98. Concerning the Rod of Moses and the Rod of Aaron
97. Concerning the Murmuring of Israel / Kebra Nagast / 98. Concerning the Rod of Moses and the Rod of Aaron 99. Concerning the Two Servants

፺፰ ፡ በእንተ ፡ በትረ ፡ ሙሴ ፡ ወአሮን ።

 

ወነገሮሙ ፡ ሙሴ ፡ ዘንተ ፡ ወአምጽኡ ፡ በበአብያተ ፡ አበዊሆሙ ፡ እለ ፡ ኀረዩ ፡ ለንጽሕ ፡ ወኮነ ፡ ፲ ፡ ወ፪ ፡ አብትረ ፤ ወጸሐፈ ፡ ሙሴ ፡ አብትሪሆሙ ፡ በአስማተ ፡ አበዊሆሙ ፤ በትረ ፡ አሮን ፡ ተጽሕፈት ፡ በሌዊ ፡ ወበትረ ፡ ከርሚን ፡ ተጽሕፈ ፡ በይሁዳ ፡ ወበትረ ፡ አዶንያስ ፡ ተጽሕፈት ፡ በሮቤል ፡ ወኵሉ ፡ ቤተ ፡ እስራኤል ፡ ከማሁ ፡ ተጽሕፉ ፡ አብትሪሆሙ ፡ በበአስማተ ፡ አበዊሆሙ ። ወይቤሎ ፡ እግዚኣብሔር ፡ ውግር ፡ ኀበ ፡ ጽዮን ፡ ኀበ ፡ ደብተራ ፡ ዘመርጡል ፡ ወዕጸው ፡ ህየ ፡ እስከ ፡ ነግህ ፡ ወንሥኦን ፡ በቅድሜሆሙ ፡ ወሀቦሙ ፡ ለለ ፡ በትሮሙ ፡ ለለ ፡ አብያተ ፡ አበዊሆሙ ፡ ለለ ፡ አስማቲሆሙ ፡ ዘጽሑፍ ፡ ውስተ ፡ በትሩ ፡ ወዘተረክበ ፡ ትእምርት ፡ በውስተ ፡ በትሩ ፡ ውእቱ ፡ ኀረይኩ ፡ ይኩነኒ ፡ ካህነ ። ወነገሮሙ ፡ ሙሴ ፡ ዘንተ ፡ ነገረ ፡ ወገብሩ ፡ በከመ ፡ አዘዞሙ ፡ እግዚኣብሔር ። ወእምዝ ፡ ሶበ ፡ ጸብሐ ፡ ነሥአ ፡ ወመጽኡ ፡ ኵሉ ፡ አእሩገ ፡ እስራኤል ፡ ወአሮን ፤ ወቦአ ፡ ሙሴ ፡ በቅድሜሆሙ ፡ ወአልዐሎን ፡ ለአብትር ፡ ወአምጽኦን ፡ ቅድመ ፡ ኵሉ ፡ ሕዝብ ፡ ወተረክበት ፡ በትረ ፡ አሮን ፡ ምስለ ፡ ፍሬ ፡ ወጽጌ ፡ ከርካዕ ፡ እንተ ፡ ትምዕዝ ፡ ሠናየ ፡ መዐዛ ፤ ወይቤሎሙ ፡ ሙሴ ፡ ርእዩኬ ፡ ዛቲ ፡ በትር ፡ ዘኀረየ ፡ እግዚኣብሔር ፡ አምላክክሙ ፡ ኪያሁ ፡ ፍርሁ ፡ ወተቀነዩ ፡ ሎቱ ፤ ወሰገዱ ፡ ኵሉ ፡ ሕዝብ ፡ ለእግዚኣብሔር ። በትርኬ ፡ ይእቲ ፡ ማርያም ፡ ወዘእንበለ ፡ ትስተይ ፡ ማየ ፡ ዘሠረጸት ፡ ጽጌ ፡ ዘእንበለ ፡ ዘርአ ፡ ብእሲ ፡ ዘተወልደ ፡ እምኔሃ ፡ ቃለ ፡ እግዚኣብሔር ፤ ወዘይቤ ፡ ኀረይኩ ፡ ኣርኢ ፡ ትእምርተ ፡ ወይኩነኒ ፡ ካህነ ፡ ውእቱ ፡ እግዚኣብሔር ፡ ኀረያ ፡ ለማርያም ፡ እምኵሉ ፡ ተዓይነ ፡ እስራኤል ፤ በከመ ፡ ተነበየ ፡ ዳዊት ፡ አቡሃ ፡ ያበድሮን ፡ እግዚኣብሔር ፡ ለአናቅጸ ፡ ጽዮን ፡ እምኵሉ ፡ ተዓይኒሁ ፡ ለያዕቆብ ፤ ወመትልው ፡ ይቤ ፡ ነኪር ፡ ነገሩ ፡ በእንቲአኪ ፡ ሀገረ ፡ እግዚኣብሔር ፤ እምኵሉ ፡ ትዕይንተ ፡ እስራኤል ፡ ወአናቅጺሃ ፡ ሶበ ፡ ይብል ፡ አርምሞ ፡ አፉሃ ፡ ወንጽሐ ፡ ከናፍሪሃ ፡ ወስብሐት ፡ ዘይወፅእ ፡ እምአፉሃ ፡ ከመ ፡ ጸቃውዕ ፡ ዘይውሕዝ ፡ እምከናፍሪሃ ፡ ወንጽሐ ፡ ድንግልናሃ ፡ ዘእንበለ ፡ ጥልቀት ፡ ወዘእንበለ ፡ ሙስና ፡ ወርኵስ ፡ እምቅድመ ፡ ትለድኒ ፤ ወእምድኅረ ፡ ወለደትኒ ፡ ንጽሕትኒ ፡ ወቅድስትኒ ፡ ወከማሁ ፡ ከመኒ ፡ እስከ ፡ ለዓለም ፤ ወበሰማያትኒ ፡ ንጽሕት ፡ ምስለ ፡ መላእክት ፡ ታንሶሱ ፡ ወይእቲ ፡ በትረ ፡ አሮን ፡ ህሉት ፡ ይእቲ ፡ ውስተ ፡ ጽዮን ፡ ምስለ ፡ ጎሞር ፡ መና ፡ ምልእት ፡ ወምስለ ፡ ክልኤ ፡ ጽላት ፡ እለ ፡ ተጽሕፋ ፡ በአጽባዕተ ፡ እግዚኣብሔር ፡ ወጽዮን ፡ ሰማያዊት ፡ መንፈሳዊት ፡ መልዕልቴሆሙ ፡ ጽዮን ፡ እንተ ፡ ግብራ ፡ ወኅብራ ፡ ነኪር ፡ እንተ ፡ ለሊሁ ፡ ገባሪሃ ፡ ወኬንያሃ ፡ ለማኅደረ ፡ ስብሐቲሁ ፠ ወይቤሎ ፡ ለሙሴ ፡ ግበር ፡ ታቦተ ፡ እምዕዕ ፡ ዘኢይነቅዝ ፡ ወትለብጦ ፡ በወርቅ ፡ ጽሩይ ፡ እንተ ፡ ኵለንታሁ ፤ ወርቅሰ ፡ ጽርየተ ፡ መለኮት ፡ ዘወረደ ፡ እምሰማያት ፡ እስመ ፡ መለኮት ፡ ይእኅዝ ፡ ኵሎ ፡ ሰማያተ ፡ ወምድረ ፡ ወከማሁ ፡ በወርቅ ፡ ተለብጠት ፡ ታቦት ፡ ማኅደራ ፡ ለጽዮን ፡ ሰማያዊት ። ወታቦት ፡ ትተረጐም ፡ ማርያም ፡ ወዕፅ ፡ ዘኢይነቅዝ ፡ ይተረጐም ፡ ክርስቶስ ፡ መድኀኒነ ፡ ወጎሞር ፡ እንተ ፡ ይእቲ ፡ መሶበ ፡ ወርቅ ፡ እንተ ፡ ውስተ ፡ ታቦት ፡ ትተረጐም ፡ ይእቲ ፡ ማርያም ፡ ወመና ፡ ዘውስተ ፡ መሶብ ፡ ሥጋሁ ፡ ለክርስቶስ ፡ ይተረጐም ፡ ዘወረደ ፡ እምሰማያት ፡ ወቃለ ፡ እግዚኣብሔር ፡ ዘተጽሕፈ ፡ ውስተ ፡ ክልኤ ፡ ጽላት ፡ ይተረጐም ፡ ክርስቶስ ፡ ወልደ ፡ እግዚኣብሔር ፡ ወጽዮን ፡ መንፈሳዊት ፡ ትተረጐም ፡ ብርሃነ ፡ መለኮት ፤ መንፈሳዊት ፡ ባሕርይ ፡ እንተ ፡ ተገምረት ፡ ውስተ ፡ ታቦት ፡ በከመ ፡ ዕንቈ ፡ ባሕርይ ፡ እንተ ፡ ተኀቱ ፡ ዘብዙኅ ፡ ሤጣ ፡ ወይእኅዛ ፡ ዘአጥረያ ፡ ውስተ ፡ እዴሁ ፡ ወይፀብጣ ፡ ወያገምራ ፡ ውስተ ፡ እዴሁ ፡ ወእንዘ ፡ ሀለወት ፡ ውስተ ፡ እዴሁ ፡ ቦአ ፡ ወተገምረ ፡ ውስቴታ ፤ ወባሕርይ ፡ ዘአጥረያ ፡ ይተረጐም ፡ ቃለ ፡ እግዚኣብሔር ፡ ክርስቶስ ፡ ወእንተ ፡ ተእኅዘት ፡ ባሕርይ ፡ መንፈሳዊት ፡ ትተረጐም ፡ ማርያም ፡ ወላዲተ ፡ ብርሃን ፡ ዘእምኔሃ ፡ ተሠገወ ፡ አክራጦስ ፡ ዘአልቦቱ ፡ ቱስሕት ፡ በውስቴታ ፡ ገብረ ፡ ማኅፈደ ፡ ለርእሱ ፡ እምሥጋሃ ፡ ንጹሕ ፡ ወተወልደ ፡ እምኔሃ ፡ ብርሃን ፡ ዘእምብርሃን ፡ አምላክ ፡ ዘእምአምላክ ፡ ዘተወልደ ፡ በፈቃዱ ፡ ወኢተገብረ ፡ በእደ ፡ ካልእ ፡ አላ ፡ ለርእሱ ፡ ገብረ ፡ ማኅፈደ ፡ በእንተ ፡ ኢትትረከብ ፡ ጥበብ ፡ እንተ ፡ ዕዱት ፡ እምኅሊና ፡ ሰብእ ፠ ወካዕበ ፡ አመ ፡ አውፅኦሙ ፡ እግዚኣብሔር ፡ ለእስራኤል ፡ እምግብጽ ፡ ጸምኡ ፡ ማየ ፡ በቃዴስ ፡ ወአንጐርጐሩ ፡ ወበከዩ ፡ ኀበ ፡ ሙሴ ፡ ወሖረ ፡ ሙሴ ፡ ኀበ ፡ እግዚኣብሔር ፡ ወአይድዖ ፡ ዘንተ ፡ ለእግዚኣብሔር ፤ ወይቤሎ ፡ እግዚኣብሔር ፡ ንሣእ ፡ በትረከ ፡ ወዝብጣ ፡ ለይእቲ ፡ እዝኅ ፡ ወዘበጣ ፡ ሙሴ ፡ ኑኃ ፡ ወግድማ ፡ በአርአያ ፡ ትእምርተ ፡ መስቀል ፡ ወውሕዘት ፡ ማየ ፡ ፲ወ፪ ፡ አፍላግ ፡ ወሰትዩ ፡ እምኔሃ ፡ ወረወዩ ፡ ሰብኦሙ ፡ ወእንስሳሆሙ ፡ ወሰቲዮሙ ፡ ተለወቶሙ ፡ ይእቲ ፡ ኰኵሕ ። ወኰኵሕሰ ፡ ይተረጐም ፡ በክርስቶስ ፡ ወአፍላግ ፡ ሐዋርያት ፡ ወዘሰትዩ ፡ ትምህርተ ፡ ሐዋርያት ፡ ወበትርኒ ፡ ዕፀ ፡ መስቀል ፤ ወኰኵሕሰ ፡ በከመ ፡ ይቤ ፡ በወንጌል ፡ ዘሣረረ ፡ ዲበ ፡ ኰኵሕ ፡ ኢይትሀወክ ፡ እምአጋንንት ፤ ወካዕበ ፡ ይቤ ፡ አነ ፡ አንቀጽ ፤ ወካዕበ ፡ ይቤ ፡ አነ ፡ ዴዴ ፤ ወርእዩሂ ፡ ዘከመ ፡ ከፈሎሙ ፡ ለአርዳኢሁ ፡ እንዘ ፡ ይብል ፡ ወለእለ ፡ እምድኅሬሆሙ ፡ ጳጳሳት ፡ ወማኅበረ ፡ ክርስቲያን ፤ አንተ ፡ ኰኵሕ ፡ ይቤሎ ፡ ለጴጥሮስ ፡ ወላዕሌከ ፡ አሐንጾሙ ፡ ለሕዝበ ፡ ክርስቲያን ፤ ወዓዳ ፡ ይቤ ፡ አነ ፡ ኖላዌ ፡ አባግዕ ፡ ወሎቱኒ ፡ ይቤሎ ፡ ሥልሰ ፡ ረዐይኬ ፡ አባግዕየ ፤ ወካዕበ ፡ ይቤ ፡ አነ ፡ ጕንደ ፡ ዐጸደ ፡ ወይን ፤ ወሎሙኒ ፡ ይቤሎሙ ፡ አንትሙ ፡ አዕጹቂሁ ፡ ወአሕሩጊሁ ። ወበትረ ፡ ሙሴኒ ፡ እንተ ፡ ባቲ ፡ በዘገብረ ፡ ተኣምረ ፡ ትተረጐም ፡ ዕፀ ፡ መስቀል ፡ በዘአድኀኖ ፡ ለአዳም ፡ ወለደቂቁ ፡ እምሥቃየ ፡ አጋንንት ፡ ወበከመ ፡ ሙሴ ፡ ዘበጠ ፡ ባቲ ፡ ማየ ፡ ተከዜ ፡ ወረሰያ ፡ ደመ ፡ ወቀተለ ፡ ዓሣቲሆሙ ፡ ከማሁ ፡ ክርስቶስኒ ፡ በመስቀሉ ፡ ቀተሎ ፡ ለሞት ፡ ወአውፅኦሙ ፡ እምውስተ ፡ ሲኦል ፤ ወበከመ ፡ ሙሴ ፡ ዘበጠ ፡ በበትሩ ፡ ውስተ ፡ ነፋሳት ፡ ወጸልመ ፡ ኵላ ፡ ምድረ ፡ ግብጽ ፡ እስከ ፡ ፫ ፡ ዕለት ፡ ወ፫ ፡ ሌሊት ፡ ጽልመት ፡ ዘያርመሰምስ ፡ እስከ ፡ ኢይትነሥኡ ፡ እምስካቢሆሙ ፡ ወከማሁ ፡ ክርስቶስኒ ፡ ተሰቂሎ ፡ ዲበ ፡ ዕፅ ፡ አብርሀ ፡ ጽልመተ ፡ አልባበ ፡ ሰብእ ፡ ወተንሥአ ፡ እምዉታን ፡ በሣልስት ፡ ዕለት ፡ ወሣልስት ፡ ሌሊት ፤ ወበከመ ፡ በትረ ፡ ሙሴ ፡ ኮነ፡ ሚጦተ ፡ ወወልጦተ ፡ በቃለ ፡ እግዚኣብሔር ፡ እንዘ ፡ ይብስት ፡ ኮነት ፡ ዘነፍስ ፡ ወካዕበ ፡ እንዘ ፡ ነፍስ ፡ ኮነት ፡ ይብስተ ፡ ወከማሁ ፡ ክርስቶስኒ ፡ በዕፀ ፡ መስቀሉ ፡ ረሰየ ፡ ሕይወተ ፡ ለሕዝበ ፡ ክርስቲያን ፡ ለእለ ፡ አምኑ ፡ ቦቱ ፤ ረሰየ ፡ በትእምርተ ፡ መስቀል ፡ ከመ ፡ ይሰደዱ ፡ መንፈሰ ፡ አጋንንት ፡ እስመ ፡ ተውላጠ ፡ ኮኑ ፡ አጋንንት ፡ ወክርስቲያን ፡ እሙንቱ ፡ እንዘ ፡ መንፈሳዊያን ፡ ኮኑ ፡ ኅሱራነ ፡ በተዐድዎ ፡ ትእዛዘ ፡ እግዚኦሙ ፡ ኮኑ ፡ ስዱዳነ ፡ በኀይለ ፡ መስቀሉ ፡ ወንሕነኒ ፡ ኮነ ፡ መንፈሳዊያነ ፡ በነሢአ ፡ ሥጋሁ ፡ ወደሙ ፡ ህየንቴሆሙ ፡ ለእለ ፡ ተሰዱ ፡ መንፈሳዊያን ፡ ወኮነ ፡ ንሕነ ፡ ሰባሕያነ ፡ እለ ፡ አመነ ፡ በመስቀሉ ፡ ወበትንሣኤሁ ፡ ቅድስት ፤ ወበከመ ፡ ሙሴ ፡ ዘበጠ ፡ አድባረ ፡ ወአምጽአ ፡ መቅሠፍተ ፡ በትእዛዘ ፡ እግዚኣብሔር ፡ ሰፊሖ ፡ እዴሁ ፡ ምስለ ፡ በትሩ ፡ ከማሁ ፡ ክርስቶስኒ ፡ አውፅኦሙ ፡ ለአጋንንት ፡ እምላዕለ ፡ ሰብእ ፡ በኀይለ ፡ መስቀሉ ፡ ሰፊሖ ፡ እዴሁ ፡ ዲበ ፡ ዕፀ ፡ መስቀል ፤ ሶበ ፡ ይቤሎ ፡ እግዚኣብሔር ፡ ለሙሴ ፡ ዝብጥ ፡ በበትርከ ፡ ዘንተ ፡ ብሂል ፡ ዕትብ ፡ በማዕተበ ፡ መስቀሉ ፡ ለክርስቶስ ፡ ብሂል ፤ ወሶበ ፡ ይቤሎ ፡ እግዚኣብሔር ፡ ለሙሴ ፡ ስፋሕ ፡ እዴከ ፡ ዝኒ ፡ ብሂል ፡ ከመ ፡ በስፍሐተ ፡ እዴሁ ፡ አድኀነነ ፡ ክርስቶስ ፡ እምተቀንዮ ፡ ለጸላኢ ፡ ወወሀበነ ፡ ሕይወተ ፡ እንቲአሁ ፡ በስፍሐተ ፡ እዴሁ ፡ በዲበ ፡ ዕፀ ፡ መስቀል ፡ ብሂል ። ወአመኒ ፡ ይጸብኡ ፡ ዐማልቅ ፡ ምስለ ፡ እስራኤል ፡ ዐርገ ፡ ሙሴ ፡ ውስተ ፡ ደብር ፡ ወአሮን ፡ ምስሌሁ ፡ ዐርጉ ፡ ከመ ፡ ይጸልዩ ፡ እስመ ፡ ተኀየሉ ፡ ዐማሌቅ ፡ ወአዘዞ ፡ እግዚኣብሔር ፡ ለሙሴ ፡ ወይቤሎ ፡ ስፋሕ ፡ እዴከ ፡ እስከ ፡ ይረክቡ ፡ ኀይለ ፡ እስራኤል ፤ ወይቤ ፡ በውስተ ፡ ኦሪት ፡ ኮና ፡ ርቡባተ ፡ እዴሁ ፡ ለሙሴ ፡ እስከ ፡ ዕርበተ ፡ ፀሐይ ፡ አላ ፡ ባሕቱ ፡ ክቡዳት ፡ እደዊሁ ፡ ለሙሴ ፡ ወሶበ ፡ የዐፅቦ ፡ አውረደ ፡ እዴሁ ፡ እምዘ ፡ ሰፍሐ ፡ ይትዌጽዑ ፡ እስራኤል ፡ ወይመውእዎሙ ፡ ፀሮሙ ፤ ወሶበ ፡ ያሌዕል ፡ እዴሁ ፡ ወይሰፍሕ ፡ በርቱዕ ፡ ይትመውኡ ፡ ዐማሌቅ ፡ ወይሰድድዎሙ ፡ እስራኤል ፡ ወይመውእዎሙ ፡ ለፀሮሙ ፡ ዓማሌቅ ፤ ወዘንተ ፡ ሶበ ፡ ርእዩ ፡ አሮን ፡ ወሆር ፡ ነደቁ ፡ እብነ ፡ በየማኑ ፡ ወበፀጋሙ ፡ ለሙሴ ፡ ወአፅግዑ ፡ እደወ ፡ ሙሴ ፡ ላዕለ ፡ አእባን ፤ ዘነደቁ ፡ አሮን ፡ እንተ ፡ የማኑ ፡ ወሆር ፡ እንተ ፡ ፀጋሙ ፡ ወአኀዝዎ ፡ ዲበ ፡ መታክፍቲሆሙ ፡ ከመ ፡ ኢያግብእ ፡ እዴሁ ፡ እምዘሰፍሖ ። ወዘንተ ፡ እፌክር ፡ ለክሙ ፤ ፀብአ ፡ ዐማሌቅሰ ፡ ምስለ ፡ እስራኤል ፡ ፀብአ ፡ መሀይምናን ፡ ምስለ ፡ አጋንንት ፡ ውእቱ ፡ ወዘእንበለ ፡ ይሰቀል ፡ ክርስቶስ ፡ ሞእዎሙ ፡ ለቀደምት ፡ ወሶበ ፡ ሰፍሐ ፡ እዴሁ ፡ ዲበ ፡ ዕፀ ፡ መስቀል ፡ በእንተ ፡ ኀጢአተ ፡ አዳም ፡ ወደቂቁ ፡ ወሶበ ፡ ሰፍሐ ፡ እዴሁ ፡ ወተቀነወ ፡ እራኁ ፡ ሞእዎሙ ፡ እለ ፡ ይትዐተቡ ፡ በመስቀሉ ፡ ለክርስቶስ ፤ ስፍሐ ፡ እዴሁ ፡ ለሙሴ ፡ ይተረጐም ፡ ስቅለቱ ፡ ለክርስቶስ ፡ ወዘነደቁ ፡ አእባን ፡ አሮን ፡ ወሆር ፡ ይተረጐም ፡ ዕፀ ፡ መስቀል ፡ ወቅንዋት ፡ ወአሮን ፡ ይተረጐም ፡ በፈያታዊ ፡ የማን ፡ ወሆር ፡ በፈያታዊ ፡ ዘፀጋም ፡ ወዐማሌቅ ፡ ይተረጐም ፡ በአጋንንት ፡ ወንጉሦሙ ፡ ለዐማሌቅ ፡ ይተረጐም ፡ በሰይጣን ፤ ወአሜሃ ፡ ዘተመውኡ ፡ ውእቶሙ ፡ በትንሣኤሁ ፡ ለክርስቶስ ፡ ወበመስቀሉ ፡ ሞእናሆሙ ፡ ለአጋንንት ፡ ወለሰይጣን ። ወካዕበ ፡ አመ ፡ ይወፅኡ ፡ እስራኤል ፡ እምግብጽ ፡ ወፅኡ ፡ ውስተ ፡ ማይ ፡ መሪር ፡ ወኀጥኡ ፡ ዘይሰትዩ ፡ እምረተ ፡ ማዩ ፡ ወቀዳሚ ፡ ነጐርጓር ፡ አንጐርጐሩ ፡ በእንተ ፡ ምረተ ፡ ማይ ፤ ወይቤሎ ፡ እግዚኣብሔር ፡ ለሙሴ ፡ ንሣእ ፡ በትረከ ፡ ወደይ ፡ ውስቴቱ ፡ ወዕተቦ ፡ ይምነ ፡ ወፅግመ ፤ ወርኢ ፡ በዝንቱ ፡ ሶበ ፡ ይቤሎ ፡ እግዚኣብሔር ፡ ይኩን ፡ ጥዑመ ፡ እመ ፡ ኢኮነኑ ፡ ጥዑመ ፤ ወባሕቱ ፡ ያርኢ ፡ ከመ ፡ በትእምርተ ፡ መስቀል ፡ ይሤኒ ፡ ኵሉ ፡ ወማይ ፡ መሪር ፡ ይከውን ፡ ጥዑመ ፡ ወኵሉ ፡ ዘማሰነ ፡ በኀይለ ፡ መስቀሉ ፡ ለኢየሱስ ፡ ክርስቶስ ፡ ይከውን ፡ ሠናየ ፡ ወአዳመ ። ወባዕድኒ ፡ በዘ ፡ እነግረከ ፡ እምካልኣን ፡ ነቢያት ፡ በእንተ ፡ ስቅለቱ ፤ ይቤ ፡ ዳዊት ፡ ቀነዉኒ ፡ እደውየ ፡ ወእገርየ ፡ ዝኒ ፡ ገሃደ ፡ አርአየ ፡ በእንተ ፡ ቅንዋተ ፡ እደዊሁ ፡ ወእገሪሁ ፤ ወካዕበ ፡ ይቤ ፡ አስተዩኒ ፡ ብሒአ ፡ ለጽምእየ ፡ ዘኒ ፡ ገሃደ ፡ አርአየ ፡ ከመ ፡ ሰረበ ፡ ብሒአ ፡ በእንተ ፡ ስሕተቱ ፡ ለአዳም ፤ መንፈሰ ፡ ሕይወተ ፡ ዘነፍሐ ፡ ላዕሌሁ ፡ ለአዳም ፡ ሰረበ ፡ ብሒአ ፡ ወእድ ፡ እንተ ፡ ሣረረታ ፡ ለምድር ፡ ተቀነወት ፡ ዘበእንቲአሁ ፡ ለአዳም ፡ ተትሒቶ ፡ ተወልደ ፡ አያያተ ፡ ገብር ፡ ነሢኦ ፠ ፠ ፠