92. How they renewed the kingdom of David
91. This is what ye shall eat: the clean and the unclean / Kebra Nagast / 92. How they renewed the kingdom of David 93. How the Men of Rome destroyed the Faith

፺፪ ፡ ኀበ ፡ ሐደሱ ፡ መንግሥቶ ፡ ለዳዊት ።

 

ወይቤ ፡ አዛርያስ ፡ አምጽኡ ፡ ኢዮቤል ፡ ወንሖር ፡ ኀበ ፡ ጽዮን ፡ ወበህየ ፡ ነሐድስ ፡ መንግሥቶ ፡ ለእግዚእነ ፡ ዳዊት ። ወነሥአ ፡ ቅብአ ፡ መንግሥትኒ ፡ ምልአ ፡ ቀርን ፡ ወቀብእዎ ፡ ዕፍረተ ፡ ዘውእቱ ፡ ቅብአ ፡ መንግሥት ፤ ወነፍኁ ፡ ቀርነ ፡ ወብዕዛ ፡ ወከበሮ ፡ ወመሰንቆ ፡ ወዕንዚራ ፡ ወኵሎ ፡ ተውኔተ ፡ ወማኅሌተ ፡ ዘምስለ ፡ ፈረስ ፡ ወወልታ ፡ ወቀስት ፡ ወኵሉ ፡ ተባዕት ፡ ወአንስት ፡ ሰብአ ፡ ብሔረ ፡ ኢትዮጵያ ፡ ንኡሶሙ ፡ ወዐቢዮሙ ፡ ወንኡሳን ፡ ጸሊማን ፡ በበ፷፻ወአዋልድ ፡ ደናግል ፡ እለ ፡ ኀረየ ፡ አዛርያስ ፡ ለአዋልደ ፡ ጽዮን ፡ ዘበሕግ ፡ እለ ፡ ይከይድ ፡ ንጉሥ ፡ ዳዊት ፡ ሶበ ፡ የዐርግ ፡ ውስተ ፡ ቄፋዝ ፡ ለምሳሕ ፡ ወለድራር ፡ በውስተ ፡ ታዕካ ፡ መንግሥት ፤ ወከመዝ ፡ ተሐደሰ ፡ መንግሥቱ ፡ ለዳዊት ፡ ወልደ ፡ ሰሎሞን ፡ ንጉሠ ፡ እስራኤል ፡ በሀገረ ፡ ምስፍና ፡ በደብረ ፡ ማክዳ ፡ በቤተ ፡ ጽዮን ፡ ኀበ ፡ ተገብረ ፡ ቀዳሚ ፡ ሕግ ፡ ለንጉሠ ፡ ኢትዮጵያ ፤ ወእምዝ ፡ ሶበ ፡ ፈጸመ ፡ ዘተገብረ ፡ ሕግ ፡ ወበከመ ፡ ርእዩ ፡ በኢየሩሳሌም ፡ ገብሩ ፡ በቤተ ፡ ጽዮን ፡ ሕገ ፡ ለኅሩያነ ፡ መንግሥት ፡ ወለእለ ፡ ውስጥ ፡ ወለእለ ፡ አፍአ ፡ ወለሕዝብ ፡ ወለአላዳስ ፡ ወለአህጉር ፡ ወለበሓውርት ፡ ወለኵሉ ፡ ሕዘቢሆሙ ፡ ወአንጋዳሆሙ ፡ ከመዝ ፡ ሠርዑ ። ወከመዝ ፡ ሞጻእተ ፡ ሀገረ ፡ መንግሥቱ ፡ ለንጉሠ ፡ ኢትዮጵያ ፡ ሠረቃዊ ፡ ጥንተ ፡ ሀገረ ፡ ጋዛ ፡ በምድረ ፡ ይሁዳ ፡ ዘውእቱ ፡ ኢየሩሳሌም ፡ ወሞጻእቱ ፡ ባሕረ ፡ ኢያሪኮ ፡ ወትትኃለፍ ፡ በሐይቀ ፡ ባሕሩ ፡ እስከ ፡ ሊባ ፡ ወሳባ ፡ ወትወርድ ፡ ሞጻእቱ ፡ እስከ ፡ ቢሲስ ፡ ወአስኔት ፡ ወሞጻእቱ ፡ ብሔረ ፡ ጸሊማን ፡ ወዕሩቃን ፡ ወተዐርግ ፡ ደብረ ፡ ኬቤሬኔዮን ፡ ውስተ ፡ ባሕረ ፡ ጽልመት ፡ ዝውእቱ ፡ ምዕራበ ፡ ፀሐይ ፡ ወተዑዱ ፡ ሞጻእቱ ፡ እስከ ፡ ፌኔኤል ፡ ወለሲፋላ ፡ ወሞጻእቱ ፡ አግዋረ ፡ ገነት ፡ መስመረ ፡ እክል ፡ ወብዝኀተ ፡ እንስሳ ፡ ወፌኔቄንሃ ፡ ወሞጻእቱ ፡ እስከ ፡ ዛውል ፡ ወትትኃለፍ ፡ ባሕረ ፡ ህንድ ፡ ወሞጻእቱ ፡ እስከ ፡ ባሕረ ፡ ተርሲስ ፡ ወበቅሥፈቱ ፡ ብሔረ ፡ ምድያም ፡ እስከ ፡ ይበጽሕ ፡ ብሔረ ፡ ጋዛ ፡ ወሞጻእቱ ፡ ኀበ ፡ ቀዳሚ ፡ ተወጠነ ፤ ወከመዝ ፡ ሢመቱ ፡ ለንጉሠ ፡ ኢትዮጵያ ፡ ሎቱ ፡ ወለዘርኡ ፡ እስከ ፡ ለዓለም ፠ ፠ ፠