Chapter 4
Chapter 3 / Book of Jubilees / Dillmann's Edition / Chapter 4 Chapter 5

1 ወበሣልስ ፡ ሱባዔ ፡ በካልእ ፡ ኢዮቤልዉ ፡ ወለደቶ ፡ ለቃየን ፡ ወበራብዕ ፡ ወለደቶ ፡ ለአቤል ፡ ወበኃምስ ፡ ወለደታ ፡ ለአዋን ፡ ወለቱ ።

2 ወበቀዳሚሁ ፡ ለኢዮቤልዉ ፡ ሣልስ ፡ ቀተሎ ፡ ቃየን ፡ ለአቤል ፡ እስመ ፡ ተወክፈ ፡ እምእዴሁ ፡ ቍርባነ ፡ ወእምእደ ፡ ቃየንሰ ፡ ኢተወክፈ ፡ ምሥዋዕቶ ፡

3 ወቀተሎ ፡ በገዳም ። ወጸርኀ ፡ ደሙ ፡ እምድር ፡ ውስተ ፡ ሰማይ ፡ እንዘ ፡ ይበኪ ፡ በእንተ ፡ ዘቀተሎ ፡

4 ወዘለፎ ፡ እግዚአብሔር ፡ ለቃየን ፡ በእንተ ፡ አቤል ፡ ዘቀተሎ ። ወገብረ ፡ ሎቱ ፡ ኑኀ ፡ ዲበ ፡ ምድር ፡ በእንተ ፡ ደመ ፡ እኁሁ ፡ ወረገሞ ፡ በዲበ ፡ ምድር ።

5 በእንተ ፡ ዝንቱ ፡ ተጽሕፈ ፡ ውስተ ፡ ጽላተ ፡ ሰማይ ፡ ርጉም ፡ ዘይዘብጥ ፡ ካልኦ ፡ በእከይ ፡ ወይብሉ ፡ ኵሎሙ ፡ እለ ፡ ሰምዑ ፡ ለይኩን ፡ ወሰብእ ፡ ዘርእየ ፡ ወኢነገረ ፡ ይኩን ፡ ርጉመ ፡ ከማሁ ።

6 በእንተዝ ፡ ሰሚዐነ ፡ ንሕነ ፡ መጻእነ ፡ ናይድዕ ፡ ቅድመ ፡ እግዚአብሔር ፡ አምላክነ ፡ ኵሎ ፡ ኃጢአተ ፡ ዘይከውን ፡ ውስተ ፡ ሰማይ ፡ ወምድር ፡ ወዘበብርሃን ፡ ወዘበጽልመት ፡ ወዘበኵሉ ።

7 ወሀለዉ ፡ አዳም ፡ ወብእሲቱ ፡ እንዘ ፡ ይላህዉ ፡ በእንተ ፡ አቤል ፡ ፬ ፡ ሱባዔ ፡ ዓመት ። ወበራብዕ ፡ ዓመት ፡ ዘሱባዔ ፡ ኃምስ ፡ ተፈሥሐ ፡ ወአእመራ ፡ ዳግመ ፡ ለብእሲቱ ፡ ወወለደት ፡ ሎቱ ፡ ወልደ ፡ ወሰመዮ ፡ ስሞ ፡ ሴት ። እስመ ፡ ይቤ ፡ አንሥአ ፡ ለነ ፡ እግዚአብሔር ፡ ዘርአ ፡ ውስተ ፡ ምድር ፡ ካልአ ፡ ህየንተ ፡ አቤል ፡ እስመ ፡ ቀተሎ ፡ ቃየን ።

8 በሱበዔ ፡ ሳድስ ፡ ወለዳ ፡ ለአዙራ ፡ ወለቱ ።

9 ወነሥኣ ፡ ቃየን ፡ ለአዋን ፡ እኅቱ ፡ ሎቱ ፡ ብእሲተ ፡ ወወለደት ፡ ሎቱ ፡ ኤኖኅሃ ፡ በፍጻሜ ፡ ራብዑ ፡ ኢዮቤልዉ ። ወበ ፡ ፩ ፡ ዓመት ፡ ዘሱበዔ ፡ ቀዳሚ ፡ ዘኃምስ ፡ ኢዮቤልዉ ፡ ተሐንጹ ፡ አብያት ፡ ውስተ ፡ ምድር ፡ ወሐነጸ ፡ ቃየን ፡ ሀገረ ፡ ወሰመያ ፡ በስመ ፡ ወልዱ ፡ ኤኖኅ ።

10 ወአዳም ፡ አእመራ ፡ ለሔዋን ፡ ብእሲቱ ፡ ወወለደት ፡ ዓዲ ፡ ፱ ፡ ደቂቀ ።

11 ወበሱባዔ ፡ ኃምስ ፡ ዘኢዮቤልዉ ፡ ነሥኣ ፡ ሴት ፡ ለአዙራ ፡ እኅቱ ፡ ሎቱ ፡ ብእሲተ ፡ ወበራብዑ ፡ ሎቱ ፡ ወለደት ፡ ሎቱ ፡ ሄኖስሃ ፡

12 ውእቱ ፡ ወጠነ ፡ ቀዳሚ ፡ ጸውዖ ፡ ስመ ፡ እግዚአብሔር ፡ በዲበ ፡ ምድር ።

13 ወበሳብዕ ፡ ኢዮቤልዩ ፡ በሱባዔ ፡ ኃምስ ፡ ነሥአ ፡ ኤኖስ ፡ ኖኤምሃ ፡ እኅቶ ፡ ሎቱ ፡ ብእሲተ ፡ ወወለደት ፡ ሎቱ ፡ ወልደ ፡ በሣልስ ፡ ዓመት ፡ ዘኃምስ ፡ ሱበዔ ፡ ወሰመየ ፡ ስሞ ፡ ቃይናን ።

14 ወበፍጻሜ ፡ ሳምን ፡ ኢዮቤልዉ ፡ ነሥአ ፡ ሎቱ ፡ ቃይናን ፡ ብእሲተ ፡ ሙአሌትሃ ፡ እኅቶ ፡ ወወለደት ፡ ሎቱ ፡ ወልደ ፡ በታስዕ ፡ ኢዮቤልዉ ፡ በሱባዔ ፡ ቀዳሚ ፡ በሣልስ ፡ ዓመት ፡ በሱባዔሁ ፡ ለዝ ፡ ወጸውዐ ፡ ስሞ ፡ መላልኤል ።  

15 ወበካልእ ፡ ሱባዔ ፡ ዘዓሥር ፡ ኢዮቤልዩ ፡ ነሥአ ፡ ሎቱ ፡ መላልኤል ፡ ዲናሃ ፡ ወለተ ፡ በራክሔል ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ፡ ወወለደት ፡ ሎቱ ፡ ወልደ ፡ በሱባዔ ፡ ሣልስ ፡ በሳድስ ፡ ዓመቱ ፡ ወጸውዐ ፡ ስሞ ፡ ያሬድሃ ። እስመ ፡ በመዋዕሊሁ ፡ ወረዱ ፡ መላእክተ ፡ እግዚአብሔር ፡ ውስተ ፡ ምድር ፡ እለ ፡ ተሰምዩ ፡ ትጉሃነ ፡ ከመ ፡ ይምሀርዎሙ ፡ ለደቂቀ ፡ እጓለ ፡ እመሕያው ፡ ይግበሩ ፡ ፍትሐ ፡ ወርትዐ ፡ በዲበ ፡ ምድር ።

16 ወበዓሥር ፡ ወአሐዱ ፡ ኢዮቤልዉ ፡ ነሥአ ፡ ሎቱ ፡ ያሬድ ፡ ብእሲተ ፡ ወስማ ፡ ባረካ ፡ ወለተ ፡ ራሱእያል ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ፡ በሱባዔ ፡ ራብዕ ፡ ዘኢዮቤል ፡ ዝንቱ ፡ ወወለደት ፡ ሎቱ ፡ ወልደ ፡ በሱባዔ ፡ ኃምስ ፡ በራብዕ ፡ ዓመት ፡ ዘኢዮቤልዉ ፡ ወጸውዐ ፡ ስሞ ፡ ሄኖክ ።

17 ውእቱ ፡ ቀደመ ፡ ተምህሮ ፡ መጽሐፍ ፡ ወትምህርት ፡ ወጥበብ ፡ እምእጓለ ፡ እመሕያው ፡ እለ ፡ ተወልዱ ፡ ዲበ ፡ ምድር ፡ ወጸሐፈ ፡ ተአምረ ፡ ሰማይ ፡ በከመ ፡ ሥርዐተ ፡ አውራኂሆሙ ፡ ውስተ ፡ መጽሐፍ ፡ ከመ ፡ ያእምሩ ፡ እጓለ ፡ እመሕያው ፡ ጊዜ ፡ ዓመታት ፡ በከመ ፡ ሥርዐቲሆሙ ፡ ለለ ፡ ወርኆሙ ።

18 ውእቱ ፡ ቀደመ ፡ ጽሒፈ ፡ ስምዐ ፡ ወአስምዐ ፡ ለደቂቀ ፡ እጓለ ፡ እመሕያው ፡ ውስተ ፡ ትዝምደ ፡ ምድር ፡ ወሱባዔሆሙ ፡ ለኢዮቤልዮታት ፡ ነገረ ፡ ወመዋዕለ ፡ ዓመታት ፡ አይድዐ ፡ ወአውራኃ ፡ ሠርዐ ፡ ወሰንበታተ ፡ ዓመታት ፡ ነገረ ፡ በከመ ፡ አይዳዕናሁ ።

19 ወዘኮነ ፡ ወዘይከውን ፡ ርእየ ፡ በራእየ ፡ ሌሊት ፡ በንዋም ፡ ወዘከመ ፡ ይከውን ፡ ዲበ ፡ ደቂቀ ፡ እጓለ ፡ እመሕያው ፡ በትውልዶሙ ፡ እስከ ፡ አመ ፡ ዕለተ ፡ ደይን ፤ ኵሎ ፡ ርእየ ፡ ወአእመረ ፡ ወጸሐፎ ፡ ስምዐ ፡ ወአንበሮ ፡ ለስምዕ ፡ ዲበ ፡ ምድር ፡ ላዕለ ፡ ኵሉ ፡ ደቂቀ ፡ እጓለ ፡ እመሕያው ፡ ወለትውልዶሙ ።

20 ወበ ፡ ፲ ፡ ወ ፡ ፪ ፡ ኢዮቤልው ፡ በሳብዕ ፡ ሱባዔሁ ፡ ነሥአ ፡ ሎቱ ፡ ብእሲተ ፡ ወስማ ፡ እድና ፡ ወለተ ፡ ዳንኤል ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ፡ ወበሳድስ ፡ ዓመት ፡ ለሱባዔሁ ፡ ለዝ ፡ ወለደት ፡ ሎቱ ፡ ወልደ ፡ ወጸውዐ ፡ ስሞ ፡ ማቱሳላ ፡

21 ወሀለወ ፡ እንከ ፡ ምስለ ፡ መላእክተ ፡ አምላክ ፡ ስድስተ ፡ ዘኢዮቤልሳተ ፡ ዓመታት ፡ ወአርአይዎ ፡ ኵሎ ፡ ዘውስተ ፡ ምድር ፡ ወዘበሰማያት ፡ ሥልጣኖ ፡ ለፀሐይ ፡ ወጸሐፈ ፡ ኵሎ ።

22 ወአስምዐ ፡ ለትጉሃን ፡ ለእለ ፡ አበሱ ፡ ምስለ ፡ አዋልደ ፡ ሰብእ ፡ እስመ ፡ አኀዙ ፡ እሉ ፡ ይደመሩ ፡ ምስለ ፡ አዋልደ ፡ ምድር ፡ ከመ ፡ ይራኵሱ ፡ ወአስምዐ ፡ ሄኖክ ፡ ላዕለ ፡ ኵሎሙ ።

23 ወተንሥአ ፡ እማእከለ ፡ ደቂቀ ፡ እጓለ ፡ እመሕያው ፡ ወወሰድናሁ ፡ ውስተ ፡ ገነተ ፡ ኤዶም ፡ ለዕበይ ፡ ወለክብር ፡ ወናሁ ፡ ውእቱ ፡ በህየ ፡ ይጽሕፍ ፡ ደይነ ፡ ወኵነኔ ፡ ዓለም ፡ ወኵሎ ፡ እከዮሙ ፡ ለደቂቀ ፡ እጓለ ፡ እመሕያው ።

24 ወበእንቲአሁ ፡ አምጽአ ፡ ማየ ፡ አይኅ ፡ ዲበ ፡ ኵሉ ፡ ምድረ ፡ ኤዶም ፡ እስመ ፡ ህየ ፡ ተውህበ ፡ ውእቱ ፡ ለትእምርት ፡ ወከመ ፡ ያስምዕ ፡ ላዕለ ፡ ኵሉ ፡ ደቂቀ ፡ እጓለ ፡ እመሕያው ፡ ከመ ፡ ይንግር ፡ ኵሎ ፡ ግብረ ፡ ትውልድ ፡ እስከ ፡ አመ ፡ ዕለተ ፡ ደይን ።

25 ወውእቱ ፡ ዕጣነ ፡ ዐጠነ ፡ ምሴተ ፡ መቅደስ ፡ ዘይሰጠው ፡ ቅድመ ፡ እግዚአብሔር ፡ በደብረ ፡ ቀትር ።

26 እስመ ፡ ፬ ፡ መካን ፡ በዲበ ፡ ምድር ፡ ለእግዚአብሔር ፡ ገነተ ፡ ኤዶም ፡ ወደብረ ፡ ጽባሕ ፡ ውስቴቱ ፡ ወዝደብር ፡ ዘሀለውከ ፡ ውስቴቱ ፡ አንተ ፡ ዮም ፡ ደብረ ፡ ሲና ፡ ወደብረ ፡ ጽዮን ፡ ይትቀደስ ፡ በፍጥረት ፡ ሐዳስ ፡ ለቅዳሴ ፡ ምድር ፤ በእንተዝ ፡ ትትቄደስ ፡ ምድር ፡ እምኵሉ ፡ አበሳ ፡ ወእምርኵሳ ፡ ለትውልደ ፡ ዓለም ።

27 ወበዓሥር ፡ ወራብዕ ፡ ኢዮቤልዉ ፡ ነሥአ ፡ ሎቱ ፡ ማቱሳላ ፡ ብእሲቶ ፡ እድናሃ ፡ ወለተ ፡ እዝራኤል ፡ ወለተ ፡ እኅተ ፡ አቡሁ ፡ ብእሲተ ፡ ሎቱ ፡ በሱበዔ ፡ ሣልስ ፡ በዓመት ፡ ፩ ፡ ዘውእቱ ፡ ወወለደ ፡ ወልደ ፡ ወጸውዐ ፡ ስሞ ፡ ላሜክ ።

28 ወበዓሥር ፡ ወኃምስ ፡ ኢዮቤልዉ ፡ በሱባዔ ፡ ሣልስ ፡ ነሥአ ፡ ሎቱ ፡ ላሜክ ፡ ብእሲተ ፡ ወስማ ፡ ቢተኖስ ፡ ወለተ ፡ በራክኤል ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ፡ ወበዝ ፡ ሱባዔ ፡ ወለደት ፡ ሎቱ ፡ ወልደ ፡ ወጸውዐ ፡ ስሞ ፡ ኖኅ ፡ እንዘ ፡ ይብል ፡ ዘይናዝዘኒ ፡ እምኵሉ ፡ ግብርየ ፡ ወእምድርሂ ፡ እንተ ፡ ረገመ ፡ እግዚአብሔር ።

29 ወበፍጻሜሁ ፡ ለዓሥር ፡ ወታስዕ ፡ ኢዮቤልዉ ፡ በሱባዔ ፡ ሳብዕ ፡ በሳድስ ፡ ዓመቱ ፡ ሞተ ፡ አዳም ፡ ወቀበርቃ ፡ ኵሎሙ ፡ ደቂቁ ፡ ውስተ ፡ ምድረ ፡ ፍጥረቱ ፡ ለአዳም ፡ ወውእቱ ፡ መቅድመ ፡ ተቀብረ ፡ ውስተ ፡ ምድር ፡

30 ወ ፡ ፸ ፡ ዓመተ ፡ አሕፀፀ ፡ እም ፡ ፲፻ ፡ ዓመት ። እስመ ፡ ፲፻ ፡ ዓመት ፡ ከመ ፡ አሐቲ ፡ ዕለት ፡ ውስተ ፡ ስምዐ ፡ ሰማያት ፤ በእንተዝ ፡ ተጽሕፈ ፡ በእንተ ፡ ዕፀ ፡ አእምሮ ፡ እስመ ፡ በዕለት ፡ እንተ ፡ ትበልዑ ፡ እምኔሁ ፡ ትመውቱ ፤ በእንተዝ ፡ ኢፈጸመ ፡ ዓመታተ ፡ ዛቲ ፡ ዕለት ፡ እስመ ፡ ባቲ ፡ ሞተ ።

31 በተፍጸሜቱ ፡ ለዝ ፡ ኢዮቤልዉ ፡ ተቀትለ ፡ ቃየን ፡ እምድኅሬሁ ፡ በ ፡ ፩ ፡ ዓመት ፡ ወወድቀ ፡ ቤቱ ፡ ላዕሌሁ ፡ ወሞተ ፡ በማእከለ ፡ ቤቱ ፡ ወተቀትለ ፡ በእበኒሃ ፡ እስመ ፡ በእብን ፡ ቀተሎ ፡ ለአቤል ፡ ወበእብን ፡ ተቀትለ ፡ በኵነኔ ፡ ጽድቅ ።

32 በእንተዝ ፡ ተሠርዐ ፡ ውስተ ፡ ጽላተ ፡ ሰማይ ፡ በንዋይ ፡ ዘቀተለ ፡ ብእሲ ፡ ቢጾ ፡ ቦቱ ፡ ይትቀተል ፤ በከመ ፡ አቍሰሎ ፡ ከማሁ ፡ ይግበሩ ፡ ሎቱ ።

33 ወበ ፡ ፳ወ፭ ፡ ኢዮቤል ፡ ነሥአ ፡ ሎቱ ፡ ኖኅ ፡ ብእሲተ ፡ ወስማ ፡ እምዘራ ፡ ወለተ ፡ ራክኤል ፡ ወለተ ፡ እኅቱ ፡ ሎቱ ፡ ብእሲተ ፡ በቀዳሚ ፡ ዓመት ፡ በሱባዔ ፡ ኃምስ ፡ ወበሣልስ ፡ ዓመቱ ፡ ወለደት ፡ ሎቱ ፡ ሴምሃ ፡ ወበኃምስ ፡ ዓመቱ ፡ ወለደት ፡ ሎቱ ፡ ካምሃ ፡ ወበዓመት ፡ ቀዳሚ ፡ በሱባዔ ፡ ሳድስ ፡ ወለደት ፡ ሎቱ ፡ ያፌትሃ ።