99. Concerning the Two Servants
98. Concerning the Rod of Moses and the Rod of Aaron / Kebra Nagast / 99. Concerning the Two Servants 100. Concerning the Angels who rebelled

፺፻ ፡ በእንተ ፡ ክልኤቱ ፡ አግብርት ።

 

እስመ ፡ ብእሲ ፡ ንጉሥ ፡ ከመ ፡ ዘቦቱ ፡ ፪አግብርተ ፡ ፩ዕቡይ ፡ ወጽኑዕ ፡ ወ፩ትሑት ፡ ወድኩም ፡ ወተኀየሎ ፡ ውእቱ ፡ ዕቡይ ፡ ለውእቱ ፡ ትሑት ፡ ወዘበጦ ፡ ወቀተሎ ፡ ወሰለቦ ፤ ወርእዮሙ ፡ ንጉሥ ፡ እምልዑል ፡ መንበሩ ፡ ወካዕበ ፡ ውእቱ ፡ ንጉሥ ፡ ወሪዶ ፡ አኀዞ ፡ ለውእቱ ፡ ዕቡይ ፡ ወዘበጦ ፡ ወቀጥቀጦ ፡ ወአሰሮ ፡ ወወደዮ ፡ ውስተ ፡ ቤተ ፡ ጽልመት ፡ ወለውእቱሰ ፡ ትሑት ፡ ወድኩም ፡ ገብሩ ፡ አንሥኦ ፡ ወሐቀፎ ፡ ወነገፎ ፡ ጸበሎ ፡ ወኀፀቦ ፡ ወሶጠ ፡ ቅብአ ፡ ወወይነ ፡ ለቍስሉ ፡ ወጸዐኖ ፡ ዲበ ፡ አድጉ ፡ ወአብጽሖ ፡ ውስተ ፡ ሀገሩ ፡ ወአዕረጎ ፡ ዲበ ፡ መንበሩ ፡ ወአንበሮ ፡ በየማኑ ። ንጉሥሰ ፡ ክርስቶስ ፡ ውእቱ ፡ በአማን ፡ ወአግብርትኒ ፡ ዘእቤ ፡ ሰይጣን ፡ ዕቡይ ፡ ወአዳም ፡ ትሑት ፤ ወርእዮ ፡ ዘከመ ፡ ተኀየሎ ፡ ወአውደቆ ፡ ወረደ ፡ እምልዑል ፡ መንበሩ ፡ ወአንሥኦ ፡ ለአዳም ፡ ገብሩ ፡ ወአሰሮ ፡ ለሰይጣንሰ ፡ ውስተ ፡ ረዓደ ፡ ሲኦል ፤ ወለሥጋ ፡ አዳም ፡ አንበሮ ፡ ዲበ ፡ መንበረ ፡ መለኮት ፡ አዕበዮ ፡ ወአልዐሎ ፡ ወአክበሮ ፡ ወተሰብሐ ፡ እምነ ፡ ኵሎሙ ፡ እለ ፡ ፈጠረ ፡ መላእክት ፡ ወሊቃነ ፡ መላእክት ፡ እልፍ ፡ አእላፋት ፡ ወትእልፊተ ፡ አእላፋት ፡ መንፈሳዊያን ፤ እስመ ፡ አውደቆ ፡ ለዕቡይ ፡ ወአንሥኦ ፡ ለትሑት ፡ አኅሰሮ ፡ ለዕቡይ ፡ ወአክበሮ ፡ ለትሑት ፡ አስቆረሮ ፡ ለዕቡይ ፡ ወአፍቀሮ ፡ ለትሑት ፡ ተሀየዮ ፡ ለዝኁር ፡ ወመሐሮ ፡ ለነዳይ ፡ እምልዕልና ፡ አውደቆ ፡ ለዕቡይ ፡ ወእመሬት ፡ አንሥኦ ፡ ለምስኪን ፡ እምክብሩ ፡ ነሠቶ ፡ ለኀያል ፡ ወእሙስና ፡ አንሥኦ ፡ ለነዳይ ፤ እስመ ፡ ኀቤሁ ፡ ክብር ፡ ወኀሳር ፡ ለዘ ፡ ፈቀደ ፡ ያከብር ፡ ወለዘፈቀደ ፡ ያኀስር ፠ ፠ ፠