87. How the nobles (or governors) of Ethiopia took the oath
86. How Queen Makeda made her son King / Kebra Nagast / 87. How the nobles (or governors) of Ethiopia took the oath 88. How he himself related to his mother how they made him King

፹፯ ፡ ኀበ ፡ መሐሉ ፡ መኳንንተ ፡ ኢትዮጵያ ።

 

ወትቤሎሙ ፡ ለመኳንንቲሃ ፡ በሉኬ ፡ መሐሉ ፡ በጽዮን ፡ ሰማያዊት ፡ ከመ ፡ ኢታንግሡ ፡ አንስተ ፡ ውስተ ፡ መንበረ ፡ መንግሥተ ፡ ኢትዮጵያ ፡ ዘእንበለ ፡ ዘርኡ ፡ ለዳዊት ፡ ወልደ ፡ ሰሎሞን ፡ ንጉሥ ፡ ተባዕተ ፡ እስከ ፡ ለዓለም ፤ ወኢታንግሡ ፡ አንስተ ፡ እስከ ፡ ለዓለመ ፡ ዓለም ። ወመሐሉ ፡ ኵሎሙ ፡ ዐበይተ ፡ ቤተ ፡ ንጉሥ ፡ ወመኳንንት ፡ ወመማክርት ፡ ወገብት ፤ ወአምሐልዎሙ ፡ ኤልምያስ ፡ ወአዛርያስ ፡ ሊቀ ፡ ካህናት ፡ ወሊቀ ፡ ዲያቆናት ፡ ወሐደሱ ፡ መንግሥት ፡ ወገብሩ ፡ ሕገ ፡ ደቂቀ ፡ ኀይለ ፡ እስራኤል ፡ ምስለ ፡ ንጉሦሙ ፡ ዳዊት ፡ በውስተ ፡ ደብተራ ፡ ስምዕ ፡ ወተሐደሰት ፡ መንግሥት ። ወበርሀ ፡ አልባበ ፡ ሰብእ ፡ በርእየ ፡ ጽዮን ፡ ታቦተ ፡ ሕጉ ፡ ለእግዚኣብሔር ፡ ወገደፉ ፡ ጣዖቶሙ ፡ ሕዝበ ፡ ኢተዮጵያ ፡ ወአምለኩ ፡ ፈጣሪሆሙ ፡ ለዘ ፡ ገብሮሙ ፡ እግዚኣብሔር ፤ ኀደጉ ፡ ምግባራቲሆሙ ፡ ሰብአ ፡ ኢትዮጵያ ፡ ወአፍቀሩ ፡ ጽድቀ ፡ ወርትዐ ፡ ዘያፈቅር ፡ እግዚኣብሔር ፡ ኀደጉ ፡ ዝሙቶሙ ፡ ዘትካት ፡ ወአፍቀሩ ፡ ንጽሐ ፡ በውስተ ፡ ትዕይንት ፡ ዘርእዮተ ፡ ጽዮን ፡ ሰማያዊት ፤ ኀደጉ ፡ ማሪተ ፡ ወሰገለ ፡ ወአፍቀሩ ፡ ንስሓ ፡ ወአንብዐ ፡ ለአግዚኣብሔር ፤ ኀደጉ ፡ ተጠይሮ ፡ ወአጣዕዎ ፡ ወገብኡ ፡ ለሰሚዕ ፡ ወለሠዊዕ ፡ ለአግዚኣብሔር ፤ ኀደጉ ፡ ተውኔተ ፡ አማልክት ፡ ዘአጋንንት ፡ ወአፍቀሩ ፡ ተቀንዮ ፡ ወሰብሖ ፡ ለእግዚኣብሔር ። ኀስራ ፡ አዋልደ ፡ ኢየሩሳሌም ፡ ወከብራ ፡ አዋልደ ፡ ኢትዮጵያ ፤ ተከዘት ፡ ወለተ ፡ ይሁዳ ፡ ወተፈሥሐት ፡ ወለተ ፡ ኢትዮጵያ ፤ ተፈሥሐ ፡ አድባረ ፡ ኢትዮጵያ ፡ ወተከዛ ፡ አድባረ ፡ ሊባኖስ ። በጣዖት ፡ ወግልፈዋት ፡ ተኀርዩ ፡ ሕዝበ ፡ ኢትዮጵያ ፡ ወተመነኑ ፡ ሕዝበ ፡ አስራኤል ፤ ተመነና ፡ አዋልደ ፡ ጽዮን ፡ ወከብራ ፡ አዋልደ ፡ ኢትዮጵያ ፤ ኀስሩ ፡ አእሩገ ፡ እስራኤል ፡ ወከብሩ ፡ አእሩገ ፡ ኢትዮጵያ ። እስመ ፡ እግዚኣብሔር ፡ ተወክፎሙ ፡ ለግዱፋን ፡ ሕዝብ ፡ ወመነኖሙ ፡ ለእስራኤል ፡ በእንተ ፡ ዘተንሥአት ፡ ጽዮን ፡ እምኔሆሙ ፡ ወመጽአት ፡ ውስተ ፡ ብሔረ ፡ ኢትዮጵያ ፤ እስመ ፡ ኀበ ፡ ሠምረ ፡ እግዚኣብሔር ፡ ተኀድር ፡ ጽዮን ፡ ማኅደራ ፡ ወኀበሰ ፡ ኢሠምረ ፡ ኢተኀድር ፤ እስመ ፡ ለሊሁ ፡ ኬንያሃ ፡ ገባሪሃ ፡ ወሐናጺሃ ፡ እግዚኣብሔር ፡ ኄር ፡ በውስተ ፡ ጽርሐ ፡ መቅደሱ ፡ ለማኅደረ ፡ ስብሐቲሁ ፡ ምስለ ፡ ወልዱ ፡ ወመንፈሱ ፡ ቅዱስ ፡ እስከ ፡ ለዓለመ ፡ ዓለም ፡ አሜን ፠ ወወሀበት ፡ ንግሥተ ፡ ኢትዮጵያ ፡ መከዳ ፡ መንግሥተ ፡ ለወልዳ ፡ ዳዊት ፡ ወልደ ፡ ሰሎሞን ፡ ንጉሠ ፡ እስራኤል ፤ ወትቤሎ ፡ ንሣእ ፡ ወሀብኩከ ፡ ወአንገሥኩ ፡ ዘእግዚኣብሔር ፡ አንገሠ ፡ ወኀረይኩ ፡ ዘእግዚኣብሔር ፡ ኀረየ ፡ ቀዋሚሃ ፡ ለደብተራሁ ፡ ወሠመርኩ ፡ ዘእግዚኣብሔር ፡ ሠምረ ፡ ላእከ ፡ ታቦተ ፡ ኪዳኑ ፡ ወሕጉ ፡ ወአዕበይኩ ፡ ዘእግዚኣብሔር ፡ አዕበየ ፡ መጋቤ ፡ ለአቤራቲሁ ፡ ወአክበርኩ ፡ ዘእግዚኣብሔር ፡ አክበረ ፡ ወሃቤ ፡ ሲሳይ ፡ ለእጓለ ፡ ማውታ ፠ ወተንሥአ ፡ ንጉሥ ፡ ወቀነተ ፡ ዘይትዐጸፍ ፡ ወሰገደ ፡ ለእሙ ፡ ወይቤላ ፡ ንግሥትሰ ፡ አንቲ ፡ እግዝእትየ ፡ ወአነ ፡ እትለአክ ፡ በኀበ ፡ ኵሉ ፡ ዘአዘዝክኒ ፡ እመሂ ፡ ለሞት ፡ ወእመሂ ፡ ለሕይወት ፡ ኀበ ፡ ፈነውክኒ ፡ እትፌነው ፡ ወኀበ ፡ ለአክኒ ፡ እትለአክ ፡ ወኵሎ ፡ ዘአዘዝክኒ ፡ እገብር ፤ እስመ ፡ አንቲ ፡ ርእስ ፡ ወአነ ፡ እግር ፡ ወአንቲ ፡ እግዝእት ፡ ወአነ ፡ ገብር ፡ ለኪ ፡ ወኵሉ ፡ ይትገበር ፡ በቃልኪ ፡ ወአልቦ ፡ ዘይትዐደው ፡ እምትእዛዝኪ ፡ ወእገብር ፡ ኵሎ ፡ ዘፈቀድኪ ። ወባሕቱ ፡ ጸልዪ ፡ ላዕሌየ ፡ ከመ ፡ ያድኅነኒ ፡ እመዐቱ ፡ አምላከ ፡ እስራኤል ፤ እስመ ፡ ይትመዐዕ ፡ ይቤሉነ ፡ ለእመ ፡ ኢያርታዕነ ፡ ልበነ ፡ ለገቢረ ፡ ፈቃዱ ፡ ወኢያሠነይነ ፡ በኵሉ ፡ ትእዛዙ ፡ ለጽዮን ፡ ማኅደረ ፡ ስብሐቲሁ ፡ ለእግዚኣብሔር ፤ እስመ ፡ መልአከ ፡ ኀይሉ ፡ ምስሌነ ፡ ዘመገበነ ፡ ወአብጽሐነ ፡ ዝየ ፡ ወኢይትፈለጥ ፡ ወኢይትአተት ፡ እምኔነ ። ወይእዜኒ ፡ ስምዒ ፡ ኦእግዝእትየ ፡ ለእመ ፡ አሠነይነ ፡ ወገበርነ ፡ ፈቃዶ ፡ አነ ፡ ወእለ ፡ እምድኅሬየ ፡ ይነብር ፡ እግዚኣብሔር ፡ ምስሌነ ፡ ወየዐቅበነ ፡ እምነ ፡ ኵሉ ፡ እኩይ ፡ ወእምእደ ፡ ፀርነ ፡ ወእመሰ ፡ ኢያርታዕነ ፡ ልበነ ፡ ኀቤሁ ፡ ይትመዐዐነ ፡ ወይመይጥ ፡ ገጾ ፡ እምኔነ ፡ ወይቀሥፈነ ፡ ወይትሐበለዩነ ፡ ጸላእትነ ፡ ወይመጽአነ ፡ ፍርሀት ፡ ወረዓድ ፡ እምኀበ ፡ ኢተሐዘብነ ፡ ወይትነሥኡ ፡ ላዕሌነ ፡ ወይጸብዑነ ፡ አጽባአ ፡ ወያጠፍኡነ ። ወለእመሰ ፡ ገበርነ ፡ ፈቃደ ፡ እግዚኣብሔር ፡ ወአሠነይነ ፡ ግብራ ፡ ለጽዮን ፡ ንከውን ፡ ኄራን ፡ ወአልቦ ፡ ዘይክል ፡ አሕሥሞ ፡ ላዕሌነ ፡ በደብረ ፡ መቅደሱ ፡ እንዘ ፡ ሀለወት ፡ ማኅደሩ ፡ ምስሌነ ። ወነዋ ፡ ዘአምጻእነ ፡ ጽሑፍ ፡ ምስሌነ ፡ ኵሉ ፡ ሕገ ፡ መንግሥት ፡ ወትእዛዘ ፡ እግዚኣብሔር ፡ ዘነገረነ ፡ ሰዶቅ ፡ ሊቀ ፡ ካህናት ፡ አመ ፡ ይቀብአኒ ፡ ቅብአ ፡ መንግሥት ፡ በውስተ ፡ ቤተ ፡ መቅደሱ ፡ ለእግዚኣብሔር ፡ እንዘ ፡ ውስተ ፡ እዴሁ ፡ ቀርነ ፡ ቅብአ ፡ ዕፍረት ፡ ዘክህነት ፡ ወዘመንግሥት ፤ ወገብሩ ፡ ለነ ፡ ዘበሕጉ ፡ ወተቀባእነ ፡ አዛርያስ ፡ ለክህነት ፡ ወአነ ፡ ለመንግሥት ፡ ወአልምያስ ፡ አፈ ፡ እግዚኣብሔር ፡ ዐቃቤ ፡ ሕግ ፡ ዘውእቱ ፡ ዐቃቢሃ ፡ ለጽዮን ፡ ወእዘኒሁ ፡ ለንጉሥ ፡ በኵሉ ፡ ፍኖተ ፡ ጽድቅ ። ወአዘዙኒ ፡ ከመ ፡ አልቦ ፡ ዘእገብር ፡ ዘእንበለ ፡ በምክሮሙ ፡ ወአቀሙነ ፡ ቅድመ ፡ ንጉሥ ፡ ወቅድመ ፡ ሊቃውንተ ፡ እስራኤል ፡ ወኵሉ ፡ ሕዝብ ፡ ይሰምዕ ፡ እንዘ ፡ ይኤዝዘነ ፡ ሰዶቅ ፡ ካህን ። ወተነፍኀ ፡ ኢዮብልዮስ ፡ ወኣርጋኖን ፡ ወቃለ ፡ ዕንዚራቲሆሙ ፡ ወብዕዛቲሆሙ ፡ ወድምፀ ፡ ጽራኃቲሆሙ ፡ ዘተገብረ ፡ አሜሃ ፡ በአናቅጺሃ ፡ ለኢየሩሳሌም ። ምንተ ፡ እነግረክሙ ፡ ለእለ ፡ ሀለውክሙ ፡ ዝየ ፤ እስመ ፡ መሰለነ ፡ ምድር ፡ ዘታድለቀልቅ ፡ እስከ ፡ መሠረታቲሃ ፡ ወሰማይኒ ፡ ዘያንጐደጕድ ፡ በመልዕልቴነ ፤ ወልብኒ ፡ ትርዕድ ፡ ምስለ ፡ ብረኪሃ ፠ ፠ ፠