113. Concerning the Chariot and the Vanquisher of the Enemy
112. How the Prophets foreshadowed Him in their persons / Kebra Nagast / 113. Concerning the Chariot and the Vanquisher of the Enemy 114. Concerning the return of Zion

፻፲፫ ፡ በእንተ ፡ ሰረገላ ፡ ወመግረሬ ፡ ፀር ።

 

አውሥኡ ፡ ወይቤልዎ ፡ ሊቃነ ፡ ጳጳሳት ፡ ለጎርጎርዮስ ፡ ገባሬ ፡ መንክር ፡ ናሁኬ ፡ ጠየቅነ ፡ ወአለበውከነ ፡ ከመ ፡ ከብሩ ፡ ወዐብዩ ፡ ነገሥተ ፡ ኢትዮጵያ ፡ በእንተ ፡ ጽዮን ፤ ወካዕበ ፡ ዐብዩ ፡ ነገሥተ ፡ ሮም ፡ በእንተ ፡ ቅንዋት ፡ ዘገብረት ፡ ልጓመ ፡ እሌኒ ፡ ወኮኖ ፡ መግረሬ ፡ ፀር ፡ ለንጉሠ ፡ ሮም ፡ ወለንጉሠ ፡ ኢትዮጵያ ፡ ኮኖ ፡ ሰረገላ ፡ ወውእቱኒ ፡ ሞእ ፡ ፀሮ ፤ ወካዕበ ፡ ንግረነ ፡ እስከ ፡ ማእዜኑ ፡ ይነብር ፡ መግረሬ ፡ ፀር ፡ ኀበ ፡ ንጉሠ ፡ ሮም ፡ ወሰረገላ ፡ ምስለ ፡ ጽዮን ፡ ኀበ ፡ ንጉሠ ፡ ኢትዮጵያ ፤ ንግረነ ፡ እስመ ፡ ከሠተ ፡ ለከ ፡ እግዚኣብሔር ፡ ዘኮነ ፡ ወዘይከውን ፡ ራእየ ፡ ወትንቢተ ፡ ከመ ፡ ሙሴ ፡ ወኤልያስ ። አውሥአ ፡ ወይቤሎሙ ፡ አነ ፡ እከሥት ፡ ለክሙ ፡ ለንጉሠ ፡ ሮም ፡ ሶበ ፡ ተዐደወ ፡ ወአምዐዖ ፡ ለእግዚኣብሔር ፡ በውስተ ፡ ሃይማኖት ፡ ዛቲ ፡ እንተ ፡ ሠራዕነ ፡ ሃይማኖተ ፡ ሀሎ ፡ ይትዐደዋ ፡ ዘይመጽእ ፡ ንጉሥ ፡ በሮሜ ፡ ወየኀብር ፡ ምስሌሁ ፡ ፩ ፡ ሊቀ ፡ ጳጰሳት ፡ ወይዌልጥዋ ፡ ወይገፈትእዋ ፡ ለነገረ ፡ ፲ወ፪ ፡ ሐዋርያት ፡ ወያፈልስዎ ፡ ውስተ ፡ ፍትወተ ፡ ልቦሙ ፡ ወይሜህሩ ፡ በፈቃዶሙ ፡ ወይመይጥዎ ፡ ለመጽሐፍ ፡ ውስተ ፡ ግዕዞሙ ፤ በከመ ፡ ይቤ ፡ ሐዋርያ ፡ በዘ ፡ ለሊሆሙ ፡ አትከሉ ፡ ርእሶሙ ፡ ከመ ፡ ሰዶም ፡ ወገሞራ ፤ ወእግዚእነሂ ፡ ይቤሎሙ ፡ በወንጌል ፡ ለአርዳኢሁ ፡ ተዐቅቡ ፡ እምእለ ፡ ይመጽኡ ፡ ኀቤክሙ ፡ በአልባሰ ፡ አባግዕ ፡ ወእንተ ፡ ውስጦሙሰ ፡ ተኵላት ፡ ወመሠጥ ። ሶበ ፡ አዕለውዋ ፡ ለሃይማኖት ፡ ትትሀየድ ፡ እምኔሆሙ ፡ መግረሬ ፡ ፀር ፡ ወመንበረ ፡ ጴጥሮስኒ ፡ አልቦ ፡ ዘይነብር ፡ ዲቤሃ ፡ እለ ፡ ወለጡ ፡ ሃይማኖትነ ፤ እስመ ፡ ይትዐረቅ ፡ አማዑቲሆሙ ፡ ለሊቃነ ፡ ጳጳሳቲሆሙ ፡ ለእመ ፡ ነበሩ ፡ በሕሡም ፡ ሃይማኖት ፡ ዲቤሃ ፤ እስመ ፡ ይትኤዝዝ ፡ መልአከ ፡ እግዚኣብሔር ፡ ዘየዐቅባ ፡ ለመንበረ ፡ ጴጥሮስ ፡ በሮሜ ። ወመግረሬ ፡ ፀርኒ ፡ የሀይዳ ፡ እግዚኣብሔር ፡ እምኔሁ ፡ ለንጉሥ ፡ ዘኢየዐቅብ ፡ ሃይማኖተ ፡ ይፀብእዎ ፡ ፋርስ ፡ ወስሙ ፡ ይመስለኒ ፡ መርቅያኖስ ፡ ዕልወ ፡ ሃይማኖት ፤ ወይከብቶ ፡ ንጉሠ ፡ ፋርስ ፡ ዘስሙ ፡ ሃሬኔዎስ ፡ ወይነሥኦ ፡ ምስለ ፡ ፈረሱ ፡ ንጉሥ ፤ ወበፈቃደ ፡ እግዚኣብሔር ፡ ይትሀወክ ፡ ፈረስ ፡  ዘቦቱ ፡ መግረሬ ፡ ፀር ፡ ወይበውእ ፡ ውስተ ፡ ባሕር ፡ ወየኀልቅ ፡ በህየ ፤ ወቅንዋትሰ ፡ ታበርህ ፡ ህየ ፡ በውስተ ፡ ባሕር ፡ እስከ ፡ ይመጽእ ፡ ክርስቶስ ፡ ዳግመ ፡ በዐቢይ ፡ ስብሐት ፡ በደመና ፡ ሰማይ ፡ ምስለ ፡ ኀይል ። ዘንተኬ ፡ አርአየኒ ፡ እግዚኣብሔር ፡ በውስተ ፡ ግብ ፤ ወበእንተ ፡ ንጉሠ ፡ ኢትዮጵያ ፡ ወጽዮን ፡ መርዓተ ፡ ሰማይ ፡ ወሰረገላ ፡ በዘ ፡ ይረውጹ ፡ አነ ፡ እነግረክሙ ፡ ዘከሠተ ፡ ሊተ ፡ አምላኪየ ፡ ወአለበወኒ ፤ ትነብር ፡ በርትዕት ፡ ሃይማኖት ፡ እስከ ፡ ምጽአተ ፡ እግዚእነ ፡ ወአልቦ ፡ ዘትጸንን ፡ እምቃለ ፡ ሐዋርያት ፡ ወንሕነ ፡ በከመ ፡ ሠራዕነ ፡ ትሄሉ ፡ እስከ ፡ ኅልቀተ ፡ ዓለም ፠ ወአውሥእዎ ፡ ለገባሬ ፡ መንክር ፡ ወይቤልዎ ፡ አመኬ ፡ ይመጽእ ፡ ሰማልያል ፡ ይትኀበልኑ ፡ ውሕኮ ፡ ሃይማኖቶሙ ፡ ለኢትዮጵያ ፡ ዘውእቱ ፡ ሐሳዌ ፡ መሲሕ ። አውሥአ ፡ ወይቤ ፡ አልቦ ፡ አኮኑ ፡ ተነበየ ፡ ዳዊት ፡ ወይቤ ፡ ኢትዮጵያ ፡ ታበጽሕ ፡ እደዊሃ ፡ ኀበ ፡ እግዚኣብሔር ፤ ወዘንተ ፡ ዘይቤ ፡ ኢየዐልዉ ፡ ወኢይዌልጡ ፡ ዘንተ ፡ ሃይማኖትነ ፡ ወሥርዐትነ ፡ ወዘእለ ፡ እምቅድሜነ ፡ መምህራነ ፡ ሕግ ፡ ሐዋርያት ፠ ፠ ፠