75. Concerning the King of Babylon
74. Concerning the King of Medyam / Kebra Nagast / 75. Concerning the King of Babylon 76. Concerning lying witnesses

፸፭ ፡ በእንተ ፡ ንጉሠ ፡ ባቢሎን ።

 

ወንጉሠ ፡ ባቢሎንሂ ፡ ዘርአ ፡ ሴም ፡ ውእቱ ፤ ወንነግረክሙ ፡ ጥዩቀ ፡ ከመ ፡ ዘርአ ፡ ሴም ፡ ንጉሠ ፡ ባቢሎን ። ወሀሎ ፡ በውእቱ ፡ መዋዕል ፡ በመንግሥተ ፡ ምናሴ ፡ ንጉሠ ፡ እስራኤል ፡ ወሀሎ ፡ ፩ ፡ ብእሲ ፡ ዘስሙ ፡ ከርሚን ፡ ፈራሄ ፡ እግዚኣብሔር ፡ ወይገብር ፡ ብዙኀ ፡ ምጽዋተ ፡ ለነዳያነ ፡ እስራኤል ፤ ወሶበሂ ፡ ይሠውዕ ፡ ለቤተ ፡ እግዚኣብሔር ፡ ይገብር ፡ በንጹሕ ፡ ወዓሥራተሂ ፡ ይሁብ ፡ አመክዒቦ ፡ ወበኵሉ ፡ ፍኖቱ ፡ ሠናይ ፡ ወአልቦ ፡ ወኢምንተኒ ፡ እኩየ ፡ በቅድሜሁ ፤ ወሰይጣንሰ ፡ ጸላኤ ፡ ሠናያት ፡ ይቀንእ ፡ ላዕሌሁ ፡ በዘ ፡ ርእየ ፡ ሠናየ ፡ ፍኖቶ ። ወውእቱሰ ፡ ብእሲ ፡ ባዕል ፡ ጥቀ ፡ አግማለ ፡ ወአፍራሰ ፡ ወመራዕየ ፡ እንስሳ ፡ ወአልህምተ ፡ ወርቀ ፡ ወብሩረ ፡ ወአልባሰ ፡ ክቡረ ፤ ወይሴሲ ፡ በቅለ ፡ ንጉሥ ፡ በአርማቴም ፡ ሀገረ ፡ እስራኤል ። እስመ ፡ ደወሉሰ ፡ ብሔረ ፡ ይሁዳ ፡ ክፍለ ፡ አበዊሁ ፤ ወበእንተ ፡ ፍቅረ ፡ ንዋይ ፡ ሖረ ፡ ውስተ ፡ አርማቴም ፡ ከመ ፡ ይንበር ፡ ወአንበርዎ ፡ እስራኤል ፡ በእንተ ፡ ብዕሉ ፡ እስመ ፡ ቦ ፡ ብዙኀ ፡ ንዋየ ፡ ወይፈርህ ፡ መኳንንተ ፠ ፠ ፠