89. How the Queen talked to the Children of Israel
88. How he himself related to his mother how they made him King / Kebra Nagast / 89. How the Queen talked to the Children of Israel 90. How Azariah praised the Queen and her city

፹፱ ፡ ኀበ ፡ ነገረቶሙ ፡ ንግሥት ፡ ለደቂቀ ፡ እስራኤል ።

 

ወአውሥአት ፡ ንግሥት ፡ ወትቤሎሙ ፡ አኮ ፡ ከመ ፡ አግብርት ፡ ዘትብሉ ፡ አላ ፡ ንሬስየክሙ ፡ ከመ ፡ አብ ፡ ወከመ ፡ መምሀር ፤ እስመ ፡ አንትሙ ፡ ዐቃብያነ ፡ ሕጉ ፡ ለእግዚኣብሔር ፡ ወመራሕያነ ፡ ትእዛዙ ፡ ለአምላከ ፡ እስራኤል ፡ ወሰብአ ፡ ቤቱ ፡ ለእግዚኣብሔር ፡ ወዐቃብያኒሃ ፡ ለጽዮን ፡ ታቦተ ፡ ሕጉ ፡ ለእግዚኣብሔር ፡ ወአልቦ ፡ ዘንትዐደው ፡ እምትእዛዝክሙ ፡ እስመ ፡ አንትሙ ፡ ትከውኑነ ፡ መርሐ ፡ በኀበ ፡ ፍኖተ ፡ እግዚኣብሔር ፡ እምኵሉ ፡ እኩይ ፤ ንትገሐሥ ፡ በቃልክሙ ፡ እምዘ ፡ ኢይሠምር ፡ እግዚኣብሔር ፡ ወንቅረብ ፡ ኀበ ፡ ኵሉ ፡ ሠናይ ፡ ዘሠምረ ፡ እግዚኣብሔር ፡ በትእዛዘ ፡ ዚአክሙ ፤ ወባሕቱ ፡ አይድዑ ፡ ለዝንቱ ፡ ኵሉ ፡ ሕዝብ ፡ ወመሀርዎሙ ፡ ቃላተ ፡ አእምሮ ፡ እስመ ፡ አልቦ ፡ አመ ፡ ሰምዑ ፡ ዘእንበለ ፡ ዮም ፡ ዘከመዝ ፤ ወባሕቱ ፡ ጥበብሰ ፡ ወአእምሮ ፡ ታበርህ ፡ ከመ ፡ ብርሃነ ፡ ፀሐይ ፡ ለእለ ፡ ቦሙ ፡ አእምሮ ። ወአንሰ ፡ እስከ ፡ ይእዜሂ ፡ ኢረወይክዎ ፡ ለማየ ፡ አእምሮ ፡ እስመ ፡ ይጥዕም ፡ እምነ ፡ መዓር ፡ ወያረዊ ፡ እምነ ፡ ወይን ፡ ወያጸግብ ፡ ወያጐሥዕ ፡ ጥበበ ፡ ወያስዖዝዝ ፡ ልቡና ፡ ወያልሕስ ፡ ከመ ፡ ዘሰክረ ፡ ወያለጸልጽ ፡ ከመ ፡ ዘጐየ ፡ ወያሀፉ ፡ ከመ ፡ ዘጾረ ፡ ክቡደ ፡ በፍኖተ ፡ ዐቀብ ፡ በብሔረ ፡ ሐሩር ፡ ወላህበ ፡ ፀሐይ ፤ ሶበ ፡ ተከሥተ ፡ አልባቢሆሙ ፡ ለጠቢባን ፡ ለትንቢት ፡ ወለምህሮ ፡ ኢይፈርህዎ ፡ ለንጉሥ ፡ በእንተ ፡ ዕበየ ፡ ክብሩ ፡ ለእመ ፡ ተግሕሠ ፡ እምፍኖተ ፡ እግዚኣብሔር ። ነዋኬዝ ፡ ዘተነግረ ፡ ቃለ ፡ ሕግ ፡ ዘበአማን ፡ አእምሮ ፡ ለእለ ፡ ይፈቅድዎ ፡ ወይሰትይዎ ፡ ወይረውይዎ ፤ አንሰ ፡ እጼሊ ፡ እግዚኦ ፡ አምላከ ፡ እስራኤል ፡ ቅዱሰ ፡ ቅዱሳን ፡ ሀበኒ ፡ ከመ ፡ እትልዋ ፡ ለጥበብ ፡ ወኢይትገደፍ ፡ ሀበኒ ፡ ከመ ፡ እጠቀም ፡ ባቲ ፡ ወኢይንኀል ፡ ሀበኒ ፡ ከመ ፡ እሣረር ፡ ባቲ ፡ ወኢያንቀልቅል ፡ ሀበኒ ፡ ከመ ፡ እትዐመድ ፡ ባቲ ፡ ወኢይጽነን ፡ ሀበኒ ፡ ከመ ፡ እሰወር ፡ ባቲ ፡ ወኢይትቀላዕ ፡ ሀበኒ ፡ ከመ ፡ እትሐነጽ ፡ ባቲ ፡ ወኢይንሐድ ፡ ሀበኒ ፡ ከመ ፡ እትወርዘው ፡ ባቲ ፡ ወኢይድክም ፡ ሀበኒ ፡ ከመ ፡ እቁም ፡ ባቲ ፡ ወኢይደቅ ፡ ሀበኒ ፡ ከመ ፡ እትመርጐዝ ፡ ባቲ ፡ ወኢይተንትን ፡ ሀበኒ ፡ ከመ ፡ እሠአን ፡ ባቲ ፡ ወኢይድኀፅ ፡ ሀበኒ ፡ ከመ ፡ እትአኀዝ ፡ ባቲ ፡ ወኢይሰጠም ፡ ሀበኒ ፡ ከመ ፡ እጽናዕ ፡ ባቲ ፡ ወኢይሠረም ፡ ሀበኒ ፡ ከመ ፡ እንበር ፡ ባቲ ፡ በስንኣሃ ፡ እጽገብ ፡ በማእዳ ፡ ወኢይሜጽራ ፡ እስትያ ፡ ወኢይረውያ ፡ እጽገባ ፡ ወኢይተፍኣ ፤ ሰከርኩ ፡ ባቲ ፡ ወኢተንተንኩ ፡ ተንተንኩ ፡ በእንቲአሃ ፡ ወኢወደቁ ፡ ወደቁ ፡ በእንቲአሃ ፡ ወኢተሀጐልኩ ፡ ባቲ ። ተሰጠምኩ ፡ በእንቲአሃ ፡ ውስተ ፡ ዐቢይ ፡ ባሕር ፡ ወአኀዝኩ ፡ ባሕርየ ፡ በውስተ ፡ ልጐተ ፡ መዓምቅቲሃ ፡ በዘባቲ ፡ እብዕል ፤ ወረድኩ ፡ ከመ ፡ ዐቢይ ፡ መልሕቀ ፡ ኀጺን ፡ በዘ ፡ ይበይታ ፡ አሕማር ፡ ውስተ ፡ ዕመቀ ፡ ባሕር ፡ ወነሣእኩ ፡ ማኅቶተ ፡ እንተ ፡ ታበርህ ፡ ሊተ ፡ ወዐረጉ ፡ በአሕባለ ፡ ራግናቲሃ ፡ ለልቡና ፤ ኖምኩ ፡ ውስተ ፡ መዓምቅቲሃ ፡ ለባሕር ፡ ወዘእንበለ ፡ እትዐዘዝ ፡ በማይ ፡ ሐለምኩ ፡ ባቲ ፡ እንዘ ፡ ኮከብ ፡ ውስተ ፡ ሕፅንየ ፡ ወአንከርኩ ፡ ባቲ ፡ በእኂዞታ ፡ ወአጽናዕክዋ ፡ ምስለ ፡ ጸዳለ ፡ ፀሐይ ፡ አኀዝክዋ ፡ ወኢየኀድጋ ፡ እስከ ፡ ለዓለም ፤ ቦእኩ ፡ ውስተ ፡ አናቅጸ ፡ መዛግብቲሃ ፡ ለጥበብ ፡ ወሔብኩ ፡ ሊተ ፡ ማየ ፡ አእምሮ ፤ ቦእኩ ፡ ውስተ ፡ ዋዕየ ፡ ነበልባለ ፡ ፀሐይ ፡ ወአብርሀተኒ ፡ በጸዳላ ፡ ወተወልተውኩ ፡ ባቲ ፡ ወድኅንኩ ፡ በተወክሎታ ፤ አኮ ፡ ሊተ ፡ ባሕቲትየ ፡ አላ ፡ ለኵሎሙ ፡ እለ ፡ ሖሩ ፡ በአሠራ ፡ ለጥበብ ፡ አኮ ፡ ሊተ ፡ ለባሕቲትየ ፡ አላ ፡ ለኵሎሙ ፡ ሰብአ ፡ ሀገርየ ፡ መንግሥተ ፡ ኢትዮጵያ ፡ ወአኮ ፡ ሎሙ ፡ ለባሕቲቶሙ ፡ አላ ፡ ለእለ ፡ የሐውሩ ፡ በፍኖቶሙ ፡ አሕዛብ ፡ እለ ፡ ዐውዶሙ ። እስመ ፡ እግዚኣብሔር ፡ ወሀበነ ፡ ዘርአ ፡ በጽዮን ፡ ወማኅደረ ፡ በኢየሩሳሌም ፡ ወዓዲ ፡ ኮነ ፡ ክፍለ ፡ ምስለ ፡ እለ ፡ ኀረየ ፡ ዘርአ ፡ ያዕቆብ ፡ እስመ ፡ ረሰያ ፡ ለማኅደሩ ፡ ትኅድር ፡ ምስሌነ ፤ እሙንቱሰ ፡ እምይእዜ ፡ ተዐቅጹ ፡ ወንሕነሰ ፡ እምይእዜ ፡ ረታዕነ ፡ እሙንቱሰ ፡ እምይእዜ ፡ ኀስሩ ፡ ወተመነኑ ፡ ወንሕነሰ ፡ እምይእዜ ፡ ከበርነ ፡ ወተፈቀርነ ፡ እስከ ፡ ለዓለመ ፡ ዓለም ፡ ወለትውልደ ፡ ትውልድ ፡ ዘይመጽእ ። ወአንትሙኒ ፡ መኳንንት ፡ ስምዑኒ ፡ ወጠይቅዋ ፡ ለመክሥተ ፡ አፉየ ፡ ወቃልየ ፤ አፍቅርዋ ፡ ለርትዕ ፡ ወጽልእዋ ፡ ለሐሰት ፡ ርትዕሰ ፡ ጽድቅ ፡ ወሐሰትሰ ፡ ርእሰ ፡ ዐመፃ ፡ ወኢትትዓመፁ ፡ በበይናቲክሙ ፤ እስመ ፡ እግዚኣብሔር ፡ የኀድር ፡ ምስሌክሙ ፡ ወማኅደረ ፡ ስብሐቲሁ ፡ ማእከሌክሙ ፡ እስመ ፡ ሰብአ ፡ ቤቱ ፡ ኮንክሙ ። ወኅድጉ ፡ እምይእዜ ፡ ዘትካት ፡ ልማድክሙ ፡ ተጠይሮ ፡ ወአጣዕዎ ፡ ሰገለ ፡ ወሥራየ ፡ ወቀስመ ፡ ወሐረሰ ፤ ወለእመቦ ፡ ዘተረክበ ፡ እምዮም ፡ በውስተ ፡ ዘትካት ፡ ልማድ ፡ ይትበርበር ፡ ቤቱ ፡ ወይትኰነን ፡ ብእሲቱ ፡ ወውሉዱ ፡ ወንዋዩ ፠ ወትቤሎ ፡ ለአዛርያስ ፡ በል ፡ ንግር ፡ ዘከመ ፡ ታፈቅር ፡ እግዝእትነ ፡ ምስለ ፡ ንጉሣ ፡ ሰማያዊ ፠ ፠ ፠