115. Concerning the Judgement of Israel
114. Concerning the return of Zion / Kebra Nagast / 115. Concerning the Judgement of Israel 116. Concerning the Chariot of Ethiopia

፻፲፭ ፡ በእንተ ፡ ቅስተ ፡ እስራኤል ።

 

ወያወሥኦሙ ፡ ወይብሎሙ ፡ ለምንት ፡ ክሕድክሙኒ ፡ ወዐለውክሙኒ ፡ ወሰቀልክሙኒ ፡ ዘንተ ፡ ኵሎ ፡ ዘገበርኩ ፡ ለክሙ ፡ ወአድኀንኩክሙ ፡ ወሪድየ ፡ እምሰይጣን ፡ ወእምግብርናተ ፡ ፈርዖን ፡ ወበእንቲአክሙኒ ፡ መጻእኩ ፡ ወአንትሙሰ ፡ ርእዩ ፡ ዘከመ ፡ ቀነውክሙኒ ፡ ወረገዝክሙኒ ። ወይትነሥኡ ፡ ወይኴንንዎሙ ፡ ፲ወ፪ ፡ ሐዋርያት ፡ እንዘ ፡ ይብልዎሙ ፡ አስማዕናክሙ ፡ ወኢሰማዕክሙ ፡ ትንቢተ ፡ ነቢያት ፡ ወስብከተነ ፡ ለነ ፡ ለሐዋርያት ። ወይበክዩ ፡ ወይኔስሑ ፡ በኀበ ፡ ኢይበቍዕ ፡ ወየሐውሩ ፡ ውስተ ፡ ኵነኔ ፡ ዘለዓለም ፤ ምስለ ፡ ዲያብሎስ ፡ አቡሆሙ ፡ ዘአመከሮሙ ፡ ወአጋንንቲሁ ፡ መስሕታን ፡ ይትኀተሙ ፡ ረሲዓን ። ወእለሰ ፡ አምኑ ፡ ወተጠምቁ ፡ ቦቱ ፡ በቅድስት ፡ ሥላሴ ፡ ወተመጠዉ ፡ ሥጋሁ ፡ ወደሞ ፡ ይከውኑ ፡ ሎቱ ፡ አግብርተ ፡ በኵሉ ፡ ልቦሙ ፡ እስመ ፡ አልቦ ፡ ዘይክል ፡ ጸሊአ ፡ ሥጋሁ ፡ ግሙራ ፡ ይጸርኅ ፡ ሥጋ ፡ ክርስቶስ ፡ በውስተ ፡ ሥጋነ ፡ ወይምሕር ፡ በእንተ ፡ ሥጋሁ ፡ ወደሙ ፡ እስመ ፡ ኮንዎ ፡ ውሉዱ ፡ ወአኀዊሁ ፤ ወእኒቦ ፡ ዘአበሱ ፡ ይትኴነኑ ፡ መጠነ ፡ አበሳሆሙ ፡ በእሳት ፡ ለዘ ፡ ቀሊል ፡ ጾሩ ፡ ቀሊል ፡ ኵነኔሁ ፡ ወለዘ ፡ ክቡድ ፡ ጾሩ ፡ ፈድፈደ ፡ ኵነኔሁ ፤ አሐቲ ፡ ዕለት ፡ በኀበ ፡ እግዚኣብሔር ፡ መጠነ ፡ ፼ ፡ ዓመት ፡ ቦዘ ፡ ይትኴነን ፡ መጠነ ፡ ዕለት ፡ ወቦመንፈቀ ፡ ዕለት ፡ ወቦ፫ ፡ ሰዐት ፡ ዘዕለት ፡ ወቦ ፡ ፩ሰዓት ፡ ዘዕለት ፡ ወቦዘያሜክርዎ ፡ ወያስተናጽሕዎ ፡ እምነ ፡ አበሳሁ ፠ ፠ ፠