112. How the Prophets foreshadowed Him in their persons
111. Concerning His Ascension and His Second Coming / Kebra Nagast / 112. How the Prophets foreshadowed Him in their persons 113. Concerning the Chariot and the Vanquisher of the Enemy

፻፲፪ ፡ በእንተ ፡ ዘአርአዩ ፡ ነቢያት ፡ በሥጋሆሙ ።

 

ተአዘዘ ፡ ይስሐቅ ፡ ለአቡሁ ፡ ወይቤ ፡ ዕቅደኒ ፡ ወተሦዐ ፡ እንዘ ፡ ኢይመውት ፡ ተቤዘዎ ፡ በበግዕ ፡ ዘወረደ ፡ እምሰማያት ፤ ወከማሁ ፡ ወልደ ፡ እግዚኣብሔር ፡ ተአዛዜ ፡ ለአቡሁ ፡ ኮነ ፡ እስከ ፡ ለሞት ፡ ወተአስረ ፡ በፍቅረ ፡ ሰብእ ፡ ወተቀነወ ፡ ወተረግዘ ፡ ወኮነ ፡ ቤዛነ ፡ ወልደ ፡ እግዚአብሔር ፡ ወመለኮቱ ፡ ኢሐመ ። ወበከመ ፡ ያዕቆብ ፡ ወልዱ ፡ ፈለሰ ፡ ምድረ ፡ ላባ ፡ ሀገረ ፡ እኅወ ፡ እሙ ፡ ምስለ ፡ በትሩ ፡ ባሕቲታ ፡ ወበህየ ፡ ገብረ ፡ ብዙኀ ፡ እንስሳ ፡ ወአጥረየ ፡ ንጹሐ ፡ ወርኩሰ ፡ ወወለደ ፡ ፲ወ፪ደቂቀ ፡ ወከሠተ ፡ ጥምቀተ ፡ ወገብአ ፡ ውስተ ፡ ብሔሩ ፡ ኀበ ፡ ነሥአ ፡ በረከተ ፡ እምኀበ ፡ ይስሐቅ ፡ አቡሁ ፡ ወከማሁ ፡ እግዚእነ ፡ ክርስቶስ ፡ ወረደ ፡ እምሰማያት ፡ ባሕቲታ ፡ ቃለ ፡ መለኮት ፤ ወበትረ ፡ ያዕቆብሰ ፡ በዘ ፡ ይሬዒ ፡ አባግዒሁ ፡ ይእቲ ፡ እግዝእትነ ፡ ማርያም ፡ መድኀኒትነ ፤ ወካዕበ ፡ ትተረጐም ፡ ዕፀ ፡ መስቀል ፡ እንተ ፡ ባቲ ፡ ተሰቂሎ ፡ አድኀነ ፡ መርዔቶ ፡ ወአጥረየነ ፡ እለ ፡ እምአይሁድ ፡ ወአረሚ ፡ ወአሕዛብ ፤ ወኀረየ ፡ ሎቱ ፡ ፲ወ፪ሐዋርያተ ፡ ወአእመኑ ፡ በኵሉ ፡ ምድር ፡ ወበሓውርት ፡ ወዐርገ ፡ ሰማያተ ፡ ኀበ ፡ አቡሁ ። ወበከመ ፡ ፈለሰ ፡ ሙሴ ፡ ብሔረ ፡ ምድያም ፡ ወበህየ ፡ ተናጊሮ ፡ ምስለ ፡ እግዚኣብሔር ፡ ወአእሚሮ ፡ ተምሂሮ ፡ አሚነ ፡ ዘበትንሣኤ ፡ ምዉታን ፡ ዘበአበዊሁ ፡ አብርሃም ፡ ይስሐቅ ፡ ወያዕቆብ ፡ ወበይእቲ ፡ በትሩ ፡ ተበዊሖ ፡ ከመ ፡ ይግበር ፡ ተኣምረ ፡ ወወለደ ፡ ፪ ፡ ደቂቀ ፡ ወዝኒ ፡ ያርኢ ፡ ገሃደ ፡ ከመ ፡ በሥላሴ ፡ ንድኅን ። በከመ ፡ ነበበ ፡ አፉሁ ፡ ለእግዚኣብሔር ፡ አነ ፡ አምላከ ፡ አብርሃም ፤ ዘንተ ፡ ዘአብ ፤ ወአምላከ ፡ ይስሐቅ ፤ ዘንተ ፡ ዘወልድ ፤ ወአምላከ ፡ ያዕቆብ ፤ ሶበ ፡ ይብል ፡ ዘንተ ፡ ዘመንፈስ ፡ ቅዱስ ፤ ያርኢ ፡ ገሃደ ፡ ሥላሴ ፡ ጥዩቀ ፤ ኢኮንኩ ፡ አምላከ ፡ ምዉታን ፡ አላ ፡ አምላከ ፡ ሕያዋን ፡ እስመ ፡ ኵሎሙ ፡ ሕያዋን ፡ በኀቤሁ ፡ ለእግዚኣብሔር ፡ ወበዝንቱኬ ፡ ተዐውቀ ፡ ትንሣኤ ፡ ምዉታን ። ዮናስ ፡ ተገንዘ ፡ ወተወድየ ፡ ውስተ ፡ ከርሠ ፡ ዐንበሪ ፤ ወወረደ ፡ መድኀኒነ ፡ ውስተ ፡ ልበ ፡ ምድር ፡ ወተንሥአ ፡ በሣልስት ፡ ዕለት ። ወዳንኤልኒ ፡ ተወድየ ፡ ውስተ ፡ ግበ ፡ አናብስት ፡ ወኀተምዋ ፡ በማኅትሞሙ ፡ ወተንሥአ ፡ ዘእንበለ ፡ ይብልዕዎ ፤ ወከማሁ ፡ እግዚእነሂ ፡ ተወድየ ፡ ውስተ ፡ መቃብር ፡ ወኀተምዎ ፡ አይሁድ ፡ በማኅተሞሙ ፡ እንዘ ፡ ይመስሎሙ ፡ ዘየኀትሙ ፡ ምሥራቀ ፡ ፀሐይ ፡ ከመ ፡ ኢይብራህ ፤ ኦአብዳን ፡ ሕቡላን ፡ ፅሩፋን ፡ ዕውራን ፡ ዕንቡዛን ፡ ትብሉኑ ፡ ከመ ፡ ኢይምጻእ ፡ ወኢይጻእ ፡ መንፈሰ ፡ ሕይወት ፤ ወኀፍሩ ፡ አይሁድ ፡ ወወፅአ ፡ ከመ ፡ ያብርህ ፡ ለነ ፡ ለእለ ፡ አመነ ፡ ቦቱ ። ዮሴፍ ፡ ተሠይጠ ፡ በእደ ፡ አኀዊሁ ፡ ወእግዚእነ ፡ ተሠይጠ ፡ በእደ ፡ ይሁዳ ፤ ወበኀበ ፡ ተሠይጠ ፡ አድኀኖሙ ፡ ለአኀዊሁ ፡ እምረኃብ ፡ ወክርስቶስኒ ፡ አድኀነነ ፡ ለእለ ፡ አመነ ፡ ቦቱ ፡ ወረሰየነ ፡ መዋርስቲሁ ፡ ወአኀዊሁ ፤ ወበከመ ፡ ዮሴፍ ፡ ወሀቦሙ ፡ ርስተ ፡ ለአዝማዲሁ ፡ በምድረ ፡ ጌሠም ፡ ከመሁ ፡ ይሁቦሙ ፡ ማኅደረ ፡ ለጻድቃኒሁ ፡ ምድረ ፡ ርስት ፡ ዘለዓለም ። ወካዕበ ፡ በእንተ ፡ ትንሣኤ ፡ ሙታን ፡ አነ ፡ እሁበከ ፡ ትእምርተ ፡ ከመ ፡ ታእምር ፡ ወትለቡ ፡ ወትጠይቅ ፡ በአምርሕተ ፡ ነገሩ ፡ ትሌቡ ፡ አብርሃም ፡ ሶበ ፡ ቦአ ፡ በምድረ ፡ ርስት ፡ አቅደመ ፡ ተሣይጦ ፡ መቃብር ፡ ኀበ ፡ ያስተጋብእ ፡ አብድንተ ፡ አዝማዲሁ ፡ ወውሉዱ ፡ ወብእሲቱ ፡ ከመ ፡ ይኅበር ፡ ተንሥኦ ፡ ምስሌሆሙ ፤ ወቀበርዋ ፡ ህየ ፡ ለሳራ ፡ ብእሲቱ ፡ ወካዕበ ፡ ለሊሁ ፡ ተቀብረ ፡ በህየ ፤ እስመ ፡ ነቢይ ፡ ውእቱ ፡ አእሚሮ ፡ ከመ ፡ ይትነሣእ ፡ ምስለ ፡ ዘመዱ ፤ ወካዕበ ፡ ተቀብሩ ፡ ይስሐቅ ፡ ምስለ ፡ ርብቃ ፡ ብእሲቱ ። ወእምዝ ፡ ወረደ ፡ ያዕቆብ ፡ ምድረ ፡ ግብጽ ፡ ምስለ ፡ ፸ ፡ ወ፯ ፡ ነፍስ ፡ በእንተ ፡ ረኃብ ፡ ወበእንተ ፡ ዮሴፍ ፡ ወልዱ ፡ እስከ ፡ በዝኀ ፡ ወኮነ ፡ ኆልቆሙ ፡ ፷፼ ፡ አጋር ፡ እለ ፡ ድልዋን ፡ ለፀብእ ፡ ዘእንበለ ፡ አንስት ፡ ወደቅ ፤ ወሞተ ፡ ያዕቆብ ፡ በህየ ፡ በሠናይ ፡ ርሥእ ፡ ወይቤሎ ፡ ለዮሴፍ ፡ ወልዱ ፡ አምሕሎ ፡ ኣምሕለከ ፡ በሕይወተ ፡ አበውየ ፡ ወአምላኪየ ፡ ሐዳሲሃ ፡ ለሕይወትየ ፡ ከመ ፡ ኢትቅብረኒ ፡ ውስተ ፡ ዛሀገር ፡ ዘእንበለ ፡ ውስተ ፡ መቃብረ ፡ አበዊየ ፡ ከመ ፡ ይኩን ፡ ሞትየ ፡ ምስሌሆሙ ፡ ወሕይወትየ ፡ ዓዲ ፡ ምስሌሆሙ ፤ ዑቅኬ ፡ በዝ ፡ አያተ ፡ ነገር ። ወጾሮ ፡ ወልዱ ፡ ዮሴፍ ፡ ለእስራኤል ፡ ወቀበሮ ፡ ኀበ ፡ መቃብረ ፡ አበዊሁ ፡ እስመ ፡ ፈርሀ ፡ መሐላሁ ፡ ዘአምሐሎ ። ወካዕበ ፡ ሶበ ፡ ሐመ ፡ ዮሴፍ ፡ በግብጽ ፡ ጸውዖሙ ፡ ለአኀዊሁ ፡ ወለደቂቁ ፡ ወአምሐሎሙ ፡ ከመ ፡ ኢይኅድጉ ፡ አዕፅምቲሁ ፡ ውስተ ፡ ምድረ ፡ ግብጽ ፤ አላ ፡ ከመ ፡ ሶበ ፡ ሐወጸክሙ ፡ እግዚኣብሔር ፡ ንሥኡ ፡ ምስሌክሙ ፡ ወደምሩ ፡ አዕፅምትየ ፡ ውስተ ፡ መቃብረ ፡ አበዊየ ፠ ፠ ፠