109. Concerning His Crucifixion
108. Concerning the wickedness of the iniquitous Jews / Kebra Nagast / 109. Concerning His Crucifixion 110. Concerning His Resurrection

፻፱ ፡ በእንተ ፡ ስቅለቱ ።

 

ወካዕበ ፡ ተነበዩ ፡ ነቢያት ፡ በእንተ ፡ ስቅለተ ፡ ለክርስቶስ ። ወበከመ ፡ ተነበየ ፡ ሙሴ ፡ ቍልዔሁ ፡ ለእግዚኣብሔር ፡ ወይቤ ፡ ትሬእዩ ፡ መድኀኒትክሙ ፡ ስቁለ ፡ ዳበ ፡ ዕፅ ፡ ወኢተአምኑ ፡ ቦቱ ። ወበከመ ፡ ተነበየ ፡ ዳዊት ፡ ወይቤ ፡ አኀዙኒ ፡ ከለባት ፡ ብዙኃን ፡ ወቀነዉኒ ፡ እደዊየ ፡ ወእገርየ ፡ ወኆለቁ ፡ ኵሎ ፡ አዕፅምትየ ፡ እሙንቱሰ ፡ ጠዪቆሙ ፡ ተዐወሩኒ ፡ ወተካፈሉ ፡ አልባስየ ፡ ለርእሶሙ ፡ ወተዓፀዉ ፡ ዲበ ፡ ዐራዝየ ። ወበከመ ፡ ተነበየ ፡ ኢሳይያስ ፡ ነቢይ ፡ በእንተ ፡ ትስብእቱ ፡ ወስቅለቱ ፡ ለክርስቶስ ፡ ወይቤ ፡ እግዚአ ፡ መኑ ፡ የአምነነ ፡ ቃልነ ፡ ወለመኑ ፡ ተከሥተ ፡ መዝራዕተ ፡ እግዚኣብሔር ፤ ወነገርነ ፡ ከመ ፡ ሕፃን ፡ በቅድሜሁ ፡ ወከመ ፡ ሥርው ፡ በውስተ ፡ ምድር ፡ ጽምእት ፡ አልቦ ፡ ላሕየ ፡ ወአልቦ ፡ ራእየ ፡ ወራእዩሂ ፡ ምኑን ፡ ወትሑት ፡ እምኵሉ ፡ ሰብእ ፤ ብእሲሁ ፡ ቅሡፍ ፡ ውእቱ ፡ ወሕሙም ፡ እስመ ፡ ሜጠ ፡ ገጾ ፡ ወአስተሐቀርዎ ፡ ወኢተሓሰብዎ ። ወበከመ ፡ ተነበየ ፡ ሰሎሞን ፡ ወይቤ ፡ ንቅትሎ ፡ ለጻድቅ ፡ እስመ ፡ ክቡድ ፡ ለነ ፡ ይትቃወሞን ፡ ለምግባሪነ ፡ መዝለፌ ፡ ኮነነ ፡ ለኅሊናነ ፡ ወሰቆራረ ፡ ኮነ ፡ ሎቱ ፡ በኀጣውኢነ ፤ ወካዕበ ፡ ደገመ ፡ ወይቤ ፡ ወልድየ ፡ ኢያስሕቱከ ፡ ሰብእ ፡ ረሲዓን ፡ ለእመ ፡ ይቤሉከ ፡ ነዓ ፡ ምስሌነ ፡ ተሳተፍ ፡ ንድፍን ፡ ደመ ፡ ንጹሐ ፡ ወንንሣእ ፡ በርባሮ ፡ ወይኩነነ ፡ አሐደ ፡ ቍናመተ ፡ ለኵልነ ፤ አግሕሥ ፡ ርእሰከ ፡ እምአሠሮሙ ፡ እስመ ፡ አኮ ፡ በከ ፡ ዘይረብቡ ፡ ለአዕዋፍ ፡ መሥገርተ ። ወበከመ ፡ ተነበየ ፡ ዳዊት ፡ ወይቤ ፡ ወወደዩ ፡ ሐሞተ ፡ ውስተ ፡ መብልዕየ ፡ ወአስተዩኒ ፡ ብሒአ ፡ ለጽምእየ ። ወበከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ ውእቱ ፡ ነሥአ ፡ ደዌነ ፡ ወጾረ ፡ ሕማመነ ፡ ወበቍስለ ፡ ዚአሁ ፡ ሐየውነ ፤ ወርኢናሁ ፡ ሕሙመ ፡ ወቍሱለ ፡ በሕማም ፡ ወውእቱሰ ፡ ኢከሠተ ፡ አፉሁ ፡ በሕማሙ ፡ ወመጽአ ፡ ይጠባሕ ፡ ከመ ፡ በግዕ ፡ በቅድመ ፡ ዘይቀርጾ ፡ ከማሁ ፡ ኢከሠተ ፡ አፉሁ ፡ በሕማሙ ፡ እስከ ፡ ይነሥእዋ ፡ ለነፍሱ ፤ ወኢየአምርዋ ፡ ለልደቱ ፤ በኀጢአተ ፡ ሕዝብየ ፡ በጻሕኩ ፡ እስከ ፡ ለሞት ። ወበከመ ፡ ተነበየ ፡ ኤርምያስ ፡ ነቢይ ፡ ወይቤ ፡ ወነሥኡ ፡ ሤጦ ፡ ለክቡር ፡ ፴ብሩረ ፡ ዘአክበርዎ ፡ እምደቂቀ ፡ እስራኤል ፡ ወይቤለኒ ፡ እግዚኣብሔር ፡ ደዮ ፡ ውስተ ፡ ሕንቅርት ፡ ወፍትኖ ፡ ለእመ ፡ ኮነ ፡ ንጹሐ ፡ ወወሀብዎ ፡ ለገራህተ ፡ ለብሓዊ ፤ በከመ ፡ አዘዘኒ ፡ እግዚኣብሔር ፡ እንብብ ። ወበከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ ኆለቍዎ ፡ ምስለ ፡ ኃጥኣን ፡ ወአግብእዎ ፡ ለሞት ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ በዝኁ ፡ እለ ፡ ይጸልኡኒ ፡ በዐመፃ ፡ ወፈደዩኒ ፡ እኪተ ፡ ህየንተ ፡ ሠናይት ። ወበከመ ፡ ተነበየ ፡ ዘካርያስ ፡ ነቢይ ፡ ወይቤ ፡ ወሀለዎሙ ፡ ይርአይዎ ፡ ለዘሰቀልዎ ፡ ወወግእዎ ፠ ወብዙኀ ፡ ዘእምተነግረ ፡ ወተዘመረ ፡ ትንቢተ ፡ ነቢያት ፡ በእንተ ፡ ምጽአቱ ፡ ወስቅለቱ ፡ ወሞቱ ፡ ወትንሣኤሁ ፡ ወዕርገቱ ፡ ወዳግም ፡ ምጽአቱ ፡ በስብሐት ፤ ወባሕቱ ፡ ኅዳጠ ፡ ዘከርነ ፡ ትንቢተ ፡ ነቢያት ፡ ለእለ ፡ ትሰምዑ ፡ ወተአምኑ ፡ ወትሌብዉ ፡ ንሕነ ፡ በበ፩ዘከርነ ፡ በከመ ፡ ተብህለ ፡ በሐዋርያት ፡ በወንጌል ፡ መራሕከነ ፡ ወበነቢያት ፡ ናዘዝከነ ፤ እስመ ፡ ነገረ ፡ ነቢያት ፡ ያረትዕ ፡ ሃይማኖተ ፡ ኑፉቃን ፠