103. Concerning the Horns of the Altar
102. Concerning the Beginning / Kebra Nagast / 103. Concerning the Horns of the Altar 104. More concerning the Ark and the Talk of the Wicked

፻፫ ፡ በእንተ ፡ አቅርንተ ፡ ምሥዋዕ ።

 

ታቦትሰ ፡ አቅርንተ ፡ ምሥዋዕ ፡ ውእቱ ፡ ኀበ ፡ ይሠውዑ ፡ ቅዱሳን ፡ ካህናት ፡ ወዘያነብሩ ፡ ዲቤሁ ፡ ጠረጲዛ ፡ አምሳለ ፡ ኀበ ፡ ተቀብረ ፡ በውስተ ፡ ጎልጎታ ፡ መቃብር ፤ ወዘመልዕልተ ፡ ጠረጲዛ ፡ ጵርስፎራ ፡ አምሳለ ፡ አጰርጌ ፡ ዘውእቱ ፡ ሥጋሁ ፡ ለአማኑኤል ፡ አክራጦስ ፡ ንጹሕ ፡ ዘአልቦቱ ፡ ቱስሕተ ፡ እንተ ፡ ነሥአ ፡ መድኀኒነ ፡ እማርያም ፤ ዘይቤሎሙ ፡ ለሐዋርያቲሁ ፡ ቅዱሳን ፡ ብልዑ ፡ ሥጋየ ፡ ወዘሰ ፡ ኢበልዐ ፡ ሥጋየ ፡ አልቦ ፡ ክፍለ ፡ ምስሌየ ፡ ወአልቦ ፡ ሕይወተ ፡ ዘለዓለም ፡ ወዘሰ ፡ በልዐ ፡ ሥጋየ ፡ እመኒ ፡ ሞተ ፡ የሐዩ ፡ ለዓለም ፡ ወተሳተፈ ፡ ሥጋየ ፡ ወደምየ ፡ ወኮነ ፡ መዋርስትየ ፡ ወይብሎ ፡ ለአቡየ ፡ አንተ ፡ አቡነ ፡ ዘበሰማያት ፤ ወአብኒ ፡ ይሰጠዎ ፡ እንዘ ፡ ይብሎ ፡ ወልድየ ፡ አንተ ። ወአክሊል ፡ እንተ ፡ መልዕልተ ፡ ውእቱ ፡ ጵርስፎራ ፡ አምሳለ ፡ እብን ፡ እንተ ፡ ኀተምዋ ፡ አይሁድ ፡ ላዕለ ፡ መቃብር ። ወሶበ ፡ ይብል ፡ ካህን ፡ ፈኑ ፡ መንፈሰ ፡ ቅዱሰ ፡ ይትፌነው ፡ መንፈስ ፡ ቅዱስ ፡ ወይከውን ፡ ሥጋሁ ፡ ለእግዚእነ ፡ ፍጹመ ፡ ወሶበ ፡ ተመጠውነ ፡ ንከውን ፡ ሱቱፋነ ፡ ለሥጋ ፡ ወደም ፡ ለእግዚእነ ፡ ወመድኀኒነ ፡ ኢየሱስ ፡ ክርስቶስ ፡ ወልደ ፡ እግዚኣብሔር ፡ ሕያው ፡ ወመንፈስ ፡ ቅዱስ ፡ እምይእዜ ፡ ወእስከ ፡ ለዓለም ፠ ወንግሩኬ ፡ ለለ ፡ ፩፩ ፤ ከመ ፡ ኢይትመክሑ ፡ ላዕሌነ ፡ ዕዉራነ ፡ ልብ ፡ አይሁድ ፡ ፀርነ ፡ ወፀረ ፡ እግዚኣብሔር ፡ አምላክነ ፤ ወይብሉ ፡ ብዙኅ ፡ አማልክቲሆሙ ፡ ወይሰግዱ ፡ ለዕፀው ፡ ወይብሉ ፡ ተዘሚሮሙ ፡ ኀበ ፡ ነገረ ፡ ኢሳይያስ ፡ ነቢይ ፡ ለመንፈቁ ፡ ትሰግዱ ፡ ወበመንፈቁ ፡ ትጠብሱ ፡ ሥጋ ፡ ወትበልዑ ፤ ይብል ፡ ኢሳይያስ ፡ ከመዝ ፡ በእንተ ፡ እለ ፡ ይሰግዱ ፡ ለግልፎ ፡ ወለጣዖት ፤ ወይብሉ ፡ እሉ ፡ አማልክቲነ ፡ ወፈጠሩነ ፡ ይብልዎሙ ፡ ወይሰግዱ ፡ ሎሙ ፡ ከመ ፡ እግዚኣብሔር ፡ አምላኮሙ ፤ እሉኬ ፡ እለ ፡ ያስሕትዎሙ ፡ አጋንንት ፡ በእከዮሙ ፡ ወዳዊትኒ ፡ ይቤ ፡ በእንቲአሆሙ ፡ አማልክቲሆሙ ፡ ለአሕዛብ ፡ አጋንንት ፡ ወእግዚኣብሔርሰ ፡ ሰማያተ ፡ ገብረ ፡ አሚን ፡ ወሠናይት ፡ ቅድሜሁ ፠ ፠ ፠