88. How he himself related to his mother how they made him King
87. How the nobles (or governors) of Ethiopia took the oath / Kebra Nagast / 88. How he himself related to his mother how they made him King 89. How the Queen talked to the Children of Israel

፹፰ ፡ ኀበ ፡ ዜነዌ ፡ ለእሙ ፡ ዘከመ ፡ አንገሥዎ ።

 

ወሶበ ፡ አርመሙ ፡ እሉ ፡ ተንሥአ ፡ ካህን ፡ ዘይኤዝዘነ ፡ ዘምስለ ፡ ፍርሀተ ፡ እግዚኣብሔር ፡ ወአንብዕ ፡ እንዘ ፡ ትርዕድ ፡ ከርሥነ ፡ ወትውኅዝ ፡ አንብዕነ ፤ ውስተ ፡ ልብነ ፡ በአማንኬ ፡ ወኢኮነ ፡ ሐሰተ ፡ ህልው ፡ እግዚኣብሔር ፡ ወይነብር ፡ ውስተ ፡ ትእዛዙ ፡ ወነጊረ ፡ ትእዛዙ ፡ ኢያአትት ፡ እምእለ ፡ ያፈቅርዎ ፡ ወየዐቅቡ ፡ ትእዛዞ ፡ ይሄሉ ፡ ወትረ ፡ ምስሌሆሙ ። ወይእዜኒአ ፡ ስምዕዮሙአ ፡ እሉ ፡ መላህቅት ፡ ወደቂቀ ፡ ኀያላነ ፡ እስራኤል ፡ ዘአምጽኡ ፡ ኵነኔ ፡ ወፍትሐ ፡ ዘጸሐፉ ፡ በቅድመ ፡ ንጉሥ ፡ ሰሎሞን ፡ ወወሀቡነ ፡ ከመ ፡ ኢንትገሐሥ ፡ ኢለየማን ፡ ወኢለፀጋም ፡ እምዘ ፡ አዘዙነ ፤ ወካዕበ ፡ ይቤሉነ ፡ ወአለበዉነ ፡ ከመ ፡ ነሣእነ ፡ ሞተ ፡ ወሕይወተ ፡ ወከመ ፡ ብእሲ ፡ ዘቦቱ ፡ ውስተ ፡ ፀጋሙ ፡ እሳት ፡ ወውስተ ፡ የማኑ ፡ ማይ ፡ ወኀበ ፡ ይፈቅድ ፡ ይወዲ ፡ እዴሁ ፤ እስመ ፡ መቅሠፍት ፡ ወሕይወት ፡ ጽሑፍ ፡ ውስቴቱ ፡ ለእለ ፡ ገብርዋ ፡ ለእኪት ፡ መቅሠፍት ፡ ወለእለ ፡ ገብርዋ ፡ ለሠናይት ፡ ሕይወት ፠ ወአውፅኡ ፡ ኤልምያስ ፡ ወአዛርያስ ፡ ይእቲ ፡ መጽሐፈ ፡ እንተ ፡ ተጽሕፈት ፡ በቅድመ ፡ እግዚኣብሔር ፡ ወበቅድመ ፡ ንጉሠ ፡ እስራኤል ፡ ወአንበብዋ ፡ በቅድመ ፡ መክዳ ፡ ወበቅድመ ፡ ዐበይተ ፡ እስራኤል ። ወሶበ ፡ ሰምዑ ፡ ዘንተ ፡ ቃላተ ፡ ሰገዱ ፡ ለእግዚኣብሔር ፡ ኵሎሙ ፡ እለ ፡ ውስተ ፡ ዐውድ ፡ ንኡሶሙ ፡ ወዐቢዮሙ ፡ ወገነዩ ፡ ወሰብሑ ፡ ለእግዚኣብሔር ፡ ለዘ ፡ አስምዖሙ ፡ ዘንተ ፡ ቃለ ፡ ወወሀቦሙ ፡ ዘንተ ፡ ትእዛዘ ፡ ከመ ፡ ይግበሩ ፡ ፍትሐ ፡ ወኵነኔሁ ፡ ለእግዚኣብሔር ፤ ወዓዲ ፡ ረሰዮሙ ፡ ሰብአ ፡ ቤቱ ፡ እስመ ፡ ሀለወት ፡ ጽዮን ፡ ማእከሌሆሙ ፡ ወማኅደረ ፡ ስብሐቲሁ ፡ ለእግዚኣብሔር ፡ እንተ ፡ ታድኅኖሙ ፡ እምኵሉ ፡ እኩይ ፡ ወትባርክ ፡ ፍሬ ፡ ምድሮሙ ፡ ወታበዝኅ ፡ እንስሳሆሙ ፡ ወትባርክ ፡ አንቅዕተ ፡ ማያቲሆሙ ፡ ወትባርክ ፡ ተግባሮሙ ፡ ወፍሬ ፡ አትክልቲሆሙ ፡ ወታልህቅ ፡ ውሉዶሙ ፡ ተዐቅብ ፡ ርሡኣኒሆሙ ፡ ወትከውኖሙ ፡ ፍጽመ ፡ ወኳላ ፡ ኀበ ፡ ኵሉ ፡ ዘኀደሩ ፡ ወይመውኡ ፡ ፀሮሙ ፡ በኵሉ ፡ ኀበ ፡ ሖሩ ። ወተፈሥሑ ፡ ኵሎሙ ፡ ሰብአ ፡ ኢትዮጵያ ፠ ወንግሥትኒ ፡ ትቤሎ ፡ ለወልዳ ፡ ወልድየ ፡ ወሀበከ ፡ እግዚኣብሔር ፡ ርትዐ ፡ ወሖር ፡ ባቲ ፡ ወኢትትገሐሥ ፡ ኢለየማን ፡ ወኢለፀጋም ፤ ወአፍቅር ፡ እግዚኣብሔር ፡ አምላክከ ፡ እስመ ፡ መሓሪ ፡ ውእቱ ፡ ለየዋሃን ፡ እስመ ፡ እምትእዛዙ ፡ ይትዐወቅ ፡ ፍኖቱ ፡ ወእምአምርሕተ ፡ ነገሩ ፡ ይትአመር ፡ ኂሩቱ ። ወተመይጠት ፡ ኀቤሆሙ ፡ ለኤልምያስ ፡ ወአዛርያ ፡ ወለኵሎሙ ፡ ኀያላነ ፡ እስራኤል ፤ አንትሙ ፡ ዕቀብዎ ፡ ወመሀርዎ ፡ ፍኖተ ፡ ለመንግሥተ ፡ እግዚኣብሔር ፡ ወአክብሮታ ፡ ለጽዮን ፡ እግዝእትነ ፡ ወለኵሉ ፡ ዘኢታፈቅር ፡ እግዝእትነ ፡ ኢንግበር ፡ ንግሩነ ፡ በአስተጠናቅቆ ፡ ለዓለም ፡ ለትውልደ ፡ ትውልድ ፡ ከመ ፡ ኢትትመዐዐነ ፡ ለእመ ፡ ኢያሠነይነ ፡ ግብራ ፡ ወእግዚኣብሔርኒ ፡ ከመ ፡ ይኅድር ፡ ምስሌነ ፤ ወአንተኒ ፡ ኦወልድየ ፡ ስማዕ ፡ ቃለ ፡ አበዊከ ፡ ወሖር ፡ በምክሮሙ ፡ ኢያእብድከ ፡ ስታይ ፡ ወኢአንስት ፡ ወኢአስተምክሖ ፡ አልባስ ፡ ወአልጕሞ ፡ አፍራስ ፡ ኢነጽሮ ፡ ንዋየ ፡ ሐቅል ፡ ዘቅድም ፡ ወዘድኅር ፡ አላ ፡ ይኩን ፡ ትውክልትከ ፡ በእግዚኣብሔር ፡ ወበጽዮን ፡ ታቦተ ፡ ሕጉ ፡ ለእግዚኣብሔር ፡ ፈጣሪከ ፡ ከመ ፡ ትማዕ ፡ ፀርከ ፡ ወይብዛኅ ፡ ዘርአከ ፡ በዲበ ፡ ምድር ፡ ወይግረሩ ፡ ጸላእትከ ፡ ወፀርከ ፡ ዘቅሩብ ፡ ወዘርሑቅ ፠ ወእሙንቱኒ ፡ ደቂቀ ፡ ኀይል ፡ አውሥኡ ፡ በአሐዱ ፡ ቃል ፡ ወይቤሉ ፡ ንሕነሰ ፡ እግዝእትነ ፡ ምስሌክሙ ፡ ኵሎ ፡ ጊዜ ፡ ወንዜከሮ ፡ ለእግዚእ ፡ ንጉሥ ፡ ናሁ ፡ ዘጽሑፍ ፡ ወገቢርሰ ፡ እንዘ ፡ አምላከ ፡ እስራኤል ፡ ይከውኖ ፡ ረዳኤ ፡ ወነገረ ፡ እሙ ፡ ይሰምዕ ፡ ወንንግሮ ፡ ፍኖታ ፡ ለምግባረ ፡ ሠናይ ፤ እስመ ፡ አልቦ ፡ ዘይትረከብ ፡ በዝ ፡ መዋዕል ፡ በጥበብ ፡ ዘእንበለ ፡ እግዚእነ ፡ ንጉሥ ፡ ዘከማኪ ፡ ሰሐብክነ ፡ ዝየ ፡ ከመ ፡ አግብርትኪ ፡ ምስለ ፡ እግዝእትነ ፡ ጽዮን ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ አምላክነ ፡ በከመ ፡ ይስሕብዎ ፡ ለገመል ፡ ዘጽዑን ፡ ንዋየ ፡ ክብር ፡ በንስቲት ፡ ቀጢን ፡ ፈትለ ፡ ኢዊጥ ፡ እንተ ፡ ኢትትበተክ ፡ ዲበ ፡ አንፉ ፡ ዝማማት ፤ ወይእዜኒ ፡ ኢትትሀየዩነ ፡ ወኢትረስዩነ ፡ ከመ ፡ ነግድ ፡ ባዕድ ፡ አላ ፡ ረስዩነ ፡ ከመ ፡ አግብርቲክሙ ፡ እለ ፡ የኀፅቡ ፡ እገሪክሙ ፡ እስመ ፡ ንሕነሰ ፡ እመኒ ፡ ሞትነ ፡ ወእመኒ ፡ ሐየውነ ፡ ምስሌክሙ ፡ ወአልብነ ፡ ተስፋ ፡ ውስተ ፡ ብሔረ ፡ ሙላድነ ፡ ዘእንበለ ፡ ኀቤክሙ ፡ ወእግዝእትነ ፡ ጽዮን ፡ ቅድስት ፡ ሰማያዊት ፡ ማኅደረ ፡ ስብሐቲሁ ፡ ለእግዚኣብሔር ፠ ፠ ፠