106. A Prophecy concerning the Coming of Christ
105. Concerning the belief of Abraham / Kebra Nagast / 106. A Prophecy concerning the Coming of Christ 107. Concerning His entrance into Jerusalem in Glory

፻፮ ፡ ትንቢት ፡ በእንተ ፡ ምጽአቱ ፡ ለክርስቶስ ።

 

ወበእንተሰ ፡ ምጽአቱ ፡ ስማዕ ፡ ዘከመ ፡ ተነበዩ ፡ ፩፩ዘአዳም ፡ ለሰሚዖት ። በእንተ ፡ ምጽአቱ ፡ ተነበየ ፡ ኢሳይያስ ፡ ወይቤ ፡ ወልድ ፡ ተወልደ ፡ ለነ ፡ ሕፃን ፡ ተውህበ ፡ ለነ ፡ ስልጣን ፡ ጽሑፍ ፡ ዲበ ፡ መትከፍቱ ፡ ውእቱ ፡ አምላክ ፡ ጽኑዐ ፡ ምኵናን ፡ ንጉሥ ፡ ዐቢየ ፡ ምክር ፡ ስሙ ፤ ወትርጓሜሁ ፡ ዘንተ ፡ ይብል ፡ ገሃደ ፡ ወልደ ፡ እግዚኣብሔር ፡ ተወልደ ፡ ዘመንግሥቱ ፡ ጽሑፍ ፡ እምቅድመ ፡ ዓለም ፡ ወይጠብብ ፡ እምነ ፡ ኵሉ ፡ ይብለከ ። ወካዕበ ፡ ተነበየ ፡ ወይቤ ፡ ኢሳይያስ ፡ ናሁ ፡ ቍልዔየ ፡ ዘኀረይኩ ፡ ዘሠምረት ፡ ነፍስየ ፡ ዲቤሁ ፡ ወይትዌከሉ ፡ አሕሳብ ፡ ቦቱ ፤ ወካዕበ ፡ ዝኒ ፡ ያሌብወነ ፡ ከመ ፡ መንፈሰ ፡ እግዚኣብሔር ፡ ውእቱ ፡ ክርስቶስ ፡ ቃለ ፡ አብ ፡ ዘለብሰ ፡ ሥጋነ ፡ ወተወልደ ፡ ለነ ፡ ወአምኑ ፡ ቦቱ ፡ አሕዛበ ፡ ሮሜ ፡ ወኢትዮጵያ ፡ ወባዕድኒ ፡ ኵሉ ፡ አሕዛብ ። ወለእስራኤልሰ ፡ ሕዝብ ፡ ይብሎሙ ፡ ወካዕበ ፡ ተነበየ ፡ ወይቤ ፡ ብዙኃን ፡ ይተልዉከ ፡ ድኅሬከ ፡ እንዘ ፡ ቅኑታን ፡ ሐቌሆሙ ፡ ወእሱራን ፡ ድኅሪተ ፡ በሰናስል ፡ ወይጼልዩ ፡ ኀቤከ ፡ ወይሰግዱ ፡ ለከ ፡ እስመ ፡ እግዚኣብሔር ፡ አንተ ፡ ወኢያእመርናከ ፤ ወዘንተኒ ፡ በእንተ ፡ ሰማዕት ፡ ወእለ ፡ ይከውኑ ፡ ገዳማዊያን ፡ ወፈላስያን ፡ እለ ፡ እሱራን ፡ አልባቢሆሙ ፡ በትእዛዙ ፡ ወይጼልዩ ፡ ሎቱ ፡ እስመ ፡ ድልው ፡ ዐስቦሙ ፡ ለክልኤሆሙ ፡ ሰማዕት ፡ ወፈላስያን ፡ ብሂል ፤ ወኢያእመርናከሰ ፡ እስመ ፡ ተዐወርዎ ፡ እስራኤል ፡ ወሰቀልዎ ፡ ወአበዩ ፡ ሐዊረ ፡ በጽድቁ ። ወካዕበ ፡ ተነበየ ፡ ወይቤ ፡ እግዚኣብሔር ፡ ይመጽእ ፡ ወይትዌከሉ ፡ ወያአምሩ ፡ አሕዛብ ፡ ወዘንተኒ ፡ መጽአ ፡ ክርስቶስ ፡ ወአበይዎ ፡ አይሁድ ፡ ወአምኑ ፡ ቦቱ ፡ አሕዛብ ፡ ብሂል ። ወካዕበ ፡ ተነበየ ፡ ወይቤ ፡ ጽንዑ ፡ እደው ፡ ድኩማን ፡ ወብረከ ፡ ፅቡሳን ፡ ወተፈሥሑ ፡ ዕንቡዛነ ፡ ልብ ፡ እስመ ፡ እግዚኣብሔር ፡ መጽአ ፡ ዘይፈዲ ፡ ዕዳነ ፡ ወያድኅነነ ፡ ወይከሥት ፡ አዕይንተ ፡ ዕውራን ፡ ወያሰምዕ ፡ እዝነ ፡ ጽሙማን ፡ ወያረውጽ ፡ እግረ ፡ ሐንካሳን ፡ ወያነብብ ፡ ልሳነ ፡ በሃማን ፡ ይነቡ ፤ ወዘንተኒ ፡ ዘተብህለ ፡ እለ ፡ ተስሕቱ ፡ በሰጊድ ፡ ለጣዖት ፡ ወእለ ፡ ምዉታን ፡ በኀጢአት ፡ ወእለ ፡ ተጸለለ ፡ ልብክሙ ፡ ወኢታአምሩ ፡ ዘፈጠረክሙ ፤ ተፈሥሑ ፡ ዮም ፡ መጽአ ፡ ዘይፈዲ ፡ ኀጢአተ ፡ አዳም ፡ ረሲዮ ፡ ዕዳ ፡ ዚአሁ ፡ ተሰቂሎ ፡ ዘእንበለ ፡ ኀጢአት ፡ ቀተሎ ፡ ለሞት ፡ በሞቱ ፤ ወርእዩ ፡ ዕዉራን ፡ ወሖሩ ፡ ሐንካሳን ፡ ወሰምዑ ፡ ጽሙማን ፡ ወተናገሩ ፡ ርቱዐ ፡ በሃማን ፡ ወዓዲ ፡ ተንሥኡ ፡ ምዉታን ፡ ብሂል ። በከመ ፡ ተነበየ ፡ ዳዊት ፡ ነቢይ ፡ ወይቤ ፡ እግዚኣብሔርሰ ፡ ገሃደ ፡ ይመጽእ ፡ ወአምላክነሂ ፡ ኢያረምም ። በከመ ፡ ተነበየ ፡ ኤርምያስ ፡ ወይቤ ፡ ይወርድ ፡ እግዚኣብሔር ፡ ዲበ ፡ ምድር ፡ ወያንሶሱ ፡ ምስለ ፡ ሰብእ ፡ ከማነ ። በከመ ፡ ተነበየ ፡ ሕዝቅኤል ፡ ነቢይ ፡ ወይቤ ፡ እመጽእ ፡ አነ ፡ አምላኮሙ ፡ ወኣንሶሱ ፡ ማእከሎሙ ፡ ወያአምሩኒ ፡ ከመ ፡ አምላኮሙ ። ወበከመ ፡ ተነበየ ፡ ዳዊት ፡ ወይቤ ፡ ቡሩክ ፡ ዘይመጽእ ፡ በስመ ፡ እግዚኣብሔር ፡ ባረክናክሙ ፡ በስመ ፡ እግዚኣብሔር ። በከመ ፡ ተነበየ ፡ እንባቆም ፡ ወይቤ ፡ እግዚኣብሔርሰ ፡ እምቴማን ፡ ይመጽእ ፡ ወቅዱስኒ ፡ እምደብረ ፡ ፋራን ፡ ወእምአህጉረ ፡ ይሁዳ ። በከመ ፡ ተነበየ ፡ ኤልያስ ፡ ነቢይ ፡ ወይቤ ፡ በሐዲስ ፡ ሥርዐት ፡ ይመጽእ ፡ እግዚኣብሔር ፡ ኀቤነ ። በከመ ፡ ተነበየ ፡ ኢዩኤል ፡ ነቢይ ፡ ወይቤ ፡ አማኑኤል ፡ ሰማያዊ ፡ ይመጽእ ፡ ወያድኅን ፡ ተግባሮ ፡ ዘለሐኰ ፡ በእዴሁ ፡ እምእደ ፡ ዲያብሎስ ፡ ተዐጋሊ ፡ ወአጋንንቲሁ ፡ መስሕታን ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ያስተርኢ ፡ አምላከ ፡ አማልክት ፡ በጽዮን ፤ ወካዕበ ፡ ይቤ ፡ እምነ ፡ ጽዮን ፡ ይብል ፡ ሰብእ ፡ ወብእሲ ፡ ተወልደ ፡ በውስቴታ ፡ ወውእቱ ፡ ልዑል ፡ ሣረራ ። ወበከመ ፡ ተነበየ ፡ ሰሎሞን ፡ ወልዱ ፡ ወይቤ ፡ አማን ፡ ይሄሉ ፡ እግዚኣብሔር ፡ ምስለ ፡ ሰብእ ፡ ወያንሶሱ ፡ ዲበ ፡ ምድር ። ወበከመ ፡ ተነበየ ፡ አቡሁ ፡ ዳዊት ፡ ወይቤ ፡ ይወርድ ፡ ከመ ፡ ጠል ፡ ውስተ ፡ ፀምር ፡ ወከመ ፡ ነጠብጣብ ፡ ዘያንጠበጥብ ፡ ዲበ ፡ ምድር ፡ ወይሠርጽ ፡ ጽድቅ ፡ በመዋዕሊሁ ። ወበከመ ፡ ተነበየ ፡ ሰሎሞን ፡ ወልዱ ፡ ወይቤ ፡ ይትወለድ ፡ መድኅን ፡ እምጽዮን ፡ ወያአትት ፡ ኀጢአተ ፡ እምያዕቆብ ። ወበከመ ፡ ተነበየ ፡ ሆሴዕ ፡ ነቢይ ፡ ወይቤ ፡ እመጽእ ፡ ኀቤኪ ፡ ጽዮን ፡ ወኣንሶሱ ፡ ማእከሌኪ ፡ ኢየሩሳሌም ፡ ይቤ ፡ እግዚኣብሔር ፡ ቅዱሰ ፡ እስራኤል ። ወበከመ ፡ ተነበየ ፡ ሚኪያስ ፡ ነቢይ ፡ ወይቤ ፡ ያስተርኢ ፡ ቃለ ፡ እግዚኣብሔር ፡ በኢየሩሳሌም ፡ ወሕግ ፡ ይወፅእ ፡ እምጽዮን ። ወበከመ ፡ ተነበየ ፡ ሆሴዕ ፡ ነቢይ ፡ ወይቤ ፡ ያስተርኢ ፡ እግዚኣብሔር ፡ ዲበ ፡ ምድር ፡ ወየኀድር ፡ ምስለ ፡ ሰብእ ፡ ከማነ ። ወበከመ ፡ ተነበየ ፡ ኤርምያስ ፡ ነቢይ ፡ ወይቤ ፡ ይትፌኖ ፡ መድኅን ፡ እምጽዮን ፡ ወያአትት ፡ ኀጢአተ ፡ እምሕዝበ ፡ እስራኤል ። ወበከመ ፡ ተነበየ ፡ ሚኪያስ ፡ ነቢይ ፡ ወይቤ ፡ ይመጽእ ፡ እግዚኣብሔር ፡ እምሰማይ ፡ ወየኀድር ፡ ውስተ ፡ ጽርሑ ። በከመ ፡ ተነበየ ፡ ዘካርያስ ፡ ነቢይ ፡ ወይቤ ፡ ተፈሥሒ ፡ ወለተ ፡ ጽዮን ፡ ናሁ ፡ ሕያው ፡ አነ ፡ ወአኀድር ፡ ውስቴትኪ ፡ ይቤ ፡ እግዚአብሔር ፡ ቅዱሰ ፡ እስራኤል ። ወበከመ ፡ ተነበየ ፡ ሚኪያስ ፡ ነቢይ ፡ ወይቤ ፡ ናሁ ፡ እግዚአብሔር ፡ ይመጽእ ፡ ወያበርህ ፡ ለእለ ፡ ይፈርህዎ ፡ ወፀሐየ ፡ ጽድቅ ፡ ስሙ ። ወበከመ ፡ ተነበየ ፡ ሆሴዕ ፡ ነቢይ ፡ ወይቤ ፡ ይመጽእ ፡ እግዚአብሔር ፡ ላዕሌኪ ፡ ኢየሩሳሌም ፡ ወያስተርኢ ፡ በውስቴትኪ ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ወየሐዩ ፡ ወይሁብዎ ፡ እምወርቀ ፡ ዐረብ ፡ ወዘልፈ ፡ ይጼልዩ ፡ በእንቲአሁ ፡ ወይከውን ፡ ምስማከ ፡ ለኵሉ ፡ ምድር ፡ ውስተ ፡ አርእስተ ፡ አድባር ። ወበከመ ፡ ተነበየ ፡ ኢዮብ ፡ ጻድቅ ፡ ወይቤ ፡ እግዚአብሔር ፡ ያንሶሱ ፡ ዲበ ፡ ምድር ፡ ወየሐውር ፡ ዲበ ፡ ባሕር ፡ ከመ ፡ የብስ ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ አጽነነ ፡ ሰማያተ ፡ ወወረደ ። በከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ ናሁ ፡ ድንግል ፡ ትፀንስ ፡ ወትወልድ ፡ ወልደ ፡ ወትሰምዮ ፡ ስሞ ፡ አማኑኤል ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ወለድኩከ ፡ እምከርሥ ፡ እምቅድመ ፡ ኮከበ ፡ ጽባሕ ፤ ወካዕበ ፡ ይቤ ፡ እግዚአብሔር ፡ ይቤለኒ ፡ ወልድየ ፡ አንተ ፡ ወአነ ፡ ዮም ፡ ወለድኩከ ። ወበከመ ፡ ተነበየ ፡ ጌዴዎን ፡ ወይቤ ፡ ናሁ ፡ ይወርድ ፡ ከመ ፡ ጠል ፡ ውስተ ፡ ፀምር ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ እግዚአብሔር ፡ ሐወጸ ፡ እምሰማይ ፡ ላዕለ ፡ እጓለ ፡ እመሕያው ፡ ወእምድልው ፡ ጽርሐ ፡ መቅደሱ ። በከመ ፡ ተነበየ ፡ ሙሴ ፡ ነቢይ ፡ ወይቤ ፡ ወይብሉ ፡ ኵሎሙ ፡ ውሉደ ፡ እግዚአብሔር ፡ ጽኑዕ ፡ ውእቱ ፡ እስመ ፡ ይትቤቀል ፡ ደመ ፡ ደቂቁ ። ወበከመ ፡ ተነበየ ፡ ዳዊት ፡ ወይቤ ፡ ወበህየ ፡ ኣበቍል ፡ ቀርነ ፡ ለዳዊት ፡ ወአስተዴሉ ፡ ማኅቶተ ፡ ለመሲሕየ ፡ ወኣለብሶሙ ፡ ኀፍረተ ፡ ለጸላእቱ ፡ ወቦቱ ፡ ይፈሪ ፡ ቅድሳትየ ። ወበከመ ፡ ይቤ ፡ ሆሴዕ ፡ ነቢይ ፡ ኢትፍራህ ፡ እስመ ፡ ኢትትኀፈር ፡ ወኢትደንግዕ ፡ በእንተ ፡ ዘሰባሕከ ፤ ወካዕበ ፡ ይቤ ፡ ስምዑኒ ፡ ስምዑኒ ፡ ሕዝብየ ፡ እስመ ፡ ፍትሕየ ፡ ርቱዕ ፡ እመጽእ ፡ ወአኀድር ፡ ምስሌክሙ ፡ ወይትዌከሉ ፡ አሕዛብ ፡ በብርሃንየ ፤ እስመ ፡ አሕዛብ ፡ ኮኑ ፡ ፍቁራኒሁ ፡ ለክርስቶስ ። ወበከመ ፡ ይቤ ፡ ዳዊት ፡ ነቢይ ፡ ሕዝብ ፡ ዘኢያአምር ፡ ተቀንየ ፡ ሊተ ፡ ውስተ ፡ ምስማዐ ፡ እዝን ፡ ተሰጥዉኒ ፤ ወለአይሁድሰ ፡ ይቤሎሙ ፡ ውሉደ ፡ ነኪር ፡ ሐሰዉኒ ፡ ውሉደ ፡ ነኪር ፡ በልዩ ፡ ወሐንከሱ ፡ በፍኖቶሙ ፡ ሕያው ፡ እግዚኣብሔር ፡ ወቡሩክ ፡ አምላኪየ ፤ ሕያው ፡ እግዚኣብሔር ፡ ሶበ ፡ ይብለከ ፡ በእንተ ፡ መለኮቱ ፡ ይነግር ፡ ወቡሩክ ፡ አምላኪየ ፡ ሶበ ፡ ይብለከ ፡ በእንተ ፡ እንተ ፡ ለብሰ ፡ ሥጋ ፡ ይነግር ። ወካዕበ ፡ ይቤ ፡ በእንተ ፡ እንተ ፡ ለብሰ ፡ ሥጋ ፡ በኢሳይያስ ፡ ነቢይ ፡ መኑ ፡ ዝንቱ ፡ መካሕ ፡ ዘይወፅእ ፡ እምኤዶም ፡ አዶናይ ፡ ዘወረደ ፡ እምሰማይ ፡ ወይለብስ ፡ ዘበሶር ፡ ግሩም ፤ መካሕ ፡ ሶበ ፡ ይብል ፡ ዘመዐዛሁ ፡ ሠናይ ፡ ወአዶናይ ፡ ብሂል ፡ ቃለ ፡ አብ ፡ ዘእምቅድመ ፡ ዓለም ፡ ወልደ ፡ እግዚኣብሔር ፡ ይለብስ ፡ ዘበሶር ፡ ግሩም ፡ ሶበ ፡ ይብል ፡ ሥጋሁ ፡ ለአዳም ፡ ገሃደ ፡ ያርኢ ። ወበከመ ፡ ተነበየ ፡ ዳዊት ፡ ነቢይ ፡ እንዘ ፡ ይብል ፡ በእንተ ፡ ሕዝበ ፡ ክርስቲያን ፡ በልዎሙ ፡ ለአሕዛብ ፡ ከመ ፡ እግዚኣብሔር ፡ ነግሠ ፡ ወአጽንዓ ፡ ለዓለም ፡ ከመ ፡ ኢታንቀልቅል ፤ ወካዕበ ፡ ተነበየ ፡ በእንተ ፡ ምጽአቱ ፡ ኀበ ፡ አሕዛብ ፡ ወይቤ ፡ እምቅድመ ፡ ገጹ ፡ ለእግዚአብሔር ፡ እስመ ፡ ይመጽእ ፡ ይመጽእ ፡ ወይኴንና ፡ ለምድር ፡ ወይኴንና ፡ ለዓለም ፡ በጽድቅ ፡ ወለአሕዛብኒ ፡ በርትዕ ። ወበከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ እግዚኣብሔር ፡ ጸባኦት ፡ መከረ ፡ ይስዐር ፡ ጽዕለቶሙ ፡ ለአሕዛብ ፡ ወያኅስሮሙ ፡ ለክቡራን ፡ ዐበይተ ፡ ምድር ፤ ወዓዲ ፡ አትለወ ፡ ትንቢቶ ፡ ወይቤ ፡ ይመጽእ ፡ ወየሐንጽ ፡ ቤቶ ፡ ወያድኅን ፡ ሕዝቦ ፤ ወዓዲ ፡ ወሰከ ፡ ወይቤ ፡ ወውእተ ፡ አሚረ ፡ ይሠርጽ ፡ እምሥርወ ፡ እሴይ ፡ ዘተሠይመ ፡ መልአከ ፡ አሕዛብ ፡ ወይትዌከሉ ፡ ቦቱ ፡ አሕዛብ ፡ ወይከውን ፡ ክብረ ፡ ምዕራፊሁ ፡ ለዓለም ። ወበከመ ፡ ተነበየ ፡ ዳዊት ፡ ወይቤ ፡ ዘምሩ ፡ ለእግዚአብሔር ፡ ዘየኀድር ፡ ውስተ ፡ ጽዮን ፡ ወንግርዎሙ ፡ ለአሕዛብ ፡ ምግባሮ ። ወበከመ ፡ ተነበየ ፡ ሰሎሞን ፡ ወልዱ ፡ ወይቤ ፡ በእንተ ፡ መድኀኒነ ፡ አማኑኤል ፡ ፀሐየ ፡ ጽድቅ ፡ እምቅድመ ፡ አውግር ፡ ወለደኒ ፡ ወእምቅድመ ፡ ይጠአጣእ ፡ ወይግበር ፡ በሓውርተ ፡ ወእምቅድመ ፡ ዓለም ፡ ሣረረኒ ፤ ዘእንበለ ፡ ምድረ ፡ ይግበር ፡ ወዘእንበለ ፡ ቀላያተ ፡ ይግበር ፡ ወዘእንበለ ፡ ይፃእ ፡ አንቅ ፅት ፡ ማያተ ፡ ወያስተርኢ ፡ ሥነ ፡ ጽገያት ፡ ወእምቅድመ ፡ ይንፋሕ ፡ ነፋሳተ ፡ አየር ፡ እግዚኣብሔር ፡ ፈጠራ ፡ ለምግባሩ ፡ ቅድመ ፡ ገጹ ፡ ወሀሎኩ ፡ ኣስተዋድድ ፡ ምስለ ፡ አቡየ ። በከመ ፡ ተነበየ ፡ አቡሁ ፡ ዳዊት ፡ ወይቤ ፡ እምቅድመ ፡ ፀሐይ ፡ ሀሎ ፡ ስሙ ፡ ወእምቅድመ ፡ ወርኅ ፡ ለትውልደ ፡ ትውልድ ። ወበከመ ፡ ተነበየ ፡ ሰሎሞን ፡ ወልዱ ፡ ወይቤ ፡ አመ ፡ ጽኑዐ ፡ ይገብር ፡ መልዕልተ ፡ ደመናት ፡ ወአመ ፡ ያነብር ፡ ምንባረ ፡ አረፋተ ፡ አጽናፈ ፡ ሰማያት ፡ ወአመ ፡ ያነብራ ፡ ለባሕር ፡ በዐቅማ ፡ ወእምቅድመ ፡ ይሣርር ፡ መንበሮ ፡ መልዕልተ ፡ ነፋሳት ፡ ወአመ ፡ ጽኑዐ ፡ ይገብር ፡ መሠረታተ ፡ ምድር ፡ ሀሎኩ ፡ ምስሌሁ ፡ ኣስተዋድድ ፡ አነ ፡ ውእቱ ፡ ለእንተ ፡ ይትፌሣሕ ፡ ወትረ ፡ እንተ ፡ ጸብሐት ፡ ወእትሐሠይ ፡ ምስሌሁ ፡ በኵሉ ፡ ጊዜ ፡ በቅድመ ፡ ገጹ ። ወበከመ ፡ ተነበየ ፡ ኢዮብ ፡ ነቢይ ፡ ወይቤ ፡ ዘውእቱ ፡ ገጸ ፡ አምላኪየ ፡ ምሥራቅ ፡ ወእምቅድመ ፡ ፀሐይ ፡ ብርሃኑ ፡ ወይትዌከሉ ፡ አሕዛብ ፡ በስሙ ። ወበከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ ኢትዝከሩ ፡ ዘትካት ፡ ወኢተኀልዩ ፡ ዘቀዲሙ ፡ ናሁ ፡ አነ ፡ እገብር ፡ ሐዲሰ ፡ ዘይእዜ ፡ ይሠርቅ ፡ ወከመ ፡ ታእምሩ ፡ እገብር ፡ ፍኖተ ፡ ውስተ ፡ በድው ፡ ወኣውሕዝ ፡ ማየ ፡ ውስተ ፡ ገዳም ፡ ወይድኅሩኒ ፡ አራዊተ ፡ ገዳም ፡ ወእጓለ ፡ አዕዋፍ ፡ ወሴሬኔሲ ፤ እስመ ፡ ወሀብኩ ፡ ማየ ፡ ውስተ ፡ በድው ፡ ወአውሐዝኩ ፡ ውስተ ፡ ገዳም ፡ ከመ ፡ ኣስትዮሙ ፡ ለሕዝብየ ፡ ወለኅሩያንየ ፡ እለ ፡ አጥረይኩ ፡ ከመ ፡ ይንግሩ ፡ ስብሐትየ ፡ ወይግበሩ ፡ ትእዛዝየ ። ወበከመ ፡ ተነበየ ፡ ሰሎሞን ፡ ወይቤ ፡ መኑ ፡ ዐርገ ፡ ውስተ ፡ ሰማይ ፡ ወወረደ ፡ ወመኑ ፡ አስተጋብአ ፡ ነፋሳተ ፡ ውስተ ፡ ሕፅኑ ፡ ወመኑ ፡ ዘዐቈረ ፡ ማያተ ፡ በልብሱ ፡ ወመኑ ፡ ሰፈረ ፡ ማየ ፡ ባሕር ፡ በሕፍኑ ፡ ወሰማየኒ ፡ በስዝሩ ፡ ወመኑ ፡ ስሙ ፡ ወመኑ ፡ ስመ ፡ ወልዱ ። ወበከመ ፡ ተነበየ ፡ ሚኪያስ ፡ ነቢይ ፡ ወይቤሎሙ ፡ ለአይሁድ ፡ ኢይሠምር ፡ ብክሙ ፡ ይቤ ፡ እግዚኣብሔር ፡ ዘኵሎ ፡ ይመልክ ፡ ወኢይሠምር ፡ ምሥዋዕተክሙ ፡ ወኢይትመጠው ፡ ቍርባነ ፡ እምእዴክሙ ፡ እስመ ፡ እምሥራቀ ፡ ፀሐይ ፡ እስከ ፡ ዐረብ ፡ ይሴባሕ ፡ ስምየ ፡ በውስተ ፡ ኵሉ ፡ አሕዛብ ፡ ወበኵሉ ፡ በሓውርት ፡ ይትቄረብ ፡ ዕጣን ፡ ለስምየ ፡ ዐቢይ ፡ በውስተ ፡ ኵሉ ፡ አሕዛብ ፡ ይቤ ፡ እግዚኣብሔር ፡ ዘኵሎ ፡ ይመልክ ። ወካዕበ ፡ ይቤ ፡ ሚኪያስ ፡ ነቢይ ፡ ሐዲስ ፡ ሥርዐት ፡ ያስተርኢ ፡ ደብረ ፡ እግዚኣብሔር ፡ ወድልውት ፡ ውስተ ፡ አርእስተ ፡ አድባር ፡ ወይትሌዐል ፡ መልዕልተ ፡ አውግር ፡ ወይብሉ ፡ ንዑ ፡ ንዕርግ ፡ ውስተ ፡ ደብረ ፡ እግዚኣብሔር ፤ ወየሐውሩ ፡ ኀቤሁ ፡ ብዙኃን ፡ አሕዛብ ፡ ወይብሉ ፡ ንዑ ፡ ንዕርግ ፡ ውስተ ፡ ደብረ ፡ እግ ዚኣብሔር ፡ ወይንግሩነ ፡ ፍኖቶ ፡ ወንሖር ፡ ባቲ ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ስምዐኒ ፡ ሕዝብየ ፡ ወእንግርከ ፡ እስራኤል ፡ ኣሰምዕ ፡ ለከ ፡ አምላክከሰ ፡ አምላክ ፡ አነ ፡ ውእቱ ። ወበከመ ፡ ተነበየ ፡ ሙሴ ፡ ነቢይ ፡ ወይቤ ፡ በእንተ ፡ ሥላሴ ፡ ስማዕ ፡ እስራኤል ፡ ፩ውእቱ ፡ እግዚኣብሔር ፡ አምላክከ ፤ ወዘንተሰ ፡ ይትፌከር ፡ አብ ፡ ወወልድ ፡ ወመንፈስ ፡ ቅዱስ ፡ ፩ውእቱ ፡ አምላክ ፡ ዘአሐቲ ፡ መንግሥቶሙ ፡ ወአሐቲ ፡ ስልጣኖሙ ፡ ወአሐተ ፡ ይሰግዱ ፡ ሎሙ ፡ በሰማይ ፡ ወበምድር ፡ በባሕር ፡ ወበቀላያት ፤ ወሎቱ ፡ ስብሐት ፡ ለዓለመ ፡ ዓለም ፡ አሜን ፠ ፠ ፠