110. Concerning His Resurrection
109. Concerning His Crucifixion / Kebra Nagast / 110. Concerning His Resurrection 111. Concerning His Ascension and His Second Coming

፻፲ ፡ በእንተ ፡ ትንሣኤሁ ።

 

ወካዕበ ፡ በእንተ ፡ ትንሣኤሁ ፡ ተነበየ ፡ ዳዊት ፡ ወይቤ ፡ ይእዜ ፡ እትነሣእ ፡ ይቤ ፡ እግዚኣብሔር ፡ እሬሲ ፡ መድኀኒተ ፡ ወኣግህድ ፡ ቦቱ ፤ ወካዕበ ፡ ይቤ ፡ ተንሥእ ፡ እግዚኦ ፡ ወኰንና ፡ ለምድር ፡ እስመ ፡ አንተ ፡ ትወርስ ፡ በኵሉ ፡ አሕዛብ ፤ ወካዕበ ፡ ተነበየ ፡ ወይቤ ፡ ተንሥእ ፡ እግዚኦ ፡ ርድአነ ፡ ወአድኅነነ ፡ በእንተ ፡ ስምከ ፤ ወደገመ ፡ ወይቤ ፡ ይትነሣእ ፡ እግዚኣብሔር ፡ ወይዘረዉ ፡ ፀሩ ፡ ወይጕየዩ ፡ ጸላእቱ ፡ እምቅድመ ፡ ገጹ ፤ ወካዕበ ፡ ተነበየ ፡ ወይቤ ፡ ወተንሥአ ፡ እግዚኣብሔር ፡ ከመ ፡ ዘንቃህ ፡ እምንዋም ፡ ወከመ ፡ ኀያል ፡ ወኅዳገ ፡ ወይን ። ወበከመ ፡ ተነበየ ፡ ኢሳይያስ ፡ ነቢይ ፡ ያእትት ፡ ሕማመ ፡ እምነፍሱ ፡ እስመ ፡ ኢገብረ ፡ ኀጢአተ ፡ ወኢተረክበ ፡ ሐሰት ፡ ውስተ ፡ አፉሁ ፤ ወያርእዮ ፡ ብርሃነ ፡ ወያጸድቆ ፡ ለዘ ፡ ይትቀነይ ፡ ለጽድቅ ፡ ወለሠናይ ፡ ወለብዙኃን ፡ ኀጢአቶሙ ፡ ውእቱ ፡ ይደመስስ ፤ እስመ ፡ ኢገብረ ፡ ኀጢአተ ፡ ወኢተረክበ ፡ ሐሰት ፡ ውስተ ፡ አፉሁ ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ እስመኢተኀድጋ ፡ ውስተ ፡ ሲኦል ፡ ለነፍስየ ። ወበከመ ፡ ተነበየ ፡ ሰሎሞን ፡ ወልዱ ፡ ወይቤ ፡ ወይትሌዐል ፡ ፀሐየ ፡ ጽድቅ ፡ ወይምነ ፡ የዐውድ ፡ ወይገብእ ፡ ውስተ ፡ መካኑ ፠ ፠ ፠