Chapter 1
/ Book of Jubilees / Dillmann's Edition / Chapter 1 Chapter 2

መጽሐፈ ፡ ኩፋሌ ።

 

ዝንቱ ፡ ነገረ ፡ ኩፋሌ ፡ መዋዕላት ፡ ለሕግ ፡ ወለስምዕ ፡ ለግብረ ፡ ዓመታት ፡ ለተሰብዖቶሙ ፡ ለኢዮቤላቲሆሙ ፡ ውስተ ፡ ኵሉ ፡ ዓመታተ ፡ ዓለም ፡ በከመ ፡ ተናገሮ ፡ እግዚአብሔር ፡ በደብረ ፡ ሲና ፡ ለሙሴ ፡ አመ ፡ ዐርገ ፡ ይንሣእ ፡ ጽላተ ፡ እብን ፡ ዘሕግ ፡ ወዘትእዛዝ ፡ በቃለ ፡ እግዚአብሔር ፡ በከመ ፡ ይቤሎ ፡ ዕርግ ፡ ውስተ ፡ ርእሰ ፡ ደብር ።

 

1 ወኮነ ፡ በቀዳሚ ፡ ዓመት ፡ በፀአቶሙ ፡ ለደቂቀ ፡ እስራኤል ፡ እምግብጽ ፡ በወርኅ ፡ ሣልስ ፡ አመ ፡ ዐሡሩ ፡ ወሰዱሱ ፡ ለውእቱ ፡ ወርኅ ። ተናገሮ ፡ እግዚአብሔር ፡ ለሙሴ ፡ እንዘ ፡ ይብል ፡ ዕርግ ፡ ኀቤየ ፡ ዝየ ፡ ውስተ ፡ ደብር ፡ ወአሀብከ ፡ ክልኤ ፡ ጽላተ ፡ እብን ፡ ዘሕግ ፡ ወዘትእዛዝ ፡ ዘመጠነ ፡ ጸሐፍኩ ፡ ታለብዎሙ ።

2 ወዐርገ ፡ ሙሴ ፡ ውስተ ፡ ደብረ ፡ እግዚአብሔር ፡ ወኀደረ ፡ ስብሐተ ፡ እግዚአብሔር ፡ ውስተ ፡ ደብረ ፡ ሲና ፡ ወጸለሎ ፡ ደመና ፡ ሰዱሰ ፡ ዕለተ ።

3 ወጸውዖ ፡ እግዚአብሔር ፡ ለሙሴ ፡ በዕለት ፡ ሳብዕት ፡ በማእከለ ፡ ደመና ፡ ወርእየ ፡ ስብሐተ ፡ እግዚአብሔር ፡ ከመ ፡ እሳት ፡ ዘይነድድ ፡ ውስተ ፡ ርእሰ ፡ ደብር ።

4 ወሀሎ ፡ ህየ ፡ ሙሴ ፡ ውስተ ፡ ደብር ፡ አርብዓ ፡ ዕለተ ፡ ወአርብዓ ፡ ሌሊተ ፡ ወአመሮ ፡ እግዚአብሔር ፡ ዘቀዳሚ ፡ ወዘኒ ፡ ይመጽእ ፡ ነገረ ፡ ኩፋሌ ፡ መዋዕላት ፡ ወበሕግ ፡ ወለስምዕ ።

5 ወይቤሎ ፡ አንብር ፡ ልበከ ፡ ውስተ ፡ ኵሉ ፡ ነገር ፡ ዘአነ ፡ እነግረከ ፡ በዝንቱ ፡ ደብር ፡ ወጸሐፎ ፡ ውስተ ፡ መጽሐፍ ፡ ከመ ፡ ይርአዩ ፡ ትውልዶሙ ፡ ከመ ፡ ኀደግዎሙ ፡ በእንተ ፡ ኵሉ ፡ እኩይ ፡ ዘገብሩ ፡ ለአስሕቶ ፡ ወለአኅድጎ ፡ ሥርዐት ፡ ዘአነ ፡ እሠርዕ ፡ ማእከሌየ ፡ ወማእከሌከ ፡ ዮም ፡ ለትውልዶሙ ፡ በደብረ ፡ ሲና ።

6 ወይከውን ፡ ወይዜኑ ፡ ከመዝ ፡ አመ ፡ ይመጽእ ፡ ኵሉ ፡ መቅሥፍት ፡ ዝነገር ፡ ላዕሌሆሙ ፡ ወያአምሩ ፡ ከመ ፡ ጻድቅ ፡ አነ ፡ እምኔሆሙ ፡ በኵሉ ፡ ፍትሖሙ ፡ ወበኵሉ ፡ ምክሮሙ ፡ ወያአምሩ ፡ ከመ ፡ ህልወ ፡ ኮንኩ ፡ ምስሌሆሙ ።

7 ወአንተኒ ፡ ጸሐፍ ፡ ለከ ፡ ኵሎ ፡ ዘቃለ ፡ ዘአነ ፡ ኣየድዐከ ፡ ዮም ፡ እስመ ፡ ኣአምር ፡ ምረቶሙ ፡ ወክሳዶሙ ፡ ይቡሰ ፡ ዘእንበለ ፡ ኣብኦሙ ፡ ውስተ ፡ ምድር ፡ እንተ ፡ መሐልኩ ፡ ለአበዊሆሙ ፡ ለአብርሃም ፡ ወለይስሐቅ ፡ ወለያዕቆብ ፡ እንዘ ፡ እብል ፡ ለዘርእክሙ ፡ እሁብ ፡ ዛተ ፡ ምድረ ፡ እንተ ፡ ትውሕዝ ፡ ሐሊበ ፡ ወመዓረ ፡ ወይበልዑ ፡ ወይጸግቡ ።

8 ወይትመየጡ ፡ ኀበ ፡ አማልክተ ፡ ነኪር ፡ እለ ፡ ኢያድኅንዎሙ ፡ እምኵሉ ፡ ምንዳቤሆሙ ፡ ወትሰማዕ ፡ ላዕሌሆሙ ፡ ዛቲ ፡ ስምዕ ፡ ለስምዕ ።

9 እስመ ፡ ይረስዑ ፡ ኵሎ ፡ ትእዛዝየ ፡ ዘአነ ፡ እኤዝዞሙ ፡ ወየሐውሩ ፡ ድኅረ ፡ አሕዛብ ፡ ወድኅረ ፡ ርኵሶሙ ፡ ወድኅረ ፡ ኀሣሮሙ ፡ ወይትቀነዩ ፡ ለአማልክቲሆሙ ፡ ወይከውንዎሙ ፡ ማዕቅፈ ፡ ለምንዳቤ ፡ ወለፃዕር ፡ ወለመሥገርት ።

10 ወይትሐጐሉ ፡ ብዙኃን ፡ ወይትአኀዙ ፡ ወይወድቁ ፡ ውስተ ፡ እደ ፡ ፀር ፡ እስመ ፡ ኀደጉ ፡ ሥርዐትየ ፡ ወትእዛዝየ ፡ ወበዓላተ ፡ ኪዳንየ ፡ ወሰንበታትየ ፡ ወቅድሳትየ ፡ ዘቀደስኩ ፡ ሊተ ፡ በማእከሎሙ ፡ ወደብተራየ ፡ ወመቅደስየ ፡ ዘቀደስኩ ፡ ሊተ ፡ በማእከለ ፡ ምድር ፡ ከመ ፡ እሢም ፡ ስምየ ፡ ላዕሌሁ ፡ ወይኅድር ።

11 ወይገብሩ ፡ ሎሙ ፡ ፍስሐታተ ፡ ወኦመ ፡ ወግልፎ ፡ ወይሰግዱ ፡ ዘዘ ፡ ዚአሆሙ ፡ ለስሒት ፡ ወይዘብሑ ፡ ውሉዶሙ ፡ ለአጋንንት ፡ ወለኵሉ ፡ ግብረ ፡ ስሕተተ ፡ ልቦሙ ።

12 ወእፌኑ ፡ ኀቤሆሙ ፡ ሰማዕተ ፡ ከመ ፡ ኣስምዕ ፡ ላዕሌሆሙ ፡ ወኢይሰምዑ ፡ ወሰማዕተኒ ፡ ይቀትሉ ፡ ወለእለኒ ፡ የኀሥሡ ፡ ሕገ ፡ ይሰድድዎሙ ፡ ወኵሎ ፡ ያጸርዑ ፡ ወይዌጥኑ ፡ ለገቢረ ፡ እኩይ ፡ በቅድመ ፡ አዕይንትየ ፡

13 ወአኀብእ ፡ ገጽየ ፡ እምኔሆሙ ፡ ወእሜጥዎሙ ፡ ውስተ ፡ አሕዛብ ፡ ለፂዋዌ ፡ ወለኅብል ፡ ወለተበልዖ ፡ ወኣሴስሎሙ ፡ እማእከለ ፡ ምድር ፡ ወእዘርዎሙ ፡ ማእከለ ፡ አሕዛብ ።

14 ወይረስዑ ፡ ኵሎ ፡ ሕግየ ፡ ወኵሎ ፡ ትእዛዝየ ፡ ወኵሎ ፡ ፍትሕየ ፡ ወይስሕቱ ፡ ሠርቀ ፡ ወሰንበተ ፡ ወበዓለ ፡ ወኢዮቤለ ፡ ወሥርዐተ ።

15 ወእምዝ ፡ ይትመየጡ ፡ ኀቤየ ፡ እማእከለ ፡ አሕዛብ ፡ በኵሉ ፡ ልቦሙ ፡ ወበኵሉ ፡ ነፍሶሙ ፡ ወበኵሉ ፡ ኀይሎሙ ፡ ወኣስተጋብኦሙ ፡ እማእከለ ፡ ኵሉ ፡ አሕዛብ ፡ ወየኀሥሡኒ ፡ ከመ ፡ እትራከቦሙ ፡ ሶበ ፡ ኀሠሡኒ ፡ በኵሉ ፡ ልቦሙ ፡ ወበኵሉ ፡ ነፍሶሙ ፡ ወእከሥት ፡ ሎሙ ፡ ብዙኀ ፡ ሰላመ ፡ በጽድቅ ።

16 ወኣፈልሶሙ ፡ ተክለ ፡ ርትዕ ፡ በኵሉ ፡ ልብየ ፡ ወበኵሉ ፡ ነፍስየ ፡ ወይከውኑኒ ፡ ለበረከት ፡ ወአኮ ፡ ለመርገም ፡ ርእሰ ፡ ወአኮ ፡ ዘነበ ።

17 ወአሐንጽ ፡ መቅደስየ ፡ ማእከሎሙ ፡ ወአኀድር ፡ ምስሌሆሙ ፡ ወእከውኖሙ ፡ አምላኮሙ ፡ ወእሙንቱኒ ፡ ይከውኑኒ ፡ ሕዝብየ ፡ ዘበአማን ፡ ወዘበጽድቅ ፡

18 ወኢየኀድጎሙ ፡ ወኢይትናከሮሙ ፡ እስመ ፡ አነ ፡ እግዚአብሔር ፡ አምላኮሙ ።

19 ወወድቀ ፡ ሙሴ ፡ በገጹ ። ወጸለየ ፡ ወይቤ ፡ እግዚእየ ፡ አምላኪየ ፡ ኢትኅድግ ፡ ሕዝበከ ፡ ወርስተከ ፡ ለሐዊር ፡ በስሕተተ ፡ ልቦሙ ፡ ወኢትመጥዎሙ ፡ ውስተ ፡ እደ ፡ ፀሮሙ ፡ አሕዛብ ፡ ከመ ፡ ኢይኰንንዎሙ ፡ ወከመ ፡ ኢይግበርዎሙ ፡ ከመ ፡ ይኅጥኡ ፡ ለከ ።

20 ይትለዐል ፡ እግዚኦ ፡ ምሕረትከ ፡ ላዕለ ፡ ሕዝብከ ፡ ወፍጥር ፡ ሎሙ ፡ መንፈሰ ፡ ርቱዐ ፡ ወኢይኰንኖሙ ፡ መንፈሰ ፡ ቤልሖር ፡ ለአስተዋድዮቶሙ ፡ ቅድሜከ ፡ ወለአዕቅጾቶሙ ፡ እምኵሉ ፡ ፍኖተ ፡ ጽድቅ ፡ ከመ ፡ ይትሐጐሉ ፡ እምቅድመ ፡ ገጽከ ፤

21 ወእሙንቱሰ ፡ ሕዝብከ ፡ ወርስትከ ፡ ዘባላህከ ፡ በኀይልከ ፡ ዐቢይ ፡ እምእደ ፡ ግብጽ ፤ ወፍጥር ፡ ሎሙ ፡ ልበ ፡ ንጹሐ ፡ ወመንፈሰ ፡ ቅዱሰ ፡ ወኢይትዐቀጹ ፡ በኃጢአቶሙ ፡ እምይእዜ ፡ ወእስከ ፡ ለዓለም ።

22 ወይቤሎ ፡ እግዚአብሔር ፡ ለሙሴ ፡ አነ ፡ ኣአምር ፡ ተዋሥኦቶሙ ፡ ወሕሊናሆሙ ፡ ወይቡሰ ፡ ክሳዶሙ ፡ ወኢይሰምዑ ፡ እስከ ፡ ሶበ ፡ ያአምሩ ፡ ኃጢአቶሙ ፡ ወኃጣውአ ፡ አበዊሆሙ ።

23 ወእምድኅረ ፡ ዝንቱ ፡ ይትመየጡ ፡ ኀቤየ ፡ በኵሉ ፡ ርትዕ ፡ ወበኵሉ ፡ ልብ ፡ ወበኵሉ ፡ ነፍስ ፡ ወኣወቂ ፡ ቍልፈተ ፡ ልቦሙ ፡ ወቍልፈተ ፡ ልበ ፡ ዘርኦሙ ፡ ወእፈጥር ፡ ሎሙ ፡ መንፈሰ ፡ ቅዱሰ ፡ ወኣነጽሖሙ ፡ ከመ ፡ ኢይትመየጡ ፡ እምድኅሬየ ፡ እምይእቲ ፡ ዕለት ፡ እስከ ፡ ለዓለም ።

24 ወትተሉ ፡ ነፍሶሙ ፡ ኀቤየ ፡ ወበኵሉ ፡ ትእዛዝየ ፡ ወይገብእ ፡ ሎሙ ፡ ትእዛዝየ ፡ ወእከውኖሙ ፡ አበ ፡ ወእሙንቱ ፡ ይከውኑኒ ፡ ውሉደ ።

25 ወይሰመዩ ፡ ኵሎሙ ፡ ውሉደ ፡ አምላክ ፡ ሕያው ፡ ወያአምሩ ፡ ኵሉ ፡ መንፈስ ፡ ወኵሉ ፡ መልአክ ፡ ወያአምርዎሙ ፡ ከመ ፡ እሙንቱ ፡ ውሉድየ ፡ ወአነ ፡ አቡሆሙ ፡ በርትዕ ፡ ወበጽድቅ ፡ ወኣፈቅሮሙ ።

26 ወአንተ ፡ ጸሐፍ ፡ ለከ ፡ ኵሎ ፡ ዘንተ ፡ ነገረ ፡ ዘአነ ፡ ኣየድዐከ ፡ በዝንቱ ፡ ደብር ፡ ዘቀዳሚ ፡ ወዘደኃሪ ፡ ወዘይመጽእ ፡ ሀሎ ፡ በኵሉ ፡ ኵፋሌ ፡ መዋዕል ፡ ዘበሕግ ፡ ወዘበስምዕ ፡ ወበሱባዔሆሙ ፡ ዘኢዮቤልዮን ፡ እስከ ፡ ለዓለም ፤ እስከ ፡ ሶበ ፡ እወርድ ፡ ወአኀድር ፡ ምስሌሆሙ ፡ በኵሉ ፡ ዓለመ ፡ ዓለም ።

27 ወይቤሎ ፡ ለመልአከ ፡ ገጽ ፡ ጸሐፍ ፡ ለሙሴ ፡ እምቀዳሚ ፡ ፍጥረት ፡ እስከ ፡ አመ ፡ ይትሐነጽ ፡ መቅደስየ ፡ በማእከሎሙ ፡ ለዓለመ ፡ ዓለማት ።

28 ወያስተርኢ ፡ እግዚአብሔር ፡ ለዐይነ ፡ ኵሉ ፡ ወያአምር ፡ ኵሉ ፡ ከመ ፡ አነ ፡ አምላከ ፡ እስራኤል ፡ ወአብ ፡ ለኵሎሙ ፡ ደቂቀ ፡ ያዕቆብ ፡ ወንጉሥ ፡ በደብረ ፡ ጽዮን ፡ ለዓለመ ፡ ዓለም ፤ ወትከውን ፡ ጽዮን ፡ ወኢየሩሳሌም ፡ ቅድስተ ።

29 ወነሥአ ፡ መልአከ ፡ ገጽ ፡ ዘየሐውር ፡ ቅድመ ፡ ትዕይንቶሙ ፡ ለእስራኤል ፡ ጽላተ ፡ ዘኩፋሌ ፡ ዓመታት ፡ እምአመ ፡ ፍጥረት ፡ ሕግ ፡ ወስምዕ ፡ ለሱባዔሁ ፡ ወለኢዮቤልዮን ፡ በበ ፡ ዓመት ፡ በኵሉ ፡ ኍልቆሙ ፡ ወኢዮቤልዮን ፡ በበዓመት ፡ እምዕለተ ፡ ሐዳስ ፡ ፍጥረት ፡ አመ ፡ ይትሔደስ ፡ ሰማያት ፡ ወምድር ፡ ወኵሉ ፡ ፍጥረቶሙ ፡ በከመ ፡ ኀይላቲሆሙ ፡ ለሰማይ ፡ ወበከመ ፡ ኵሉ ፡ ፍጥረተ ፡ ምድር ፡ እስከ ፡ አመ ፡ ይትፈጠር ፡ መቅደሰ ፡ እግዚአብሔር ፡ በኢየሩሳሌም ፡ በደብረ ፡ ጽዮን ፡ ወኵሉ ፡ ብርሃናት ፡ ይትሔደሱ ፡ ለፈውስ ፡ ወለሰላም ፡ ወለበረከት ፡ ለኵሎሙ ፡ ኅሩያነ ፡ እስራኤል ፡ ከመ ፡ ይኩን ፡ ከማሁ ፡ እምይእቲ ፡ ዕለት ፡ ወእስከ ፡ ኵሉ ፡ መዋዕለ ፡ ምድር ።