Chapter 3
Chapter 2 / Book of Jubilees / Dillmann's Edition / Chapter 3 Chapter 4

1 ወበሰዱስ ፡ መዋዕል ፡ ዘሰንበት ፡ ካልእት ፡ አምጻእነ ፡ በቃለ ፡ እግዚአብሔር ፡ ኀበ ፡ አዳም ፡ ኵሎ ፡ አራዊተ ፡ ወኵሎ ፡ እንስሳ ፡ ወኵሎ ፡ አዕዋፈ ፡ ወኵሎ ፡ ዘይትሐወስ ፡ ውስተ ፡ ምድር ፡ ወኵሎ ፡ ዘይትሐወስ ፡ ውስተ ፡ ማይ ፡ በበ ፡ ዘመዶሙ ፡ ወበበ ፡ አምሳሎሙ ፤ በቀዳሚት ፡ ዕለት ፡ አራዊተ ፤ ወእንስሳ ፡ በሳኒታ ፡ ዕለት ፤ ወአዕዋፈ ፡ በዕለት ፡ ሣልስት ፤ ወኵሎ ፡ ዘይትሐወስ ፡ ዲበ ፡ ምድር ፡ በዕለት ፡ ራብዕት ፤ ወዘይትሐወስ ፡ ውስተ ፡ ማይ ፡ በዕለት ፡ ኃምስት ።

2 ወሰመዮሙ ፡ አዳም ፡ ለኵሎሙ ፡ በበ ፡ አስማቲሆሙ ፡ ወበከመ ፡ ጸውዖሙ ፡ ከማሁ ፡ ኮነ ፡ ስሞሙ ።

3 ወበኃምስ ፡ እላ ፡ መዋዕል ፡ ሀሎ ፡ አዳም ፡ እንዘ ፡ ይሬኢ ፡ ዘንተ ፡ ኵሎ ፡ ተባዕተ ፡ ወአንስተ ፡ በኵሉ ፡ ዘመድ ፡ ዘበምድር ፡ ወውእቱሰ ፡ ሀሎ ፡ ባሕቲቱ ፡ ወአልቦ ፡ ዘረከበ ፡ ቢጸ ፡ ዘይረድኦ ፡ ዘከማሁ ።

4 ወይቤለነ ፡ እግዚአብሔር ፡ አኮ ፡ ሠናይ ፡ የሀሉ ፡ ብእሲ ፡ ባሕቲቱ ፡ ንግበር ፡ ሎቱ ፡ መርድአ ፡ ዘከማሁ ።

5 ወወደየ ፡ እግዚአብሔር ፡ አምላክነ ፡ ህድመተ ፡ ላዕሌሁ ፡ ወኖመ ፡ ወነሥኣ ፡ ለብእሲት ፡ እማእከለ ፡ አዕጽምቲሁ ፡ ዐጽመ ፡ አሐተ ፡ ወይእቲ ፡ ገቦ ፡ ፍጥረታ ፡ ለብእሲት ፡ እማእከለ ፡ አዕፅምቲሁ ፡ ወሐነጸ ፡ ሥጋ ፡ ህየንቴሃ ፡ ወሐነጸ ፡ ብእሲተ ።

6 ወአንቅሖ ፡ ለአዳም ፡ እምንዋሙ ፡ ወነቂሖ ፡ ተንሥአ ፡ በዕለት ፡ ሳድስት ፡ ወምጽአ ፡ ኀቤሃ ፡ ወአእመራ ። ወይቤላ ፡ ዝንቱ ፡ ይእዜ ፡ ዐጽም ፡ እምዐጽምየ ፡ ወሥጋ ፡ እምሥጋየ ፤ ዛቲ ፡ ትሰመይ ፡ ብእሲትየ ፡ እስመ ፡ እምብእሲሃ ፡ ወፅአት ፡ ወተንሥአት ፡ ይእቲ ።

7 በእንተዝ ፡ ይኩን ፡ ብእሲ ፡ ወብእሲት ፡ አሐደ ፡ ወበእንተዝ ፡ ይኩን ፡ ብእሲ ፡ ዘየኀድግ ፡ አባሁ ፡ ወእሞ ፡ ወይጻመር ፡ ምስለ ፡ ብእሲቱ ፡ ወይከውኑ ፡ ሥጋ ፡ አሐደ ።

8 ወበሳብዕ ፡ ቀዳሚ ፡ ተፈጥረ ፡ አዳም ፡ ወገቦ ፡ ብእሲቱ ፤ ወበሳብዕ ፡ ካልእት ፡ አርአዮ ፡ ሎቱ ፡ ኪያሃ ፡ ወበእንተዝ ፡ ተውህበ ፡ ትእዛዝ ፡ ለዐቂብ ፡ ሰቡዕ ፡ መዋዕለ ፡ ለተባዕት ፡ ወለአንስት ፡ ክልኤ ፡ ሰቡዐ ፡ መዋዕለ ፡ ውስተ ፡ ርኵሶን ።

9 ወእምድኅረ ፡ ተፈጸመ ፡ ለአዳም ፡ ፵ ፡ መዋዕል ፡ በውስተ ፡ ምድር ፡ ኀበ ፡ ተፈጥረ ፡ አባእናሁ ፡ ውስተ ፡ ገነተ ፡ ኤዶም ፡ ከመ ፡ ይትቀነያ ፡ ወይዕቀባ ። ወብእሲቱኒ ፡ አብእዋ ፡ በ፹ ፡ ዕለት ፡ ወእምድኅረ ፡ ዝንቱ ፡ ቦአት ፡ ውስተ ፡ ገነተ ፡ ኤዶም ፡

10 ወበእንተ ፡ ዝንቱ ፡ ተጽሕፈ ፡ ትእዛዝ ፡ ውስተ ፡ ጽላተ ፡ ሰማይ ፡ ለእንተ ፡ ትወልድ ፡ እመ ፡ ተባዕተ ፡ ወለደት ፡ ትንበር ፡ ውስተ ፡ ርኵሳ ፡ ሰቡዐ ፡ መዋዕለ ፡ በከመ ፡ ሰቡዐ ፡ መዋዕል ፡ ቀዳሚ ፡ ወ፴ወ፫ ፡ ዕለተ ፡ ትንበር ፡ ውስተ ፡ ደመ ፡ ንጽሓ ፡ ወኵሎ ፡ ቅዱሰ ፡ ኢትግሥሥ ፡ ወውስተ ፡ መቅደስ ፡ ኢትባእ ፡ እስከ ፡ ትፌጽም ፡ ዘንተ ፡ መዋዕለ ፡ ዘበተባዕት ።

11 ወዘበአንስት ፡ ክልኤ ፡ ሰቡዓተ ፡ መዋዕለ ፡ በከመ ፡ ፪ ፡ ሰቡዓት ፡ ቀዳምያት ፡ በርኵስ ፡ ወ፷ ፡ መዋዕለ ፡ ወሰዱሰ ፡ ዕለተ ፡ ትንበር ፡ በደመ ፡ ንጽሓ ፡ ወይከውና ፡ ኵሎን ፡ ፹ ፡ መዋዕለ ።

12 ወፈጺማ ፡ እላንተ ፡ ፹ ፡ መዋዕለ ፡ አባእናሃ ፡ ውስተ ፡ ገነተ ፡ ኤዶም ፡ እስመ ፡ ቅድስት ፡ ይእቲ ፡ እምኵሉ ፡ ምድር ፡ ወኵሉ ፡ ዕፅ ፡ ዘትኩል ፡ ውስቴታ ፡ ቅዱስ ።

13 በእንተዝ ፡ ተሠርዐ ፡ ለእንተ ፡ ትወልድ ፡ ለተባዕት ፡ ወለአንስት ፡ ዝንቱ ፡ ፍትሖን ፡ ለእላንቱ ፡ መዋዕል ፤ ኵሎ ፡ ቅዱሰ ፡ ኢትልክፍ ፡ ወውስተ ፡ ቤተ ፡ መቅደስ ፡ ኢትባእ ፡ እስከ ፡ አመ ፡ ይትፌጸም ፡ እማንቱ ፡ መዋዕል ፡ ለተባዕት ፡ ወለአንስት ።

14 ዝንቱ ፡ ሕግ ፡ ወስምዕ ፡ ተውህበ ፡ ወተጽሕፈ ፡ ለደቂቀ ፡ እስራኤል ፡ ከመ ፡ ይዕቀቡ ፡ ኵሎ ፡ መዋዕለ ።

15 ወበሱባዔ ፡ ቀዳማዊ ፡ ዘኢዮቤልዩ ፡ ቀዳማዊ ፡ ወሀለዉ ፡ አዳም ፡ ወብእሲቱ ፡ ሰብዐተ ፡ ዓመተ ፡ ውስተ ፡ ገነተ ፡ ኤዶም ፡ እንዘ ፡ ይትቀነዩ ፡ ወየዐቅቡ ፡ ወምግባረ ፡ ወሀብናሁ ፡ ወሀሎነ ፡ እንዘ ፡ ንሜህሮ ፡ ገቢሮተ ፡ ኵሉ ፡ ዘያስተርኢ ፡ ለቅኔ ።

16 ወሀሎ ፡ እንዘ ፡ ይትቀነይ ፡ ወውእቱሰ ፡ ዕራቁ ፡ ወኢያአምር ፡ ወኢየኀፍር ፡ ወየዐቅብ ፡ ገነተ ፡ እምአዕዋፍ ፡ ወእምአራዊት ፡ ወእምእንስሳ ፡ ወያስተጋብእ ፡ ፍሬሁ ፡ ወይበልዕ ፡ ወያነብር ፡ ተረፈ ፡ ሎቱ ፡ ወለብእሲቱ ፡ ወያነብር ፡ ዘይትዐቀብ ።

17 ወኀሊቆ ፡ ፍጻሜሁ ፡ ለ፯ ፡ ዓመት ፡ እለ ፡ ፈጸመ ፡ በህየ ፡ ፯ ፡ ዓመተ ፡ ጥንቁቀ ፡ ወበካልእ ፡ ወርኅ ፡ አመ ፡ ዐሡሩ ፡ ወሰቡዑ ፡ መጽአ ፡ አርዌ ፡ ምድር ፡ ወቀርበ ፡ ኀበ ፡ ብእሲት ፡ ወይቤላ ፡ አርዌ ፡ ምድር ፡ ለብእሲት ፡ እምኵሉ ፡ ፍሬ ፡ ዕፀው ፡ ዘውስተ ፡ ገነት ፡ አዘዘክሙ ፡ እግዚአብሔር ፡ ኢትብልዑ ፡ እምኔሁ ።

18 ወትቤሎ ፡ እምኵሉ ፡ ፍሬ ፡ ዕፅ ፡ ዘውስተ ፡ ገነት ፡ ይቤለነ ፡ ብልዑ ፡ ወእምነ ፡ ፍሬ ፡ ዕፅ ፡ ዘማእከለ ፡ ገነት ፡ ኢትብልዑ ፡ እምኔሁ ፡ ወኢትልክፍዎ ፡ ከመ ፡ ኢትሙቱ ።            

19 ወይቤላ ፡ አርዌ ፡ ምድር ፡ ለብእሲት ፡ አኮ ፡ ሞተ ፡ ዘትመውቱ ፡ አላ ፡ እስመ ፡ ያአምር ፡ እግዚአብሔር ፡ አመ ፡ ዕለተ ፡ ትበልዑ ፡ እምኔሁ ፡ ይትረኀው ፡ አዕይንቲክሙ ፡ ወትከውኑ ፡ ከመ ፡ አማልክት ፡ ወታአምሩ ፡ ሠናየ ፡ ወእኩየ ።

20 ወርእየት ፡ ብእሲት ፡ ዕፀ ፡ ከመ ፡ አዳም ፡ ወያሠምር ፡ ለዐይን ፡ ወሠናይ ፡ ፍሬሁ ፡ ለበሊዕ ፡ ነሥአት ፡ እምኔሁ ፡ ወበልዐት ።

21 ወከደነት ፡ ኀፍረታ ፡ በቈጽለ ፡ በለስ ፡ ዘቀዳሚ ፡ ወወሀበቶ ፡ ለአዳም ፡ ወበልዐ ፡ ወተርኅወ ፡ አዕይንቲሁ ፡ ወርእየ ፡ ከመ ፡ ዕራቁ ፡ ውእቱ ።

22 ወነሥአ ፡ ቈጽለ ፡ በለስ ፡ ወጠቀበ ፡ ወገብረ ፡ ሎቱ ፡ ሞራአ ፡ ወከደነ ፡ ኀፍረቶ ።

23 ወረገሞ ፡ እግዚአብሔር ፡ ለአርዌ ፡ ምድር ፡ ወተምዖ ፡ ለዓለም ። ወለብእሲትኒ ፡ ተምዓ ፡ እስመ ፡ ሰምዐት ፡ ቃለ ፡ አርዌ ፡ ምድር ፡ ወይቤላ ፡

24 አብዝኆ ፡ ኣበዝኅ ፡ ለኀዘንኪ ፡ ወለፃዕርኪ ፤ በሐዘንኪ ፡ ለዲ ፡ ውሉደ ፡ ወኀበ ፡ ምትኪ ፡ ምግባኢኪ ፡ ወውእቱ ፡ ይኰንንኪ ።        

25 ወለአዳምሂ ፡ ይቤሎ ፡ እስመ ፡ ሰማዕከ ፡ ቃለ ፡ ብእሲትከ ፡ ወበላዕከ ፡ እምውስተ ፡ ውእቱ ፡ ዕፅ ፡ ዘአዘዝኩከ ፡ ከመ ፡ ኢትብላዕ ፡ እምኔሁ ፡ ርግምተ ፡ ትኩን ፡ ምድር ፡ በተግባርከ ፡ አስዋክ ፡ ወአሜከላ ፡ ይብቍልከ ፡ ወብላዕ ፡ ኅብስተከ ፡ በሐፈ ፡ ገጽከ ፡ እስከ ፡ አመ ፡ ትገብእ ፡ ውስተ ፡ ምድር ፡ እንተ ፡ እምኔሃ ፡ ተንሣእከ ፡ እስመ ፡ ምድር ፡ አንተ ፡ ወውስተ ፡ ምድር ፡ ትገብእ ።

26 ወገብረ ፡ ሎሙ ፡ አልባሰ ፡ ዘማዕስ ፡ ወአልበሶሙ ፡ ወፈነዎሙ ፡ እምገነተ ፡ ኤዶም ።

27 ወበይእቲ ፡ ዕለት ፡ እንተ ፡ ወፅእ ፡ እምገነተ ፡ ኤዶም ፡ ዐጠነ ፡ ለመዐዛ ፡ ሠናይ ፡ ዕጣነ ፡ ስኂነ ፡ ወቀንዓተ ፡ ወማየ ፡ ልብን ፡ ወሰንበልተ ፡ በጽባሕ ፡ ምስለ ፡ ትንሣኤ ፡ ፀሐይ ፡ እምዕለተ ፡ ከደነ ፡ ኃፍረቶ ።

28 ወበይእቲ ፡ ዕለት ፡ ተፈጽመ ፡ አፈ ፡ ኵሉ ፡ አራዊት ፡ ወዘእንስሳ ፡ ወዘአዕዋፍ ፡ ወዘያንሶሱ ፡ ወዘይትሐወስ ፡ እምነቢብ ፡ እስመ ፡ ኵሎሙ ፡ ይትናገሩ ፡ ዝንቱ ፡ ምስለ ፡ ዝንቱ ፡ ከንፈረ ፡ ፩ ፡ ወልሳነ ፡ ፩ ።

29 ወፈነወ ፡ እምገነተ ፡ ኤዶም ፡ ኵሎ ፡ ዘሥጋ ፡ ዘሀሎ ፡ ውስተ ፡ ገነተ ፡ ኤዶም ፡ ወተዘርወ ፡ ኵሉ ፡ ዘሥጋ ፡ በበ ፡ ዘመዶሙ ፡ ወበበ ፡ ፍጥረቶሙ ፡ ውስተ ፡ መካን ፡ ዘተፈጥረ ፡ ሎሙ ።

30 ወለአዳም ፡ ባሕቲቱ ፡ ወሀቦ ፡ ይክድን ፡ ኀፍረቶ ፡ እምኵሉ ፡ አራዊት ፡ ወእንስሳ ።

31 በእንተ ፡ ዝንቱ ፡ ተአዘዘ ፡ ውስተ ፡ ጽላተ ፡ ሰማይ ፡ ላዕለ ፡ ኵሎሙ ፡ እለ ፡ ያአምሩ ፡ ፍትሐ ፡ ሕግ ፡ ይክድኑ ፡ ኀፍረቶሙ ፡ ወኢይትከሠቱ ፡ ከመ ፡ አሕዛብ ፡ ይትከሠቱ ።

32 ወአመ ፡ ሠርቀ ፡ ወርኅ ፡ ራብዕ ፡ ወፅኡ ፡ አዳም ፡ ወብእሲቱ ፡ እምገነተ ፡ ኤዶም ፡ ወኀደሩ ፡ ውስተ ፡ ምድረ ፡ ኤልዳ ፡ ውስተ ፡ ምድረ ፡ ፍጥረቶሙ ።

33 ወሰመየ ፡ አዳም ፡ ስመ ፡ ብእሲቱ ፡ ሔዋን ።

34 ወኢኮኑ ፡ ምስለ ፡ ወልድ ፡ እስከ ፡ ቀዳሚ ፡ ኢዮቤልዩ ፡ ወእምድኅረ ፡ ዝንቱ ፡ አእመራ ።

35 ወውእቱሰ ፡ ይትጌበራ ፡ ለምድር ፡ በከመ ፡ ተምህረ ፡ በገነተ ፡ ኤዶም ።