95. How the honourable estate of the King of Ethiopia was univer
94. The first war of the King of Ethiopia / Kebra Nagast / 95. How the honourable estate of the King of Ethiopia was univer 96. Concerning the Prophecy about Christ

፺፭ ፡ ኀበ ፡ ኀብሩ ፡ ክብሩ ፡ ለንጉሠ ፡ ኢትዮጵያ ።

 

ወበእንተሰ ፡ ክብረ ፡ ነገሥት ፡ አእመርነ ፡ ወጠየቅነ ፡ ከመ ፡ ይከብር ፡ ንጉሠ ፡ ኢትዮጵያ ፡ ንጉሠ ፡ ጽዮን ፡ ውእቱ ፡ ወበኵርኒ ፡ ውእቱ ፡ እምዘርአ ፡ ሴም ፡ ወማኅደሩሂ ፡ ውስተ ፡ ጽዮን ፡ ለእግዚኣብሔር ፡ ውእቱ ፡ ወበህየ ፡ ይሰብር ፡ ኀይለ ፡ ኵሎሙ ፡ ፀሩ ፡ ወጸላእቱ ። ወእምድኅሬሁ ፡ ንጉሠ ፡ ሮም ፡ መሲሑ ፡ ለእግዚኣብሔር ፡ በእንተ ፡ ዕፀ ፡ መስቀል ። ወመንግሥተ ፡ እስራኤልሰ ፡ እምአመ ፡ ተወልደት ፡ ባሕርይ ፡ እምኔሆሙ ፡ ወእምባሕርይ ፡ ካዕበ ፡ ተወልደ ፡ ፀሐየ ፡ ጽድቅ ፡ ተሰዊሮ ፡ በሥጋ ፡ ዚአሃ ፡ ወእመሰ ፡ ኢተሰወረ ፡ በሥጋ ፡ ሰብእ ፡ እመ ፡ ኢተርእየ ፡ ለአዕይንተ ፡ መዋቲ ፤ ለቢሶ ፡ ሥጋነ ፡ ተመሰለ ፡ ኪያነ ፡ ወአንሶሰወ ፡ ምስሌሆሙ ፡ ወገብረ ፡ ተኣምረ ፡ ወመንክረ ፡ በማእከሌሆሙ ፤ አንሥአ ፡ ሙታኒሆሙ ፡ ወፈወሰ ፡ ድዉያኒሆሙ ፡ ወአብርሀ ፡ አዕይንተ ፡ ዕዉራኒሆሙ ፡ ወከሠተ ፡ እዝነ ፡ ጽሙማኒሆሙ ፡ ወእለ ፡ ለምጽ ፡ አንጽሐ ፡ ወርኁባነ ፡ አጽገበ ፡ ወብዙኀ ፡ ተኣምረ ፡ ወመንክረ ፡ ገብረ ፡ ዘተጽሕፈ ፡ ወዘኢተጽሕፈ ፤ በከመ ፡ ይቤ ፡ ዮሐንስ ፡ ወንጌላዊ ፡ ወልደ ፡ ዘብዴስ ፡ ሶበሰ ፡ ተጽሕፈ ፡ ኵሉ ፡ ዘገብረ ፡ ኢየሱስ ፡ እመ ፡ ኢያግመሮ ፡ ዓለም ፡ ጥቀ ፡ መጻሕፍቲሁ ፡ ዘእምተጽሕፈ ። ወዘንተ ፡ ኵሎ ፡ ሶበ ፡ ርእዩ ፡ ደቂቀ ፡ እስራኤል ፡ ዐላዊያን ፡ አምሰልዎ ፡ ከመ ፡ ሰብእ ፡ ወቀንኡ ፡ ላዕሌሁ ፡ በዘ ፡ ርእዩ ፡ ወሰምዑ ፡ ወሰቀልዎ ፡ ዲበ ፡ ዕፀ ፡ መስቀል ፡ ወቀተልዎ ፤ ወተንሥአ ፡ እሙታን ፡ በሣልስት ፡ ዕለት ፡ ወዐርገ ፡ ሰማያተ ፡ በስብሐት ፡ ዲበ ፡ መንበረ ፡ መለኮት ፡ ወተወፈየ ፡ እምኀበ ፡ እብ ፡ መንግሥተ ፡ ዘኢየኀልቅ ፡ ለዓለመ ፡ ዓለም ፡ ላዕለ ፡ መንፈሳዊያን ፡ ወመሬታዊያን ፡ ወላዕለ ፡ ኵሉ ፡ ፍጥረት ፡ ከመ ፡ ለስሙ ፡ ይግነይ ፡ ኵሉ ፡ ልሳን ፡ ወይስግድ ፡ ኵሉ ፡ ብርክ ፡ ወይኴንን ፡ ሕያዋነ ፡ ወሙታነ ፡ ወይፈድዮ ፡ ለኵሉ ፡ በከመ ፡ ምግባሩ ። አሜሃኬ ፡ ሀለዎሙ ፡ ለአይሁድ ፡ ይርአይዎ ፡ ወይትኀፈሩ ፡ ወይትኴነኑ ፡ በእሳት ፡ ዘለዓለም ፤ ወንሕነሰ ፡ እለ ፡ አመነ ፡ በርትዕት ፡ ሃይማኖት ፡ ዲበ ፡ መንበርነ ፡ ንሄሉ ፡ ወንትፌሣሕ ፡ ምስለ ፡ መምህራን ፡ ሐዋርያት ፡ ለእመ ፡ ሖርነ ፡ በፍኖተ ፡ ክርስቶስ ፡ ወበትእዛዛቲሁ ፤ ወሶበ ፡ ሰቀሉ ፡ መድኀኔ ፡ ዓለም ፡ ኮኑ ፡ ዝርዋነ ፡ ወመንግሥቶሙ ፡ ኮነት ፡ ብዱተ ፡ ወኀልቁ ፡ ወተሠረዉ ፡ እስከ ፡ ለዓለመ ፡ ዓለም ፠ ወይቤሉ ፡ ኵሎሙ ፡ ማኅበረ ፡ ቅዱሳን ፡ ጥዩቀ ፡ በአማን ፡ የዐቢ ፡ ወይተሌዐል ፡ ወይከብር ፡ ንጉሠ ፡ ኢትዮጵያ ፡ እምኵሎሙ ፡ ነገሥተ ፡ ምድር ፡ በእንተ ፡ ክብራ ፡ ወዕበያ ፡ ለጽዮን ፡ ሰማያዊት ፤ ወእግዚኣብሔር ፡ አፍቀሮሙ ፡ ለሕዝበ ፡ ኢትዮጵያ ፡ እስመ ፡ ዘእንበለ ፡ ያእምሩ ፡ ሕጎ ፡ ሠረዉ ፡ ጣዖቶሙ ፡ ወእለሰ ፡ ተውህቦሙ ፡ ሕገ ፡ እግዚኣብሔር ፡ ገብሩ ፡ ጣዖተ ፡ ወሰገዱ ፡ ለአማልክት ፡ ዘይጸልእ ፡ እግዚኣብሔር ። ወበደኃሪ ፡ አመ ፡ ተወልደ ፡ ከመ ፡ ይቤዝዎ ፡ ለአዳም ፡ ገብረ ፡ ተኣምረ ፡ ወመንክረ ፡ በቅድሜሆሙ ፡ ወኢአምኑ ፡ ቦቱ ፡ ኢበስብከቱ ፡ ወኢበስብከተ ፡ አበዊሁ ፡ ወሕዝበ ፡ ኢትዮጵያሰ ፡ አምኑ ፡ በ፩ ፡ ረድእ ፡ መሀይምን ፡ ወበእንተዝ ፡ አፍቀሮሙ ፡ እግዚኣብሔር ፡ ፈድፋደ ፡ ለሕዝበ ፡ ኢትዮጵያ ፠ አውሥኡ ፡ ወይቤልዎ ፡ ጳጳሳት ፡ ሠናየ ፡ ነበብከ ፡ ወርቱዕ ፡ ቃልከ ፡ ወጥዩቀ ፡ ፈከርከ ፡ ወተርጐምከ ፡ ለነ ፤ በከመ ፡ ይቤ ፡ ጳውሎስ ፡ አኮኑ ፡ ዘርአ ፡ አብርሃም ፡ አልዐለ ፡ ውእቱ ፡ ዘርአ ፡ ሴም ፤ ኵሎሙ ፡ ነገሥተ ፡ ምድር ፡ እሙንቱ ፡ ወኅሩያኒሁ ፡ ለእግዚኣብሔር ፡ ሰብአ ፡ ኢትዮጵያ ፡ እስመ ፡ ማኅደሩ ፡ ለእግዚኣብሔር ፡ ኮነት ፡ ህየ ፡ ጽዮን ፡ ሰማያዊት ፡ ታቦተ ፡ ሕጉ ፡ ወታቦተ ፡ ኪዳኑ ፡ እንተ ፡ ረሰያ ፡ ለምሥሃል ፡ በእንተ ፡ ምሕረተ ፡ ውሉደ ፡ ሰብእ ፡ ለክራማት ፡ ወለዝናማት ፡ ለአትክልት ፡ ወለፍረያት ፡ ለአሕዛብ ፡ ወለበሓውርት ፡ ለነገሥት ፡ ወለመኳንንት ፡ ለሰብእ ፡ ወለእንስሳ ፡ ለአዕዋፍ ፡ ወለአራዊት ፠ አውሥአ ፡ ወይቤሎሙ ፡ ጎርጎርዮስ ፡ ጳጳስ ፡ ገባሬ ፡ መንክር ፡ በአማን ፡ ተውህበት ፡ ለነ ፡ መድኀኒት ፡ ለኵልነ ፡ ሕዝበ ፡ ክርስቲያን ፡ ለእለ ፡ አመነ ፡ ባቲ ፡ ለእግዝእትነ ፡ ማርያም ፡ አምሳሊሃ ፡ ለጽዮን ፡ ሰማያዊት ፤ እስመ ፡ ኀደረ ፡ እግዚኣብሔር ፡ ውስተ ፡ ከርሠ ፡ ድንግል ፡ ወተወልደ ፡ እምኔሃ ፡ ዘእንበለ ፡ ሩካቤ ፡ ወበአጽባዕተ ፡ እግዚኣብሔር ፡ ተጽሕፈ ፡ ፲ ፡ ቃላት ፡ ዘሕግ ፡ ተገብረ ፡ ውስተ ፡ ጽዮን ፡ ታቦተ ፡ ሕጉ ፡ ለእግዚኣብሔር ። ወይእዜኒ ፡ ሀቡ ፡ ንንግር ፡ ትንቢቶሙ ፡ ለነቢያት ፡ አበዊነ ፡ ቀደምት ፡ ቅዱሳን ፡ እምአሪተ ፡ ሙሴ ፡ ወነቢያት ፡ በእንተ ፡ ክርስቶስ ፡ መድኀኒነ ፡ ከመ ፡ ይስምዑ ፡ ደኃሪ ፡ ትውልድ ፡ ፍካሬ ፡ ዜና ፡ ዘንዜንዎሙ ፡ በእንተ ፡ ተርጕሞ ፡ መጻሕፍት ። ነአኀዝኬ ፡ እምርእሰ ፡ መጽሐፍ ፡ ወንለቡ ፡ በመንፈስ ፡ በከመ ፡ ይቤ ፡ ዳዊት ፡ በመንፈስ ፡ ቅዱስ ፡ ውስተ ፡ ርእሰ ፡ መጽሐፍ ፡ ተጽሕፈ ፡ በእንቲአየ ፠ አውሥአ ፡ ወይቤ ፡ ምንት ፡ ውእቱ ፡ ርእሰ ፡ መጽሐፍ ። አውሥኡ ፡ ወይቤልዎ ፡ ዝውእቱ ፡ ኦሪት ፡ ዘተጽሕፈ ፡ በእንተ ፡ ክርስቶስ ፡ ወልደ ፡ እግዚኣብሔር ፤ ወይቤ ፡ በቀዳሚ ፡ ገብረ ፡ እግዚኣብሔር ፡ ሰማየ ፡ ወምድረ ፡ ወህልው ፡ እምትካት ፤ ወምድርሰ ፡ ኢኮነት ፡ ድሉተ ፡ አላ ፡ ድሙራን ፡ ጽልመት ፡ ወነፋስ ፡ ወማይ ፡ ወጊሜ ፡ ወመሬት ፡ ኵሎሙ ፡ ድሙራን ፡ ወመንፈሰ ፡ እግዚኣብሔር ፡ ይጼልል ፡ መልዕልተ ፡ ማይ ፤ ዘንተሰ ፡ ዘይቤ ፡ በቃለ ፡ እግዚኣብሔር ፡ ተፈጥሩ ፡ ሰማያት ፡ ወምድር ፡ ወመንፈሰ ፡ እግዚኣብሔር ፡ ኀደረ ፡ ላዕለ ፡ ኵሉ ፡ ፍጥረት ፡ ብሂል ፠ ፠ ፠