97. Concerning the Murmuring of Israel
96. Concerning the Prophecy about Christ / Kebra Nagast / 97. Concerning the Murmuring of Israel 98. Concerning the Rod of Moses and the Rod of Aaron

፺፯ ፡ ኀበ ፡ አንጐርጐሩ ፡ እስራኤል ።

 

ወካዕበ ፡ አንጐርጐሩ ፡ ደቂቀ ፡ እስራኤል ፡ በእንተ ፡ ተክህኖ ፡ ቅድመ ፡ እግዚኣብሔር ፡ እንዘ ፡ ይብሉ ፡ ንሕነሰ ፡ አኮኑ ፡ እስራኤል ፡ ንሕነ ፡ ዘርአ ፡ አብርሃም ፡ ወእፎ ፡ ዘኢንሠውዕ ፡ ንሕነ ፡ ከማሆሙ ፡ በውስተ ፡ ደብተራ ፡ ስምዕ ፡ በኀበ ፡ ታቦተ ፡ ሕጉ ፡ ለእግዚኣብሔር ፡ ጽዮን ፡ ቅድስት ፡ በመዓጥንት ፡ ወበዕጣን ፡ ወበቅድሳት ፡ ዘእንበለ ፡ ሙሴ ፡ ወአሮን ፡ እኁሁ ፡ ወደቂቆሙ ፡ ወንሕነሰ ፡ አኮኑ ፡ ሕዝብ ፡ እለ ፡ ኀረየነ ፡ ከማሆሙ ፡ ወንገብር ፡ ፈቃዶ ፤ ወሰሚዖ ፡ ሙሴ ፡ ይቤሎሙ ፡ ግበሩኬ ፡ ዘፈቀድክሙ ፤ ወሖሩ ፡ ወአግበሩ ፡ ሊቃናተ ፡ እስራኤል ፡ ፸ ፡ ማዕጠንታተ ፡ በዘ ፡ የዐጥኑ ፡ ለጽዮን ፡ ወይሴብሑ ፡ ለእግዚኣብሔር ፡ ወነሥኡ ፡ እምአብያቲሆሙ ፡ ዕጣነ ፡ ወፍሕመ ፡ በማዕጠንት ፡ ወሖሩ ፡ ወቦኡ ፡ ውስተ ፡ ቅድስተ ፡ ቅዱሳን ፡ ከመ ፡ ይዕጠኑ ፤ ወሶቤሃ ፡ ወደዩ ፡ ዕጣነ ፡ በአሐቲ ፡ ውዝዋዜ ፡ ማዕጠንት ፡ ወፅአ ፡ ነበልባል ፡ እመዓጥኒሆሙ ፡ ወውዕዩ ፡ ሶቤሃ ፡ ወተመስዉ ፡ ከመ ፡ ሠምዕ ፡ በቅድመ ፡ ገጸ ፡ እሳት ፡ ከማሁ ፡ ተመስዉ ፡ ከመ ፡ ሣዕር ፡ ይቡስ ፡ ሶበ ፡ ይረክቦ ፡ ነበልባለ ፡ እሳት ፡ ከማሁ ፡ ውዕዩ ፡ ምስለ ፡ ንዋየ ፡ ቅድሳቲሆሙ ፡ ወአልቦ ፡ ዘተርፈ ፡ ዘእንበለ ፡ መዓጥኒሆሙ ፤ ወይቤ ፡ እግዚኣብሔር ፡ ቀድስዎን ፡ ሊተ ፡ ለእሉ ፡ መዓጥንት ፡ ለደብተራየ ፡ ወይኩን ፡ ለመሥዋዕትየ ፡ እስመ ፡ ተቀደሰ ፡ በሞተ ፡ ዚአሆሙ ። ማዕጠንትሰ ፡ ማርያም ፡ ይእቲ ፡ ወፍሕምኒ ፡ ክርስቶስ ፡ ወልደ ፡ እግዚኣብሔር ፡ መለኮት ፡ ውእቱ ፡ ወጼና ፡ ዕጣን ፡ መዐዛሁ ፡ ለክርስቶስ ፡ ዘበ ፡ መዐዛሁ ፡ ሐዋርያት ፡ ወነቢያት ፡ ወሰማዕታት ፡ ወፈላስያን ፡ መነኑ ፡ ዓለመ ፡ ወወረሱ ፡ መንግሥተ ፡ ሰማያት ፤ ወአሕባሊሃ ፡ ለመዓጥንት ፡ ሰዋስው ፡ ዘርእየ ፡ ያዕቆብ ፡ በዘ ፡ ቦቱ ፡ የዐርጉ ፡ ወይወርዱ ፡ ተእኂዞሙ ፡ ባቲ ፡ ወምስለ ፡ ጢሰ ፡ ዕጣን ፡ የዐርግ ፡ ዲበ ፡ መንበረ ፡ እግዚኣብሔር ፡ ጸሎቶሙ ፡ ለንጹሓን ። ወሶበ ፡ አውዐዮሙ ፡ ነበልባል ፡ ለኃጥኣን ፡ ሐመይዎሙ ፡ ሕዝብ ፡ አዝማዲሆሙ ፡ ለእለ ፡ ኀልቁ ፡ ወይቤልዎሙ ፡ ለሙሴ ፡ ወለአሮን ፡ አኅለቅምዎሙ ፡ ለነ ፡ ለሊቃውንቲነ ፡ ወነሥኡ ፡ እብነ ፡ ከመ ፡ ይውግርዎሙ ፡ ለሙሴ ፡ ወለአሮን ፤ ወተምዕዐ ፡ እግዚኣብሔር ፡ መዓተ ፡ ላዕለ ፡ እስራኤል ፡ ወአስቆረራ ፡ ከመ ፡ ፀርቀ ፡ ትክቶ ፡ ለምክረ ፡ ዳታን ፡ ወአቤሮን ፡ ደቂቀ ፡ ቆሬ ፤ ወቀጸባ ፡ ቃለ ፡ እግዚኣብሔር ፡ ለምድር ፡ ወፈትሐት ፡ ምድር ፡ አፉሃ ፡ ወውኅጠቶሙ ፡ ምስለ ፡ ኵሉ ፡ ዘዚአሆሙ ፡ ወአንስቲያሆሙ ፡ ወደቂቆሙ ፡ ወእንስሳሆሙ ፤ ወረዱ ፡ ውስተ ፡ ሲኦል ፡ ሕያዋኒሆሙ ፡ ወተኀትመት ፡ ምድር ፡ በመልዕልቴሆሙ ፤ ወለሕዝብሰ ፡ እለ ፡ ኀብሩ ፡ ምስሌሆሙ ፡ ሰሚዖሙ ፡ ሐሜተ ፡ ዚአሆሙ ፡ ፈነወ ፡ ሎሙ ፡ እግዚኣብሔር ፡ ብድብደ ፡ ወሞቱ ፡ በአሐቲ ፡ ጊዜ ፤ ወቦኡ ፡ ሙሴ ፡ ወአሮን ፡ በዕጣን ፡ ወበማዕጠንት ፡ ወበከዩ ፡ በኀበ ፡ እግዚኣብሔር ፡ ወአስተስረዩ ፡ ለሕዝብ ፡ እንዘ ፡ ይብሉ ፡ ተዘከር ፡ እግዚኦ ፡ አብርሃምሃ ፡ ፍቁርከ ፡ ወይስሐቅ ፡ ቍልዔከ ፡ ወእስራኤል ፡ ቅዱስከ ፡ እስመ ፡ ዘርኦሙ ፡ ንሕነ ፡ ውሉደ ፡ ሕዝብከ ፡ አቍርር ፡ መዐተከ ፡ እምኔነ ፡ ወፍጡነ ፡ ስምዐነ ፡ ወኢታማስነነ ፡ ወአእትት ፡ መቅሠፍተ ፡ እምላዕለ ፡ ሕዝብከ ፤ ወእግዚኣብሔር ፡ መሓሪ ፡ ርእየ ፡ የውሃቶ ፡ ለሙሴ ፡ ወመሐሮሙ ፤ ወነበቦ ፡ እግዚኣብሔር ፡ ለሙሴ ፡ ወይቤሎ ፡ ንግሮሙ ፡ ለዝንቱ ፡ ሕዝብ ፡ ወበሎሙ ፡ ቀድሱ ፡ ርእሰክሙ ፡ ወአምጽኡ ፡ በበአብያተ ፡ አበዊክሙ ፡ በትረ ፤ ወጸሐፉ ፡ ከመ ፡ ታእምሩ ፡ በትሮሙ ፡ አንተ ፡ ወአሮን ፡ እኁከ ፤ ወእምቤትክሙሂ ፡ ይጽሐፍ ፡ አሮን ፡ በትሮ ፤ ወበትርከሰ ፡ ኢትጽሐፍ ፡ እስመ ፡ ፍጽምት ፡ ትእምርት ፡ ለደቂቀ ፡ ሕዝብከ ፡ ቅስት ፡ ለዐላውያን ፡ ወለኵሎሙ ፡ እለ ፡ አምኑሰ ፡ ትእምርተ ፡ ሕይወት ፤ ወሶበ ፡ ጸሐፍከ ፡ ይእዜ ፡ ምስሌሆሙ ፡ ይብሉከ ፡ ዛቲሰ ፡ እምትካት ፡ ገባሪተ ፡ መንክር ፡ በቃለ ፡ እግዚኣብሔር ፡ እምይቤሉ ፡ ሶበ ፡ አርአይኩ ፡ ተኣምረ ፡ በውስቴታ ፤ አላ ፡ ለቤተ ፡ አቡከ ፡ ጸሐፍ ፡ በትረ ፡ አሮን ፠ ፠ ፠