Chapter 2
Chapter 1 / Book of Jubilees / Dillmann's Edition / Chapter 2 Chapter 3

1 ወይቤ ፡ መልአከ ፡ ገጽ ፡ ለሙሴ ፡ በቃለ ፡ እግዚአብሔር ፡ እንዘ ፡ ይብል ፡ ጸሐፍ ፡ ኵሎ ፡ ነገረ ፡ ፍጥረት ፡ ከመ ፡ በሰዱስ ፡ ዕለት ፡ ፈጸመ ፡ እግዚአብሔር ፡ አምላክ ፡ ኵሎ ፡ ግብሮ ፡ ዘፈጠረ ፡ ወአሰንበተ ፡ በዕለት ፡ ሳብዕት ፡ ወቀደሳ ፡ ለኵሉ ፡ ዓለማት ፡ ወአንበራ ፡ ትእምርተ ፡ ለኵሉ ፡ ግብሩ ።

2 እስመ ፡ በዕለት ፡ ቀዳሚት ፡ ፈጠረ ፡ ሰማያተ ፡ እለ ፡ መልዕልት ፡ ወምድረ ፡ ወማያተ ፡ ወኵሎ ፡ መንፈሰ ፡ ዘይትለአክ ፡ ቅድሜሁ ፡ ወመላእክተ ፡ ገጽኒ ፡ ወመላእክተ ፡ ቅዳሴ ፡ ወመላእክተ ፡ መንፈሰ ፡ እሳት ፡ ወመላእክተ ፡ መንፈሰ ፡ እስትንፋስ ፡ ወመላእክተ ፡ መንፈሰ ፡ ደመናት ፡ ለጽልመት ፡ ወለበረድ ፡ ወለአስሐትያ ፡ ወመላእክተ ፡ ቀላያት ፡ ወነጐድጓዳት ፡ ወመባርቅት ፡ ወመላእክተ ፡ መናፍስት ፡ ለቍር ፡ ወለመርቄ ፡ ወለክረምት ፡ ወለመጸው ፡ ወለማእረር ፡ ወለሐጋይ ፡ ወለኵሉ ፡ መናፍስተ ፡ ምስትጉባእ ፡ ዘበሰማያት ፡ ወዘበምድር ፡ ወዘበኵሉ ፡ ቀላያት ፡ ወጽልመት ፡ ወብርሃን ፡ ወጎህ ፡ ወምሴት ፡ ዘአስተዳለወ ፡ በአእምሮ ፡ ልቡ ።

3 ወአሜሃ ፡ ርኢነ ፡ ምግባሮ ፡ ወባረክናሁ ፡ ወሰባሕናሁ ፡ ቅድሜሁ ፡ በእንተ ፡ ኵሉ ፡ ምግባሩ ፡ እስመ ፡ ሰብዐተ ፡ ግብረ ፡ ዐበይተ ፡ ገብረ ፡ በቀዳሚት ፡ ዕለት ።

4 ወበዕለት ፡ ሳኒታ ፡ ገብረ ፡ ምጽንዓተ ፡ ማእከለ ፡ ማይ ፡ ወተከፍሉ ፡ ማያት ፡ በይእቲ ፡ ዕለት ፤ መንፈቆሙ ፡ ዐርጉ ፡ ላዕለ ፡ ወመንፈቆሙ ፡ ወረዱ ፡ መትሕተ ፡ ምጽንዓት ፡ ዲበ ፡ ገጻ ፡ ለምድር ፤ ወዝንቱ ፡ ባሕቲቱ ፡ ግብረ ፡ ተገብረ ፡ በሳኒታ ፡ ዕለት ።

5 ወበሣልስት ፡ ዕለት ፡ ገብረ ፡ በከመ ፡ ይቤ ፡ ለማያት ፡ ይኅልፉ ፡ እምቅድመ ፡ ገጻ ፡ ለኵላ ፡ ምድር ፡ ኀበ ፡ ፩ ፡ መካን ፡ ወያስተርኢ ፡ የብስ ።

6 ወገብረ ፡ ከማሁ ፡ ማያተ ፡ በከመ ፡ ይቤሎሙ ፡ ወተግኅሡ ፡ እምዲበ ፡ ገጻ ፡ ለምድር ፡ ውስተ ፡ መካን ፡ ፩ ፡ አፍአ ፡ እምጽንዓት ፡ ዝ ፡ ወአስተርአየ ፡ የብስ ።

7 ወበይእቲ ፡ ዕለት ፡ ፈጠረ ፡ ላቲ ፡ ልጐታተ ፡ ዘአብህርት ፡ በበ ፡ ምጉባኣቲሆሙ ፡ ወኵሎ ፡ አፍላገ ፡ ወምጉባኣቲሆሙ ፡ ለማያት ፡ ውስተ ፡ አድባር ፡ ወውስተ ፡ ኵሉ ፡ ምድር ፡ ወኵሎ ፡ ምዕቃላተ ፡ ወኵሎ ፡ ጠለ ፡ ምድር ፡ ወዘርእ ፡ ዘይዘራእ ፡ በበዘርኡ ፡ ወኵሎ ፡ ዘይትበላዕ ፡ ወዕፀወ ፡ እለ ፡ ይፈርዩ ፡ ወኦማተ ፡ ወገነተ ፡ ኤዶም ፡ ለተድላ ፡ ወለኵሉ ፡ ፬ ፡ ዘንተ ፡ ዐበይተ ፡ ትውልደ ፡ ገብረ ፡ በዕለት ፡ ሣልስት ።

8 ወበዕለት ፡ ራብዕት ፡ ገብረ ፡ እግዚአብሔር ፡ ፀሐየ ፡ ወወርኀ ፡ ወከዋክብተ ፡ ወአንበሮሙ ፡ ውስተ ፡ ምጽንዓተ ፡ ሰማይ ፡ ከመ ፡ ያብርሁ ፡ ዲበ ፡ ምድር ፡ ወለኰንኖ ፡ መዓልት ፡ ወሌሊት ፡ ወለፈሊጥ ፡ ማዕከለ ፡ ሌሊት ፡ ወመዓልት ፡ ወማእከለ ፡ ጽልመት ፡ ወብርሃን ።

9 ወወሀበ ፡ እግዚአብሔር ፡ ፀሐየ ፡ ለትእምርት ፡ ዐቢይ ፡ ዲበ ፡ ምድር ፡ ለመዋዕል ፡ ወለሰንበታት ፡ ወለአውራኅ ፡ ወለበዓላት ፡ ወለዓመታት ፡ ወለሰንበታተ ፡ ወለኢዮቤልዮታት ፡ ወለኵሉ ፡ ጊዜያት ፡ ለዓመታት ።

10 ወይፈልጥ ፡ ማእከለ ፡ ብርሃን ፡ ወማእከለ ፡ ጽልመት ፡ ወለጥዕዮ ፡ ከመ ፡ ይጥዐይ ፡ ኵሉ ፡ ዘይሠርፅ ፡ ወይልህቅ ፡ ዲበ ፡ ምድር ፤ ፫ ፡ ዘንተ ፡ ዘመደ ፡ ገብረ ፡ በዕለት ፡ ራብዕት ።

11 ወበዕለት ፡ ኃምስት ፡ ፈጠረ ፡ አናብርተ ፡ ዐበይተ ፡ ማእከለ ፡ ቀላያተ ፡ ማያት ፡ እስመ ፡ ዝንቱ ፡ ተገብረ ፡ ቀዳሚ ፡ በእደዊሁ ፡ ዘሥጋ ፡ ወኵሉ ፡ ዘይትሐወስ ፡ ውስተ ፡ ማያት ፡ ወዓሣት ፡ ወኵሉ ፡ ዘይሰርር ፡ አዕዋፍ ፡ ወኵሉ ፡ ዘመዶሙ ።

12 ወሠረቀ ፡ ፀሐይ ፡ ላዕሌሆሙ ፡ ለጥዒና ፡ ወላዕለ ፡ ኵሉ ፡ ዘሀሎ ፡ ውስተ ፡ ምድር ፡ ኵሉ ፡ ዘይሠርፅ ፡ እምድር ፡ ወኵሉ ፡ ዕፀው ፡ ዘይፈሪ ፡ ወኵሉ ፡ ዘሥጋ ፤ ዘንተ ፡ ዘመደ ፡ ፫ ፡ ገብረ ፡ እምዕለት ፡ ኃምስት ።

13 ወበዕለት ፡ ሳድስት ፡ ገብረ ፡ ኵሎ ፡ አራዊተ ፡ ምድር ፡ ወኵሎ ፡ እንስሳ ፡ ወኵሎ ፡ ዘይትሐወስ ፡ ዲበ ፡ ምድር ።

14 ወእምድኅረዝ ፡ ኵሉ ፡ ገብረ ፡ ሰብአ ፡ አሐደ ፡ ብእሴ ፡ ወብእሲተ ፡ ገብሮሙ ፡ ወአሠልጠኖ ፡ ላዕለ ፡ ኵሉ ፡ ዘዲበ ፡ ምድር ፡ ወዘውስተ ፡ አብሕርት ፡ ወዲበ ፡ ዘይሰርር ፡ ወዲበ ፡ ኵሉ ፡ አራዊት ፡ እንስሳ ፡ ወዲበ ፡ ኵሉ ፡ ዘይትሐወስ ፡ ዲበ ፡ ምድር ፡ ወላዕለ ፡ ኵሉ ፡ ምድር ፡ ወዲበዝ ፡ ኵሉ ፡ አሠልጠኖ ፡ ወ ፡ ፬ ፡ ዘንተ ፡ ዘመደ ፡ ገብረ ፡ በዕለት ፡ ሳድስት ።

15 ወኮነ ፡ ኵሉ ፡ ፳ወ፪ ፡ ዘመደ ።

16 ወፈጸመ ፡ ኵሎ ፡ ግብሮ ፡ በዕለት ፡ ሳድስት ፡ ኵሎ ፡ ዘበሰማያት ፡ ወዘበምድር ፡ ወውስተ ፡ አብህርት ፡ ወውስተ ፡ ቀላያት ፡ ውስተ ፡ ብርሃን ፡ ወውስተ ፡ ጽልመት ፡ ወውስተ ፡ ኵሉ ።

17 ወወሀበነ ፡ እግዚአብሔር ፡ ትእምርተ ፡ ዐቢየ ፡ ዕለተ ፡ ሰንበታት ፡ ከመ ፡ ንኩን ፡ እንዘ ፡ ንገብር ፡ ሰዱሰ ፡ ዕለተ ፡ ግብረ ፡ ወናሰንብት ፡ አመ ፡ ዕለት ፡ ሳብዕት ፡ እምኵሉ ፡ ግብር ።

18 ኵሎ ፡ መላእክተ ፡ ገጽ ፡ ወኵሎሙ ፡ መላእክተ ፡ ቅዳሴ ፡ ክልኤተ ፡ ዘንተ ፡ ዘመደ ፡ ዐበይተ ፡ ይቤለነ ፡ ናሰንብት ፡ ምስሌሁ ፡ በሰማይ ፡ ወበምድር ።

19 ወይቤለነ ፡ ናሁ ፡ አነ ፡ እፈልጥ ፡ ሊተ ፡ ሕዝበ ፡ እማኵሉ ፡ አሕዛብ ፡ ወያሰነብቱ ፡ እሙንቱኒ ፡ ወእቄድሶሙ ፡ ሊተ ፡ ለሕዝብ ፡ ወእባርኮ ፡ በከመ ፡ ቀደስክዋ ፡ ለዕለተ ፡ ሰንበታት ፡ ወቀደስክዎን ፡ ሊተ ፡ ወከመዝ ፡ እባርኮሙ ፡ ወይከውኑኒ ፡ ሕዝብየ ፡ ወአነሂ ፡ እከውኖሙ ፡ አምላከ ።

20 ወኀረይኩ ፡ ዘርአ ፡ ያዕቆብ ፡ በኵሉ ፡ እምዘርኢኩ ፡ ወጸሐፍክዎ ፡ ሊተ ፡ ወልደ ፡ በኵረ ፡ ወቀደስክዎ ፡ ሊተ ፡ ለዓለመ ፡ ዓለማት ፡ ወዕለተ ፡ ሰንበታት ፡ እኤምሮሙ ፡ ከመ ፡ ያሰንብቱ ፡ ባቲ ፡ እምኵሉ ፡ ግብር ።

21 ወገብረ ፡ ቦቱ ፡ ትእምርተ ፡ ከማሁ ፡ በዘያሰነብቱ ፡ እሙንቱኒ ፡ ምስሌነ ፡ በዕለት ፡ ሳብዕት ፡ ለበሊዕ ፡ ወለሰትይ ፡ ወለባርኮ ፡ ዘፈጠረ ፡ ኵሎ ፡ በከመ ፡ ባረኮ ፡ ወቀደሰ ፡ ሎቱ ፡ ሕዝበ ፡ ዘያስተርኢ ፡ እምኵሉ ፡ አሕዛብ ፡ ወከመ ፡ ያሰንብቱ ፡ ኅቡረ ፡ ምስሌነ ።

22 ወገብረ ፡ በቅድሜሁ ፡ ፈቃዳቲሁ ፡ ይዕርግ ፡ መዓዛ ፡ ሠናይ ፡ ዘይትዌከፍ ፡ ቅድሜሁ ፡ ኵሎ ፡ መዋዕለ ፤

23 ፳ወ፪ ፡ አርእስተ ፡ ሰብእ ፡ እምአዳም ፡ እስከ ፡ ያዕቆብ ፡ ወ፳ወ፪ ፡ ዘመደ ፡ ግብር ፡ ተገብረ ፡ እስከ ፡ ዕለት ፡ ሳብዕት ፤ ዝንቱ ፡ ቡሩክ ፡ ወቅዱስ ፡ ወውእቱኒ ፡ ቡሩክ ፡ ወቅዱስ ፡ ወዝንቱ ፡ ምስለ ፡ ዝንቱ ፡ ኮነ ፡ ለቅዳሴ ፡ ወለበረከት ።

24 ወተውህበ ፡ ለዝንቱ ፡ ከመ ፡ ይኩኑ ፡ ኵሎ ፡ መዋዕለ ፡ ቡሩካነ ፡ ወቅዱሳነ ፡ ዘስምዕ ፡ ወዘሕግ ፡ ቀዳሚ ፡ በከመ ፡ ቀደሳ ፡ ወባረካ ፡ ለዕለተ ፡ ሰንበት ፡ በዕለት ፡ ሳብዕት ፤

25 ፈጠረ ፡ ሰማየ ፡ ወምድረ ፡ ወኵሎ ፡ ዘፈጠረ ፡ በሰዱስ ፡ ዕለት ፡ ወወሀበ ፡ እግዚአብሔር ፡ ዕለተ ፡ በዓል ፡ ቅዱስ ፡ ለኵሉ ፡ ምግባሩ ፤ በእንተዝ ፡ አዘዘ ፡ በእንቲአሃ ፡ ኵሉ ፡ ዘይገብር ፡ ባቲ ፡ ኵሎ ፡ ግብረ ፡ ይሙት ፡ ወዘኒ ፡ አረኰሳ ፡ ሞተ ፡ ለይሙት ።

26 ወአንተ ፡ አዝዝ ፡ ለደቂቀ ፡ እስራኤል ፡ ወይዕቀቡ ፡ ዛተ ፡ ዕለተ ፡ ከመ ፡ ይቀድስዋ ፡ ወከመ ፡ ኢይግበሩ ፡ ባቲ ፡ ኵሎ ፡ ግብረ ፡ ወከመ ፡ ኢያርኵስዋ ፡ እስመ ፡ ቅድስት ፡ ይእቲ ፡ እምኵሉ ፡ መዋዕል ።

27 ኵሉ ፡ ዘያጌምና ፡ ለዛቲ ፡ ዕለት ፡ ሞተ ፡ ለይሙት ፡ ወኵሉ ፡ ዘይገብር ፡ ባቲ ፡ ኵሎ ፡ ግብረ ፡ ሞተ ፡ ለይሙት ፡ ለዓለም ፡ ከመ ፡ ይዕቀቡ ፡ ደቂቀ ፡ እስራኤል ፡ ዛተ ፡ ዕለተ ፡ በትውልዶሙ ፡ ወኢይሠረዉ ፡ እምድር ፡ እስመ ፡ ዕለት ፡ ቅድስት ፡ ይእቲ ፡ ወዕለት ፡ ቡርክት ፡ ይእቲ ፡

28 ወኵሉ ፡ ሰብእ ፡ ዘየዐቅባ ፡ ወያሰነብት ፡ ባቲ ፡ እምኵሉ ፡ ግብሩ ፡ ቅዱሰ ፡ ወቡሩከ ፡ ይከውን ፡ በኵሉ ፡ መዋዕል ፡ ከማነ ።

29 አይድዕ ፡ ወንግር ፡ ለደቂቀ ፡ እስራኤል ፡ ኵነኔሃ ፡ ለዛቲ ፡ ዕለት ፡ ወያሰንብቱ ፡ ባቲ ፡ ወኢይኅድግዋ ፡ በስሕተተ ፡ ልቦሙ ፡ ወከመ ፡ ኢይኩኑ ፡ ለገቢረ ፡ ግብር ፡ ባቲ ፡ ዘኢይከውን ፡ ወከመ ፡ ኢያስተዳልዉ ፡ ባቲ ፡ ኵሎ ፡ ዘይትበላዕ ፡ ወዘይሰተይ ፡ ወለቀዲሐ ፡ ማይ ፡ ወለአብኦ ፡ ወለአውፅኦ ፡ ባቲ ፡ ኵሎ ፡ ዘይጸውር ፡ በአናቅጺሆሙ ፡ ዘኢያስተዳለውዎ ፡ ሎሙ ፡ እሙንቱ ፡ በሳድስት ፡ ዕለት ፡ ግብረ ፡ ውስተ ፡ ማኅደሪሆሙ ።

30 ወኢያብኡ ፡ ወኢያውፅኡ ፡ እምቤት ፡ ቤተ ፡ በዛቲ ፡ ዕለት ፡ እስመ ፡ ቅድስት ፡ ይእቲ ፡ ወቡርክት ፡ ይእቲ ፡ እምኵሉ ፡ ዕለተ ፡ ኢዮቤልዩያት ፤ በዛቲ ፡ አሰንበትነ ፡ በሰማያት ፡ እንበለ ፡ ይትአመር ፡ ለኵሉ ፡ ዘሥጋ ፡ ለአሰንብቶ ፡ ባቲ ፡ በዲበ ፡ ምድር ፡

31 ወባረከ ፡ ፈጣሬ ፡ ኵሉ ፡ ወኢቀደሰ ፡ ኵሎ ፡ ሕዝበ ፡ ወአሕዛበ ፡ ለአሰንብቶ ፡ ባቲ ፡ ዘእንበለ ፡ እስራኤል ፡ ባሕቲቶ ፤ ሎቱ ፡ ለባሕቲቱ ፡ ወሀቦ ፡ ከመ ፡ ይብላዕ ፡ ወይስተይ ፡ ወለአሰንብቶ ፡ ባቲ ፡ ዲበ ፡ ምድር ።

32 ወባረካ ፡ ፈጣሬ ፡ ኵሉ ፡ ዘፈጠረ ፡ ዛተ ፡ ዕለተ ፡ ለበረከት ፡ ወለቅድሳት ፡ ወለስብሐት ፡ እምኵሉ ፡ መዋዕል ።

33 ዝንቱ ፡ ሕግ ፡ ወስምዕ ፡ ተውህበ ፡ ለደቂቀ ፡ እስራኤል ፡ ሕገ ፡ ዘለዓለም ፡ ለትውልዶሙ ።