91. This is what ye shall eat: the clean and the unclean
90. How Azariah praised the Queen and her city / Kebra Nagast / 91. This is what ye shall eat: the clean and the unclean 92. How they renewed the kingdom of David

 

፺፩ ፡ ዘንተ ፡ ዘይበልዑ ፡ ንጹሕ ፡ ወርኩስ ።

 

ወዝንቱ ፡ ዘትበልዑ ፡ ንጹሕ ፡ ወዘኢኮነ ፡ ንጹሕ ፤ ላህም ፡ በግዕ ፡ ወጠሊ ፡ ሐርጌ ፡ ሀየል ፡ ወይጠል ፡ ቶራ ፡ ድስክነ ፡ ወውዕላ ፡ ዓርጋ ፡ ወዝራት ፡ ወኵሉ ፡ እንስሳ ፡ ዘንፉቅ ፡ ሰኰናሁ ፡ ወጽፈሪሁ ፡ ብልዑ ፡ ወዘይትመሰኳዕ ፡ ብልዑ ፤ ወዝንቱሰ ፡ ዘኢትበልዑ ፡ እምውስተ ፡ ዘይትመሰኳዕ ፡ ወዘንፉቅ ፡ ሰኰናሁ ፡ ገመል ፡ ወዳሲጳዳ ፡ ወካርግልዮን ፡ እስመ ፡ ይትመሰኵዑ ፡ ወኢኮነ ፡ ንፉቅ ፡ ጽፈሪሆሙ ፤ ወዝእብ ፡ ወሐራዊያ ፡ ኢትብልዑ ፡ እስመ ፡ ንፉቅ ፡ ሰኰናሆሙ ፡ ወኢይትመሰኵዑ ፡ ርኩሳን ፡ ኢትብልዑ ፤ በውስተ ፡ ማይ ፡ ዘቦ ፡ ክንፈ ፡ ወቅሣረ ፡ ብልዑ ፡ ወእምኔሁ ፡ ርኩሰ ፡ ኢትብልዑ ፤ ወእምነ ፡ ውስተ ፡ አዕዋፍ ፡ ኵሉ ፡ ዘንጹሕ ፡ ብልዑ ፡ ወዘኢትበልዑ ፡ ዝንቱ ፡ ንስር ፡ ጊጳ ፡ ኤልያጣን ፡ ግሪጳ ፡ ሆባይ ፡ ወዘአምሳሊሁ ፡ ቋዕ ፡ ሰገኖ ፡ ግላውቃ ፡ ለሮን ፡ አሮድዮን ፡ ቃቃኖን ፡ ኢብን ፡ ቀጣራቃጤን ፡ ጕዛ ፡ ሂጳጳ ፡ ጒጓ ፡ ወኣባጒንባሕ ፡ ወክራድዮን ፡ ጳርፋርዮና ፡ ጽግነት ፡ ዝንቱ ፡ ዘርኵስ ፤ ወዘኢትበልዑ ፡ ደገብያ ፡ ወዘአምሳሉ ፡ አቃጣን ፡ ወዘአምሳሉ ፡ አፍዮማክን ፡ ወዘአምሳሉ ፡ አንበጣ ፡ ወዘአምሳሉ ፤ እምነ ፡ ዘይሰርር ፡ በበ፪ ፡ በበ፬ ፡ ወበበ፮ ፡ እግሩ ፡ ውእቱ ፡ ርኩስ ፡ ሥጋሆሙ ፡ ኢትብልዑ ፡ ወበድኖሙ ፡ ኢትግስሱ ፡ ወዘገሰሰ ፡ በድኖሙ ፡ እስከ ፡ ሰርክ ፡ ርኩስ ፡ ውእቱ ። ዘንተኬ ፡ ነገርናክሙ ፡ ከመ ፡ ትዕቀቡ ፡ ወትግበሩ ፡ ፍርሀተ ፡ እግዚኣብሔር ፡ ከመ ፡ ትትባረኩ ፡ በዛቲ ፡ ምድርክሙ ፡ እንተ ፡ ወሀበክሙ ፡ እግዚኣብሔር ፡ በእንተ ፡ ጽዮን ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ እስመ ፡ ተኀረይክሙ ፡ በእንቲአሃ ፤ ወአበዊነሰ ፡ ተመነኑ ፡ በእንተ ፡ ዘነሥኦሙ ፡ እግዚኣብሔር ፡ ጽዮን ፡ ታቦተ ፡ ሕጉ ፡ ለእግዚኣብሔር ፡ ትዕቀብክሙ ፡ ለክሙ ፡ ወለዘርእክሙ ፡ እስከ ፡ ለዓለም ፤ ወይባርክ ፡ ፍሬ ፡ ምድርክሙ ፡ ወያብዝኅ ፡ እንስሳክሙ ፡ ወይዕቀብ ፡ ደቂቅክሙ ፡ በኵሉ ፡ ዘትትመሐፀኑ ። ወአንቲኒ ፡ እግዝእትየ ፡ ጥበብኪ ፡ ሠናይ ፡ ዘተዐደወ ፡ እምጥበበ ፡ ሰብእ ፡ ዘከማኪ ፡ አልቦ ፡ ዘይትማሰላ ፡ ለኅሊናኪ ፡ አኮ ፡ ምክረ ፡ አንስት ፡ ባሕቱ ፡ ዘተፈጥረ ፡ እስከ ፡ ይእዜ ፡ አላ ፡ እምክረ ፡ ተባዕትኒ ፡ ፈድፈደ ፡ አእምሮ ፡ ልብኪ ፡ ወአልቦ ፡ ዘይትማሰለኪ ፡ በብዝኀ ፡ አእምሮትኪ ፡ ዘእንበለ ፡ ሰሎሞን ፡ እግዚእየ ፤ ወእምሰሎሞንኒ ፡ ተዐደወ ፡ ጥበብኪ ፡ እስከ ፡ ትስሕቢ ፡ ደቂቀ ፡ ኀይለ ፡ እስራኤል ፡ ወታቦተ ፡ ሕጉ ፡ ለእግዚኣብሔር ፡ በአሕባለ ፡ አእምሮትኪ ፡ ወነሠትኪ ፡ ቤተ ፡ ጣዖቶሙ ፡ ወደምሰስኪ ፡ አምሳሊሆሙ ፡ ወአንጻሕኪ ፡ ርኵሰ ፡ እምሕዝብኪ ፡ እስመ ፡ አሰሰልኪ ፡ ዘጸልአ ፡ እግዚኣብሔር ፡ እምላዕሌሆሙ ። ወለስምኪኒ ፡ እግዚኣብሔር ፡ አስተዳለዎ ፡ ዘሰመየኪ ፡ ማክዳ ፡ ወትርጒምናሁ ፡ አኮ ፡ ከመዝ ፡ ብሂል ፤ ነጸርኪ ፡ በውስተ ፡ ሕዝብኪ ፡ ዘኢይሠምር ፡ እግዚኣብሔር ፡ ወትቤሊ ፡ አኮ ፡ ከመዝ ፡ ሠናይ ፡ አላ ፡ ይረትዕ ፡ ንስግድ ፡ ለእግዚኣብሔር ፤ አኮ ፡ ከመዝ ፡ ሠናይ ፡ ሰጊድ ፡ ለፀሐይ ፡ አላ ፡ ሰጊድ ፡ ለእግዚኣብሔር ፡ ይረትዕ ፡ ትቤሊ ፤ አኮ ፡ ከመዝ ፡ ሠናይ ፡ ሐቲተ ፡ ማሪት ፡ አላ ፡ ተወክሎ ፡ በእግዚኣብሔር ፡ ይኄይስ ፡ ትቤሊ ፤ አኮ ፡ ከመዝ ፡ ሠናይ ፡ አስተቃስሞ ፡ ሰገል ፡ አላ ፡ አስምኮ ፡ በቅዱሰ ፡ እስራኤል ፡ ይኄይስ ፡ ትቤሊ ፤ አኮ ፡ ከመዝ ፡ ሠናይ ፡ ሠዊዕ ፡ ለአእባን ፡ ወለአዕዋም ፡ አላ ፡ ሠዊዕ ፡ ለእግዚኣብሔር ፡ ይረትዕ ፡ ትቤሊ ፤ አኮ ፡ ከመዝ ፡ ሠናይ ፡ ተጠይሮ ፡ በአዕዋፍ ፡ አላ ፡ ተአምኖ ፡ በፈጣሪ ፡ ይረትዕ ፡ ትቤሊ ። ወእምዝ ፡ ኀረይኪያ ፡ ለጥበብ ፡ ወኮነተኪ ፡ እመ ፤ ኀሠሥኪያ ፡ ወኮነተኪ ፡ መዝገበ ፤ ተጸወንኪያ ፡ ወኮነተኪ ፡ ጥቅመ ፤ ጸሀቂያ ፡ ወአፍቀረተኪ ፡ እምኵሉ ፤ ተወከልኪያ ፡ ወሐቀፈተኪ ፡ ከመ ፡ ሕፃና ፤ አፍቀርኪያ ፡ ወኮነተኪ ፡ በከመ ፡ ፈቀድኪ ፤ አኀዝኪያ ፡ ወኢተኀድገኪ ፡ እስከ ፡ ዕለተ ፡ ሞትኪ ፤ አንቲ ፡ ሐዘንኪ ፡ በእንቲአሃ ፡ ወአስተፍሥሐተኪ ፡ እስከ ፡ ለዓለም ፤ ጸመውኪ ፡ በእንቲአሃ ፡ ወአጥዐየተኪ ፡ እስከ ፡ ለዓለም ፤ ረኀብኪ ፡ በእንቲአሃ ፡ ወአጽገበተኪ ፡ እስከ ፡ ለዓለም ፤ ጸማእኪ ፡ ለጥበብ ፡ ወአርወየተኪ ፡ እስከ ፡ ለዓለም ፤ ተመንደብኪ ፡ በእንቲአሃ ፡ ለጥበብ ፡ ወኮነተኪ ፡ ፈውሰ ፡ እስከ ፡ ለዓለም ፤ ጸመምኪ ፡ በእንቲአሃ ፡ ለጥበብ ፡ ወአስምዐተኪ ፡ እስከ ፡ ለዓለም ፤ ዖርኪ ፡ በእንቲአሃ ፡ ለጥበብ ፡ ወአብርሀተኪ ፡ ፈድፋደ ፡ እምነ ፡ ፀሐይ ፡ እስከ ፡ ለዓለም ። ወዝንቱ ፡ ኵሉ ፡ ዘኮነ ፡ እምኀበ ፡ እግዚኣብሔር ፡ በእንተ ፡ ዘአፍቀርኪያ ፡ ለጥበብ ፤ እስመ ፡ ጥበብ ፡ ወአእምሮ ፡ ወልቡና ፡ እምኀበ ፡ እግዚኣብሔር ፡ ውእቱ ፤ ልቡና ፡ ወአእምሮ ፡ ወቀዳሜ ፡ ጥበብሰ ፡ ፈሪህ ፡ እግዚኣብሔር ፡ ወአእምሮ ፡ ወመኪረ ፡ ሠናይኒ ፡ ምጽዋት ፡ ወምሕረት ፡ እስከ ፡ ለዓለም ፡ እንተ ፡ ትሄሉ ፡ ዘንተ ፡ ኵሎ ፡ ረከብኪ ፡ እግዝእትየ ፡ ኀበ ፡ አምላከ ፡ እስራኤል ፡ ቅዱሰ ፡ ቅዱሳን ፡ ማእመሬ ፡ አልባብ ፡ ዘየሐትት ፡ ዘውስተ ፡ ልበ ፡ ሰብእ ፡ ዘእምኀቤሁ ፡ ኵሉ ፡ ኮነ ፤ ወዘኒ ፡ ኮነ ፡ በፈቃደ ፡ እግዚኣብሔር ፡ ኮነ ፡ ከመ ፡ ትምጻእ ፡ ጽዮን ፡ ውስተ ፡ ዛቲ ፡ ብሔረ ፡ ኢትዮጵያ ፡ ወከመ ፡ ትኩኖ ፡ መርሐ ፡ ለንጉሥነ ፡ ዳዊት ፡ መፍቀሬ ፡ እግዚኣብሔር ፡ ቀዋሚሃ ፡ ለደብተራሁ ፡ መጋቢሃ ፡ ለማኅደረ ፡ ስብሐቲሁ ፠ ፠ ፠