ፡ ቀትር ፡ ትበውአ ፡ ሶሰና ፡ ወታንሶሱ ፡ ውሰተ ፡ ዐጸደ ፡ አቅማሕ ፡ ዘምታ ።

8 ወይሬእይዋ ፡ ረበናት ፡ ኵሎ ፡ አሚረ ፡ ሶበ ፡ ትበውእ ፡ ወታንሶሱ ፡ ወፈተውዋ ።

9 ወሜጡ ፡ ልቦሙ ፡ ወገፍትኡ ፡ አዕይንቲሆሙ ፡ ከመ ፡ ኢይነጽሩ ፡ ሰማየ ፡ ወኢተዘከሩ ፡ ኵነኔ ፡ ጽድቅ ።

10 ወክልኤሆሙ ፡ አፍቀርዋ ፡ ወኢተናገሩ ፡ በበይናቲሆሙ ፡ ዘውስተ ፡ ልቦሙ ።

11 እስመ ፡ ኀፍሩ ፡ ነጊረ ፡ ፍትወቶሙ ፡ ወፈቀዱ ፡ ይስክቡ ፡ ምስሌሃ ።

12 ወይጸንሕዋ ፡ ኵሎ ፡ አሚረ ፡ ይርከብዋ ።

13 ወይቤ ፡ አሐዱ ፡ ለካልኡ ፤ ንእቱ ፡ ቤተነ ፡ እስመ ፡ ጊዜ ፡ ምሳሕ ፡ ውእቱ ፤ ወኀለፉ ፡ ወተፋለጡ ፡ በበይናቲሆሙ ።

14 ወተሠውጡ ፡ ወተራከቡ ፡ ኅቡረ ፡ ወተናጸሩ ፡ ክልኤሆሙ ፡ ወተናገሩ ፡ ፍትወቶሙ ፤ ወሶቤሃ ፡ ተዓደሙ ፡ ጊዜ ፡ ይክሉ ፡ ረኪቦታ ፡ ባሕቲታ ።

15 ወእምዝ ፡ እንዘ ፡ ይጸንሕዋ ፡ መዐልተ ፡ ቦአት ፡ ከመ ፡ ዘልፍ ፡ ምስለ ፡ ክልኤ ፡ አዋልዲሃ ፡ ወፈተወት ፡ ትትኀፀብ ፡ በውስተ ፡ ገነት ፡ እስመ ፡ ሀፈወት ።

16 ወአልቦ ፡ ህየ ፡ ወኢመነሂ ፡ ዘእንበለ ፡ ክልኤ ፡ ረባናት ፡ ይትኀብኡ ፡ ወይጸንሕዋ ።

17 ወትቤሎን ፡ ለአዋልዲሃ ፡ ያምጽኣ ፡ ላቲ ፡ ቅብአ ፡ ወኀፅበ ፡ ወይዕጽዋ ፡ ኆኅተ ፡ ገነት ፡ ወትትኀፀብ ።

18 ወገብራ ፡ በከመ ፡ አዘዘቶን ፡ <ወዐጸዋ ፡ ኆኅተ ፡ ገነት ፡ ወወፅኣ ፡ እንተ ፡ መፍልስት ፡ ያምጽኣ ፡ ዘአዘዘቶን ፡ >ወኢርእያሆሙ ፡ ለረበናት ፡ እለ ፡ ይትኀብእዎን ።

19 ወወፃኦን ፡ አዋልድ ፡ ተንሥኡ ፡ ክልኤቱ ፡ ረበናት ፡ እልክቱ ፡ ወሮጹ ፡ ኀቤሃ ።

20 ወይቤልዋ ፤ ናሁ ፡ ዕጽው ፡ ኆኅተ ፡ ገነት ፡ ወአልቦ ፡ ዘይሬእየነ ፡ ወንፈቱ ፡ ንስክብ ፡ ምስሌኪ ፡ ወኦሆ ፡ በልነ ።

21 ወእማእኮ ፡ ናስተዋድየኪ ፡ ከመ ፡ ረከብነ ፡ ብእሴ ፡ ምስሌኪ ፡ ወበኣንተዝ ፡ ሰደድኪ ፡ አዋልደኪ ።

22 ወበከየት ፡ ሶሰና ፡ ወትቤ ፤ ተመንደብኩ ፡ እምኵልሄ ፡ እመኒ ፡ ገበርኩ ፡ እመውት ፡ ወእመኒ ፡ ኢገበርኩ ፡ ኢይድኅን ፡ እምእዴሆሙ ።

23 ይኄይሰኒ ፡ ኢገቢርየ ፡ እደቅ ፡ ውስተ ፡ ኣዴሆሙ ፡ እምአአብስ ፡ ቅድመ ፡ እግዚአ ፡ ብሔር ።

24 ወአውየወት ፡ ሶሰና ፡ በዐቢይ ፡ ቃል ፡ ወአውየዉ ፡ ረባናት ፡ ምስሌሃ ።

25 ወሮጸ ፡ አሐዱ ፡ ወአርኀወ ፡ ኆኅተ ፡ ገነት ።

26 ወሰሚዖሙ ፡ አውያተ ፡ ውስተ ፡ ገነተ ፡ ቤቶሙ ፡ ሮጹ ፡ እንተ ፡ መፍለስት ፡ ወርእዩ ፡ ምንተ ፡ ኮነት ።

27 ወሶበ ፡ ነገሩ ፡ እልክቱ ፡ ረባናት ፡ ዘነገረ ፡ ተኀፈሩ ፡ አግብርቲሆሙ ፡ ጥቀ ፡ እስመ ፡ ግሙራ ፡ ኢተሰምዐ ፡ ነገር ፡ ዘከመዝ ፡ ላዕለ ፡ ሶሰና ።

28 ወበሳኒታ ፡ ተጋቢኦሙ ፡ ሕዝብ ፡ ኀበ ፡ ምታ ፡ ኢዮአቄም ፡ መድኡ ፡ እልክቱ ፡ ክልኤቱ ፡ ረባናት ፡ ምስለ ፡ ልቦሙ ፡ ወዐመፃ ፡ ከመ ፡ ይቅትልዋ ፡ ለሶሰና ፤ ወይቤሉ ፡ በቅድመ ፡ ሕዝብ ።

29 [ወ]ለአኩ ፡ ለሶሰና ፡ ወለተ ፡ ኬልቂዩ ፡ ብእሲተ ፡ ኢዮአቄም ፤ ወለአኩ ፡ ላቲ ።

30 ወመድአት ፡ ይእቲ ፡ ወነገዳ ፡ ወአዝማዲሃ ፡ ወኵሉ ፡ ዘመዳ ።

31 ወሶሰና ፡ ላሕይ<ት> ፡ ጥቀ ፡ ወሠናይት ፡ ራእያ ።

32 ወአዘዙ ፡ እልክቱ ፡ ዐማፅያን ፡ ይክሥትዋ ፡ ከመ ፡ ይጽገብዋ ፡ እምላሕያ ፡ ወከሠትዋ ።

33 ወይበክዩ ፡ ሰብኣ ፡ ወኵሉ ፡ ዘያአምራ ።

34 ወተንሥኡ ፡ እልክቱ ፡ ክልኤቱ ፡ ረበናት ፡ ማእከለ ፡ ሕዝብ ፡ ወአንበሩ ፡ እዴሆሙ ፡ ላዕለ ፡ ርእሳ ።

35 ወእንዘ ፡ ትበኪ ፡ ነጸረት ፡ ሰማየ ፡ እስመ ፡ ተወከለ ፡ ልባ ፡ በእግዚአ ፡ ብሔር ።

36 ወይቤሉ ፡ እልክቱ ፡ ረባናት ፤ እንዘ ፡ ናንሶሱ ፡ ውስተ ፡ ገነት ፡ ባሕቲትነ ፡ ቦአት ፡ ይእቲ ፡ ወክልኤ ፡ ገዛኢ ፡ ወዐጸዋ ፡ ኆኅተ ፡ ገነት ፡ ወፈነወቶን ፡ ለአዋልዲሃ ።

37 ወመጽአ ፡ ኀቤሃ ፡ ወሬዛ ፡ እምውእደ ፡ ይትኀባእ ፡ ወሰክበ ፡ ምስሌሃ ።

38 ወንሕነሰ ፡ ውስተ ፡ ማእዝንተ ፡ ገነት ፡ ርኢነ ፡ ኀጢአቶሙ ፡ ወሮጽነ ፡ ኀቤሆሙ ።

39 ወረከብናሆሙ ፡ ይሰክቡ ፡ ኅቡረ ፡ ወንሕነሰ ፡ ሎቱ ፡ ስእናሁ ፡ እኂዘ ፡ ወአምሠጠነ ፡ እስመ ፡ ይኄይለነ ፡ ወአርኀወ ፡ ኆኅተ ፡ ወወፅአ ።

40 ወኪያሃሰ ፡ አኀዝናሃ ፡ ወተስእልናሃ ፡ መኑ ፡ ብእሲሁ ።

41 ወኢያይድዐተነ ፤ ወአምንዎሙ ፡ ዐውድ ፡ እስመ ፡ ረባናተ ፡ ሕዝብ ፡ እሙንቱ ፡ ወመኳንንት ፡ <ወኰነንዋ ፡ ትሙት ። >

42 ወአውየወት ፡ ሶሰና ፡ በዐቢይ ፡ ቃል ፡ ወትቤ ፤ አምላክ ፡ ዘለዓለም ፡ ዘታአምር ፡ ዘኅቡእ ፡ ዘታአምር ፡ ኵሎ ፡ ዘእንበለ ፡ ይኩን ።

43 አንተ ፡ ታአምር ፡ ከመ ፡ ሐሰተ ፡ አስተዋደዩኒ ፡ ወናሁ ፡ እመውት ፡ ዘአልቦ ፡ ዘገበርኩ ፡ በዘ ፡ አሕሠሙ ፡ ላዕሌየ ፡ እሉ ።

44 ወሰምዐ ፡ እግዚአ ፡ ብሔር ።

45 ወእንዘ ፡ ይወስዱ ፡ ይቅትልዋ ፡ አንሥአ ፡ እግዚአ ፡ ብሔር ፡ መንፈሰ ፡ ቅዱሰ ፡ ላዕለ ፡ ወልድ ፡ ወሬዛ ፡ ዘስሙ ፡ ዳንኤል ።

46 ወከልሐ ፡ በዐቢይ ፡ ቃል ፡ ወይቤ ፤ ንጹሕ ፡ አነ ፡ እምደማ ፡ ለዛቲ ።

47 ወተመይጡ ፡ ኵሉ ፡ ሕዝብ ፡ ኀቤሁ ፡ ወይቤሉ ፤ ምንትኑ ፡ ዝነገር ፡ ዘትብል ፡ አንተ ።

48 ወቆመ ፡ ማእከሎሙ ፡ ወይቤ ፤ ከመዝኑ ፡ አንትሙ ፡ አብዳን ፡ ደቂቀ ፡ እስራኤል ፡ ዘእንበለ ፡ ትሕትቱ ፡ ወትጠይቁ ፡ ትኴንኑ ፡ ወለተ ፡ እስራኤል ።

49 ግብኡኬ ፡ ውስተ ፡ ዐውድ ፡ እስመ ፡ ሐሰዉ ፡ አስተዋድዮታ ፡ እሉ ።

50 ወተሠውጡ ፡ ኵሉ ፡ ሕዝብ ፡ እንዘ ፡ ይረውጹ ፤ ወይቤልዎ ፡ ሊቃናት ፤ ነዐ ፡ ንበር ፡ ማእከሌነ ፡ ወንግረነ ፡ እስመ ፡ ኪያከ ፡ አልሀቀ ፡ እግዚአ ፡ ብሔር ።

51 ወይቤሎሙ ፡ ዳንኤል ፤ አርሕቅዎሙ ፡ ዘዘ ፡ ዚአሆሙ ፡ ወእሕትቶሙ ።

52 ወአቀምዎሙ ፡ በበ ፡ አሐዱ ፤ ወጸውዖ ፡ ለአሐዱ ፡ እምኔሆሙ ፡ ወይቤሎ ፤ ብሉይ ፡ መዋዕሊከ ፡ እኩያት ፡ በጽሓ ፡ ኀጣውኢከ ፡ ዘገበርከ ፡ ቀዲሙ ።

53 እስመ ፡ ኰነንከ ፡ ፍትሐ ፡ ዐመፃ ፡ ወአሕየውከ ፡ ጊጉያነ ፡ ወቀተልከ ፡ ንጹሐ ፡ ዘከልአ ፡ እግዚአ ፡ ብሔር ፡ ወይቤ ፤ ጻድቀ ፡ ወንጹሐ ፡ ኢትቅትል ።

54 ወይእዜኒ ፡ እመ ፡ ርኢካ ፡ ለዛቲ ፡ ንግረኒ ፡ በታሕተ ፡ አይ ፡ ዕፅ ፡ ኀበ ፡ ርኢኮሙ ፡ ይትናገሩ ፡ ክልኤሆሙ ፤ ወይቤ ፡ ታሕተ ፡ ዕፀ ፡ ሲኪኖን ።

55 ወይቤሎ ፡ ዳንኤል ፤ አማን ፡ ሐሰውከ ፡ ላዕለ ፡ ርእስከ ፤ ናሁ ፡ ወድአ ፡ መልአከ ፡ እግዚአ ፡ ብሔር ፡ ተአዘዘ ፡ በኀበ ፡ እግዚአ ፡ ብሔር ፡ ያንቅዕከ ፡ እማእከልከ ።

56 ወአግሐሦ ፡ ኪያሁ ፤ ወአዘዘ ፡ ያምጽኡ ፡ ካልኦ ፡ ወይቤሎ ፤ ዘርአ ፡ ከናአን ፡ ወአኮ ፡ ዘይሁዳ ፡ ላሕይ ፡ አስሐተከ ፡ ወፍትወት ፡ ገፍትአ ፡ ልበከ ።

57 ከመዝኑ ፡ ትሬስዩ ፡ ወለተ ፡ እስራኤል ፡ እስመ ፡ ይእቲ ፡ ኢክህለት ፡ ተዋቅሦተክሙ ፡ ወፈርሀት ፡ ወለተ ፡ ይሁዳ ፡ ተዐገሠት ፡ ወዐመፅክሙ ።

58 ወይእዜኒ ፡ ንግረኒ ፡ ምንት ፡ ዕፀ ፡ በኀበ ፡ ረከብኮሙ ፡ ይትናገሩ ፡ ክልኤሆሙ ፤ ወይቤ ፡ ታሕተ ፡ ዕፀ ፡ ጵርዩን ።

59 ወይቤ ፡ ዳንኤል ፤ አማን ፡ ሐሰውከ ፡ አንተሂ ፡ ላዕለ ፡ ርእስከ ፤ ናሁ ፡ ጽኑሕ ፡ መልአከ ፡ እግዚአ ፡ ብሔር ፡ በሰይፍ ፡ ይሠጽርከ ፡ በመንፈቅከ ፡ ከመ ፡ ይሠሩክሙ ።

60 ወከልሑ ፡ ኵሉ ፡ ሕዝብ ፡ በዐቢይ ፡ ቃል ፡ ወባረክዎ ፡ ለእግዚአ ፡ ብሔር ፡ ዘአድኀና ፡ ዘተወከለት ፡ ቦቱ ።

61 ወተንሥኡ ፡ ላዕለ ፡ እልክቱ ፡ ክልኤቱ ፡ ረባናት ፡ እስመ ፡ አርስሖሙ ፡ ዳንኤል ፡ እምቃሎሙ ፡ ወሐሰዉ ፡ ስምዖሙ ፡ ወገብሩ ፡ ላዕሌሆሙ ፡ በከመ ፡ ገብሩ ፡ እኩየ ፡ ዲበ ፡ ቢጾሙ ።

62 በሕገ ፡ ሙሴ ፤ ወቀተልዎሙ ፡ ወድኅነ ፡ ደም ፡ ንጹሕ ፡ በይእቲ ፡ ዕለት ።

63 ወአእኰትዎ ፡ ለእግዚአ ፡ ብሔር ፡ ኪልቂዩስ ፡ ወብእሲቱ ፡ በእንተ ፡ ወለቶሙ ፡ ሶሰና ፡ ምስለ ፡ ኢዮአቄም ፡ ምታ ፡ ወኵሉ ፡ አዝማዲሃ ፡ እስመ ፡ ኢተረክበ ፡ እኩይ ፡ ላዕሌሃ ፡ ምግባር ።

64 ወኮነ ፡ ዳንኤል ፡ ዐቢየ ፡ በቅድመ ፡ ሕዝብ ፡ ይእተ ፡ ዕለተ ፡ ወለዘላፉ ።