117. Concerning the King of Rome and the King of Ethiopia
116. Concerning the Chariot of Ethiopia / Kebra Nagast / 117. Concerning the King of Rome and the King of Ethiopia Colophon

፻፲፯ ፡ በእንተ ፡ ንጉሠ ፡ ሮምያ ፡ ወንጉሠ ፡ ኢትዮጵያ ።

 

ወይትለአኩ ፡ ንጉሠ ፡ ሮምያ ፡ ወንጉሠ ፡ ኢትዮጵያ ፡ ወሊቀ ፡ ጳጳሳት ፡ ዘእስክንድርያ ፡ ከመ ፡ ያኅልቅዎሙ ፡ እንዘ ፡ ርቱዕ ፡ ሃይማኖቶሙ ፡ ለሰብአ ፡ ሮም ፤ ወይትነሥኡ ፡ ፀብአ ፡ ከመ ፡ ይጽብእዎሙ ፡ ለፀረ ፡ እግዚኣብሔር ፡ አይሁድ ፡ ወያኅልቅዎሙ ፡ ንጉሠ ፡ ሮሜ ፡ ለኤንያ ፡ ወንጉሠ ፡ ኢትዮጵያ ፡ ለፊንሐስ ፡ ወያመዘብሩ ፡ ብሔሮሙ ፡ ወየሐንጹ ፡ አብያተ ፡ ክርስቲያናት ፡ በህየ ፡ ወየሐርድዎሙ ፡ ለነገሥተ ፡ አይሁድ ፡ በተፍጻሜተ ፡ ዛቲ ፡ ቀመር ፡ ፲ወ፪ ፡ አቅማር ። አሜሃ ፡ ትትፌጸም ፡ መንግሥቶሙ ፡ ለአይሁድ ፡ ወትረትዕ ፡ መንግሥተ ፡ ክርስቶስ ፡ እስከ ፡ ምጽአተ ፡ ሐሳዌ ፡ መሲሕ ። ወእሙንቱሰ ፡ ነገሥት ፡ ዮስጢኖስ ፡ ንጉሠ ፡ ሮሜ ፡ ወካሌብ ፡ ንጉሠ ፡ ኢትዮጵያ ፡ ይትራከቡ ፡ ክልኤሆሙ ፡ በኢየሩሳሌም ፡ ወይሠርዑ ፡ ቍርባነ ፡ ሊቀ ፡ ጳጳሳቲሆሙ ፡ ወይቄርቡ ፡ ወያኀብሩ ፡ ሃይማኖተ ፡ በፍቅር ፡ ወይትወሀቡ ፡ አምኃ ፡ ወሰላመ ፡ ወይትካፈሉ ፡ ምድረ ፡ እመንፈቃ ፡ ለኢየሩሳሌም ፡ በከመ ፡ ነገርነ ፡ ውስተ ፡ ርእሰ ፡ ዝንቱ ፡ መጽሐፍ ፡ ቀዳሚ ። ወካዕበ ፡ በእንተ ፡ ፍቅር ፡ ይዴመሩ ፡ ስመ ፡ መንግሥት ፡ ይዴመሩ ፡ ፩ ፡ ዘኀረዩ ፡ በሃይማኖት ፡ እምነገሥተ ፡ ሮም ፡ በውስተ ፡ ዕፃ ፡ ዘይሰመይ ፡ ምስለ ፡ ዳዊት ፡ ወሰሎሞን ፡ አበዊሆሙ ፡ ከመ ፡ ይሰመይ ፡ ንጉሠ ፡ ኢትዮጵያ ፡ ወንጉሠ ፡ ሮሜሂ ፡ ከማሁ ፡ ይነሥእ ፡ ስመ ፡ ንጉሠ ፡ ኢትዮጵያ ፡ ወይዴምር ፡ ውስተ ፡ ዕፃ ፡ ዘይሰመይ ፡ ምስለ ፡ ዳዊት ፡ ወሰሎሞን ፡ አበዊሆሙ ፡ በአምሳለ ፡ ፬ ፡ ወንጌላዊያን ፡ ወራብዕሰ ፡ ዘኀረዩ ፡ በበሀገሮሙ ። ወከመዝ ፡ እምድኅረ ፡ ኀብሩ ፡ ወአርትዑ ፡ ሃይማኖተ ፡ ይትማከሩ ፡ ከመ ፡ ኢያሕይዉ ፡ አይሁድ ፡ ወየኀድጉ ፡ ህየ ፡ በበውሉዶሙ ፤ ወንጉሠ ፡ ኢትዮጵያሰ ፡ የኀድግ ፡ ህየ ፡ ወልደ ፡ ዘበኵሩ ፡ ዘስሙ ፡ እስራኤል ፡ ወይገብእ ፡ ብሔሮ ፡ በፍሥሓ ፤ ወሶበ ፡ በጽሐ ፡ ቤተ ፡ መንግሥቱ ፡ ያአኵቶ ፡ ለእግዚኣብሔር ፡ ፈድፋደ ፡ ወይበጽዕ ፡ ሥጋሁ ፡ ለመሥዋዕተ ፡ ስብሐት ፡ ለአምላኩ ፤  ወጥቀ ፡ ይትወከፎ ፡ እግዚኣብሔር ፡ እስመ ፡ ኢያረኵስ ፡ ሥጋሁ ፡ እምድኅረ ፡ ገብአ ፡ አላ ፡ የሐውር ፡ ውስተ ፡ ደብር ፡ በንጹሕ ፡ ልብ ፤ ወያነግሥ ፡ ወልዶ ፡ ዘይንእስ ፡ ዘስሙ ፡ ገብረ ፡ መስቀል ፡ ወውእቱሰ ፡ የዐጹ ፡ ርእሶ ። ወሶበ ፡ ነገርዎ ፡ ለንጉሠ ፡ ናግራን ፡ ወልደ ፡ ካሌብ ፡ ይመጽእ ፡ ከመ ፡ ይንግሥ ፡ ኀበ ፡ ጽዮን ፡ ወገብረ ፡ መስቀልኒ ፡ ያነሥእ ፡ ሰራዊተ ፡ ወየሐውር ፡ በሰረገላ ፡ ወይትራከቡ ፡ በኀበ ፡ መጽብበ ፡ ባሕረ ፡ ሊበ ፡ ወይትቃተሉ ፡ ወበአሐቲ ፡ ሌሊት ፡ ይጼልዩ ፡ ክልኤሆሙ ፡ እምሰርክ ፡ እስከ ፡ ነግህ ፡ ሶበ ፡ ጸንዖሙ ፡ ቀትል ፤ ወሶበ ፡ በከዩ ፡ ኀቤሁ ፡ በአንብዕ ፡ ይኔጽር ፡ እግዚኣብሔር ፡ ኀበ ፡ ጸሎተ ፡ ክልኤሆሙ ፡ ወጸሎተ ፡ አቡሆሙ ፡ ንሱሕ ፡ እንዘ ፡ ይብል ፡ ውእቱኒ ፡ መልህቅ ፡ ወቆመ ፡ ከመ ፡ ይግበር ፡ ፈቃደ ፡ አቡሁ ፡ ወለውእቱኒ ፡ መንእስ ፡ አፍቀሮ ፡ አቡሁ ፡ ወጸለየ ፡ ኀበ ፡ እግዚኣብሔር ፤ ወይቤሎ ፡ ለገብረ ፡ መስቀል ፡ ኅረይ ፡ ለከ ፡ እምሰረገላ ፡ ወእምጽዮን ፡ ወአፍተዎ ፡ ከመ ፡ ይንሣእ ፡ ጽዮንሃ ፡ ወይንገሥ ፡ ገሃደ ፡ ዲበ ፡ መንበረ ፡ አቡሁ ፤ ወለእስራኤልኒ ፡ አፍተዎ ፡ ከመ ፡ ይኅረይ ፡ ሰረገላ ፡ ወይንግሥ ፡ በኅቡእ ፡ ወኢይትረአይ ፡ ወይፌንዎ ፡ ኀበ ፡ ኵሎሙ ፡ እለ ፡ ተዐደዉ ፡ ትእዛዘ ፡ እግዚኣብሔር ፤ ወአልቦ ፡ ዘየሐንጽ ፡ አብያተ ፡ ወይነብር ፡ በደብተራት ፡ ወአልቦሙ ፡ ጻማ ፡ ዘስራሕ ፡ ወኢጻማ ፡ በፍኖት ፤ ወመዋዕሊሆሙኒ ፡ ካዕበተ ፡ ሰብእ ፡ ወከመዝኬ ፡ የሀይጱ ፡ ወይዌስቁ ፡ ወይወግኡ ፡ ኀበ ፡ ዘጸልኦ ፡ እግዚኣብሔር ። ከመዝ ፡ ገብረ ፡ እግዚኣብሔር ፡ ለንጉሠ ፡ ኢትዮጵያ ፡ ክብረ ፡ ወሞገሰ ፡ ወዐብየ ፡ እምኵሎሙ ፡ ነገሥተ ፡ ምድር ፡ በእንተ ፡ ዕበያ ፡ ለጽዮን ፡ ታቦተ ፡ ሕጉ ፡ ለእግዚኣብሔር ፡ ጽዮን ፡ ሰማያዊት ፤ ወይረስየነ ፡ እግዚኣብሔር ፡ ከመ ፡ ንግበር ፡ ሥምረቶ ፡ መንፈሳዊተ ፡ ወያድኅነነ ፡ እመዐቱ ፡ ወይከፍለነ ፡ መንግሥቶ ፡ አሜን ፠ ወአውሥኡ ፡ ወይቤልዎ ፡ በአማን ፡ ሠናየ ፡ ነበብከ ፡ እስመ ፡ ከማሁ ፡ ተከሥተ ፡ ለከ ፡ በረድኤተ ፡ መንፈስ ፡ ቅዱስ ፤ ነገርከነ ፡ ኵሎ ፡ ዘኮነ ፡ ወአኅበርከ ፡ ምስለ ፡ መጽሐፈ ፡ ደማቲዮስ ፡ ዘሮሜ ፡ ወተነበይከ ፡ ለነ ፡ ዘይከውንሂ ፡ ለክልኤ ፡ አህጉር ፡ መራዕወ ፡ ክርስቶስ ፡ አብያተ ፡ ክርስቲያናት ፡ ንስታስያ ፡ ወአርቃድያ ፡ ወማሬና ፡ ወኢትዮጵያ ፡ አህጉር ፡ ዐበይት ፡ ዘእግዚኣብሔር ፡ ዘበውስቴቶን ፡ መሥዋዕተ ፡ ወቍርባነ ፡ ንጹሕ ፡ ይትገበር ፡ በኵሉ ፡ ጊዜ ። እግዚኣ ብሔር ፡ ይጸግወነ ፤ በረከቶሙ ፡ ለኵሎሙ ፡ ቅዱሳን ፡ ወሰማዕት ፡ ለዓለመ ፡ ዓለም ፡ አሜን ። ክርስቶስ ፡ ንጉሥነ ፡ ወበክርስቶስ ፡ ሕይወትነ ፡ ለዓለመ ፡ ዓለም ፡ አሜን ፡ ወአሜን ፠ ፠ ፠ ፠ ፠ ፠