96. Concerning the Prophecy about Christ
95. How the honourable estate of the King of Ethiopia was univer / Kebra Nagast / 96. Concerning the Prophecy about Christ 97. Concerning the Murmuring of Israel

፺፮ ፡ በእንተ ፡ ትንቢት ፡ ዘክርስቶስ ።

 

ወካዕበ ፡ ሰበከ ፡ ሙሴ ፡ በኦሪት ፡ ወይቤ ፡ ነቢየ ፡ ያነሥእ ፡ ለክሙ ፡ ዘከማየ ፡ እምአኀዊክሙ ፡ ወስምዕዎ ፡ ለውእቱ ፡ ነቢይ ፡ ወኵሉ ፡ ነፍስ ፡ እንተ ፡ ኢትሰምዖ ፡ ለውእቱ ፡ ነቢይ ፡ ይእቲ ፡ ነፍስ ፡ ለትሠሮ ፡ እምሕዝባ ፤ ወዘንተ ፡ ይቤ ፡ በእንተ ፡ ክርስቶስ ፡ ወልደ ፡ እግዚኣብሔር ። ወካዕበ ፡ ተነበየ ፡ በእንተ ፡ ስቅለቱ ፡ ወይቤ ፡ ሶበ ፡ አመንደብዎሙ ፡ አክይስት ፡ ለደቂቀ ፡ እስራኤል ፡ አውየዉ ፡ ኀበ ፡ ሙሴ ፡ ወሙሴሂ ፡ አውየወ ፡ ኀበ ፡ እግዚኣብሔር ፡ ከመ ፡ ያድኅኖሙ ፡ እምአርዌ ፡ ምድር ፡ ወይቤሎ ፡ ግበር ፡ ሥዕለ ፡ ከይሲ ፡ ዘብርት ፡ ወስቅሎ ፡ ኀበ ፡ ይትኤመርዎ ፡ ወኵሉ ፡ ዘነሰኮ ፡ ከይሲ ፡ ይነጽሮ ፡ ለውእቱ ፡ ሥዕለ ፡ ብርት ፡ ወይሕየው ፡ ወሶበ ፡ ተሀከዩ ፡ ነጽሮ ፡ ይመውቱ ፡ ወእለሰ ፡ ነጸርዎ ፡ ወአምኑ ፡ የሐይዉ ፤ ወከማሁ ፡ ክርስቶስ ፡ ለእለ ፡ ተሀከዩ ፡ ወኢአምኑ ፡ ቦቱ ፡ የኀልቁ ፡ በሲኦል ፡ ወእለሰ ፡ አምኑ ፡ ወሰምዑ ፡ ይወርሱ ፡ ምድረ ፡ ሕይወት ፡ ዘለዓለም ፡ ኀበ ፡ አልቦ ፡ ደዌ ፡ ወሕማም ፡ ዘለዓለም ። ወዘከመሂ ፡ ተሀየይዎ ፡ ለክርስቶስ ፡ ቃለ ፡ እግዚኣብሔር ፡ ንሕነ ፡ ናየድዐክሙ ፤ ሶበ ፡ ሐመይዎ ፡ ለሙሴ ፡ ደቂቀ ፡ እስራኤል ፡ እንዘ ፡ ይብሉ ፡ ለባሕቲቱኑ ፡ ለሙሴ ፡ ዘተናገሮ ፡ እግዚኣብሔር ፡ ወንሕነሰ ፡ እፎ ፡ ዘኢንሰምዕ ፡ ቃለ ፡ እግዚኣብሔር ፡ ከመ ፡ ንእመን ፡ ቦቱ ፡ ወሰምዐ ፡ እግዚኣብሔር ፡ ማእመሬ ፡ አልባብ ፡ ሐሜቶሙ ፡ ለደቂቀ ፡ እስራኤል ፡ ወይቤሎ ፡ ለሙሴ ፡ ወአንተሰ ፡ በዝየ ፡ ትስእል ፡ ስርየተ ፡ ለሕዝብከ ፡ ወእሙንቱሰ ፡ ሐመዩከ ፡ እንዘ ፡ ይብሉ ፡ ለነሰ ፡ እፎ ፡ ዘኢይትናገረነ ፡ እግዚኣብሔር ፤ ወይእዜኒ ፡ ለእመ ፡ አምኑኒ ፡ ይምጽኡ ፡ ኀቤየ ፡ ምስሌከ ፡ ዝየ ፡ ወበሎሙ ፡ ከመ ፡ ያንጽሑ ፡ ርእሶሙ ፡ ወይኅፅቡ ፡ አልባሲሆሙ ፡ ወይዕርጉ ፡ ዐበይተ ፡ እስራኤል ፡ ከመ ፡ ይስምዑ ፡ ዘአነ ፡ እኤዝዞሙ ፡ ወይስምዑ ፡ ቃልየ ፡ ወይግበሩ ፡ ትእዛዝየ ፡ ዘአነ ፡ አዘዝኩ ፤ ወተአዚዞ ፡ ሙሴ ፡ ነገሮሙ ፡ ለደቂቀ ፡ እስራኤል ፡ ወሰገዱ ፡ ሕዝብ ፡ ለእግዚኣብሔር ፡ ወአንጽሑ ፡ ርእሶሙ ፡ በሣልስት ፡ ዕለት ፡ ወዐርጉ ፡ ውስተ ፡ ደብረ ፡ ሲና ፡ ፸ ፡ አእሩገ ፡ እስራኤል ፡ ወወፅኡ ፡ እምትዕይንት ፡ ወዐርጉ ፡ ውስተ ፡ ደብረ ፡ ሲና ፡ እንዘ ፡ ይትራሐቁ ፡ መጠነ ፡ ምንዳፈ ፡ ሐጽ ፡ ቆሙ ፡ በበ፩ ፡ በአንጻረ ፡ ቢጹ ፡ ወእሙንቱሰ ፡ መጠነ ፡ ቦሙ ፡ ፈተኑ ፡ ምግባሮሙ ፡ ወኢክህሉ ፡ ዐሪገ ፡ ውስተ ፡ ቆባር ፡ ምስለ ፡ ሙሴ ፡ ወአኀዞሙ ፡ ረዓድ ፡ ወድንጋፄ ፡ ወደፈኖሙ ፡ ጽላሎተ ፡ ሞት ፡ ወሰምዑ ፡ ቃለ ፡ ቀርን ፡ ወዕንዚራ ፡ ወጽልመት ፡ ወነፋስ ፤ ወቦአ ፡ ሙሴ ፡ ውስተ ፡ ቆባር ፡ ወተናገረ ፡ ምስለ ፡ እግዚኣብሔር ፡ ወሰምዑ ፡ ኵሎሙ ፡ ዐበይተ ፡ እስራኤል ፡ ውእቱ ፡ ቃለ ፡ እግዚኣብሔር ፡ ፈርሁ ፡ ወርዕዱ ፡ ወኢክህሉ ፡ ቀዊመ ፡ እምብዝኀ ፡ ፍርሀት ፡ ዘውስተ ፡ ልቦሙ ፤ ወሶበ ፡ ወፅአ ፡ ሙሴ ፡ ይቤልዎ ፡ ኢንሰምዓ ፡ ለዛቲ ፡ ቃለ ፡ እግዚኣብሔር ፡ ከመ ፡ ኢንሙት ፡ በድንጋፄ ፡ ወናሁ ፡ አእመርነ ፡ ከመ ፡ ተናገረከ ፡ እግዚኣብሔር ፡ ወለእመቦ ፡ ዘይነግረነኬ ፡ አንተ ፡ ስማዕ ፡ ወንግረነ ፡ ወኩነነ ፡ አፈ ፡ በኀበ ፡ እግዚኣብሔር ፡ ወንከውኖ ፡ ሕዝበ ፡ ዚአሁ ። ትሬእዩኑ ፡ ዘከመ ፡ ክሕድዎ ፡ ለክርስቶስ ፡ ወይቤሉ ፡ ኢንሰምዖ ፡ ለውእቱ ፡ ቃል ፡ ከመ ፡ ኢንሙት ፡ በድንጋፄ ፤ ወቃልሰ ፡ ዘእግዚኣብሔር ፡ ክርስቶስ ፡ ውእቱ ፤ ወአሜሃ ፡ ዘይቤሉ ፡ ኢንስምዖ ፡ ለውእቱ ፡ ቃል ፡ ኢነአምኖ ፡ ለክርስቶስ ፡ ብሂል ፠ ወካዕበ ፡ ሰአለ ፡ ሙሴ ፡ ኀበ ፡ እግዚኣብሔር ፡ ወይቤ ፡ አርእየኒ ፡ ገጽከ ፤ ወይቤሎ ፡ እግዚኣብሔር ፡ ለሙሴ ፡ እስመ ፡ አልቦ ፡ ዘይክል ፡ ርኢየ ፡ ገጽየ ፡ ወየሐዩ ፡ ወባሕቱ ፡ ከመ ፡ መጽሔት ፡ ሚጥ ፡ ገጽከ ፡ ለምዕራብ ፡ ወትሬኢ ፡ በውስተ ፡ ኰኵሕ ፡ መጽሔተ ፡ ገጽየ ፤ ወሶበ ፡ ርእየ ፡ ሙሴ ፡ ጽላሎተ ፡ ገጹ ፡ ለእግዚኣብሔር ፡ በርሀ ፡ ገጹ ፡ ምስብዒተ ፡ እምነ ፡ ፀሐይ ፡ እስከ ፡ ኢይክሉ ፡ ደቂቀ ፡ እስራኤል ፡ ነጽሮተ ፡ ገጹ ፡ ዘእንበለ ፡ በግላ ፤ ወርእየ ፡ አሜሃኒ ፡ ከመ ፡ ኢፈተዉ ፡ ይርአዩ ፡ ገጸ ፡ እግዚኣብሔር ፡ አላ ፡ ይቤልዎ ፡ ግበር ፡ ለነ ፡ ግላ ፡ ከመ ፡ ኢንርአይ ፡ ገጽከ ፤ ወዘንተ ፡ ሶበ ፡ ይቤሉ ፡ ይትዐወቅ ፡ ከመ ፡ ጸልእዎ ፡ ለክርስቶስ ፡ ሰሚዐ ፡ ቃሉ ፡ ወርኢየ ፡ ገጹ ። ዓዲ ፡ ሶበ ፡ አዕረጎ ፡ አብርሃም ፡ ለይስሐቅ ፡ ወልዱ ፡ ውስተ ፡ ደብረ ፡ ቀርሜሌስ ፡ አውረደ ፡ እምሰማያት ፡ ቤዛ ፡ ይስሐቅ ፡ በግዐ ፡ ወይስሐቅሰ ፡ ኢተጠብሐ ፡ አላ ፡ ተጠብሐ ፡ በግዕ ፡ ዘወረደ ፡ እምሰማያት ፤ እስመ ፡ አብርሃም ፡ ይተረጐም ፡ በእግዚኣብሔር ፡ አብ ፡ ወይስሐቅኒ ፡ ይተረጐም ፡ አምሳሊሁ ፡ ለክርስቶስ ፡ ወልድ ፤ ወአመ ፡ ይወርድ ፡ እምሰማያት ፡ ለመድኀኒተ ፡ አዳም ፡ ወደቂቁ ፡ ኢተጠብሐ ፡ መለኮት ፡ ዘወረደ ፡ እምሰማያት ፡ አላ ፡ ተጠብሐት ፡ ሥጋሁ ፡ እንተ ፡ ለብሰ ፡ በእንቲአነ ፡ ይእቲ ፡ ምድራዊት ፡ እንተ ፡ ለብሰ ፡ እማርያም ፤ ትሌብዉኑ ፡ ወትጤይቁ ፡ ዘንተ ፡ አርአያ ፡ ወአምሳለ ፡ ለምድራዊ ፡ ይስሐቅ ፡ ወልደ ፡ አብርሃም ፡ ዘኮነ ፡ መሥዋዕተ ፡ ለፈቃደ ፡ አቡሁ ፤ ኮነ ፡ ሎቱ ፡ ቤዛሁ ፡ በግዕ ፡ ሰማያዊ ፡ ወተቤዘወ ፡ ወልደ ፡ አብርሃም ፡ ወለዘሰ ፡ ወረደ ፡ ወልደ ፡ እግዚኣብሔር ፡ ኮነ ፡ ቤዛሁ ፡ ለመለኮት ፡ ሥጋሁ ፡ ለምድራዊ ፡ ወሞተ ፡ በሥጋሁ ፡ እንዘ ፡ ኢየሐምም ፡ መለኮቱ ፡ ወተውላጠ ፡ ኮነ ፤ መዋቲት ፡ ኮነት ፡ ሕይወተ ፡ በትንሣኤሃ ፡ ምስለ ፡ መለኮት ። ወገሃደ ፡ ተዐውቀ ፡ ዕበይነ ፡ ለሰብእ ፡ በእንተ ፡ ዘቤዘወነ ፡ ክርስቶስ ፡ ወልደ ፡ እግዚኣብሔር ፤ ወፈድፋደ ፡ ናክብራ ፡ በምድርኒ ፡ ወበሰማይኒ ፡ ለዛቲ ፡ እግዝእትነ ፡ ወላዲተ ፡ አምላክ ፡ ማርያም ፡ ድንግል ። ወስምዑ ፡ ዘኒ ፡ ፍካሬ ፡ ቀዳማዊ ፡ ብእሲ ፡ ዘውእቱ ፡ አቡነ ፡ አዳም ፤ ዘእንበለ ፡ ትድምርት ፡ ወሩካቤ ፡ እምዐፅመ ፡ ገቦሁ ፡ ተፈጥረት ፡ ሔዋን ፡ እምብእሲ ፡ ወይእቲ ፡ ኮነቶ ፡ ቢጾ ፤ ወሰሚዓ ፡ ቃለ ፡ ሕብል ፡ እምዕድዉ ፡ ለአዳም ፡ ኮነቶ ፡ ቀታሊተ ፡ በአዕልዎ ፡ ትእዛዝ ፤ ወበምሕረቱ ፡ እግዚኣብሔር ፡ አብ ፡ ፈጠራ ፡ ለባሕርይ ፡ በውስተ ፡ ከርሡ ፡ ለአዳም ፤ አንጺሖ ፡ ሥጋሃ ፡ ወቀዲሶ ፡ አኅደራ ፡ ላዕሌሃ ፡ ለመድኀኒቱ ፤ ተወልደት ፡ ዘእንበለ ፡ ጥልቀት ፡ እስመ ፡ ገብራ ፡ ለንጽሕት ፡ ዘእንበለ ፡ ርስሐት ፡ ወይእቲ ፡ ፈደየት ፡ ዕዳሁ ፡ ዘእንበለ ፡ ትድምርት ፡ ወዘእንበለ ፡ ሩካቤ ፤ ወለደት ፡ በሥጋ ፡ ሰማያዊ ፡ ንጉሠ ፡ ወውእቱ ፡ ተወልደ ፡ እምኔሃ ፡ ወሐደሳ ፡ ለሕይወት ፡ በንጽሐ ፡ ሥጋሁ ፡ ወቀተሎ ፡ ለሞት ፡ በሥጋሁ ፡ ንጽሕት ፡ ወተንሥአ ፡ ዘእንበለ ፡ ሙስና ፡ ወአንሥአነ ፡ ምስሌሁ ፡ ኀበ ፡ ኢመዋቲት ፡ መንበረ ፡ መለኮት ፡ ወአዕረገነ ፡ ኀቤሁ ፡ ወተወለጥነ ፡ ሕይወተ ፡ በሥጋነ ፡ መዋቲት ፡ ወረከብነ ፡ ሕይወተ ፡ እንተ ፡ ኢትመውት ፤ በስሕታተ ፡ አዳም ፡ ተመንደብነ ፡ ወበትዕግሥተ ፡ ክርስቶስ ፡ ተፈወስነ ፡ በዕልወተ ፡ ሔዋን ፡ ሞትነ ፡ ወተቀበርነ ፡ ወበንጽሓ ፡ ለማርያም ፡ ከበርነ ፡ ወተላዐልነ ፡ እስከ ፡ አርያም ። ተነበየ ፡ ካዕበ ፡ ሕዝቅኤል ፡ በእንተ ፡ ማርያም ፡ ወይቤ ፡ ርኢኩ ፡ ኆኅተ ፡ በምሥራቅ ፡ ኅቱም ፡ በዐቢይ ፡ መንክር ፡ ማኅተም ፡ ወአልቦ ፡ ዘቦአ ፡ ውስቴታ ፡ ዘእንበለ ፡ እግዚአ ፡ ኀያላን ፡ ቦአ ፡ ውስቴታ ፡ ወወፅአ ፤ ዘኒ ፡ ፍካሬሁ ፡ ስምዑ ፤ ዘይቤ ፡ ርኢኩ ፡ ኆኅተ ፡ በአማን ፡ ኆኅተ ፡ አንቀጸ ፡ ሰማይ ፡ ሙባአሙ ፡ ለቅዱሳን ፡ ውስተ ፡ መንግሥተ ፡ ሰማያት ፤ ወበምሥራቅ ፡ ሶበ ፡ ይብል ፡ በእንተ ፡ ንጽሐ ፡ ወአዳም ፡ ሥና ፤ ይብልዋ ፡ አንቀጸ ፡ አድኅኖ ፡ ወይብልዋ ፡ ምሥራቅ ፡ ዘይኔጽርዎ ፡ ቅዱሳን ፡ በፍሥሓ ፡ ወበሐሤት ፤ ወዕጹታ ፡ ዘይቤ ፡ በእንተ ፡ ንጽሐ ፡ ድንግልናሃ ፡ ወሥጋሃ ፤ ወበእንተ ፡ ዘይቤ ፡ በዐቢይ ፡ መንክር ፡ ማኅተም ፡ ዝኒ ፡ ያርኢ ፡ ገሃደ ፡ በእግዚኣብሔር ፡ ዐቢይ ፡ መንክር ፡ በመንፈስ ፡ ቅዱስ ፡ ተኀትመት ፤ ወዘይቤሂ ፡ አልቦ ፡ ዘቦአ ፡ ውስቴታ ፡ ዘእንበለ ፡ እግዚአ ፡ ኀያላን ፡ ቦአ ፡ ወወፅአ ፡ ውእቱኬ ፡ ፈጣሬ ፡ ሰማያት ፡ ወምድር ፡ ፈጣሬ ፡ መላእክት ፡ ወሰብእ ፡ ወእጋእዝት ፡ እግዚአ ፡ ኀያላን ፡ ውእቱ ፡ ፍሬ ፡ መለኮት ፡ ዘለብሰ ፡ ሥጋነ ፡ እምኔሃ ፡ ክርስቶስ ፡ ቦአ ፡ ወወፅአ ፡ እንተ ፡ ኀቤሃ ፡ ዘእንበለ ፡ ሙስና ። ወካዕበ ፡ ተነበየ ፡ ሙሴ ፡ በእንተ ፡ ማርያም ፡ ወይቤ ፡ ርኢኩ ፡ ጳጦስ ፡ በደብረ ፡ ሲና ፡ እንተ ፡ ኢያውዐያ ፡ እሳት ፡ በላዒ ፤ ወፍካሬሁ ፡ ለዝንቱ ፡ እሳት ፡ መለኮት ፡ ወልደ ፡ እግዚኣብሔር ፡ ወዕፀ ፡ ጳጦስ ፡ ዘትነድድ ፡ ወቈጽላ ፡ ኢትውዒ ፡ ዛቲ ፡ ይእቲ ፡ ማርያም ፠ ፠ ፠