76. Concerning lying witnesses
75. Concerning the King of Babylon / Kebra Nagast / 76. Concerning lying witnesses 77. Concerning the King of Persia

፸፮ ፡ በእንተ ፡ ሰማዕተ ፡ ሐሰት ።

 

ወሀሎ ፡ ፩ ፡ ፀዋግ ፡ እምዘርአ ፡ ብንያም ፡ ዘስሙ ፡ ብንያስ ፡ ዘይስሕብ ፡ በቅለ ፡ ንጉሠ ፡ እስራኤል ፡ ወይሴስዮ ፡ ከርሚን ፡ ምስለ ፡ በቅለ ፡ ንጉሥ ፡ ምናሴ ። ወእምጎሩ ፡ ለከርሚን ፡ ሀለዉ ፡ እለ ፡ ይቀንኡ ፡ ላዕሌሁ ፡ በእንተ ፡ ሣዕር ፡ ወዐዘቅት ፡ ወበእንተ ፡ ብዝኀ ፡ እንስሳ ፡ ወአግብርት ፤ እስመ ፡ ይእቲ ፡ ምድር ፡ ርስተ ፡ አበዊሆሙ ፡ ይእቲ ፡ ወበእንተ ፡ ዝንቱ ፡ ይፈቅዱ ፡ ያርሕቅዎ ፡ እምሀገሮሙ ። ወይዋሕይዎ ፡ በእኪት ፡ ለብንያስ ፡ ሰሓቤ ፡ በቅለ ፡ ንጉሥ ፡ ወሐመይዎ ፡ ወይቤልዎ ፡ ይፀርፍ ፡ ዝንቱ ፡ ከርሚን ፡ ፀረፈ ፡ ላዕለ ፡ ንጉሠ ፡ እስራኤል ፡ መሲሑ ፡ ለእግዚኣብሔር ፡ እንዘ ፡ ይብል ፡ ዝንቱ ፡ ንጉሥ ፡ ኢኮነ ፡ ወልደ ፡ አግዓዚት ፡ አላ ፡ ወልደ ፡ አመት ፡ አረጋዊት ፡ እንተ ፡ ተሣየጥዋ ፡ በክልኤ ፡ መስፈርተ ፡ ቆሮስ ፡ ለግብረ ፡ ማኅረጽ ፡ ወግንፋል ፤ ወአንተ ፡ ተዋቀሦ ፡ በኀበ ፡ ንጉሥ ፡ ወዝልፎ ፡ እስመ ፡ ንከውነከ ፡ ስምዐ ፡ በቅድመ ፡ ንጉሥ ፡ ወኢናኀፍረከ ። ወአቀሙ ፡ ኪዳነ ፡ ወመሐሉ ፡ ሎቱ ፡ ከመ ፡ ይኩኑ ፡ ስምዐ ፡ ላዕሌሁ ፡ ለከርሚን ፡ በሐሰት ፡ ዘኢተናገረ ፡ በልሳኑ ፡ ወውስተ ፡ ኅሊናሁኒ ፡ ጥቀ ፡ ኢዐርገ ፡ ውእቱ ፡ ነገር ፠ ወሖረ ፡ ብንያስ ፡ ኀበ ፡ እግዚኡ ፡ ንጉሥ ፡ ወነገሮ ፡ ዘንተ ፡ ኵሎ ። ወይቤሎ ፡ ቦኑ ፡ ዘሰምዐ ፡ ምስሌከ ። ወአውሥአ ፡ ወይቤ ፡ እወ ፡ ሀለዉ ፡ እለ ፡ ሰምዑ ፡ ፪ ፡ ዐበይተ ፡ እስራኤል ፡ ዘእምአርማተም ። ወይቤ ፡ ንጉሥ ፡ ሖርኬ ፡ አምጽኦሙ ፡ በኅቡእ ፡ ከመ ፡ ንጠይቆሙ ፡ ለእመ ፡ የኀብሩ ፡ ምስለ ፡ ቃልከ ፡ ወንምትሮ ፡ ርእሶ ። ወሖረ ፡ ወአምጽኦሙ ፡ ለዘርዮስ ፡ ወካርሜሎስ ፡ ነገደ ፡ ምነሴ ፡ እስመ ፡ ምስሌሆሙ ፡ ተካየደ ፡ ከመ ፡ ኢያኅፍርዎ ፡ በቅድመ ፡ ንጉሥ ፡ በእንተ ፡ ስምዐ ፡ ሐሰቶሙ ። ወበባሕቲቶሙ ፡ መከሩ ፡ በፍኖት ፡ እንዘ ፡ ይብሉ ፡ ሶበ ፡ ነገርናሁ ፡ ለንጉሥ ፡ ለእመ ፡ ተጠየቀነ ፡ በበ ፡ ባሕቲትነ ፡ ከመ ፡ ያእምር ፡ ጽድቀ ፡ ቃልነ ፡ ወይብለነ ፡ በአይቴ ፡ ሰማዕክሙ ፡ ዘንተ ፡ ቃለ ፡ ንበሎ ፡ በባሕቲትነ ፡ እንዘ ፡ ንሰቲ ፡ ወይነ ፡ ምስሌሁ ፤ ወሶበ ፡ ይቤለነ ፡ ምንት ፡ ዕለቱ ፡ ንበሎ ፡ አመ ፡ ሠረቀ ፡ ወርኅ ፡ እንተ ፡ ኀለፈት ፡ ኀሙስ ፤ ወሶበ ፡ ይቤለነ ፡ አየ ፡ ጊዜ ፡ ንበሎ ፡ በ፱ ፡ ሰዐት ፡ እንዘ ፡ ይነብር ፡ ማእከሌነ ፡ ወንሰቲ ፡ ወይነ ፡ ኅቡረ ፤ ወሶበ ፡ ተስእለነ ፡ እንዘ ፡ ይብል ፡ በምንት ፡ ሰተይክምዎ ፡ ወአይቴ ፡ ነበርክሙ ፡ ንበሎ ፡ በቀናዲል ፡ ዘወርቅ ፡ ወምንባሪነሂ ፡ ውስተ ፡ ጽርሕ ፡ ኅቡረ ፡ ውስተ ፡ ምፅንጋዕ ። ወበዛቲ ፡ እኪት ፡ ምክር ፡ ኀብሩ ፡ በውስተ ፡ ፍኖት ። ወሶበ ፡ በጽሑ ፡ ኀበ ፡ ንጉሥ ፡ አብጽሖሙ ፡ ብንያስ ፡ ወሐተቶሙ ፡ ንጉሥ ፡ ወነገርዎ ፡ ኵሎ ፡ ምክረ ፡ ሐሰቶሙ ፡ ወተስእሎሙ ፡ በከመ ፡ መከሩ ፡ በፍኖት ፡ ጊዜሁ ፡ ወዕለቶ ፡ ወሰዐቶ ፡ ወመስቴሆሙ ፡ ወመናብርቲሆሙ ፡ ወነገርዎ ። በከመ ፡ አዘዘ ፡ እግዚኣብሔር ፡ ይጠይቁ ፡ ፍትሐ ፡ ነገሥት ፡ ወመኳንንት ፡ ወኵሎሙ ፡ እለ ፡ ይነብሩ ፡ በልዑል ፡ መንበር ፡ በከመ ፡ አዘዞ ፡ እግዚኣብሔር ፡ ለሙሴ ። ወዘንተ ፡ ሶበ ፡ ተጠየቀ ፡ ንጉሥ ፡ ጸውዖ ፡ ለሊቀ ፡ ሐራሁ ፡ ዘይቀውም ፡ ቅድሜሁ ፡ ወይቤሎ ፡ ሖር ፡ ነግሀ ፡ በጽባሕ ፡ ወዕግታ ፡ ለቤተ ፡ ካርሚን ፡ ወኢያምሥጥከ ፡ ፩ ፡ እምእሊአሁ ፡ ኢተባዕት ፡ ወኢአንስት ፤ ቅትል ፡ በአፈ ፡ ኀጺን ፤ ወለሊሁኒ ፡ ምትር ፡ ርእሶ ፡ ወአምጽእ ፡ ኵሎ ፡ ንዋዮ ፡ ወበርበሮ ፡ ወእንስሳሁ ፡ ወወርቆ ፡ ወብሩሮ ። ወተፈሥሑ ፡ ወገብኡ ፡ እሙንቱ ፡ ሐሳውያን ፡ ውስተ ፡ ሀገሮሙ ፡ ወሖሩ ፡ ውስተ ፡ ቤተ ፡ ካርሚን ፡ ወተናገርዎ ፡ በነገረ ፡ ሰላም ፡ ወይዌድስዎ ፡ ወይስሕቁ ፡ በቅድሜሁ ፡ እንዘ ፡ ውስተ ፡ ልቦሙ ፡ እኪት ፤ አሜሃኬ ፡ ተፈጸመ ፡ ላዕሌሆሙ ፡ ትንቢተ ፡ ዳዊት ፡ ዘይቤ ፡ እለ ፡ ይትናገሩ ፡ ሰላመ ፡ ምስለ ፡ ቢጾሙ ፡ ወእኩይ ፡ ውስተ ፡ ልቦሙ ፡ ሀቦሙ ፡ በከመ ፡ እከየ ፡ ምግባሮሙ ፡ ወበከመ ፡ እከየ ፡ ኅሊናሆሙ ። ወእሙንቱሰ ፡ ሰክሩ ፡ በውስተ ፡ ቤተ ፡ ከርሚን ፡ ወኖሙ ፡ ኅቡረ ፡ ምስሌሁ ። ወሶበ ፡ ኖሙ ፡ ናሁ ፡ ተፈነወ ፡ መልአከ ፡ እግዚኣብሔር ፡ ኀበ ፡ ካርሚን ፡ ወአንቅሆ ፡ ወይቤሎ ፡ ኅድግ ፡ ኵሎ ፡ ንዋየከ ፡ ወአድኅን ፡ ርእሰከ ፡ እስመ ፡ ተአዘዘ ፡ እምኀበ ፡ ምናሴ ፡ ንጉሥ ፡ ከመ ፡ ይምትሩ ፡ ርእሰከ ፤ ወንሣእ ፡ እምንዋይከ ፡ መጠነ ፡ ትክል ፡ ዘፈቀድከ ፡ ወጕይ ፡ ውስተ ፡ ብሐረ ፡ ባዕድ ፡ እስመ ፡ ቀታሌ ፡ ነቢያት ፡ ወኀሣሤ ፡ ደመ ፡ ንጹሓን ፡ ውእቱ ፡ ምናሴ ። ወእምዝ ፡ ተንሥአ ፡ ሶቤሃ ፡ ወኀሠሠ ፡ ወርቀ ፡ አስከሬን ፡ ወነሥኣ ፡ ወአንቅሃ ፡ ለብእሲቱ ፡ ምስለ ፡ ክልኤ ፡ ደቂቁ ፡ ወካዕበ ፡ አንቅሀ ፡ አግብርቲሁ ፡ እለ ፡ ኀረየ ፡ ወአጾሮሙ ፡ ንዋየ ፡ ክብር ፤ ወወፅአ ፡ በሌሊት ፡ ወፈነዎሙ ፡ ለብእሲቱ ፡ ወለደቂቁ ፡ ምስለ ፡ ክልኤ ፡ አግብርቲሁ ፡ ይባኡ ፡ ኢየሩሳሌም ፤ ወውእቱሰ ፡ ሖረ ፡ ምስለ ፡ ክልኤ ፡ አግብርቲሁ ፡ ርሑቀ ፡ ብሔረ ፡ መጠነ ፡ ምሕዋረ ፡ ፫ ፡ አውራኅ ፡ ወበጽሐ ፡ ብሔረ ፡ ባቢሎን ፡ ወቦአ ፡ ኀበ ፡ በላዖን ፡ ንጉሠ ፡ ባቢሎን ፡ ወአብአ ፡ አምኃ ፡ ሎቱ ፡ ወነገሮ ፡ ዘከመ ፡ መጽአ ፡ ኀቤሁ ፤ ወአፍቀሮ ፡ ለባኦን ፡ ለካርሚን ፡ ወወሀቦ ፡ ማኅደረ ፡ በአግዋረ ፡ ቤተ ፡ ነጋዲሁ ፤ ወነጋዲሁሰ ፡ ሖረ ፡ ርሑቀ ፡ ብሔረ ፡ መጠነ ፡ ፫ ፡ ዓመት ። ወለእሉሰ ፡ እለ ፡ ሐሰዉ ፡ ስምዐ ፡ ቀተልዎሙ ፡ በውስተ ፡ ምስካብ ፡ በቤት ፠ ወአፍቀረቶ ፡ ለከርሚን ፡ ብእሲተ ፡ ነጋዲ ፡ ወተስሕተት ፡ ቦቱ ፡ ወፀንሰት ፤ እስመ ፡ እኩይ ፡ ምግባሪሆን ፡ ለአንስት ። እስመ ፡ ኀደጋ ፡ ብእሲሃ ፡ እንዘ ፡ ፅንስት ፡ ይእቲ ፡ ወወለደት ፡ ወወሀበት ፡ ለሐፃኒት ፡ ወአልሀቀት ፤ ወበካልእ ፡ ዓመት ፡ ተስሕተት ፡ ወፀንሰት ፡ እምኀበ ፡ ከርሚን ፡ እስመ ፡ ሠናይ ፡ ላሕዩ ፡ ለከርሚን ፡ ፈድፋደ ፡ በውስተ ፡ እስራኤል ። ወይእቲሰ ፡ ፈቀደት ፡ ለዘፀንሰቶ ፡ ወሊዳ ፡ ትግድፎ ፡ ውስተ ፡ ባሕር ፡ ወትጽንሖ ፡ ለነጋዲ ፡ ብእሲሃ ፡ ከመ ፡ ዘኢተስሕተት ፡ ወኢገብረት ፡ ምንተኒ ፤ በከመ ፡ ይቤ ፡ ሰሎሞን ፡ ጠቢብ ፡ ፫ ፡ የዐጽበኒ ፡ በኅሊናየ ፡ ወራብዖሙሰ ፡ ስእንኩ ፡ ጠይቆቶ ፡ አሠረ ፡ ንስር ፡ በውስተ ፡ ሰማይ ፡ ወፍኖተ ፡ አርዌ ፡ ምድር ፡ በዲበ ፡ ኰኵሕ ፡ ወፍኖተ ፡ ሐመር ፡ በዲበ ፡ ባሕር ፤ ወራብዖሙሰ ፡ ስእንኩ ፡ ጠይቆ ፡ ዘይቤ ፡ በእንተ ፡ ብእሲት ፡ እኪት ፡ እንተ ፡ ትዔምፅ ፡ ምታ ፡ ወተኀፂባ ፡ ትነብር ፡ ከመ ፡ ዘኢገብረት ፡ ወትምሕል ፡ እንዘ ፡ ትሔሱ ፠ ወአሜሃ ፡ ብእሲተ ፡ በላዖን ፡ ንጉሠ ፡ ባቢሎን ፡ ፀንሰት ፡ ወወለደት ፡ አምሳለ ፡ ንስር ፡ ዘአልቦ ፡ ክንፈ ፡ ኵለንታሁ ፡ ዖፍ ፡ ፍጹም ፤ ወጸውዐታ ፡ ለአመታ ፡ እንተ ፡ ኀርየት ፡ ወፈነወቶ ፡ ውስተ ፡ ምቅላደ ፡ መሶብ ፡ ወአዘዘታ ፡ ዘእንበለ ፡ ያእምር ፡ ፩ ፡ ትገሮ ፡ ውስተ ፡ ባሕር ። ወይእቲኒ ፡ ብእሲተ ፡ ነጋዲ ፡ በጽሐ ፡ ወሊዶታ ፡ ወወለደት ፡ ሕፃነ ፡ ተባዕተ ፡ መምሕረ ፡ ዘሠናይ ፡ ላሕዩ ፤ ወዘእንበለ ፡ ታጥብዎ ፡ ጸውዐታ ፡ ለአመታ ፡ እንተ ፡ ኀረየት ፡ ወፈነወቶ ፡ ውስተ ፡ ቀማጥረ ፡ ሳጥን ፡ ወአዘዘታ ፡ ዘእንበለ ፡ ያእምር ፡ ፩ ፡ ትውግሮ ፡ ውስተ ፡ ባሕር ፤ እስመ ፡ ፈርሀት ፡ ብእሴሃ ። ወበአሐቲ ፡ ሌሊት ፡ ወለዳ ፡ ምስለ ፡ ብእሲተ ፡ ንጉሥ ፡ ወበአፈ ፡ ጽባሕ ፡ ፈነዋ ፡ አእማቲሆን ፡ ከመ ፡ ይውግራሆሙ ፡ ውስተ ፡ ባሕር ፡ ለደቂቆን ። ወበፈቃደ ፡ እግዚኣብሔር ፡ ተራከባ ፡ እላ ፡ አእማት ፡ ዘእንበለ ፡ ይውግራሆሙ ፡ ውስተ ፡ ባሕር ፡ ወተናገራ ፡ በበይናቲሆን ፡ ወሐተተታ ፡ አመተ ፡ ንጉሥ ፡ ለአመተ ፡ ነጋዲ ፡ ወትቤላ ፡ ምንት ፡ ዘውስተ ፡ ሣጹንኪ ፤ ወአርአየታ ፡ ሕፃነ ፡ ሠናየ ፤ ወትቤላ ፡ ለምንት ፡ አምጻእኪዮ ፡ ዝየ ፤ ወትቤላ ፡ እስመ ፡ ብእሲተ ፡ እግዚእየ ፡ ስሕተት ፡ በኀበ ፡ ፩ ፡ እስራኤላዊ ፡ ወፀንሰት ፡ ወወለደት ፡ ወልደ ፡ ወአዘዘተኒ ፡ ከመ ፡ እውግሮ ፡ ውስተ ፡ ባሕር ፤ ወትቤላ ፡ አመተ ፡ ንጉሥ ፡ ለምንት ፡ ኢያልሀቀት ፡ ዘመጠነዝ ፡ ሠናይ ፡ ሕፃነ ፤ ወትቤላ ፡ እንዘ ፡ ፅንስት ፡ ይእቲ ፡ ኀደጋ ፡ ብእሲሃ ፡ ወወለደት ፡ ወአልሀቀት ፡ ወዝንቱ ፡ በአይቴ ፡ ተሐፅን ፡ ዘባዕድ ፡ ነኪር ፡ ዘርእ ። ወይእቲኒ ፡ ሐተተታ ፡ ወትቤላ ፡ ምንት ፡ ውእቱ ፡ ዘውስተ ፡ መሶብ ፤ ወትቤላ ፡ ዘንተ ፡ እግዝእትየ ፡ ወለደት ፡ ዘአልቦ ፡ አርአያ ፡ ሰብእ ፡ ላዕሌሁ ፡ አላ ፡ ይመስል ፡ ንስረ ፡ ዘአልቦ ፡ ክንፈ ፡ ወአዘዘተኒ ፡ ከመ ፡ እውግሮ ፡ ውስተ ፡ ባሕር ፤ ወይእዜኒ ፡ ሀብንዮ ፡ ለዝንቱ ፡ ወልድኪ ፡ ከመ ፡ እሰዶ ፡ ኀበ ፡ እግዝእትየ ፡ ወአንቲኒ ፡ ንሥኢ ፡ ውግርዮ ፡ ለዝንቱ ፡ ዖፍ ፡ ውስተ ፡ ባሕር ፤ ወገብራ ፡ ከማሁ ። ወወስደት ፡ አመተ ፡ ንጉሥ ፡ ውእተ ፡ ሕፃነ ፡ ኀበ ፡ እግዝእታ ፡ ወተፈሥሐት ፡ ንግሥት ፤ ወአርድእዎ ፡ ለንጉሥ ፡ ከመ ፡ ወለደት ፡ ይእቲ ፡ ንግሥት ፡ ወልደ ፤ ወወሀብዎ ፡ ለሐፃንያን ፡ ወልህቀ ፡ በቤተ ፡ ንጉሥ ፤ ወሰመየቶ ፡ ስሞ ፡ ናቡክድናጸር ፡ በገደ ፡ ዖፍ ፡ ብሂል ፠ ወበእንተዝ ፡ ተዐውቀ ፡ ከመ ፡ ዘርአ ፡ ሴም ፡ ውእቱ ፡ ንጉሠ ፡ በቢሎን ። ወመጽአ ፡ ወነሠታ ፡ ለኢየሩሳሌም ፡ በፈቃደ ፡ እግዚኣብሔር ፡ ወፄወዎሙ ፡ ለደቂቀ ፡ እስራኤል ፡ ወአግዐዞሙ ፡ ውስተ ፡ ሀገረ ፡ ባቢሎን ፡ ምስለ ፡ ደቂቀ ፡ ደቂቁ ፡ ለምናሴ ። ወኮነ ፡ ባዕለ ፡ ጥቀ ፡ እስከ ፡ ያቀውም ፡ ሐውልተ ፡ ወርቅ ፡ በሐቅለ ፡ ባቢሎን ፡ ዘ፷ ፡ እመት ፡ ኑኁ ፡ ወ፮ ፡ እመት ፡ ግድመ ። ወኮነ ፡ ዕቡየ ፡ ልብ ፡ ወይቤ ፡ ኣሠርቅ ፡ ፀሐየ ፡ በላዕለ ፡ ሰማይ ፤ ወሰገደ ፡ ለጣዖት ። ወሠረዎ ፡ እግዚኣብሔር ፡ ከመ ፡ ያእምር ፡ ኪይሁ ፡ ወመክፈልቶሂ ፡ ምስለ ፡ አራዊተ ፡ ገዳም ፡ ረሰየ ፤ ወሶበ ፡ አእመረ ፡ ስመ ፡ እግዚኣብሔር ፡ እምድኅረ ፡ ዓመት ፡ ፯ ፡ ምሕሮ ፡ ወአግብኦ ፡ ውስተ ፡ ንስሓ ፤ ወኮነት ፡ መንግሥተ ፡ ባቢሎን ፡ ሎቱ ፡ ዘለዘርኡ ፡ እስከ ፡ ለዓለም ፠ ፠ ፠