105. Concerning the belief of Abraham
104. More concerning the Ark and the Talk of the Wicked / Kebra Nagast / 105. Concerning the belief of Abraham 106. A Prophecy concerning the Coming of Christ

፻፭ ፡ በእንተ ፡ አሚነ ፡ አብርሃም ።

 

ወአንተሰ ፡ ኢትሌቡ ፡ ከመ ፡ በአሚን ፡ ይጸድቁ ፡ ከመ ፡ አብርሃም ፡ ወዳዊት ፡ ወኵሎሙ ፡ ነቢያት ፡ በበ ፡ መትልው ፡ እለ ፡ ተነበዩ ፡ በእንተ ፡ ምጽአቱ ፡ ለወልደ ፡ እግዚኣብሔር ። ወይቤ ፡ አብርሃም ፡ በመዋዕልየኑ ፡ እግዚኦ ፡ ትፌኑ ፡ ቃልከ ፡ ዲበ ፡ ምድር ፤ ወይቤሎ ፡ እግዚኣብሔር ፡ አልቦ ፡ ኢበጽሐ ፡ ጊዜሁ ፡ አላ ፡ ኣርእየከ ፡ አምሳለ ፡ ምጽአቱ ፡ ወባሕቱ ፡ ዕዱ ፡ ዮርዳኖስ ፡ ወተጠመቅ ፡ እንዘ ፡ ተዐዱ ፡ ወብጻሕ ፡ ሀገረ ፡ ሳሌም ፡ ወትረክቦ ፡ ለመልከ ፡ ጼዴቅ ፡ ወአነ ፡ እኤዝዞ ፡ ያርኢከ ፡ ተኣምሪሁ ፡ ወአምሳሊሁ ፤ ወገብረ ፡ ከማሁ ፡ ወረከቦ ፡ ለመልከ ፡ ጼዴቅ ፡ ወወሀቦ ፡ ምሥጢረ ፡ ኅብስት ፡ ወወይን ፡ ውእቱ ፡ ዘተገብረ ፡ በፋሲካነ ፡ ለመድኀኒትነ ፡ በእግዚእነ ፡ ኢየሱስ ፡ ክርስቶስ ። ዝኬ ፡ ውእቱ ፡ ተምኔቱ ፡ ወትፍሥሕቱ ፡ ለአብርሃም ፡ ዐዊዶ ፡ ምሥዋዐ ፡ ዘገብረ ፡ መልከ ፡ ጼዴቅ ፡ ነሢኦ ፡ ጸበርተ ፡ ወበቀልተ ፡ በዕለተ ፡ ሰንበት ፤ በተአምኖኬ ፡ ከመ ፡ ተፈሥሐ ፡ ርኢ ፡ ወበተአምኖ ፡ ጸድቀ ፡ ርኢ ፤ ኦአይሁዳዊ ፡ ዕዉር ፡ እንዘ ፡ ብከ ፡ አዕይንተ ፡ ኢትሬኢ ፡ ወእንዘ ፡ ብከ ፡ እዝነ ፡ ኢትሰምዕ ፤ በከመ ፡ ይቤ ፡ በእንቲአክሙ ፡ ኢሳይያስ ፡ ነቢይ ፡ ዖሩ ፡ አዕይንቲሆሙ ፡ ወተጸለለ ፡ ልቦሙ ፡ ከመ ፡ ኢይለብዉ ፡ ወኢይሣሀሎሙ ፠ ፠ ፠