100. Concerning the Angels who rebelled
99. Concerning the Two Servants / Kebra Nagast / 100. Concerning the Angels who rebelled 101. Concerning Him that existeth in Everything and Everywhere

፻ ፡ በእንተ ፡ እለ ፡ ተዐደዉ ፡ መላእክት ።

 

ወቦ ፡ ካዕበ ፡ መላእክትሂ ፡ እለ ፡ ተምዕዖሙ ፡ እግዚኣብሔር ፡ እስመ ፡ አእመሮሙ ፡ ማእምረ ፡ ልብ ፡ ዘሐመይዎ ፡ ለአዳም ፡ እንዘ ፡ ይብሉ ፡ እምድኅረ ፡ አፍቀሮ ፡ እግዚኣብሔር ፡ ወወሀቦ ፡ ኪያነሂ ፡ ከመ ፡ ንትለአኮ ፡ ወእንስሳ ፡ ወአራዊት ፡ ወዓሣተ ፡ ባሕር ፡ ወአዕዋፈ ፡ ሰማይ ፡ ወኵሉ ፡ ፍረያት ፡ ወዕፀወ ፡ ገዳም ፡ ወዓዲ ፡ ሰማያት ፡ ወምድር ፤ ወወሀቦ ፡ ሰማይኒ ፡ ከመ ፡ ተሀቦ ፡ ዝናመ ፡ ወምድርኒ ፡ ከመ ፡ ተሀቦ ፡ ፍረያተ ፤ ወዓዲ ፡ ፀሐየ ፡ ወወርኀ ፡ ወሀቦ ፡ ፀሐይኒ ፡ ከመ ፡ ያብርህ ፡ ሎቱ ፡ በመዐልት ፡ ወወርኅኒ ፡ ከመ ፡ ያብርህ ፡ ሎቱ ፡ በሌሊት ፤ ለሐኮ ፡ በአጻብዒሁ ፡ ወፈጠሮ ፡ በአምሳሊሁ ፡ ወሰዐሞ ፡ ወነፍሐ ፡ ላዕሌሁ ፡ መንፈሰ ፡ ሕይወት ፡ ወይቤሎ ፡ ወልድየ ፡ በኵርየ ፡ ወፍቁርየ ፤ ወሤሞ ፡ ውስተ ፡ ገነት ፡ ከመ ፡ ይብላዕ ፡ ወይትፈጋፅ ፡ ዘእንበለ ፡ ደዌ ፡ ወሕማም ፡ ዘእንበለ ፡ ጻማ ፡ ወስራሕ ፡ ወአዘዞ ፡ ከመ ፡ ኢይብላዕ ፡ እምአሐቲ ፡ ዕፅ ፤ ወዘንተ ፡ ኵሎ ፡ እምድኅረ ፡ አወፈዮ ፡ ተዐደወ ፡ ወበልዐ ፡ እምይእቲ ፡ ዕፅ ፡ ወኮነ ፡ ጽሉአ ፡ ወምኑነ ፡ ወሰደዶ ፡ እምገነት ፤ እምይእዜሰ ፡ ቀብጸ ፡ ተስፋሁ ፡ እስመ ፡ ተዐደወ ፡ ትእዛዘ ፡ ፈጣሪሁ ። ወአውሥኦሙ ፡ እግዚኣብሔር ፡ ለመላእክት ፡ እለ ፡ ሐመይዎ ፡ ከመዝ ፡ ለአዳም ፡ ወይቤሎሙ ፡ ለምንት ፡ ከመዝ ፡ ተሐምይዎ ፡ ለአዳም ፡ እስመ ፡ ሥጋ ፡ ወደም ፡ ውእቱ ፡ ወሐመድ ፡ ወመሬት ፡ ውእቱ ። ወአውሥኡ ፡ መላእክት ፡ ወይቤልዎ ፡ ንንብብኑ ፡ ቅድሜከ ፡ እግዚኦ ፡ ኀጢአቶ ፡ ለአዳም ። ወይቤሎሙ ፡ እግዚኣብሔር ፡ ንብቡ ፡ ወእሰምዐክሙ ፡ አነሂ ፡ ወአወሥአክሙ ፡ በእንተ ፡ አዳም ፡ ገብርየ ፤ እስመ ፡ ተኬነወ ፡ እግዚኣብሔር ፡ በእንተ ፡ አዳም ፡ እስመ ፡ ይቤ ፡ ፈጠርክዎ ፡ እመሬት ፡ ወኢይገድፎ ፡ ለልሕኵትየ ፡ አምጻእክ ፡ እምኀበ ፡ ኢሀሎ ፡ ወኢይሬስዮ ፡ ስላተ ፡ ጸላኢሁ ፡ ለግብረ ፡ እደዊየ ። ወይቤሉ ፡ እሙንቱ ፡ መላእክት ፡ ስብሐት ፡ ለከ ፡ እግዚኦ ፡ እስመ ፡ አእመርከነ ፡ ማእምረ ፡ አልባብ ፡ ከመ ፡ ሐመይናሁ ፡ ለአዳም ፡ በእንተ ፡ ዘተዐደወ ፡ ትእዛዘ ፡ ዚአከ ፡ ከመ ፡ ኢይብላዕ ፡ እምአሐቲ ፡ ዕፅ ፡ እምድኅረ ፡ አመስፈንኮ ፡ ላዕለ ፡ ኵሉ ፡ ዘፈጠርከ ፡ ወሤምኮ ፡ ላዕለ ፡ ኵሉ ፡ ግብረ ፡ እደዊከ ፤ ወሶበ ፡ እመ ፡ ኢነገርኮ ፡ ወእመ ፡ ኢአዘዝኮ ፡ ከመ ፡ ኢይብላዕ ፡ እምይእቲ ፡ ዕፅ ፡ እመ ፡ ኢኮኖ ፡ ጌጋየ ፡ ወሶበኒ ፡ በልዐ ፡ በኀጢአ ፡ መብልዕ ፡ እመ ፡ ኢኮኖ ፡ ጌጋየ ፤ አላ ፡ አጠየቆ ፡ ቃለከ ፡ ወትቤሎ ፡ እመ ፡ በሊዐ ፡ ትበልዕ ፡ እምዝንቱ ፡ ዕፅ ፡ ሞተ ፡ ትመውት ፤ ወውእቱሰ ፡ እምድኅረ ፡ ሰምዐ ፡ ዘንተ ፡ ጠብዐ ፡ ወበልዐ ፤ ኢያኅጣእኮ ፡ ዘይበልዕ ፡ ጥዑመ ፡ ፍረያተ ፡ እምነ ፡ ገነት ፡ ወኢያኅጣእኮ ፡ ዘይናዝዞ ፡ ወቢጸ ፡ ዘይረድኦ ፡ ከማሁ ፤ ወዘንተ ፡ ንቤ ፡ ወአእመርከነ ፡ ወከሠትነ ፡ ለከ ፡ ከመ ፡ ተዐደወ ፡ ትእዛዝከ ። አውሥኦሙ ፡ መሓሪ ፡ ወመፍቀሬ ፡ ምሕረት ፡ ህየንተ ፡ አዳም ፡ ወይቤሎሙ ፡ አንትሙሰ ፡ ፩ ፡ ኅሊና ፡ ፈጠርኩክሙ ፡ ለስብሐት ፡ እምእሳት ፡ ወነፋስ ፡ ወሎቱሰ ፡ ፈጠርክዎ ፡ ምክዕቢተ ፡ ዚአክሙ ፡ እመሬት ፡ ወእማይ ፡ እምነፋስ ፡ ወእሳት ፤ ወኮነ ፡ ዘሥጋ ፡ ወደም ፤ ወቦቱ ፡ ፲ኅሊናተ ፡ ፭ዘሠናያት ፡ ወ፭ዘእኩይ ፡ ወለእመ ፡ አጥብዐ ፡ ልቡ ፡ ለሠናይ ፡ የሐውር ፡ በኅሊና ፡ ሠናይ ፡ ወለእመሰ ፡ አስሐቶ ፡ ዳያብሎስ ፡ የሐውር ፡ ኀቤሁ ፡ በፍኖት ፡ እኩይ ፤ ወአንትሙሰ ፡ አልብክሙ ፡ ባዕደ ፡ ኅሊና ፡ ዘእንበለ ፡ ስብሐትየ ፡ ዘእንበለ ፡ ውእቱ ፡ ዕቡይ ፡ ዘአሥረጻ ፡ ለእከይ ፡ ወኮነ ፡ እኩየ ፡ ወተስዕረ ፡ እማኅበርክሙ ፤ ወአንትሙኒ ፡ ለምንት ፡ ትትዔበዩ ፡ ላዕለ ፡ አዳም ፤ ወሶበ ፡ ኮንክሙ ፡ ከማሁ ፡ ወፈጠርኩክሙ ፡ እማይ ፡ ወመሬት ፡ እምኮንክሙ ፡ ሥጋ ፡ ወደም ፡ ወእምአፈድፈድክሙ ፡ እምኔሁ ፡ ዐሊወ ፡ ትእዛዝየ ፡ ወክሒደ ፡ ቃልየ ። ወይቤልዎ ፡ ስብሐት ፡ ለከ ፡ እግዚኦ ፤ ሐሰ ፡ ለነ ፡ ኢንትዐደው ፡ ትእዛዝከ ፡ ወኢነዐሉ ፡ ቃለከ ፡ እስመ ፡ ንሕነ ፡ መንፈሳዊያን ፡ ለሕይወት ፡ ወውእቱሰ ፡ መሬታዊ ፡ ለእበድ ፤ ወይእዜኒ ፡ እመ ፡ ንክል ፡ ጥዩቀ ፡ ፍትነነ ፡ ወአመክረነ ፡ ከመ ፡ ታእምር ፡ ለእመ ፡ ንክል ፡ ዐቂበ ፡ ቃልከ ። ወሶበ ፡ ከመዝ ፡ ተመክሑ ፡ ይቤሎሙ ፡ እግዚኣብሔር ፡ መፍቀሬ ፡ ሰብእ ፡ እምከመሰኬ ፡ ተስሕትክሙ ፡ በዐሊወ ፡ ቃልየ ፡ ግፍዕክሙ ፡ ላዕለ ፡ ርእስክሙ ፡ ሐረረት ፡ ገሀነም ፡ ወእሳት ፡ ወተይ ፡ ወመርቄ ፡ ወዐውሎ ፡ ምንባሪክሙ ፡ እስከ ፡ ዕለት ፡ ዐባይ ፡ ትትዐቀቡ ፡ በሰናስል ፡ ዘኢይትፈታሕ ፡ ወኢይሰበር ፡ እስከ ፡ ለዓለም ፤ ወለእመሰ ፡ ጥዩቀ ፡ ዐቀብክሙ ፡ ቃልየ ፡ ወገበርክሙ ፡ ትእዛዝየ ፡ ትነብሩ ፡ በየማንየ ፡ ወበፀጋምየ ፤ እስመ ፡ ኵሉ ፡ ዘሞአ ፡ ኀየለ ፡ ወዘሰ ፡ ተመውአ ፡ ተኀየለ ፤ እስመ ፡ ሰይጣንሂ ፡ አልቦ ፡ ኀይለ ፡ ዘእንበለ ፡ ዳእሙ ፡ ዘያሠርጽ ፡ ውስተ ፡ ኅሊና ፡ ወኢይኤዝዝ ፡ ወኢያጌብር ፡ ወኢይዘብጥ ፡ ወኢይስሕብ ፡ ወኢይእኅዝ ፡ ወኢይትዋሣእ ፡ አላ ፡ በጽምሚት ፡ ያሠርጽ ፡ ውስተ ፡ ኅሊና ፤ ወዘተሠጥዎ ፡ ለኅሊና ፡ እኩይ ፡ ይሬስዮ ፡ ለሀጕል ፡ ወእመሰ ፡ ሞኦ ፡ ለኅሊና ፡ እኩይ ፡ ረከበ ፡ ሞገሰ ፡ ወይከውኖ ፡ ምዝጋና ፡ እስከ ፡ ለዓለም ፤ ወአንትሙኒ ፡ በከመ ፡ ፈቀድክሙ ፡ ይኩን ፡ ላዕሌክሙ ፡ ኅሊና ፡ ሰብእ ፡ ወሥጋ ፡ ሰብእ ፡ ወባሕቱ ፡ ዑቁ ፡ ርእስክሙ ፡ ኢትትዐደዉ ፡ እምቃልየ ፡ ወኢትዕልዉ ፡ ትእዛዝየ ፡ ወኢታርኵሱ ፡ ርእስክሙ ፡ ኢበመብልዕ ፡ ወኢበመስቴ ፡ ወኢበዝሙት ፡ ወኢበዘኮነ ፡ ኢትዕድዉ ፡ እምቃልየ ። ወሶቤሃ ፡ ተውህቦሙ ፡ ምስለ ፡ ቃሉ ፡ ሥጋ ፡ ወደም ፡ ወልበ ፡ እጓለ ፡ እመሕያው ፡ ወተሠርሙ ፡ እመልዕልተ ፡ ሰማይ ፡ ወወረዱ ፡ ምድረ ፡ ኀበ ፡ እበደ ፡ ዘፍኖሙ ፡ ለደቂቀ ፡ ቀየን ፡ ምስለ ፡ ኵሉ ፡ ኪኖሙ ፡ ዘተኬነዉ ፡ በእበደ ፡ ዝሙቶሙ ፡ ወማሕሌቶሙ ፡ በከበሮ ፡ ወበመሰንቆ ፡ ወበዕንዚራ ፡ ወበረዓም ፡ ብዙኅ ፡ ምስለ ፡ ይባቤ ፡ ወማሕሌት ፤ ወአዋልዲሆሙኒ ፡ ህየ ፡ ሀለዋ ፡ ወይትዋነያ ፡ ዘእንበለ ፡ ኀፍረት ፡ እስመ ፡ ተምዕዛ ፡ ሎሙ ፡ ወአደማሆሙ ፡ ወሆካ ፡ ኅሊናሆሙ ፤ ወኢተዐገሱ ፡ አሐተ ፡ ሰዐተ ፡ አላ ፡ ነሥኡ ፡ ሎሙ ፡ ለርእሶሙ ፡ እምኔሆን ፡ ዘዘ ፡ ኀረዩ ፡ አንስትያ ፡ ወአበሱ ፡ ምስሌሆን ፤ እስመ ፡ እግዚኣብሔር ፡ ኢያዐርፍ ፡ ውስተ ፡ ልበ ፡ ዕቡያን ፡ ወሐማይያን ፡ አላ ፡ ያዐርፍ ፡ ውስተ ፡ ልበ ፡ ትሑታን ፡ ወየዋሃን ፡ ወበወንጌልሂ ፡ ነገረ ፡ እንዘ ፡ ይብል ፡ አሌሎሙ ፡ ለእለ ፡ ያጸድቁ ፡ ርእሶሙ ፡ ወይሜንኑ ፡ ቢጾሙ ፤ ወካዕበ ፡ ይቤ ፡ እስመ ፡ እግዚኣብሔር ፡ ያፈቅሮሙ ፡ ለትሑታን ፡ ወያኀስሮሙ ፡ ለእለ ፡ ያዐብዩ ፡ ርእሶሙ ። ወሶቤሃ ፡ ተምዕዖሙ ፡ እግዚኣብሔር ፡ ወአሰሮሙ ፡ ውስተ ፡ ረዓደ ፡ ሲኦል ፡ እስከ ፡ ዕለተ ፡ ፍዳ ፤ በከመ ፡ ይቤ ፡ ሐዋርያ ፡ ለመላእክቲሁ ፡ አቢሶሙ ፡ ጥቀ ፡ ኢመሐኮሙ ፡ አላ ፡ ውስተ ፡ ደይን ፡ አንበሮሙ ፡ ወተአስሩ ፡ ለዕለት ፡ ዐባይ ፤ ሞአ ፡ ቃለ ፡ እግዚኣብሔር ፡ ዘተኬነወ ፡ በልሕኵቱ ፡ አዳም ፡ ወተመውኡ ፡ እለ ፡ ሐመይዎ ፡ ወተሳለቁ ፡ ላዕሌሁ ፡ ለአዳም ። ወእለሰ ፡ ተስሕቱ ፡ ቦቶን ፡ መላእክት ፡ አዋልደ ፡ ቀየን ፡ ፀንሳ ፡ ወስእና ፡ ወሊደ ፡ ወሞታ ፡ ወእለ ፡ ውስተ ፡ ከርሦንሂ ፡ ቦእለ ፡ ሞቱ ፡ ወቦእለ ፡ ወፅኡ ፡ ሠጢቆሙ ፡ ከርሠ ፡ እሞሙ ፡ ወፅኡ ፡ እንተ ፡ ሕንብርቲሆን ፤ ወሶበ ፡ ልህቁ ፡ ወተሐፅኑ ፡ ኮኑ ፡ ረዐይተ ፡ እለ ፡ ኑኆሙ ፡ ይበጽሕ ፡ እስከ ፡ ደመናት ፡ ዘበእንቲአሆሙ ፡ ወበእንተ ፡ ኃጥኣን ፡ አነኀ ፡ መዐቶ ፡ ላዕሌሆሙ ፡ እግዚኣብሔር ፡ ወይቤ ፡ ኢይንበር ፡ መንፈስየ ፡ ላዕሌሆሙ ፡ ዘእንበለ ፡ ፻ወ፳ ፡ ንመት ፤ ወአኅለቆሙ ፡ በማየ ፡ አይኅ ፡ ሎሙኒ ፡ ወለኵሎሙ ፡ ኃጥኣን ፡ እለ ፡ አልቦሙ ፡ አሚነ ፡ በቃለ ፡ እግዚኣብሔር ፤ ወእለሰ ፡ አምኑ ፡ በቃለ ፡ አበዊሆሙ ፡ ወገብሩ ፡ ፈቃዶ ፡ አልቦ ፡ ዘረከቦሙ ፡ እኩይ ፡ እምውእቱ ፡ አይኅ ፡ አላ ፡ አድኀኖሙ ፡ እንዘ ፡ ይብል ፡ ለእመ ፡ አመንከ ፡ ቃልየ ፡ ትክል ፡ ድኂነ ፡ እምአይኅ ፤ ወይቤ ፡ ኖሕ ፡ አመንኩ ፡ እግዚኦ ፡ ቃልከ ፡ ወአይድዐኒ ፡ በዘ ፡ እድኅን ፤ ወይቤሎ ፡ በዕፅ ፡ ትድኅን ፡ እማይ ፤ ወይቤ ፡ እፎ ፡ እግዚእየ ፤ ወይቤሎ ፡ ግበር ፡ ታቦተ ፡ ርብዕት ፡ ወጽርባ ፡ ወግበር ፡ ላቲ ፡ ፫ ፡ ውሣጥያተ ፡ ወባእ ፡ ውስቴታ ፡ ምስለ ፡ ኵሉ ፡ ቤትከ ፤ ወአምነ ፡ በቃለ ፡ እግዚኣብሔር ፡ ወገብረ ፡ ወድኅነ ። ወበእንተ ፡ ዝ ፡ ስምዑኒ ፡ እፈክር ፡ ለክሙ ፤ ሶበ ፡ አዘዘ ፡ እግዚኣብሔር ፡ እምወሀቦ ፡ ክንፈ ፡ ከመ ፡ ንስር ፡ ወእምአዕደዎ ፡ ብሔረ ፡ ሕያዋን ፡ ምስለ ፡ ኵሉ ፡ ቤቱ ፡ እስከ ፡ ያቈርር ፡ መዐተ ፡ ላዕለ ፡ ኃጥኣን ፡ እለ ፡ ኢየአምኑ ፡ ቃለ ፡ እግዚኣብሔር ፡ ወቃለ ፡ አበዊሆሙ ፡ አው ፡ እምአዕረጎ ፡ እስከ ፡ አየር ፡ አው ፡ እምአዘዞ ፡ ለማየ ፡ አይኅ ፡ ከመ ፡ አረፍት ፡ ከመ ፡ ኢይቅረባ ፡ ለአሐቲ ፡ ደብር ፡ ኀበ ፡ ያነብሮ ፡ ለኖሕ ፡ ወለደቂቁ ፡ ወለእለ ፡ ፈቀደ ፡ አራዊተ ፡ ወእንስሳ ፡ ከመ ፡ ኢይድፍኖሙ ፤ ወባሕቱ ፡ ዘንተ ፡ አእምሩ ፡ ከመ ፡ ሠምረ ፡ እግዚኣብሔር ፡ በዕፅ ፡ ዘተቀደሰ ፡ ኮነ ፡ መድኀኒተ ፡ ፍጥረቱ ፡ እሉ ፡ ታቦት ፡ ወዕፀ ፡ መስቀል ፤ ይቤሎ ፡ ግበር ፡ በዘ ፡ ትድኅን ፡ ዛቲኬ ፡ ታቦት ፡ ዘቤተ ፡ ክርስቲያን ፡ ወሶበኒ ፡ ይቤሎ ፡ ግበር ፡ ርብዕተ ፡ ያርኢ ፡ ዝኒ ፡ ከመ ፡ በርባዔ ፡ ትእምርተ ፡ መስቀል ፤ ፬መኣዝኒሃ ፡ ለታቦት ፡ ዝውእቱ ፡ አቅርንተ ፡ ምሥዋዕ ፤ በከመ ፡ አዘዞ ፡ ለሙሴ ፡ ይግበር ፡ ታቦተ ፡ እምዕፅ ፡ ዘኢይነቅዝ ፤ ወአነ ፡ እቄድሶ ፡ ለከ ፡ በይእቲ ፡ ግብረ ፡ እዴየ ፡ ሰማያዊት ፡ መንፈሳዊት ፡ ወአንተኒ ፡ ቀድስ ፡ ርእሰከ ፡ እምግምንና ፡ ወርኵስ ፡ ወዝሙት ፡ ወቂም ፡ ወሐሰት ፡ ምስለ ፡ እኁከ ፡ ወቤትከ ፡ ወንጹሕ ፡ በንጹሕ ፡ ሡዕ ፡ ሊተ ፡ ወአነ ፡ እትዌከፍ ፡ ለከ ፡ እምድኅረ ፡ ቀደስከ ፡ ርእሰከ ፡ ወቤትከ ፡ አዝዞሙ ፡ ለኵሉ ፡ ሕዝብ ፡ ይቀድሱ ፡ ርእሶሙ ፡ እስመ ፡ ቅድሳትየ ፡ በቅዱሳን ፤ ዘንተኬ ፡ ተኀሥሥ ፡ ታቦተ ፡ ኪዳንየ ፡ እንተ ፡ ፈጠርክዋ ፡ ለስብሐትየ ፡ ወለእመ ፡ መጻእክሙ ፡ በንጹሕ ፡ ልብ ፡ በፍቅር ፡ ወበሰላም ፡ ዘእንበለ ፡ ተቃጽቦ ፡ ወተሓምዮ ፡ ወአርታዕክሙ ፡ ልብክሙ ፡ ሊተ ፡ ወለቢጽክሙ ፡ እሰምዐክሙ ፡ ጸሎተክሙ ፡ ወኣፀምእ ፡ ስእለትክሙ ፡ በኵሉ ፡ ዘተጋነይክሙ ፡ ሊተ ፡ ወእመጽእ ፡ ወእሄሉ ፡ ምስሌክሙ ፡ ወኣንሶሱ ፡ ማእከሌክሙ ፡ ወአኀድር ፡ ውስተ ፡ አልባቢክሙ ፤ ወትከውኑኒ ፡ ሕዝብየ ፡ ወእከውነክሙ ፡ አምላክክሙ ፡ በጽድቅ ፠ ፠ ፠