90. How Azariah praised the Queen and her city
89. How the Queen talked to the Children of Israel / Kebra Nagast / 90. How Azariah praised the Queen and her city 91. This is what ye shall eat: the clean and the unclean

፺ ፡ ኀበ ፡ ወደሳ ፡ አዛርያስ ፡ ለንግሥት ፡ ወለሀገራ ።

 

ወተንሥአ ፡ አዛርያስ ፡ ወይቤላ ፡ ለንግሥት ፡ ኦእግዝእትነ ፡ በአማን ፡ አልቦ ፡ ዘይትማሰለኪ ፡ በጥበብ ፡ ወበአእምሮ ፡ ወተውህበ ፡ ለኪ ፡ እምኀበ ፡ እግዚኣብሔር ፡ ዘእንበለ ፡ እግዚእየ ፡ ንጉሥ ፡ ዘአብጽሐነ ፡ ውስተ ፡ ዛቲ ፡ ምድር ፡ ምስለ ፡ እግዝእትነ ፡ ጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ። ንሕነሰ ፡ ወአበዊነ ፡ ቀደምት ፡ ንቤ ፡ አልቦ ፡ ዘኀረየ ፡ እግዚኣብሔር ፡ ዘእንበለ ፡ ቤተ ፡ ያዕቆብ ፡ ኪያነ ፡ ኀረየ ፡ ወኪያነ ፡ አብዝኀ ፡ ወኪያነ ፡ ሠምረ ፡ ወአንገሠነ ፡ ወረሰየነ ፡ ሰብአ ፡ ቤቱ ፡ ወመማክርቲሁ ፡ ለስብሐቲሁ ፡ ወለታቦተ ፡ ኪዳኑ ፡ ወሀገርኒ ፡ ንብል ፡ አልቦ ፡ ዘኀረየ ፡ ዘእንበለ ፡ ሀገርነ ፤ ወይእዜሰ ፡ ርኢነ ፡ እንተ ፡ ትኄይስ ፡ ሀገረ ፡ ኢትዮጵያ ፡ እምብሔረ ፡ ይሁዳ ፤ ወእምከመ ፡ በጻሕነ ፡ ውስተ ፡ ብሔርክሙ ፡ ሠነየነ ፡ ኵሉ ፡ ዘርኢነ ፡ ማይክሙኒ ፡ ሠናይ ፡ ወትሁቡ ፡ ዘእንበለ ፡ ሤጥ ፡ ወነፋስ ፡ ዘእንበለ ፡ መረዋሕት ፡ ወጸቃውዕ ፡ ከመ ፡ ጽንጕነ ፡ መርሕብ ፡ ወእንስሳ ፡ ከመ ፡ ኆጻ ፡ ባሕር ፡ ወእምዘ ፡ ርኢነ ፡ አልቦ ፡ ሕሱመ ፡ ወአልቦ ፡ ፀዋገ ፡ እምዘ ፡ ንሰምዕ ፡ ወእምዘ ፡ ንከይድ ፡ ወእምዘ ፡ ንገስስ ፡ ወእምዘ ፡ ንጥዕም ፡ በአፉነ ፤ ወባሕቱ ፡ እምእንተ ፡ ትኔጽር ፡ አሐቲ ፡ ሀለወት ፡ ኮንክሙ ፡ ጸሊማነ ፡ በገጽ ፡ ወዘንተ ፡ ዘእቤ ፡ በዘ ፡ ርኢኩ ፡ ወባሕቱ ፡ ለእመ ፡ አብርሀ ፡ እግዚኣብሔር ፡ አልባቢክሙ ፡ አልቦ ፡ ዘይነኪየክሙ ። ወባሕቱ ፡ ተገሐሡ ፡ እማውታ ፡ ወደም ፡ ወብትክ ፡ ወዝሙት ፡ ወእምኵሉ ፡ ዘይጸልእ ፡ እግዚኣብሔር ፡ ከመ ፡ ንትፈሣሕ ፡ ብክሙ ፡ ሶበ ፡ ንሬኢየክሙ ፡ እንዘ ፡ ትፈርሁ ፡ እግዚኣብሔር ፡ ወእንዘ ፡ ትርዕዱ ፡ እምቃሉ ፤ በከመ ፡ አዘዞሙ ፡ እግዚአብሔር ፡ ለአበዊነ ፡ ወይቤሎ ፡ ለሙሴ ፡ አዝዞሙ ፡ በኵሉ ፡ ወንግሮሙ ፡ ከመ ፡ ይዕቀቡ ፡ ሕግየ ፡ ወሥርዐትየ ፤ ወኢትትገሐሡ ፡ ኢለየማን ፡ ወኢለፀጋም ፡ እምዘ ፡ ንኤዝዘክሙ ፡ ዮም ፡ ወይእዜኒ ፡ ከመ ፡ ታምልክዎ ፡ ለእግዚኣብሔር ፡ ቅዱሰ ፡ እስራኤል ፡ ወትግበሩ ፡ ሥምረቶ ፡ እስመ ፡ መነኖሙ ፡ ለሕዝብነ ፡ በከመ ፡ ተነበዩ ፡ ነቢያቲነ ፡ ወኀረየ ፡ ኪያክሙ ፤ አኮኑ ፡ ለኵልክሙ ፡ እግዚኣብሔር ፡ ፈጣሪክሙ ፡ ምንተ ፡ ይሰአኖ ፡ ለእግዚኣብሔር ፡ ለእመ ፡ አፍቀረ ፡ ኪያነ ፡ ወጸልአ ፡ ኪያሆሙ ፡ እስመ ፡ ኵሉ ፡ ሎቱ ፡ ወኵሉ ፡ ተግባሩ ፡ ወአልቦ ፡ ዘይሰአኖ ፡ ለእግዚኣብሔር ፡ አምላከ ፡ እስራኤል ። ወስምዑ ፡ እንግርክሙ ፡ ትእዛዞ ፤ ፩ ፡ ኢይትኀየል ፡ ካልኦ ፡ ወኢትሂዱ ፡ ንዋየ ፡ ቢጽክሙ ፡ ወኢትትሓመዩ ፡ ወኢትትዓመፁ ፡ ወኢትትላኰዩ ፤ ወለእመቦ ፡ ዘአተወ ፡ እንስሳ ፡ ምስለ ፡ ንዋይክሙ ፡ እምንዋየ ፡ ቢጽክሙ ፡ ኢትትዐወርዎ ፡ አላ ፡ አግብኡ ፡ ሎቱ ፡ ወለእመሰ ፡ ኢያእመርክሙ ፡ ባዕለ ፡ ንዋዩ ፡ አጽንዑ ፡ ሎቱ ፡ ወእምከመ ፡ ረከበ ፡ አግብኡ ፡ ሎቱ ፡ ንዋዮ ፤ ወእመቦ ፡ ዘወድቀ ፡ ንዋየ ፡ ቢጽክሙ ፡ ውስተ ፡ ግብ ፡ አው ፡ ውስተ ፡ ዐዘቅት ፡ አው ፡ ውስተ ፡ ቀላይ ፡ አው ፡ ውስተ ፡ ጸድፍ ፡ ኢትትዐደዉ ፡ ወኢትትኀለፉ ፡ እስከ ፡ ትነግርዎ ፡ ወታስተላዕልዎ ፤ ወእመኒቦ ፡ ዘከረየ ፡ ዐዘቅተ ፡ ወዘሐነጸ ፡ ማኅፈደ ፡ ኢይኅድግ ፡ ዘእንበለ ፡ መክደን ፡ ወተድባብ ፤ ወለእመኒቦ ፡ ዘጾረ ፡ ጾረ ፡ ክቡደ ፡ አው ፡ ለእመኒ ፡ ቦዘጸዓነ ፡ ዘወድቆ ፡ ኢትኅልፉ ፡ ዘእንበለ ፡ ታስተላዕልዎ ፡ ወታቅልሉ ፡ ሎቱ ፡ እስመ ፡ እኁክሙ ፡ ውእቱ ፤ ወኢታብስሉ ፡ እጐልተ ፡ በሐሊበ ፡ እሙ ፤ ወኢትግምጹ ፡ ፍትሐ ፡ ምስኪን ፡ ወእጓለ ፡ ማውታ ፤ ወኢታድልዉ ፡ ለገጽ ፡ ወኢትንሥኡ ፡ ሕልያነ ፡ ለገሚጸ ፡ ፍትሕ ፡ ወለስምዐ ፡ ሐሰት ፤ ወሶበ ፡ ትረክቡ ፡ ዖፈ ፡ በውስተ ፡ ምድርክሙ ፡ ምስለ ፡ አፍኅርቲሃ ፡ ታሕይዉ ፡ ኪያሃ ፡ ወኢትንሥኡ ፡ ደቂቃ ፡ ከመ ፡ ይኑኅ ፡ መዋዕሊክሙ ፡ በዲበ ፡ ምድር ፡ ወይትባረኩ ፡ ዘርእክሙ ፡ ለነዋኅ ፡ መዋዕል ፤ ወሶበ ፡ ተዐጽዱ ፡ ማእረረ ፡ እክልክሙ ፡ ኢትጠናቀቁ ፡ ዐጺደ ፡ ወዘወድቀሂ ፡ ኢትእርዩ ፡ ወዘረሳዕክሙ ፡ ክልስስተ ፡ ኅድጉ ፡ ተመዪጠክሙ ፡ ኢትንሥኡ ፡ አላ ፡ ኅድጉ ፡ ለግዩረ ፡ ሀገርክሙ ፡ ከመ ፡ ይባርክ ፡ እግዚኣብሔር ፡ ፍሬ ፡ ምድርክሙ ፤ ወኢትግበሩ ፡ ርኩሰ ፡ ወኢትፍትሑ ፡ በአድልዎ ፡ ወኢትግበሩ ፡ ዐመፃ ፡ በኵሉ ፡ ዘትትናገሩ ፡ ከመ ፡ ትትባረኩ ፡ ወከመ ፡ ይብዛኅ ፡ ፍሬ ፡ ምድርክሙ ፡ ወከመ ፡ ትድኀኑ ፡ እመርገመ ፡ ሕግ ፡ ዘአዘዘ ፡ እግዚኣብሔር ፡ ከመ ፡ ይርግምዎ ፡ ለገባሬ ፡ እኪት ። ወጸሐፈ ፡ እንዘ ፡ ይብል ፡ ዘያስሕቶ ፡ ፍኖቶ ፡ ለዕዉር ፡ ርጉም ፡ ውእቱ ፤ ወዘይነግሮ ፡ ሕሡመ ፡ ለጽሙም ፡ ርጉም ፡ ውእቱ ፤ ወዘአርኰሰ ፡ ምስካበ ፡ አቡሁ ፡ ርጉም ፡ ውእቱ ፤ ወዘይዘብጥ ፡ ቢጾ ፡ በጕሕሉት ፡ ርጉም ፡ ውእቱ ፤ ወዘይገምጽ ፡ ፍትሐ ፡ ግዩር ፡ ከመ ፡ ይቅትል ፡ ደመ ፡ ንጹሕ ፡ ርጉም ፡ ውእቱ ፤ ዘያስተአኪ ፡ አቡሁ ፡ ወእሞ ፡ ርጉም ፡ ውእቱ ፤ ወኵሉ ፡ ዘይገብር ፡ ግልፎ ፡ ወስብኮ ፡ ዘርኩስ ፡ ግብረ ፡ እደ ፡ ሰብእ ፡ ወይሠይሞ ፡ ወየኀብኦ ፡ ውስተ ፡ ቤቱ ፡ ወይሰግድ ፡ ሎቱ ፡ ከመ ፡ አምላክ ፡ ኢአሚኖ ፡ ከመ ፡ እግዚኣብሔር ፡ ፈጣሬ ፡ ሰማያት ፡ ወምድር ፡ ዘገብሮ ፡ ለአዳም ፡ በዘ ፡ ዚአሁ ፡ አርአያ ፡ ወአምሳል ፡ ወሤሞ ፡ ላዕለ ፡ ኵሉ ፡ ዘፈጠረ ፡ ወኵልነ ፡ ተግባሩ ፡ ንሕነ ፡ ዘንተ ፡ ዘኢየአምን ፡ ርጉመ ፡ ለይኩን ፡ አሜን ፤ ወዘይሰክብ ፡ ምስለ ፡ እንስሳ ፡ ርጉመ ፡ ለይኩን ፤ ወዘይሰክብ ፡ ምስለ ፡ ተባዕት ፡ ከመ ፡ ዘምስለ ፡ አንስት ፡ ርጉመ ፡ ለይኩን ፤ ዘይቀትል ፡ ነፍሰ ፡ ደመ ፡ ንጹሐ ፡ በዐመፃ ፡ ወበጕሕሉት ፡ ርጉመ ፡ ለይኩን ። ወእምኵሉሰ ፡ ኢታምልኩ ፡ ባዕደ ፡ አማልክተ ፡ እስመ ፡ ቀናኢ ፡ እግዚኣብሔር ፡ ለእለ ፡ ይትዔወርዎ ፡ ወይገብሩ ፡ ከመዝ ፡ ወያቀውም ፡ ገጾ ፡ ላዕሌሆሙ ፡ እስከ ፡ ይሤርዎሙ ፡ እምድር ፡ ሕይወቶሙ ፡ ወያጠፍእ ፡ ዝክሮሙ ፡ እስከ ፡ ለዓለም ፤ ብፁዓን ፡ እለ ፡ ይሰምዑ ፡ ቃለ ፡ እግዚኣብሔር ፡ ወይገብሩ ፡ ወየዐቅቡ ፡ ወብፁዓን ፡ እለ ፡ ይትገሐሡ ፡ እምእለ ፡ ይገብሩ ፡ እኩየ ፡ ከመ ፡ ኢትርክቦሙ ፡ እምእንተ ፡ ትመጽእ ፡ መቅሠፍት ፡ ለኃጥኣን ፤ ወለእመሰ ፡ ኮንከ ፡ ዘተዐቅብ ፡ ቃለ ፡ እግዚኣብሔር ፡ ተገሐሥ ፡ እምፍኖተ ፡ ኃጥኣን ፡ ከመ ፡ ኢትዘበጥ ፡ በእንተ ፡ ተዘብጡ ፡ በበትር ፤ በከመ ፡ ይቤ ፡ ዳዊት ፡ አበ ፡ አቡሁ ፡ ለእግዚእነ ፡ ዳዊት ፡ እስመ ፡ ኢየኀድግ ፡ እግዚኣብሔር ፡ በትረ ፡ ኃጥኣን ፡ ዲበ ፡ መክፈልተ ፡ ጻድቃን ፡ ከመ ፡ ኢያንሥኡ ፡ እደዊሆሙ ፡ ጻድቃን ፡ በዐመፃ ፤ ለእመ ፡ ተክህሎ ፡ ለብእሲ ፡ ይግበር ፡ ሠናየ ፡ ለሊሁኒ ፡ ይዕቀብ ፡ ወለቢጹኒ ፡ ይንግር ፡ ከመ ፡ ይኩን ፡ ባዕለ ፡ ክልኤ ፡ መካልይ ፡ ወይትወሰኮ ፡ ክልኤ ፡ መካልይ ፡ ወይከውን ፡ ትርብዕተ ፡ ዐስቡ ፡ በኀበ ፡ እግዚኣብሔር ፡ እስመ ፡ ገብረ ፡ ለሊሁ ፡ ወመሀረ ፡ ለቢጹ ፡ ወበእንተዝ ፡ ይፈደፍድ ፡ ዐስቡ ፤ ወካዕበ ፡ ብፁዓን ፡ ትከውኑ ፡ ለእመ ፡ ወሀብክሙ ፡ ንዋይክሙ ፡ ዘእንበለ ፡ ርዴ ፡ ወልቃሕ ፠ ፠ ፠