107. Concerning His entrance into Jerusalem in Glory
106. A Prophecy concerning the Coming of Christ / Kebra Nagast / 107. Concerning His entrance into Jerusalem in Glory 108. Concerning the wickedness of the iniquitous Jews

፻፯ ፡ በእንተ ፡ በአቱ ፡ ኢየሩሳሌም ፡ በስብሐት ።

 

ወበእንተ ፡ በአቱ ፡ ኢየሩሳሌም ፡ በስብሐት ፡ ተነበዩ ፡ ነቢያት ፡ እንዘ ፡ ይብል ፡ ኢሳይያስ ፡ ነቢይ ፡ አብርሂ ፡ አብርሂ ፡ ኢየሩሳሌም ፡ በጽሐ ፡ ብርሃንኪ ፡ ወስብሐተ ፡ እግዚኣብሔር ፡ ሠረቀ ፡ ላዕሌኪ ። ወበከመ ፡ ተነበየ ፡ ዘካርያስ ፡ ነቢይ ፡ ወይቤ ፡ ተፈሥሒ ፡ ተፈሥሒ ፡ ወለተ ፡ ጽዮን ፡ ወየብቢ ፡ ኢየሩሳሌም ፡ በፍሥሓ ። ወበከመ ፡ ተነበየ ፡ ዳዊት ፡ ወይቤ ፡ እምአፈ ፡ ደቂቅ ፡ ወሕፃናት ፡ አስተዳሎከ ፡ ስብሐተ ፡ በእንተ ፡ ጸላኢ ፡ ከመ ፡ ትንሥቶ ፡ ለጸላኢ ፡ ወለገፋዒ ። ወበከመ ፡ ተነበየ ፡ ሰሎሞን ፡ ወይቤ ፡ ደቂቅከ ፡ ምሁራን ፡ በኀበ ፡ እግዚኣብሔር ፡ ወይትፌሥሑ ፡ አሕዛብ ፡ በውስቴትኪ ። ወበከመ ፡ ተነበየ ፡ ዳዊት ፡ አቡሁ ፡ ወይቤ ፡ ንፍኁ ፡ ቀርነ ፡ በጽዮን ፡ በዕለተ ፡ ሠርቅ ፡ በእምርት ፡ ዕለት ፡ በዓልነ ፡ እስመ ፡ ሥርዐቱ ፡ ለእስራኤል ፡ ውእቱ ። ወበከመ ፡ ተነበየ ፡ ዕዝራ ፡ ጸሓፊ ፡ ወይቤ ፡ ፃኡ ፡ ግበሩ ፡ በዓለ ፡ በትፍሥሕት ፡ ወበልዋ ፡ ለወለተ ፡ ጽዮን ፡ ተፈሥሒ ፡ ነዋ ፡ ንጉሥኪ ፡ በጽሐ ። ወበከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ ተፈሥሒ ፡ ኢየሩሳሌም ፡ ተፈሥሒ ፡ ነዋ ፡ ንጉሥኪ ፡ በጽሐ ፡ እንዘ ፡ ይጼዐን ፡ ዲበ ፡ እድግት ፡ ዘዕሴቱ ፡ ምስሌሁ ፡ ወምግባሩ ፡ ቅድመ ፡ ገጹ ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ቡሩክ ፡ ዘይመጽእ ፡ በስመ ፡ እግዚኣብሔር ፡ ወበከመ ፡ ተነበየ ፡ ያዕቆብ ፡ ወልደ ፡ ይስሐቅ ፡ ወይቤ ፡ ይሁዳ ፡ ሰብሑከ ፡ አኀዊከ ፡ እደዊከ ፡ ላዕለ ፡ ዘባኖሙ ፡ ለጸላእትከ ፡ ወይሰግዱ ፡ ለከ ፡ ደቂቀ ፡ እምከ ፤ ወኢየሐጽጽ ፡ ምልክና ፡ እምይሁዳ ፡ ወምስፍና ፡ እምአባሉ ፡ እስከ ፡ አመ ፡ ይረክብ ፡ ዘጽኑሕ ፡ ሎቱ ፡ ወውእቱ ፡ ተስፋሆሙ ፡ ለአሕዛብ ። ወካዕበ ፡ ተነበየ ፡ ወይቤ ፡ ጸዐዳ ፡ ስነኒሁ ፡ ከመ ፡ ዘበረድ ፡ ወፍሡሓት ፡ አዕይንቲሁ ፡ ከመ ፡ ወይን ፡ ወየኀፅብ ፡ በወይን ፡ ልብሶ ፡ ወበደመ ፡ አስካል ፡ ሶንዶኖ ። ወካዕበ ፡ ተነበየ ፡ እንዘ ፡ ይብል ፡ ይሁዳ ፡ ወልደ ፡ አንበሳ ፡ ሰከብከ ፡ ወኖምከ ፡ አልቦ ፡ ዘያነቅሆ ፡ አላ ፡ ለሊሁ ፡ እስከ ፡ ይረክብ ፡ ዘነዐወ ፤ እምሕዛእትከ ፡ ዕርግ ። ወካዕበ ፡ ባረኮ ፡ ለይሁዳ ፡ ወልዱ ፡ ያዕቆብ ፡ ወይቤሎ ፡ ሀሎ ፡ ንጉሥ ፡ ዘይወፅእ ፡ እምኔከ ፡ ዘየኀፅብ ፡ በወይን ፡ ልብሶ ፡ ወክቡር ፡ ምዕራፊሁ ፡ ለፍቁር ፤ ወፍቁር ፡ ብሂል ፡ ክርስቶስ ፡ ብሂል ፤ ወመሲሕ ፡ ብሂል ፡ ክርስቶስ ፡ ብሂል ፡ ወኢየሱስ ፡ ብሂል ፡ መድኀኔ ፡ ሕዝብ ፡ ብሂል ፤ ወነቢያትሰ ፡ ይሰምይዎ ፡ በሥውር ፡ ለክርስቶስ ፡ ወይብልዎ ፡ ፍቁር ። ወይቤ ፡ ኢሳይያስ ፡ ኀበ ፡ ዕርገቱ ፡ በትንቢት ፡ ውእተ ፡ አሚረ ፡ ይወርድ ፡ ፍቁር ፡ እምሰማይ ፡ ወየኀሪ ፡ ሎቱ ፡ ፲ወ፪ ፡ ሐዋርያት ፤ ወካዕበ ፡ ይቤ ፡ ርኢኩ ፡ ዕርገቶ ፡ ለፍቁር ፡ ወልድ ፡ እስከ ፡ ሳብዕ ፡ ሰማይ ፡ ወእንዘ ፡ ይትቄበልዎ ፡ መላእክት ፡ ወሊቃነ ፡ መላእክት ፡ እንዘ ፡ ይትሌዐል ፡ ፈድፋደ ፡ እምኔሆሙ ። ወዳዊትኒ ፡ ይቤ ፡ ወፍቁርሰ ፡ ከመ ፡ ወልድ ፡ ዘ፩ቀርኑ ፤ ወካዕበ ፡ ይቤ ፡ ወእምአቅርንት ፡ ዘ፩ቀርኑ ፡ ለብሕቱትየ ፤ ወካዕበ ፡ ይቤ ፡ ወይትሌዐል ፡ ቀርንየ ፡ ከመ ፡ ዘ፩ቀርኑ ። አቅርንትሰ ፡ ይተረጐም ፡ መንግሥታተ ፡ ዓለም ፡ ወዘይትበሀልሂ ፡ ዘ፩ቀርኑ ፡ ለመንግሥቱ ፡ አልቦ ፡ ዘይትቃረኖ ፡ እስመ ፡ መላኬ ፡ ነገሥት ፡ ውእቱ ፡ ለዘ ፡ ፈቀደ ፡ ይስዕር ፡ ወለዘፈቀደ ፡ ይሠይም ። በከመ ፡ ይቤ ፡ ዳዊት ፡ ወእምክቡዳነ ፡ አቅርንት ፡ ዘእምኔሆሙ ፡ ኣስተፈሥሐከ ፤ ወዝንቱ ፡ ዘተብህለ ፡ እምክቡራን ፡ ነገሥት ፡ አንተ ፡ ትከብር ፡ ወትትፌሣሕ ፡ ብሂል ። ወበከመ ፡ ተነበየ ፡ እንባቆም ፡ እንዘ ፡ ይብል ፡ አቅርንት ፡ ውስተ ፡ እደዊሁ ፡ ወረሰየ ፡ ፍቁረ ፡ በጽንዐ ፡ ኀይሉ ፤ ወዘንተኒ ፡ ብሂል ፡ አኃዜ ፡ ስልጣነ ፡ ነገሥት ፡ በቅንዋት ፡ ተቀነወ ፡ እራኁ ፡ ዘሕይወተ ፡ ኵሉ ፡ ውስቴቶን ፡ እኁዝ ፡ ዘገብረ ፡ ክርስቶስ ፡ በጽንዐ ፡ ኀይሉ ፡ ፍቁር ፡ ብሂል ፠ ፠ ፠