94. The first war of the King of Ethiopia
93. How the Men of Rome destroyed the Faith / Kebra Nagast / 94. The first war of the King of Ethiopia 95. How the honourable estate of the King of Ethiopia was univer

፺፬ ፡ ቀዳሚ ፡ ፀብአ ፡ ንጉሠ ፡ ኢትዮጵያ ።

 

ወእምዝ ፡ ተንሥኡ ፡ ለፀብእ ፡ እምድኅረ ፡ ፫ ፡ አውራኅ ፡ እምነ ፡ ሀገረ ፡ ምስፍና ፡ ምስለ ፡ ማክዳ ፡ እሙ ፡ ወጽዮን ፡ እግዝእቱ ፡ ወሌዋዊያን ፡ ይጸውርዋ ፡ ለታቦተ ፡ ሕግ ፡ ምስለ ፡ ንዋየ ፡ ሐቢቶሙ ፡ ወእንዘ ፡ የሐውሩ ፡ በብዙኅ ፡ ግርማ ፡ ከመ ፡ አሜሃ ፡ በደብረ ፡ ሲና ፡ አመ ፡ ያወርዳ ፡ እግዚኣብሔር ፡ እምሰማያት ፡ ለጽዮን ፡ በቅድስና ፡ ኀበ ፡ ሙሴ ፡ ወአሮን ፡ ወከማሁ ፡ ይጸውርዋ ፡ ለታቦተ ፡ ሕግ ፡ አዛርያስ ፡ ወኤልሚያስ ፡ ወባዕዳን ፡ ደቂቀ ፡ ኀይለ ፡ እስራኤል ፡ እንዘ ፡ የሐውሩ ፡ በየማና ፡ ወበፀጋማ ፡ በገቦሃ ፡ በፍጽማ ፡ ወበኳላሃ ፡ እንዘ ፡ ይሴብሑ ፡ ወይዜምሩ ፡ እንዘ ፡ መሬታዊያን ፡ ከመ ፡ ኀይለ ፡ ሰማያዊያን ፤ ወወሀቦሙ ፡ እግዚኣብሔር ፡ ቃለ ፡ ሠናየ ፡ ወዜማ ፡ መንክረ ፡ እስመ ፡ ሠምረ ፡ እግዚኣብሔር ፡ ከመ ፡ ይሴባሕ ፡ ቦሙ ። ወበጽሑ ፡ እምሀገረ ፡ ምስፍና ፡ ተዐየኑ ፡ በማየ ፡ አበው ፡ ወበነግህ ፡ አጥፍእዋ ፡ ለብሔረ ፡ ዛዉ ፡ ምስለ ፡ ሐድያ ፤ እስመ ፡ ጋእዘ ፡ ባ ፡ ምስሌሆሙ ፡ እምቀዳሚ ፡ ወእምዝ ፡ አጥፍእዎሙ ፡ ወቀተልዎሙ ፡ በአፈ ፡ ኀጺን ። ወተኃለፉ ፡ እምህየ ፡ ወተዐየኑ ፡ ጌርሳ ፤ ወካዕበ ፡ አጥፍኡ ፡ ሀገረ ፡ ሰባድዕት ፡ እለ ፡ ገጾሙ ፡ ሰብእ ፡ ወዘነበ ፡ አድግ ፡ ውስተ ፡ ሐቌሆሙ ። ወገብአት ፡ ወተዐየነት ፡ ውስተ ፡ ሀገረ ፡ ጽዮን ፡ ወነበሩ ፡ ባቲ ፡ እስከ ፡ ፫ ፡ አውራኅ ፡ ወአንሥኡ ፡ ሰረገላቲሆሙ ፡ ወበጽሑ ፡ ሀገረ ፡ ምስፍና ፤ ወእምህየ ፡ በአሐቲ ፡ ዕለት ፡ በጽሑ ፡ ሀገረ ፡ ሳባ ፡ ወአጥፍእዋ ፡ ለኖባ ፡ ወእምህየ ፡ ተዐየኑ ፡ ሳባ ፡ ወአጥፍኡ ፡ እስከ ፡ ደወለ ፡ ግብጽ ። ወኮነ ፡ ግርማ ፡ ዐቢይ ፡ ለንጉሠ ፡ ኢትዮጵያ ፡ እስከ ፡ ያመጽኡ ፡ አምኃ ፡ ንጉሠ ፡ ምድያም ፡ ወንጉሠ ፡ ግብጽ ። ወበጽሑ ፡ ውስተ ፡ ሀገረ ፡ ምስፍና ፡ ወእምህየ ፡ ተዐየኑ ፡ አብዓት ፡ ወፀብኡ ፡ ውስተ ፡ ባሕረ ፡ ህንደኬ ፤ ወአብአ ፡ ንጉሠ ፡ ህንደኬ ፡ አምኃ ፡ ወጋዳ ፡ ወሰገደ ፡ ለሊሁ ፡ ለንጉሠ ፡ ኢትዮጵያ ። ወኀበ ፡ ኵሉ ፡ ዘፈቀደ ፡ ወፀብአ ፡ አልቦ ፡ ዘይመውኦ ፡ ዘእንበለ ፡ ዘይመውእ ፡ ለሊሁ ፤ ወእለ ፡ ያስተሓይጽዎ ፡ በውስተ ፡ ትዕይንቱ ፡ ከመ ፡ ይስምዑ ፡ ዜና ፡ ወይንግሩ ፡ ለሀገሮሙ ፡ ወኢይክሉ ፡ ረዊጸ ፡ በሰረገላ ፡ እስመ ፡ ለሊሃ ፡ ጽዮን ፡ ታደክም ፡ ኀይሎሙ ፡ ለፀር ። ወንጉሥሰ ፡ ዳዊት ፡ ምስለ ፡ ሰራዊቱ ፡ ወሰራዊተ ፡ ሰራዊቱ ፡ ወኵሎሙ ፡ እለ ፡ ይትኤዘዙ ፡ በቃሉ ፡ ይረውጹ ፡ በሰረገላ ፡ ዘእንበለ ፡ ደዌ ፡ ወሕማም ፡ ዘእንበለ ፡ ረኃብ ፡ ወጽምእ ፡ ዘእንበለ ፡ ሃፍ ፡ ወድካም ፡ ይበጽሑ ፡ በአሐቲ ፡ ዕለት ፡ መጠነ ፡ ምሕዋረ ፡ ፫ ፡ አውራኅ ፤ ወአልቦ ፡ ወኢምንተኒ ፡ ዘየኀጥኡ ፡ እምዘ ፡ ሰአሉ ፡ በኀበ ፡ እግዚኣብሔር ፡ በውስተ ፡ ጽዮን ፡ ታቦተ ፡ ሕጉ ፡ ለእግዚኣብሔር ፡ እስመ ፡ ለሊሁ ፡ ይነብር ፡ ምስሌሃ ፡ ወመልአኩ ፡ ይሜግባ ፡ ወማኅደሩ ፡ ለሊሃ ፤ ወለንጉሥ ፡ ዘይትለአክ ፡ ኀበ ፡ ደብተራሁ ፡ ለእመ ፡ ሖረ ፡ በኵሉ ፡ ፍኖቱ ፡ ወበገቢረ ፡ ፈቃዱ ፡ ይትገበር ፡ ኵሉ ፡ ዘፈቀደ ፡ ወዘኀለየ ፡ በልቡ ፡ ወዘአንጸረ ፡ በአጽባዕቱ ፡ ኵሉ ፡ ይትገበር ፡ በቃሉ ፡ ወኵሉ ፡ ይፈርሆ ፤ ወውእቱሰ ፡ አልቦ ፡ ዘይፈርህ ፡ እስመ ፡ እደ ፡ እግዚኣብሔር ፡ ምስሌሁ ፡ እንተ ፡ ተዐቅቦ ፡ ሌሊተ ፡ ወመዐልተ ፡ እስመ ፡ ገብረ ፡ ፈቃዶ ፡ ወውእቱኒ ፡ ይገብር ፡ ሎቱ ፡ ወየዐቅቦ ፡ እምኵሉ ፡ እኩይ ፡ ለዓለመ ፡ ዓለም ፡ አሜን ፠ ዘንተ ፡ ረከብኩ ፡ እመጻሕፍት ፡ ዘቤተ ፡ ሶፍያ ፡ ዘቍስጥንጥንያ ። ወይቤልዎ ፡ እለ ፡ ህየ ፡ ሊቃነ ፡ ጳጳሳት ፡ አማንኬ ፡ ዝንቱ ፡ ዘተጽሕፈ ፡ እመዋዕለ ፡ ሰሎሞን ፡ ንጉሥ ። ወይቤ ፡ ድማትዮስ ፡ ዘአንጾኪያ ፡ እወ ፡ ይመስል ፡ እስከ ፡ ዕለተ ፡ ሞቱ ፡ ለሰሎሞን ፡ ዘተጽሕፈ ፡ ወእምድኅረ ፡ ሞቱሰ ፡ ለሰሎሞን ፡ እምባዕዳን ፡ ነቢያት ፡ ዘተጽሕፈ ፡ አምሳሉ ፠ ፠ ፠